Iˇsaˬyaˇ 18 - Akha

Suˬdaˬ miˇ kʼahˬ-ahˇ Miˬyehˇ kʼehˬ nehˬ tehꞈ-a

¹ Suˬdaˬ miˇ kʼahˬ lawˇ baˬ deuˬ kʼoeˇ paw kʼaˇ, aˬ dahˇ dahˇ paꞈ juiꞈ-eu teˇ saˇ mahˇ-eu miˇ kʼahˬ tiˬ kʼahˬ jaˆ meh.

² Miˇ kʼahˬ kʼoeˇ kʼahˬ neh pyehˬ leꞈ-euˬ tsawˇ kaˬ deuˬ, huˇ seu neh dzeuꞈ-euˬ lawˬ dziˬ-awˇ, Niˬlaˇ lawˇ baˬ gawˆ cawˬ oe ka-euˬ meh. Dawˬ mehˇ pyaˇ dui dui-eu tsawˇ kaˬ deuˬ-oˇ, baoˬ huiˬ-awˇ aˬ cawˬ tsawˇ jeuˬ-ahˇ gʼaˬ leˇ-eu miˇ neh, dawˬ peh gaˇ mahˇ jawˇ-eu tsawˇ jeuˬ deuˬ ya guˆ-eu, caˇ gawˬ goˇ-awˇ shaˬ jiˇ muiˬ-eu tsawˇ haˬ deuˬ jawˇ-eu, lawˇ baˬ gʼawˬ mya gawˆ yoeˇ paˆ luꞈ-eu naw maꞈ-euˬ miˇ kʼahˬ-ahˇ, yaw kawˇ-ehˇ gʼoꞈ leˇ-awˬ.

³ Miˇ tsaˬ kʼoeˇ taˆ kʼaˇ jawˇ-eu tsawˇ haˬ zaˬ deuˬ-oˇ, gawˬ jawˬ kʼoeˇ taˆ paˇ loˬ paˇ lehˇ baꞈ tuˇ laˇ gaˇ haw-awˇ, daˇ heh baw doˆ laˇ-eu teˇ saˇ ahˇ naˇ haˬ taˬ-awˬ.

⁴ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Nahˇ ma yaw shehꞈ laꞈ kʼoeˇ ahˇ-eu nahˇ tsaˇ hawˇ-eu, nahˇ tsaˇ tsoꞈ gaˇ cehˇ diˬ luꞈ ngeh jaˆ-eu ceuˬ ahˇ-eu mˬ dmˇ loꞈ-ehˇ, mˬ taˆ ngaˬ-euˬ jawˇ duˬ-ahˇ ngaˇ jawˇ-awˇ, ciˬ cuˇ ni haw luꞈ ma.

⁵ Aˬ gaꞈ aˇ paꞈ ga jiˇ-awˇ aˇ siˬ awꞈ laˇ ngeh, aˬ gaꞈ aˇ siˬ maˬ pyaˆ uiˬ dah mi naˆ-ehˇ, aˬ gaꞈ ciˇ ni-ahˇ tsoꞈ-eu uˬ laꞈ-ahˇ, mi cehˇ tawˆ jeˇ neh pyehˆ tsehˆ-eu loꞈ-ehˇ, muiˇ-eu deuˬ Suˬdaˬ tsawˇ haˬ-ahˇ, yaw awˇ laꞈ-ehˇ laˆ cawˆ tehꞈ-a.

⁶ Shiˇ taˬ-awˇ ga-eu aˬ yawꞈ maꞈ-euˬ yehˇ deuˬ, aˇ jiˇ hawˇ-eu bawˇ tsahˬ jeˬ zaˬ gʼaˇ duˬ pyeuꞈ-awˇ, aˇ jiˇ deuˬ tiˬ jawˇ la dzaˬ-eu uˬ taꞈ, tsahˬ gaˆ yamˬ-ahˇ jeˬ zaˬ deuˬ bui tehꞈ-a.”

⁷ Baoˬ huiˬ-awˇ aˬ cawˬ tsawˇ jeuˬ-ahˇ gʼaˬ leˇ-eu miˇ neh, dawˬ peh gaˇ mahˇ jawˇ-eu tsawˇ jeuˬ deuˬ ya guˆ-eu, lawˇ baˬ gʼawˬ mya gawˆ yoeˇ paˆ-eu miˇ kʼahˬ-ahˇ jawˇ-eu, shaˬ jiˇ muiˬ-awˇ caˇ gawˬ goˇ-eu tsawˇ haˬ deuˬ neh, damˬ nehˬ lawˇ nehˬ laˇ-euˬ jeˬ-ahˇ, Baoˬ huiˬ-eu Sahˬpaˬ Miˬyehˇ ha geuꞈ nehˬ-eu aˇ nah keuˆ tehꞈ-a. Baoˬ huiˬ-eu Sahˬpaˬ Miˬyehˇ-ahˇ uˬ duˬ tahˬ-eu jawˇ duˬ, Ziˇoˬ gawˬ jawˬ-ahˇ aˬ yawꞈ maꞈ laˇ-awˇ, damˬ laˇ lawˇ laˇ tehꞈ-a.