Iˇsaˬyaˇ 17 - Akha

Suˇliˆ miˇ kʼahˬ hawˇ-eu Iˇsaˬleˬlaˆ miˇ kʼahˬ-ahˇ Miˬyehˇ kʼehˬ nehˬ kʼaˆ nehˬ tehꞈ-a

¹ Sahˬpaˬ Miˬyehˇ ehˇ-eu, “Daˬmaˬsehˇ meuˬ-aˬ, meuˬ maˬ paˇ pyeuꞈ-ehˇ, yaw cawˆ jeˬ baꞈ bymˇ taˬ-euˬ gaˇ duˇ tehꞈ-a.

² Suˇliˆ miˇ kʼahˬ laꞈ kʼoeˇ jaˆ-eu meuˬ deuˬ-aˬ, meuˬ coeˬ coeˬ-iˇ jiˇ-eu miˇ neh, yawˇ hawˇ-eu mawˇ neˇ gaˆ kʼahˬ pyeuꞈ-iˇ-awˇ, teh doˆ-eu gʼaˬ maˬ jawˇ ni gaˆ tehꞈ-a.

³ Iˇsaˬleˬlaˆ miˇ kʼahˬ-euˬ meuˬ deuˬ maˬ paˇ ziꞈ-ehˇ, Daˬmaˬsehˇ meuˬ dzoeˬ dzaˬ byoˆ le tehꞈ-a. Dzeuˇ-iˇ-euˬ Suˇliˆ tsawˇ haˬ deuˬ, Iˇsaˬleˬlaˆ tsawˇ jeuˬ loꞈ-ehˇ, nui ma shaˬ zahˬ ya mˇ tehꞈ-a lehˇ, Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”

⁴ Sahˬpaˬ Miˬyehˇ ehˇ-eu, “Iˇsaˬleˬlaˆ miˇ kʼahˬ-euˬ yaw shehꞈ kʼahˬ sehˇ byoˆ-iˇ-awˇ, pyuˇ shuiˇ myawˬ gahˬ byoˆ jiˇ-awˇ ya shaˬ ya zahˬ-eu aˇ nah keuˆ le luꞈ meh.

⁵ Iˇsaˬleˬlaˆ miˇ kʼahˬ-euˬ aˇ gʼehˇ-aˬ, cehˇ yehˬ gʼaˬ-awˇ cehˇ nmˇ bi gʼoˆ jiˇ-euˬ, Leˬpeˬ deh kʼawꞈ-ahˇ jaˆ-eu yaˇ loꞈ-ehˇ, juiˇ kʼeu ni jaˆ tehꞈ-a.

⁶ Iˇsaˬleˬlaˆ miˇ kʼahˬ-euˬ gaˇ kawˆ-aˬ, saˬ loˬ aˇ siˬ bi pyaˆ geuꞈ jiˇ-awˇ, uˬ laꞈ yaw awˆ-ahˇ oeˬ siˬ ngaˬ siˬ ngeuˬ-eu, saˬ loˬ aˇ bawˇ loꞈ-ehˇ guiˬ lahˬ doeˇ tehꞈ-a lehˇ, Iˇsaˬleˬlaˆ miˇ kʼahˬ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

⁷ Aˇ nah aˇ yamˬ kʼoeˇ keuˆ le ngeh, Beh-euˬ yaw sahˇ Iˇsaˬleˬlaˆ-euˬ muiˬ-eu shawˇ-eu Miˬyehˇ-ahˇ,

⁸ tsawˇ haˬ zaˬ uˬ duˬ tahˬ shaˇ leˇ tehꞈ-a. Aˬ yawꞈ maꞈ-euˬ aˬ laꞈ neh jahˇ taˬ-euˬ lawˇ duˬ deuˬ-ahˇ, aˬ yawꞈ maꞈ maˬ paˇ gʼoe-ehˇ, aˬ yawꞈ maꞈ-euˬ kuiˇ zaˇ laꞈ zaˇ pyeuꞈ-eu, Aˬsheˇlaˬ miˬ yehˇ ma-euˬ mawˇ kawˇ deuˬ hawˇ-eu, tsiˇ yaw saw jeˬ doꞈ damˬ-eu lawˇ duˬ-ahˇ, myaˆ haw maˬ cawˬ ni byehˇ tehꞈ-a.

⁹ Iˇsaˬleˬlaˆ tsawˇ haˬ deuˬ baˬ da neh, Hiˇbiˇ tsawˇ jeuˬ hawˇ-eu Aˬmawˇliˆ tsawˇ jeuˬ, meuˬ byehˇ dzeh-awˇ cehˆ-euˬ loꞈ-ehˇ, aˇ nah aˇ yamˬ kʼoeˇ keuˆ le ngeh, aˬ yawꞈ maꞈ-euˬ meuˬ deuˬ ya byehˇ dzeh-awˇ, bi laˆ cawˆ jiˇ tehꞈ-a.

¹⁰ Iˇsaˬleˬlaˆ tsawˇ haˬ deuˬ-oˇ, naw maꞈ gʼaˇ duˬ lo guˇ loꞈ-ehˇ ziꞈ-euˬ, naw maꞈ-ahˇ ka kʼoꞈ-euˬ miˬ yehˇ-ahˇ, naw maꞈ byehˇ dzeh yaꞈ-awˇ, aˬ cawˬ tsawˇ jeuˬ-euˬ Miˬyehˇ-ahˇ uˬ duˬ tahˬ-eu gʼaˇ duˬ, muiˬ-eu shawˇ-eu yaˇ kmˇ mˇ-euˬ miˇ neh,

¹¹ ka ngeh nah neh mehˇ laˇ-awˇ, aˇ yoeˬ sehˬ ngeh shawˬ neh aˇ yehˆ yehˆ kʼawꞈ, yehˬ dzaˬ diˬ dzaˬ-eu maˬ oꞈ-ehˇ, tiˬ jawˇ-iˬ maˬ ngehˇ leˇ coeˇ ni ya noeˬ shaˬ tehꞈ-a.

Muiˇ-eu tsawˇ jeuˬ deuˬ ya smˬ-iˇ tehꞈ-a

¹² Naˇ haˬ sheˇ. Iˬ ma laˆ shaˆ iˇ luˆ dzeh-eu teˇ saˇ loꞈ-ehˇ, miˇ kʼahˬ tsawˇ jeuˬ luiˬ gʼa luꞈ meh. Naˇ haˬ sheˇ. Huiˬ-eu iˇ kʼawˇ ciˬ tahˬ ciˬ tuˆ-eu loꞈ-ehˇ, miˇ kʼahˬ tehˬ laˇ-euˬ teˇ saˇ mahˇ luꞈ meh.

¹³ Iˇ cuꞈ iˇ kʼawˇ oe-eu loꞈ-ehˇ, miˇ kʼahˬ tsawˇ jeuˬ deuˬ oe leꞈ kʼawꞈ, Miˬyehˇ aˬ yawꞈ maꞈ-ahˇ lmˬ ngeh, naˇ kʼah paw cehˆ gʼoꞈ-awˇ, gawˬ jawˬ uˬ du jaˆ-eu kʼaˬ lehˇ, jaˬ lehˇ neh bi baw byoˆ-eu loꞈ-ehˇ, jaˆ guˬ jaˆ gaˆ-ahˇ jaˬ lehˇ lehˇ ma hehˇ dzaˬ gʼeh-eu loꞈ-ehˇ, bi teh byoˆ jiˇ tehꞈ-a.

¹⁴ Uˬ ciꞈ paw keuˆ le-eu guˆ-eu gaˆ-eu jeˬ, uˬ bya maˬ bya laˇ mi naˆ-ehˇ byoˆ jiˇ-eu meh. Aˬ dui miˇ kʼahˬ-ahˇ guiˇ deuˆ le-awˇ, myawˬ gahˬ ceh geuꞈ le-eu deuˬ-euˬ guiˬ lahˬ, kʼoeˇ naˆ ni doeˇ-eu meh.