Iˇsaˬyaˇ 20 - Akha

Iˇjiˇtuˆ miˇ kʼahˬ hawˇ-eu Suˬdaˬ miˇ kʼahˬ ya shaˬ ya zahˬ tehꞈ-a

¹ Aˬshuˇliˆ sahˬ paˬ Saˬgoˬ neh, Aˬshuˇliˆ guiˇ maꞈ dawꞈ tawˆ luꞈ kʼoeˇ taˆ uˆ lahˇ-eu gʼaˬ-ahˇ dawˬ biꞈ-awˇ, Piˇliˇtiˆ miˇ kʼahˬ Aˬshaˬdoˇ meuˬ-ahˇ guiˇ bi deuˆ-iˇ-euˬ meh.

² Kʼoeˇ-euˬ mehˬ hu smˇ kʼoꞈ huˬ-ehˇ, “Nawˇ nawˬ luꞈ-eu sehˬ nawˆ hawˇ-eu, nawˇ dm luꞈ-eu guˬ daˇ pehˇ zeuˇ mehˬ tsoeˬ lehˆ dzeh-awˬ” lehˇ, Aˬmoˆ-euˬ aˬ li Iˇsaˬyaˇ-ahˇ Sahˬpaˬ Miˬyehˇ ehˇ nehˬ-euˬ meh. Kʼoeˇ ngeh, Iˇsaˬyaˇ mehˬ tsoeˬ maˬ dm, sehˬ nawˆ maˬ nawˬ ni, smˇ kʼoꞈ cah-euˬ meh.

³ Aˬshuˇliˆ tsawˇ haˬ deuˬ neh Aˬshaˬdoˇ meuˬ-ahˇ deuˆ gʼaˬ ngeh, Sahˬpaˬ Miˬyehˇ heu loꞈ-ehˇ ehˇ-eu meh. “Ngaˬ-euˬ zaˬ kʼaˆ Iˇsaˬyaˇ mehˬ tsoeˬ maˬ dm, sehˬ nawˆ maˬ nawˬ ni, doe doe-ehˇ cah luꞈ-eu smˇ kʼoꞈ byah laˇ-euˬ meh. Heu-aˬ, Iˇjiˇtuˆ miˇ kʼahˬ hawˇ-eu Suˬdaˬ miˇ kʼahˬ kʼoeˇ taˆ keuˆ le-eu lehˇ gʼeh-eu jeˬ gaˇ kawˆ bi siˬ bi mawˇ-eu jeˬ meh.

⁴ Miˇ kʼahˬ kʼoeˇ nyiˬ kʼahˬ laꞈ kʼoeˇ Aˬshuˇliˆ sahˬ paˬ neh kʼaˇ bi nyehꞈ-euˬ tsawˇ haˬ deuˬ, neˇ myawˆ ni bi sheuˬ byoˆ gʼeh tehꞈ-a. Zaˬ guˬ tsawˇ kʼaˆ maˬ ehˇ, mehˬ tsoeˬ maˬ dm sehˬ nawˆ maˬ nawˬ ni, dawˬ kʼmˬ mawˇ laˇ mawˇ laˇ-ehˇ ya cah-eu miˇ neh, Iˇjiˇtuˆ miˇ kʼahˬ kʼoeˇ taˆ shaꞈ dawˇ dui dui-eu jeˬ keuˆ le tehꞈ-a.

⁵ Suˬdaˬ miˇ kʼahˬ-ahˇ noeˬ tmˬ-awˇ, Iˇjiˇtuˆ miˇ kʼahˬ-ahˇ nui kʼaˬ tsmˬ-euˬ tsawˇ haˬ deuˬ, daˬ ga-awˇ ya shaꞈ dawˇ tehꞈ-a.

⁶ Aˇ nah aˇ yamˬ kʼoeˇ keuˆ le ngeh, Piˇliˇtiˆ miˇ kʼahˬ iˬ ma laˆ shaˆ lawˇ deh caw caw-ehˇ jawˇ-eu tsawˇ haˬ deuˬ heu loꞈ-ehˇ ehˇ tehꞈ-a. ‘Haw sheˇ. Aˬshuˇliˆ sahˬ paˬ-euˬ aˬ laꞈ laꞈ kʼoeˇ aˬ dui-ahˇ ka kʼoꞈ nya tehꞈ-a lehˇ, aˬ dui neh noeˬ tmˬ-euˬ tsawˇ haˬ kʼoeˇ deuˬ aˬ jeˬ pyeuꞈ jiˇ-euˬ nga. Aˬ dui aˬ joˆ-ehˇ dzeuˇ-iˇ nya nmˇ.’ ”