Iˇsaˬyaˇ 19 - Akha

Iˇjiˇtuˆ miˇ kʼahˬ-ahˇ Miˬyehˇ kʼehˬ nehˬ tehꞈ-a

¹ Heu-aˬ, Iˇjiˇtuˆ miˇ kʼahˬ-ahˇ taꞈ leˇ-eu Miˬyehˇ-euˬ dawˬ meh. Haw yawˬ. Mˬ dmˇ yaw kawˇ-ahˇ Sahˬpaˬ Miˬyehˇ dziˬ-awˇ, Iˇjiˇtuˆ miˇ kʼahˬ-ahˇ oe luꞈ meh. Iˇjiˇtuˆ tsawˇ jeuˬ-euˬ tahˬ pahˬ aˬ ma mawˇ kawˇ deuˬ, aˬ yawꞈ mehˬ shi yaw dzuˬ dzuˬ-awˇ, Iˇjiˇtuˆ tsawˇ haˬ deuˬ-euˬ nui ma guiˇ-iˇ luꞈ meh.

² Sahˬpaˬ Miˬyehˇ ehˇ-eu, “Iˇjiˇtuˆ tsawˇ haˬ cawˬ cawˬ guiˇ deuˆ ni ngaˇ kawˆ pyaˆ ma. Mehˇ nmˇ yaw kaˬ tiˬ gʼaˬ tiˇ gʼaˬ dawꞈ-awˇ, nymˇ kaˬ taꞈ-eu deuˬ tiˬ gʼaˬ tiˇ gʼaˬ muiˇ tehꞈ-a. Tiˬ meuˬ tiˇ meuˬ yaw kaˬ guiˇ deuˆ-awˇ, tiˬ kʼahˬ tiˇ kʼahˬ ceh dui dui tehꞈ-a.

³ Iˇjiˇtuˆ tsawˇ haˬ neh kʼaˇ noeˬ taˬ-euˬ jeˬ cawˆ jiˇ-awˇ, aˬ yawꞈ maꞈ nui ma ga ka jiˇ tehꞈ-a. Nyiˇ paˬ shaˆ ma deuˬ-ahˇ aˬ yawꞈ maꞈ gʼoe-awˇ, shiˇ dzeuˇ-euˬ deuˬ-ahˇ mehˬ bawˬ mˇ tehꞈ-a.

⁴ Gʼawˬ shaˬ gaˬ-eu maˬ siˬ nya-eu gʼaˬ-euˬ aˬ laꞈ laꞈ kʼoeˇ, Iˇjiˇtuˆ tsawˇ haˬ deuˬ-ahˇ ngaˇ a nehˬ-awˇ, guˆ dui dui laˇ paˬ-ehˇ gʼeh-eu sahˬ paˬ, aˬ yawꞈ maꞈ-ahˇ bi uˆ lahˇ ma lehˇ, Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”

⁵ Niˬlaˇ lawˇ baˬ baˬ ma iˇ cuꞈ nyiˇ le-awˇ, aw lawˆ lawˆ-ehˇ gui-iˇ tehꞈ-a.

⁶ Lawˇ baˬ-ahˇ iˇ cuꞈ yuˇ-euˬ uiˇ kʼehˬ deuˬ, iˇ cuꞈ gui-iˇ-awˇ yaw buꞈ behꞈ laꞈ tehꞈ-a. Aˇ toꞈ hawˇ-eu mehˇ cehˇ yaˇ nyoeˬ-iˇ-awˇ,

⁷ Niˬlaˇ lawˇ deh-ahˇ kʼaˇ ka taˬ-euˬ, yawˬ jeˬ na luꞈ koˆ-iˇ jiˇ-awˇ, jaˬ lehˇ bi baw byoˆ jiˇ tehꞈ-a.

⁸ Niˬlaˇ lawˇ baˬ-ahˇ ngaˬ shaˬ nyehꞈ-awˇ dehꞈ-eu deuˬ, ngaˬ myahˬ kʼmˇ-eu deuˬ hawˇ-eu ngaˬ juiꞈ juiꞈ-eu deuˬ maˬ ehˇ, yawˬ gʼaˬ na luꞈ ya ngoeˇ gaˇ keuˆ tehꞈ-a.

⁹ Saˬ paˇ paˇ kʼaˆ zaꞈ-eu deuˬ nui ma cawˆ-awˇ, shawˇ jehˆ ni gʼeh-eu saˬ paˇ zaꞈ-eu deuˬ, noeˬ dui noeˬ duiˇ tehꞈ-a.

¹⁰ Saˬ nmˇ saˬ paˇ mˇ-eu deuˬ nui ma cawˆ dui dui tehꞈ-a. saˬ nmˇ zaꞈ mahˇ mahˇ-eu deuˬ nui ma tsawˬ paˆ tehꞈ-a.

¹¹ Zoˇnaˆ meuˬ-euˬ aˬ yuiꞈ aˬ tsu deuˬ tsawˇ uˬ tehꞈ meh. Iˇjiˇtuˆ sahˬ paˬ-ahˇ ja noeˬ ja duˇ-eu tsawˇ gahˇ ahˇ-eu deuˬ, gaˇ dahˇ tsoeˬ-eu dawˬ maˬ ngehˬ-a. “Ngaˇ tsawˇ gahˇ ahˇ-eu tsawˇ haˬ ma. Aˇ hu sahˬ paˬ deuˬ-euˬ gʼaˬ kʼehˇ ma” lehˇ, sahˬ paˬ-ahˇ aˬ yawꞈ maꞈ aˬ joˆ-ehˇ ehˇ leˇ coeˇ ta.

¹² Iˇjiˇtuˆ sahˬ paˬ-oˇ, nawˬ-ahˇ nui noeˬ nui duˇ biꞈ-eu tsawˇ gahˇ ahˇ-eu deuˬ, aˬ gaˇ jawˇ ta. Iˇjiˇtuˆ miˇ kʼahˬ kʼoeˇ taˆ bi keuˆ le-eu lehˇ, Sahˬpaˬ Miˬyehˇ neh lehˬ hmˬ taˬ-euˬ jeˬ, aˬ yawꞈ maꞈ nawˬ-ahˇ bi dzawˇ mehˬ haw sheˇ.

¹³ Zoˇnaˆ meuˬ-ahˇ aˬ yuiꞈ aˬ tsu geuꞈ luꞈ-eu deuˬ, tsawˇ uˬ uˬ jiˇ-awˇ, Mehˇpiˇ meuˬ-ahˇ uˆ lahˇ-eu deuˬ, mehˇ shuiˇ tawˆ leˇ-euˬ meh. Iˇjiˇtuˆ miˇ kʼahˬ-ahˇ sheuˬ gʼeh-eu aˬ yuiꞈ aˬ tsu deuˬ, gaˇ ma sheuˬ bahˬ-euˬ meh.

¹⁴ Aˬ yawꞈ maꞈ oˇ lo maˇ la-ehˇ pyeuꞈ iˇ ni, Sahˬpaˬ Miˬyehˇ jahˇ nehˬ-euˬ miˇ neh, jiˇ baˬ yehꞈ-eu tsawˇ haˬ tiˬ gʼaˬ, yawˬ ha-euˬ uˬ pehꞈ kʼoeˇ taˆ coˬ daˆ-eu loꞈ-ehˇ, Iˇjiˇtuˆ miˇ kʼahˬ kuiˇ toꞈ maˬ ciˬ tsaˬ nya-a.

¹⁵ Iˇjiˇtuˆ miˇ kʼahˬ-ahˇ kʼaˇ jawˇ-eu tsawˇ haˬ, huiˬ zaˬ nyiˇ zaˬ maˬ ehˇ, smˇ muiˬ iˇ shaˬ maˬ ehˇ, tiˬ gʼaˬ-iˬ maˬ mˇ doˆ-a.

Iˇjiˇtuˆ miˇ kʼahˬ Sahˬpaˬ Miˬyehˇ-ahˇ uˬ duˬ tahˬ tehꞈ-a

¹⁶ Iˇjiˇtuˆ tsawˇ haˬ deuˬ zaˬ miˬ zaˬ loꞈ-ehˇ nui ma baˬ-iˇ-eu aˇ nah keuˆ le tehꞈ-a. Aˬ yawꞈ maꞈ-ahˇ kʼehˬ nehˬ kʼaˆ nehˬ-eu gʼaˇ duˬ Sahˬpaˬ Miˬyehˇ aˬ laꞈ cawˬ ja taˬ-euˬ gaˇ ya mawˇ ngeh, aˬ yawꞈ maꞈ guˆ-awˇ yaw dzuˬ dzuˬ tehꞈ-a.

¹⁷ Baoˬ huiˬ-eu Sahˬpaˬ Miˬyehˇ neh aˬ yawꞈ maꞈ-ahˇ jahˇ nehˬ-eu lehˇ lehˬ hmˬ taˬ-eu jeˬ-ahˇ Iˇjiˇtuˆ tsawˇ haˬ deuˬ kʼaˇ noeˬ mawˇ ngeh, Yuˇdaˆ miˇ kʼahˬ-ahˇ aˬ yawꞈ maꞈ guˆ dui dui tehꞈ-a.

¹⁸ Aˇ nah aˇ yamˬ kʼoeˇ keuˆ le ngeh, Iˇjiˇtuˆ meuˬ yaw huiˬ ngaˬ meuˬ laꞈ kʼoeˇ, Heˬbyehˇ dawˬ ngehˬ tehꞈ-a. Meuˬ kʼoeˇ deuˬ-ahˇ jawˇ-eu tsawˇ haˬ deuˬ saˇ jaˇ dzaˬ ngeh, Baoˬ huiˬ-eu Sahˬpaˬ Miˬyehˇ-euˬ tsawˇ myahˇ kuˇ-awˇ dzaˬ tehꞈ-a. Meuˬ kʼoeˇ deuˬ laꞈ kʼoeˇ tiˬ meuˬ-ahˇ, “Nahˇ ma-euˬ meuˬ” lehˇ kuˇ tehꞈ-a.

¹⁹ Aˇ nah aˇ yamˬ kʼoeˇ keuˆ le ngeh, Iˇjiˇtuˆ miˇ kʼahˬ laꞈ kʼoeˇ, Sahˬpaˬ Miˬyehˇ-ahˇ lawˇ-eu gʼaˇ duˬ lawˇ duˬ tiˬ tsahˇ jaˆ-awˇ, Sahˬpaˬ Miˬyehˇ-ahˇ noeˬ keuˆ-eu gʼaˇ duˬ, Iˇjiˇtuˆ miˇ kaˬ-ahˇ kʼaˬ lo kʼawˇ zeuˇ zeuˇ ma ka tuˇ taˬ tehꞈ-a.

²⁰ Kʼoeˇ deuˬ-aˬ, Baoˬ huiˬ-eu Sahˬpaˬ Miˬyehˇ Iˇjiˇtuˆ miˇ kʼahˬ laꞈ kʼoeˇ jawˇ-eu gaˇ kawˆ bi siˬ bi mawˇ-eu jeˬ pyeuꞈ tehꞈ-a. Kʼoeˇ gaˇ jawˇ-eu tsawˇ haˬ deuˬ kʼehˬ-eu kʼaˆ-eu jeˬ-ahˇ ya daˬ-awˇ, Sahˬpaˬ Miˬyehˇ-ahˇ kuˇ ngeh, aˬ yawꞈ tsawˇ haˬ pyehˬ gʼeh-awˇ, aˬ yawꞈ maꞈ-ahˇ bi ka kʼoꞈ tehꞈ-a.

²¹ Sahˬpaˬ Miˬyehˇ aˬ yawꞈ-euˬ gʼawˇ mawˇ Iˇjiˇtuˆ tsawˇ haˬ deuˬ-ahˇ pah mehˬ ngeh, aˬ yawꞈ maꞈ aˬ yawꞈ-ahˇ siˬ nya laˇ-awˇ uˬ duˬ tahˬ-eu laꞈ kʼoeˇ, lawˇ-eu shehˇ-eu jeˬ mˇ nehˬ tehꞈ-a. Aˬ yawꞈ maꞈ aˬ yawꞈ-ahˇ saˇ jaˇ dzaˬ-awˇ, saˇ jaˇ kʼaˇ dzaˬ-euˬ loꞈ-ehˇ mˇ byah tehꞈ-a.

²² Iˇjiˇtuˆ tsawˇ haˬ deuˬ-ahˇ Sahˬpaˬ Miˬyehˇ kʼehˬ neh kʼaˆ nehˬ tehꞈ-a. Ehˇ kʼawꞈ, aˬ yawꞈ maꞈ-ahˇ aˬ yawꞈ ngehˬ paˇ gʼeh nehˬ tehꞈ-a. Aˬ yawꞈ maꞈ aˬ yawꞈ jawˇ paw gʼoꞈ kʼoꞈ laˇ-awˇ guiˬ lahˬ shaˇ ngeh, aˬ yawꞈ maꞈ-euˬ shaˇ dawˬ-ahˇ aˬ yawꞈ naˇ haˬ nehˬ-awˇ, ngehˬ gʼeh dah teˬ nehˬ tehꞈ-a.

²³ Aˇ nah aˇ yamˬ kʼoeˇ keuˆ le ngeh, Iˇjiˇtuˆ miˇ kʼahˬ hawˇ-eu Aˬshuˇliˆ miˇ kʼahˬ yaw kaˬ-ahˇ, gaˇ jawˬ jawˬ ma dahˇ laˇ tehꞈ-a. Miˇ kʼahˬ kʼoeˇ nyiˬ kʼahˬ-ahˇ jawˇ-eu miˇ kʼahˬ zaˬ deuˬ iˇ tawꞈ laˇ tawꞈ-awˇ, tiˬ kawˆ loꞈ-ehˇ uˬ duˬ tahˬ taꞈ tehꞈ-a.

²⁴ Aˇ nah aˇ yamˬ kʼoeˇ keuˆ le ngeh, Iˇjiˇtuˆ miˇ kʼahˬ hawˇ-eu Aˬshuˇliˆ miˇ kʼahˬ nehˬ-ehˇ Iˇsaˬleˬlaˆ miˇ kʼahˬ gm leˇ-awˇ, miˇ kʼahˬ kʼoeˇ smˇ kʼahˬ baˬ da neh miˇ tsaˬ dawˬ tawˆ luꞈ guiˬ lahˬ za tehꞈ-a.

²⁵ Aˬ yawꞈ maꞈ-ahˇ Sahˬpaˬ Miˬyehˇ guiˬ lahˬ biꞈ-awˇ, heu loꞈ-ehˇ ehˇ nehˬ tehꞈ-a. “Ngaˬ-euˬ tsawˇ haˬ Iˇjiˇtuˆ tsawˇ jeuˬ, ngaˬ neh beh-euˬ Aˬshuˇliˆ tsawˇ jeuˬ hawˇ-eu, ngaˬ neh tseˇ doˆ-euˬ Iˇsaˬleˬlaˆ tsawˇ jeuˬ-ahˇ ngaˇ guiˬ lahˬ biꞈ-eu ma.”