Iˇsaˬyaˇ 11 - Akha

Nui saˇ oꞈ-eu miˇ kʼahˬ

¹ Yeˬshehˇ-euˬ sahˬ nyiꞈ dawˬ pehˬ-ahˇ, baw nmˬ nmˬ doˆ laˇ-awˇ, duˬ ciˇ-ahˇ uˬ laꞈ tsoꞈ doˆ laˇ-eu loꞈ-ehˇ, sahˬ paˬ yaw shuiꞈ doˆ laˇ tehꞈ-a.

² Sahˬpaˬ Miˬyehˇ-euˬ Yaw sahˇ pyeuꞈ-eu, zaˬ siˬ nui gahˇ hawˇ-eu noeˬ siˬ noeˬ mawˇ nya-eu jeˬ biꞈ-eu yaw sahˇ, nui noeˬ nui duˇ hawˇ-eu baoˬ biꞈ-eu yaw sahˇ, tsawˇ gahˇ hawˇ-eu Sahˬpaˬ Miˬyehˇ-ahˇ guˆ-eu nui ma biꞈ-eu yaw sahˇ, aˬ yawꞈ kʼoeˇ taˆ keuˆ le tehꞈ-a.

³ Kʼoeˇ ngeh, Sahˬpaˬ Miˬyehˇ-ahˇ guˆ-awˇ dehꞈ-eu laꞈ kʼoeˇ, aˬ yawꞈ laˬ kʼaˬ cehˇ tehꞈ-a. Myaˆ mawˇ-awˇ naˬ bawˇ gaˬ gaˇ gʼoe-awˇ, aˬ yawꞈ yaˇ kʼaˬ maˬ daˇ tsehˆ ni,

⁴ Iˇ shaˬ zaˬ-ahˇ yaw tsaˬ yaw dawˇ jeˬ bi mawˇ-awˇ, zaˬ coeˬ zaˬ-ahˇ di dehˬ ni haw tehꞈ-a. Aˬ yawꞈ kʼaˬ meh dawˬ ngehˬ dawˬ tmˇ, miˇ tsaˬ zaˬ-ahˇ daˇ cuiˇ sheu juiꞈ nya-awˇ, aˬ yawꞈ mehˬ luˬ-ahˇ gʼawˇ-eu saꞈ, yaw haiˬ deuˬ-ahˇ sehꞈ dzeh tehꞈ-a.

⁵ Yaw tsaˬ yaw dawˇ jeˬ-ahˇ aˬ yawꞈ joꞈ paꞈ paꞈ-awˇ, saˇ jaˇ ziꞈ-eu jeˬ joꞈ-ahˇ lahˇ tehꞈ-a.

⁶ Kʼaˬ yehˇ yawˇ zaˬ tiˬ gaˇ dehꞈ taꞈ nya-awˇ, kʼaˬ zuiˬ ciꞈ myehꞈ zaˬ nehˬ-ehˇ yuꞈ tehꞈ-a. Aˇ laˬ jaˬ shiˇ zaˬ hawˇ-eu mawˇ neˇ zaˬ, tiˬ kawˆ loꞈ-ehˇ dzaˇ gaˆ dzaˬ-awˇ, zaˬ yaw nyiˇ neh bi bo tehꞈ-a.

⁷ Mawˇ neˇ hawˇ-eu kʼaˬ hmˇ tiˬ gaˇ gaˆ-awˇ, aˬ yawꞈ maꞈ-euˬ zaˬ deuˬ tiˬ kawˆ loꞈ-ehˇ, ciˬ cuˇ ni yuꞈ tehꞈ-a. Mawˇ neˇ gʼo yoeˬ dzaˬ-eu loꞈ-ehˇ, aˇ laˬ jaˬ shiˇ gʼo yoeˬ dzaˬ gaˇ ya mawˇ tehꞈ-a.

⁸ Zaˬ nahˬ aˇ lawˇ byoe dawˬ peh aˬ mui mui nya-awˇ, doꞈ kʼaˆ-eu aˇ lawˇ uˇ-eu byoe-ahˇ, zaˬ yaw nyiˇ deuˬ beuˬ niˇ gʼa nya tehꞈ-a.

⁹ Iˬ ma laˆ shaˆ iˇ cuꞈ byah-eu loꞈ-ehˇ, Sahˬpaˬ Miˬyehˇ-ahˇ siˬ nya-eu jeˬ, miˇ tsaˬ kʼoeˇ taˆ byah-eu miˇ neh, Miˬyehˇ-euˬ muiˬ-eu shawˇ-eu Ziˇoˬ gawˬ jawˬ-ahˇ, lehˬ laˇ ca laˇ duˬ maˬ jaˆ-a.

Dzeuˇ-iˇ-euˬ deuˬ gʼoꞈ laˇ-eu

¹⁰ Daˬbiˇ-euˬ aˇ jeuˬ aˇ ca laꞈ kʼoeˇ sahˬ paˬ yaw shuiꞈ tiˬ gʼaˬ doˆ laˇ-euˬ gaˇ kawˆ, tsawˇ jeuˬ dawˬ tawˆ luꞈ-ahˇ bi siˬ bi mawˇ-eu aˇ nah keuˆ le tehꞈ-a. Aˬ yawꞈ dzoeˬ dzaˬ-eu meuˬ-ahˇ, aˬ yawꞈ maꞈ uiˬ laˇ-awˇ, aˬ yawꞈ-ahˇ taˬ huiˬ taˬ mahˇ tehꞈ-a.

¹¹ Aˇ nah aˇ yamˬ kʼoeˇ yamˬ keuˆ le ngeh, Sahˬpaˬ Miˬyehˇ aˬ laꞈ cawˬ ja-awˇ, aˬ cawˬ-euˬ miˇ kʼahˬ-ahˇ dzeˇ luꞈ-eu aˬ yawꞈ-euˬ tsawˇ haˬ deuˬ-ahˇ sheuˬ kʼoꞈ laꞈ tehꞈ-a. Aˬshuˇliˆ miˇ kʼahˬ, Iˇjiˇtuˆ miˇ kʼahˬ, Paˬdaˬloˆ miˇ kʼahˬ, Suˬdaˬ miˇ kʼahˬ, Eˇlamˬ miˇ kʼahˬ, Baˬbuˇloˬ miˇ kʼahˬ, Haˬmaˆ miˇ kʼahˬ hawˇ-eu, iˬ ma laˆ shaˆ lawˇ deh caw caw-ehˇ jaˆ-eu miˇ kʼahˬ deuˬ hawˇ-eu iˬ ma laˆ shaˆ laꞈ kʼoeˇ jaˆ-eu iˇ jaw lahˇ deuˬ laꞈ kʼoeˇ kʼaˇ dzeˇ-eu aˬ yawꞈ-euˬ tsawˇ haˬ deuˬ-ahˇ, aˬ yawꞈ sheuˬ kʼoꞈ doˆ laꞈ tehꞈ-a.

¹² Tsawˇ jeuˬ dawˬ tawˆ luꞈ-ahˇ aˬ yawꞈ paˇ loˬ paˇ lehˇ ka tuˇ mehˬ nehˬ-awˇ, byehˇ dzeh taˬ-eu Iˇsaˬleˬlaˆ tsawˇ haˬ deuˬ hawˇ-eu, iˇ byoˆ taˬ-euˬ Yuˇdaˆ tsawˇ haˬ deuˬ-ahˇ, miˇ ma oeˬ coeˇ oeˬ pyawˬ doe ni, kuˇ kʼoꞈ uiˬ laꞈ tehꞈ-a.

¹³ Iˇsaˬleˬlaˆ miˇ kʼahˬ Yuˇdaˆ miˇ kʼahˬ-ahˇ myaˆ maˬ paˇ naˆ-ehˇ, Yuˇdaˆ miˇ kʼahˬ Iˇsaˬleˬlaˆ miˇ kʼahˬ-ahˇ muiˇ-eu nui ma byoˆ-iˇ tehꞈ-a.

¹⁴ Ehˇ kʼawꞈ, aˬ yawꞈ maꞈ nui ma gm-eu laꞈ kʼoeˇ, nahˇ ma ga kʼehˬ paw-euˬ Piˇliˇtiˆ tsawˇ haˬ-ahˇ guiˇ deuˆ-awˇ, nahˇ ma doˆ kʼehˬ paw jawˇ-eu tsawˇ haˬ deuˬ-euˬ pyuˇ shuiˇ deuˆ geuꞈ tehꞈ-a. Eˬdoˬ miˇ kʼahˬ hawˇ-eu Mawˇbaˆ miˇ kʼahˬ-ahˇ aˬ yawꞈ maꞈ deuˆ gʼaˬ-awˇ, Aˬmoˬ miˇ kʼahˬ aˬ yawꞈ maꞈ-euˬ laꞈ oꞈ awꞈ tehꞈ-a.

¹⁵ Iˇjiˇtuˆ miˇ kʼahˬ-euˬ laˆ shaˆ lahˇ gʼoꞈ-ahˇ, Sahˬpaˬ Miˬyehˇ bi gui-iˇ-awˇ, Uˇpaˬlaˇ lawˇ baˬ tsiˇ-iˇ ni, aˬ yawꞈ jaˬ lehˇ yaw lahˇ bi baw-euˬ miˇ neh, tsawˇ haˬ yawˬ gʼaˬ na luꞈ tsehˆ doˆ nya-eu gawˆ laꞈ shiꞈ gawˆ tehꞈ-ehˇ dzeˇ laˇ tehꞈ-a.

¹⁶ Iˇsaˬleˬlaˆ tsawˇ haˬ-euˬ aˬ poeˬ aˬ bawˇ deuˬ, Iˇjiˇtuˆ miˇ kʼahˬ-ahˇ doˆ le ngeh gaˇ jawˬ dahˇ-euˬ loꞈ-ehˇ, Aˬshuˇliˆ miˇ kʼahˬ-ahˇ dzeˇ-eu Iˇsaˬleˬlaˆ tsawˇ haˬ deuˬ gʼaˇ duˬ, Aˬshuˇliˆ miˇ kʼahˬ-ahˇ neh gaˇ jawˬ dahˇ doˆ tehꞈ-a.