Iˇsaˬyaˇ 26 - Akha

Miˬyehˇ-euˬ tsawˇ jeuˬ gʼaˬ leˇ tehꞈ-a

¹ Yuˇdaˆ miˇ kʼahˬ laꞈ kʼoeˇ caˇ dawˬ heu bymˇ ya caˇ-eu aˇ nah keuˆ le tehꞈ-a. Aˬ dui-euˬ meuˬ ziꞈ dui dui meh. Meuˬ meuˬ lahˇ-ahˇ Miˬyehˇ haw piˇ luꞈ meh.

² Meuˬ lahˇ kʼehˬ laˇ gʼoˆ pah-awˇ, yaw tsaˬ yaw dawˇ jeˬ mˇ-eu, saˇ jaˇ ziꞈ-eu tsawˇ jeuˬ bi uˇ laˇ-awˬ.

³ Nui ma ziꞈ dah ni gʼeh-awˇ, nawˬ-ahˇ jah-eu tsawˇ haˬ deuˬ-ahˇ, byah dui dui-eu nui saˇ oꞈ-eu jeˬ, Sahˬpaˬ Miˬyehˇ nawˇ biꞈ nehˬ-awˬ.

⁴ Mˬ maˬ maˬ byaˆ zaˇ ziˇ Sahˬpaˬ Miˬyehˇ-ahˇ jah-awˬ. Aˬ dui-ahˇ aˬ yawꞈ aˬ myah luꞈ haw piˇ tehꞈ-a.

⁵ Nui ma huiˬ-eu mahˇ-eu deuˬ-ahˇ aˬ yawꞈ dehˬ awˆ-eu meh. Ziꞈ dah ni gʼeh-eu aˬ yawꞈ maꞈ-euˬ meuˬ-ahˇ, aˬ yawꞈ laˆ cawˆ nehˬ-awˇ, meuˬ meuˬ lahˇ bi byaˆ-iˇ-awˇ, kʼaˬ lehˇ loꞈ-ehˇ laˆ pyeuꞈ tehꞈ-a.

⁶ Yaw beh bi kʼehˬ bi kʼaˆ-euˬ tsawˇ haˬ deuˬ, meuˬ kʼoeˇ meuˬ-ahˇ nawˬ nawˬ-ehˇ cah tehꞈ-a.

⁷ Sahˬpaˬ Miˬyehˇ nawˇ tsawˇ muiˬ deuˬ gʼaˇ duˬ, gaˇ ma saˇ lehˆ ni shaˇ dahˇ-awˇ, juiˇ tsui ni laˆ saˆ nehˬ-eu meh.

⁸ Nawˬ-euˬ nui kʼahˇ nga maꞈ poˆ-awˇ, nawˬ-ahˇ nga maꞈ noeˬ tmˬ-eu ma. Nga maꞈ nui kʼahˇ shiˇ duˬ nawˇ meh.

⁹ Uˬ ciꞈ miˇ lah-ehˇ nawˬ-ahˇ ngaˇ noeˬ-eu ma. Miˇ tsaˬ-ahˇ nawˇ yaˇ kʼaˬ daˇ ngeh, miˇ tsaˬ zaˬ deuˬ yaw tsaˬ yaw dawˇ jeˬ-ahˇ siˬ nya tehꞈ-a.

¹⁰ Maˬ tsaˬ maˬ dawˇ-eu deuˬ-ahˇ nawˇ gʼawˬ shaˬ gaˬ kʼawꞈ, yaw tsaˬ yaw dawˇ jeˬ-ahˇ aˬ yawꞈ maꞈ maˬ poˆ-a. Yaw tsaˬ yaw dawˇ miˇ kʼahˬ heu laꞈ kʼoeˇ kʼawꞈ, miˇ kʼahˬ zaˬ deuˬ yaw lehˬ mˇ-awˇ, nawˬ-euˬ yaw shehꞈ kʼahˬ sehˇ-ahˇ, aˬ yawꞈ maꞈ maˬ mawˇ nya-a.

¹¹ Nawˇ kʼehˬ-eu kʼaˆ-eu lehˇ gʼeh-eu gaˇ kawˆ-ahˇ, nawˬ-ahˇ muiˇ-eu kʼoeˇ deuˬ maˬ siˬ nya-a. Sahˬpaˬ Miˬyehˇ-oˇ, aˬ yawꞈ maꞈ-ahˇ bi shaꞈ dawˇ-awˇ, shaˬ zahˬ bi mˇ-awˬ. Nawˬ neh lehˬ hmˬ taˬ-euˬ kʼehˬ-eu kʼaˆ-eu jeˬ, aˬ yawꞈ maꞈ kʼoeˇ taˆ bi keuˆ le-awˇ, nawˬ-euˬ tsawˇ jeuˬ-ahˇ nawˇ aˇ naˆ ni gaˬ-eu gaˇ kawˆ, aˬ yawꞈ maꞈ bi siˬ bi mawˇ-awˬ.

¹² Nga maꞈ kʼoeˇ taˆ baw le za le-eu jeˬ, Sahˬpaˬ Miˬyehˇ nawˇ biꞈ nehˬ laꞈ tehꞈ-a. Nga maꞈ neh kʼaˇ mˇ kʼaˇ shaˇ za-euˬ jeˬ, nawˬ neh biꞈ-euˬ guiˬ lahˬ tehꞈ meh.

¹³ Nga maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, aˬ cawˬ nga maꞈ kʼoeˇ taˆ dzoeˬ dzaˬ luꞈ kʼawꞈ, nawˬ-ahˇ tehꞈ-ehˇ nga maꞈ taˬ huiˬ-eu ma.

¹⁴ Nymˬ-mˇ aˬ yawꞈ maꞈ shiˇ dzeuˇ-awˇ, maˬ paˇ gʼoꞈ dehꞈ doˆ laˇ nya-ehˇ, nawˬ neh kʼehˬ-awˇ laˆ cawˆ nehˬ-euˬ miˇ neh, aˬ yawꞈ maꞈ-euˬ yaw sahˇ maˬ paˇ tuˇ laˇ nya-ehˇ, mˬ maˬ maˬ byaˆ zaˇ ziˇ byoˆ tsehˆ tehꞈ-a.

¹⁵ Nga maꞈ miˇ kʼahˬ bi huiˬ bi mahˇ laˇ-awˇ, miˇ kaˬ oeˬ pyawˬ luꞈ bi jeˇ laˇ-euˬ miˇ neh, nawˬ-euˬ yaw shehꞈ kʼahˬ sehˇ huiˬ dui dui meh.

¹⁶ Sahˬpaˬ Miˬyehˇ nawˇ nawˬ-euˬ tsawˇ haˬ-ahˇ, kʼehˬ nehˬ kʼaˆ nehˬ-euˬ baˬ da neh, aˬ yawꞈ maꞈ noeˬ shaˬ dui dui-eu laꞈ kʼoeˇ, nawˬ-ahˇ guiˬ lahˬ shaˇ luꞈ-eu meh.

¹⁷ Zaˬ baw aˬ ma uˬ maˆ naˇ-awˇ guˇ-eu loꞈ-ehˇ, nga maꞈ guˇ ni Sahˬpaˬ Miˬyehˇ nawˇ jahˇ nehˬ laꞈ-euˬ meh.

¹⁸ Nga maꞈ uˬ maˆ naˇ-awˇ shaˬ dui dui kʼawꞈ, tiˬ jeˬ-iˬ maˬ dehꞈ doˆ le-a. Nga maꞈ miˇ kʼahˬ gʼaˇ duˬ guiˇ maˬ deuˆ gʼaˬ haw-ehˇ, nga maꞈ neh mˇ doˆ-euˬ tiˬ jeˬ-iˬ maˬ jaˆ.

¹⁹ Shiˇ dzeuˇ-euˬ nga maꞈ tsawˇ haˬ deuˬ, paˇ gʼoꞈ doˆ laˇ tehꞈ-a. Aˬ yawꞈ maꞈ-euˬ gʼawˇ mawˇ paˇ gʼoꞈ dehꞈ laˇ tehꞈ-a. Lmˬ bymˇ-ahˇ yuꞈ-eu deuˬ gʼoꞈ dehꞈ doˆ laˇ jiˇ-awˇ, laˬ kʼaˬ cehˇ-eu caˇ dawˬ paˇ caˇ tehꞈ-a. Ceuˬ ga ngeh jawˇ miˇ tsaˬ dehꞈ zoˇ laˇ-eu loꞈ-ehˇ, aˇ hu neh shiˇ dzeuˇ-euˬ tsawˇ haˬ deuˬ-ahˇ, Sahˬpaˬ Miˬyehˇ bi dehꞈ zoˇ laˇ tehꞈ-a.

Miˬyehˇ yaˇ kʼaˬ daˇ-eu

²⁰ Ngaˬ-euˬ tsawˇ haˬ deuˬ-oˇ, kuˆ lawˆ-ahˇ uˇ leˇ-awˇ laˇ gʼoˆ kaꞈ tehˬ-awˬ. Miˬyehˇ nui ma pehˇ-eu jeˬ iˇ dzeuˇ ngeh keuˆ ni, dzuˇ zaꞈ-awˇ jawˇ tawˬ-awˬ.

²¹ Haw yawˬ, Sahˬpaˬ Miˬyehˇ aˬ yawꞈ-euˬ jawˇ duˬ-ahˇ luˆ laˇ-awˇ, iˬ baˇ mˇ-eu miˇ tsaˬ zaˬ-ahˇ kʼehˬ-eu lehˇ oe luꞈ meh. Miˇ tsaˬ kʼoeˇ taˆ sehꞈ kʼoeˬ shiˇ kʼoeˬ kʼoeˬ-awˇ, laˆ zaꞈ laˆ byoˆ taˬ-euˬ dawˬ tawˆ, bya cehˆ ni doˆ laˇ jiˇ tehꞈ-a.