Iˇsaˬyaˇ 25 - Akha

Ja ceuˬ-eu caˇ dawˬ

¹ Sahˬpaˬ Miˬyehˇ-oˇ, nawˇ ngaˬ-euˬ Miˬyehˇ ma. Nawˬ-ahˇ ngaˇ taˬ huiˬ taˬ mahˇ-awˇ, nawˬ-euˬ tsawˇ myahˇ-ahˇ ja ceuˬ ma. Zahˬ leˇ paˬ-ehˇ gʼeh-eu gaˇ deuˬ nawˇ mˇ-euˬ meh. Aˇ hu ba neh nawˬ neh kʼaˇ noeˬ taˬ-euˬ jeˬ, saˇ jaˇ ziꞈ-eu laꞈ kʼoeˇ nawˇ mˇ byah luꞈ-eu meh.

² Meuˬ deuˬ-ahˇ nawˇ laˆ luˬ laˆ seˇ-awˇ, ziꞈ dah ni gʼeh-eu meuˬ deuˬ bi byaˆ-iˇ-euˬ meh. Nga maꞈ-ahˇ muiˇ-eu sahˬ paˬ deuˬ-euˬ nymˇ deuˬ, piˬ-iˇ byoˆ-iˇ jiˇ-euˬ meh.

³ Baoˬ huiˬ-eu tsawˇ jeuˬ deuˬ nawˬ-ahˇ ja ceuˬ-awˇ, haiˬ-eu tsawˇ jeuˬ-euˬ meuˬ deuˬ laꞈ kʼoeˇ, nawˬ-ahˇ yaw zeu baw tehꞈ-a.

⁴ Mehꞈ-eu shuꞈ-eu deuˬ hawˇ-eu shaˬ-eu zahˬ-eu deuˬ, nawˇ jawˇ gaˇ cehˆ laˇ-awˇ, guˆ-eu gaˆ-eu jeˬ-ahˇ buˬ-iˇ-euˬ meh. Jaˬ lehˇ lehˇ ma baw ngeh aˬ yawꞈ maꞈ-ahˇ nawˇ haw lahˇ-awˇ, nahˇ tsaˇ kʼaˆ ngeh naˇ shmˇ bi awˆ-euˬ meh. Haiˬ-eu tsawˇ haˬ deuˬ neh mˇ-euˬ yaw doeˇ jeˬ-aˬ, kaˇ pyawˇ-ahˇ ciˬ tahˬ ciˬ tuˆ-eu jaˬ lehˇ lehˇ ma -ahˇ duˇ-awˇ,

⁵ miˇ tsaˬ gui ngeh mˬ gʼoˇ gʼoˇ caw gaˇ duˇ leˇ-eu meh. Ehˇ kʼawꞈ, nga maꞈ-ahˇ muiˇ-eu tsawˇ haˬ deuˬ-ahˇ, Sahˬpaˬ Miˬyehˇ nawˇ zuiˆ gʼaˬ-awˇ, nahˇ tsaˇ tsoꞈ gaˇ mˬ dmˇ joe shmˇ le-eu loꞈ-ehˇ, haiˬ-eu tsawˇ haˬ deuˬ-euˬ teˇ saˇ nawˇ laˆ naˬ nehˬ-euˬ meh.

Miˬyehˇ hawˬ byawˇ lawˇ-eu

⁶ Ziˇoˬ gawˬ jawˬ heu jawˬ kʼoeˇ taˆ, miˇ tsaˬ tsawˇ jeuˬ dawˬ tawˆ luꞈ gʼaˇ duˬ, Baoˬ huiˬ-eu Sahˬpaˬ Miˬyehˇ hawˬ byawˇ laˆ dawˆ tehꞈ-a. Muiˬ dui dui-eu dzaˬ dzaˬ dawˇ dawˇ deuˬ hawˇ-eu, kuiˇ dui dui-eu aˬ gaꞈ dzaˇ uiˇ aˬ yawꞈ lehˬ hmˬ tehꞈ-a.

⁷ Gawˬ jawˬ heu jawˬ kʼoeˇ taˆ, tsawˇ jeuˬ dawˬ tawˆ luꞈ-ahˇ ciˬ tehˬ taˬ-euˬ bi noeˬ shaˬ bi noeˬ zahˬ-eu mˬ dmˇ-ahˇ, ja pyuˬ ni aˬ yawꞈ yuˇ dzeh nehˬ tehꞈ-a.

⁸ Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-aˬ, shiˇ-eu jeˬ-ahˇ mˬ maˬ maˬ byaˆ zaˇ ziˇ laˆ cawˆ nehˬ tehꞈ-a. Tsawˇ haˬ yawˬ gʼaˬ na luꞈ-euˬ myaˆ biˇ aˬ yawꞈ shiˆ shawˇ nehˬ-awˇ, miˇ tsaˬ kʼoeˇ taˆ kʼaˇ jawˇ-eu aˬ yawꞈ-euˬ tsawˇ haˬ deuˬ ya daˬ luꞈ-eu yaw doeˇ dawˬ tawˆ luꞈ-ahˇ, aˬ yawꞈ laˆ byoˆ nehˬ tehꞈ-a lehˇ, Sahˬpaˬ Miˬyehˇ ehˇ taˬ-eu jaˆ-eu meh.

⁹ Kʼoeˇ loꞈ-ehˇ pyeuꞈ laˇ ngeh, tsawˇ haˬ yawˬ gʼaˬ na luꞈ heu loꞈ-ehˇ ehˇ tehꞈ-a. “Aˬ yawꞈ-aˬ, aˬ dui-euˬ Miˬyehˇ ma. Aˬ yawꞈ-ahˇ aˬ dui gʼoe-euˬ loꞈ-ehˇ, aˬ dui-ahˇ aˬ yawꞈ ka kʼoꞈ nehˬ laꞈ-euˬ meh. Aˬ yawꞈ-aˬ, aˬ dui-euˬ Sahˬpaˬ Miˬyehˇ meh. Aˬ yawꞈ-ahˇ aˬ dui gʼoe-euˬ loꞈ-ehˇ, nymˬ-mˇ aˬ dui laˬ kʼaˬ cehˇ nui saˇ za-eu ma. Aˬ jeˬ miˇ neh ehˇ naˇ, aˬ dui-ahˇ aˬ yawꞈ neh ka kʼoꞈ nehˬ laꞈ-euˬ meh.”

Mawˇbaˆ miˇ kʼahˬ-ahˇ Miˬyehˇ kʼehˬ tehꞈ-a

¹⁰ Ziˇoˬ gawˬ jawˬ-ahˇ Sahˬpaˬ Miˬyehˇ haw piˇ tehꞈ-a. Ehˇ kʼawꞈ, gʼo yoeˬ-ahˇ mawˇ neˇ keˬ duˬ kʼawꞈ laꞈ kʼoeˇ nawˬ pahˬ nehˬ-eu loꞈ-ehˇ, Mawˇbaˆ tsawˇ haˬ deuˬ-ahˇ aˬ yawꞈ nawˬ pahˬ tehꞈ-a.

¹¹ Aˬ yawꞈ maꞈ iˇ cuꞈ iˇ diˬ diˬ doˆ laꞈ-eu lehˇ, aˬ laꞈ cawˬ doˆ tehꞈ-a. Ehˇ kʼawꞈ, Miˬyehˇ aˬ yawꞈ maꞈ kʼoeˇ taˆ shaꞈ dawˇ-eu jeˬ bi keuˆ le-awˇ, aˬ yawꞈ maꞈ-euˬ aˬ laꞈ ga byoˆ-iˇ tehꞈ-a.

¹² Mawˇbaˆ tsawˇ jeuˬ-euˬ goˇ dui dui-eu meuˬ meuˬ lahˇ-ahˇ aˬ yawꞈ bi coˬ-iˇ-awˇ, laˆ meuˇ laˆ loeˇ nehˬ tehꞈ-a.