Iˇsaˬyaˇ 1 - Akha

¹ Sahˬ boꞈ heu taꞈ laꞈ kʼoeˇ ahˇ-eu gaˇ kawˆ deuˬ-aˬ, sahˬ paˬ Awˇziˇ, sahˬ paˬ Yoˇdaˬ, sahˬ paˬ Aˬkaˆ, sahˬ paˬ Heˬsaˬgiˇ aˬ ha maꞈ Yuˇdaˆ miˇ kʼahˬ-ahˇ uˆ lahˇ-euˬ ziˇ kʼoeˇ ziˇ-ahˇ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ taꞈ leˇ-awˇ, Aˬmoˆ-euˬ aˬ li Iˇsaˬyaˇ-ahˇ Miˬyehˇ neh pah mehˬ nehˬ-awˇ bi ngehˬ dah-euˬ gaˇ kawˆ deuˬ meh.

Miˬyehˇ aˬ yawꞈ-euˬ tsawˇ haˬ deuˬ-ahˇ yaw kʼaˆ kʼaˆ-ehˇ mehˬ nehˬ-euˬ

² Sahˬpaˬ Miˬyehˇ ehˇ-eu, “Mˬ hawˇ-eu miˇ-oˇ, naˬ bawˇ ciˬ kʼmˇ sheˇ. Ngaˇ ehˇ gaˇ naˇ haˬ sheˇ. Ngaˬ neh cu huiˬ-euˬ zaˬ deuˬ, ngaˬ-ahˇ puiˬ luꞈ meh.

³ Mawˇ neˇ kʼawꞈ yawˬ ha-euˬ yaw sahˇ-ahˇ siˬ nya-awˇ, mahˬ tahˬ laˆ kʼawꞈ, yaw sahˇ gʼaˬ-euˬ mahˬ dzaˇ kʼawˇ lawˬ siˬ nya meh. Ehˇ kʼawꞈ, Iˇsaˬleˬlaˆ kʼoeˇ loꞈ-ehˇ maˬ siˬ nya-a. Ngaˬ-euˬ tsawˇ haˬ deuˬ maˬ noeˬ siˬ nya-a.”

⁴ Iˬ baˇ huiˬ-eu tsawˇ jeuˬ law hawˇ nga. Iˬ baˇ neh bi ciˬ tehˬ sehꞈ law hawˇ nga. Yaw haiˬ-euˬ zaˬ pyeuꞈ-awˇ, yaw bahˬ je poˆ-eu nga. Sahˬpaˬ Miˬyehˇ-ahˇ aˬ yawꞈ maꞈ byehˇ dzeh-awˇ, Iˇsaˬleˬlaˆ-euˬ Muiˬ-eu shawˇ-eu gʼaˬ-ahˇ byehˇ dzeh-euˬ nga. Maˇ maˇ ni byehˇ tsehˆ tsehˆ-euˬ nga.

⁵ Aˬ jeˬ miˇ neh teuˆ naˆ naˆ-ehˇ biˬ kʼehˬ mawꞈ-eu nya. Aˬ jeˬ miˇ neh, teu naˆ naˆ-ehˇ puiˬ mawꞈ-euˬ nya. Naw maꞈ-euˬ uˬ duˬ deh leuꞈ deh kʼaw-awˇ, naw maꞈ-euˬ nui ma nyoeˬ-iˇ-euˬ nga.

⁶ Aˬ kuiˇ pehˬ zaˬ-ahˇ neh uˬ duˬ-ahˇ doˆ ni, geuꞈ-eu maˬ paˇ ahˇ ngaˇ. Maˇ kʼehˬ maˇ naˇ hawˇ-eu shiˬ dzahˬ maˇ lu tehꞈ-ehˇ jaˆ-awˇ, shiˬ doˆ dui dui luꞈ nga. Nawˬ-euˬ maˇ naˇ maˬ laˆ taˬ-ehˇ, saˬ paˇ maˬ lahˇ taˬ-aˬ. Jaˆ gʼaˬ maˬ laˆ saˆ-aˬ.

⁷ Naw maꞈ-euˬ miˇ kʼahˬ pu tsoeˬ tsoeˬ jiˇ-awˇ, naw maꞈ-euˬ meuˬ deuˬ miˬ dzaˬ puiˆ byoˆ jiˇ-euˬ nga. Boeˇ miˬ siˬ kʼaˬ deuˬ naw maꞈ-euˬ mehˬ shi, naw maꞈ-euˬ miˇ kʼahˬ laˆ cawˆ-awˇ, yaw muiˬ tiˬ hmˬ-iˬ maˬ dzeˇ ni, neˇ leuꞈ ni jaˆ luꞈ nga.

⁸ Yeˬluˇsaˬlehˬ meuˬ tiˬ meuˬ dzeˇ-eu kʼawꞈ, aˬ cawˬ neh bi jawˬ lahˇ taˬ-awˇ, aˬ gaꞈ yaˇ kmˇ-ahˇ gʼawˆ taˬ-euˬ sehˬ gʼawˆ hawˇ-eu siˬ kʼoˬ kʼoˬ yaˇ-ahˇ jaˆ-eu yaˇ cmˇ loꞈ-ehˇ tiˬ jeˬ-iˬ maˬ mˇ doˆ luꞈ-a.

⁹ Baoˬ huiˬ-eu Sahˬpaˬ Miˬyehˇ neh, aˬ dui tiˬ paˆ na deuˬ-ahˇ maˬ bi dzeuˇ-iˇ law nmˇ-aˬ, Sawˇdoˬ meuˬ hawˇ-eu Gawˇmawˇlaˆ meuˬ loꞈ-ehˇ, ya shiˇ cuˆ jiˇ-eu yaw duˬ baw law hawˇ nga.

¹⁰ Sawˇdoˬ meuˬ kʼoeˇ taˆ uˆ lahˇ-eu deuˬ-oˇ, Sahˬpaˬ Miˬyehˇ-euˬ dawˬ-ahˇ naˇ haˬ sheˇ. Gawˇmawˇlaˆ meuˬ-ahˇ jawˇ-eu tsawˇ haˬ deuˬ-oˇ, Miˬyehˇ mehˬ-eu tsoˆ-eu dawˬ-ahˇ naˬ bawˇ ciˬ kʼmˇ sheˇ.

¹¹ Sahˬpaˬ Miˬyehˇ ehˇ-eu, “Naw maꞈ neh lawˇ gahˬ shehˇ gahˬ taˬ-euˬ teu, ngaˬ-euˬ gʼaˇ duˬ aˬ jeˬ gaˇ dahˇ tsoeˬ ta. Yawˇ zaˬ dzah puiˆ-awˇ lawˇ nehˬ laꞈ gaˇ byuˇ laˇ taˬ-awˇ, jeˬ zaˬ-euˬ shaˬ tsuˇ-ahˇ maˬ haw nahˇ-ehˇ pyeuꞈ laˇ taˬ-euˬ miˇ-a. Mawˇ neˇ mawˇ gaw, yawˇ aˬ buˬ hawˇ-eu ciꞈ myehꞈ ciꞈ buˬ heu deuˬ-euˬ shiˬ-ahˇ, haw dehˆ mawˇ dehˆ laꞈ-euˬ miˇ-a.

¹² Naw maꞈ ngaˬ-ahˇ uˬ duˬ kʼaˇ tahˬ laˇ ngeh, kʼoeˇ loꞈ-ehˇ gʼeh-eu jeˬ yuˇ laꞈ lehˇ aˬ suˇ gʼaˬ ehˇ ta. Ngaˬ-euˬ Uˬ duˬ tahˬ nymˇ nymˇ ma laꞈ kʼoeˇ, aˬ kuiˇ nawˬ nawˬ-ehˇ cah laˇ lehˇ naw maꞈ-ahˇ aˬ suˇ gʼaˬ ehˇ ta.

¹³ Gaˇ dahˇ maˬ tsoeˬ-eu lawˇ-eu shehˇ-eu jeˬ taˬ paˇ yuˇ laꞈ. Tsiˇ yaw saw jeˬ doꞈ damˬ gaˇ ngaˇ nui daˆ daˆ nya. Naw maꞈ la shuiꞈ lah-eu, jawˇ nah tawˬ-eu, yaw bui bui-eu, iˬ baˇ mˇ-eu uiˬ leˇ bymˇ leˇ gaˇ duˇ-awˇ, ngaˬ-ahˇ maˬ haw nahˇ nya.

¹⁴ Naw maꞈ la shuiꞈ lah-awˇ bawˬ-iˬ gʼeh-eu jeˬ mˇ ngeh, ngaˬ-euˬ nui ma nui daˆ daˆ nya. Naw maꞈ kʼoeˇ loꞈ-ehˇ jahˇ-eu ngaˬ-ahˇ kʼaˆ behˆ kah-awˇ, maˬ baꞈ maˬ pi coeˇ nya,

¹⁵ Naw maꞈ aꞈ laꞈ cawˬ ja-awˇ guiˬ lahˬ shaˇ ngeh, naw maꞈ-ahˇ ngaˇ maˬ haw cawˬ. Naw maꞈ-euˬ aˬ laꞈ-ahˇ shiˬ lehꞈ-eu miˇ neh, naw maꞈ guiˬ lahˬ shaˇ sehꞈ leꞈ kʼawꞈ, ngaˇ maˬ naˇ haˬ nehˬ.

¹⁶ Yawˬ haˇ yawˬ ha tsiˬ shawˇ-awˬ. Yawˬ haˇ yawˬ ha mˇ shawˇ-awˬ. Ngaˬ-euˬ mehˬ shi naw maꞈ kʼaˇ mˇ-euˬ yaw haiˬ jeˬ, dawˬ tawˆ luꞈ byehˇ dzeh-awˬ. Yaw haiˬ jeˬ maˬ mˇ ni dehꞈ paˇ-awˬ.

¹⁷ Yaw muiˬ jeˬ mˇ-eu dzaw-awˬ. Yaw tsaˬ yaw dawˇ jeˬ-ahˇ poˆ-awˬ. Nawˬ dzaˬ kʼaˆ dzaˬ-eu jeˬ laˆ byoˆ-awˬ. Aˬ da maˬ baw-eu deuˬ-ahˇ haw piˇ-awˬ. Miˬ coeˬ miˬ ma-ahˇ gʼawˬ shaˬ gaˬ-awˬ.”

¹⁸ Sahˬpaˬ Miˬyehˇ ehˇ-eu, “Laˇ-awˬ tiˬ kawˆ loꞈ-ehˇ shaˇ noeˬ shaˇ sawˇ ma. Naw maꞈ-euˬ iˬ baˇ neˇ tseuˆ ni gʼeh kʼawꞈ, saˬ laˬ naˆ maˬ tseˇ pyuˇ laˇ tehꞈ-a. Naw maꞈ-euˬ iˬ baˇ shiˬ loꞈ-ehˇ neˇ kʼawꞈ, yawˇ zaˬ caꞈ hm loꞈ-ehˇ bi ba laˇ ma.

¹⁹ Naw maꞈ nui ma keuˆ-eu laꞈ kʼoeˇ ngaˬ-eu ehˇ dawˬ naˇ haˬ naˇ, miˇ tsaˬ miˇ tsiˇ ya dzaˬ tehꞈ-a.

²⁰ Ehˇ kʼawꞈ, ehˇ dawˬ maˬ naˇ haˬ ni puiˬ naˇ, mi cehˇ neh bi dzaˬ byoˆ tehꞈ-a lehˇ, Sahˬpaˬ Miˬyehˇ-euˬ kʼaˬ meh dawˬ ngehˬ-eu ma.”

Iˬ baˇ ahˇ-eu Yeˬluˇsaˬlehˬ meuˬ

²¹ Yaw beh saˇ jaˇ ziꞈ-eu meuˬ, meh maˬ laˇ-ahˇ dehꞈ duˇ taˬ-euˬ meh. Yaw beh yaw tsaˬ yaw dawˇ jeˬ byah-awˇ, yaw muiˬ yaw shawˇ jeˬ jaˆ-euˬ kʼawꞈ, nymˬ-mˇ aˬ cawˬ-ahˇ sehꞈ-eu tsawˇ haˬ tehꞈ meh.

²² Yaw beh nawˇ pyuˇ kʼoˇ loꞈ-ehˇ poeˬ kʼawꞈ, nymˬ-mˇ pyuˇ keˬ loꞈ-ehˇ tehꞈ meh. Yaw beh nawˇ kuiˇ dui dui-eu aˬ gaꞈ dzaˇ uiˇ pyeuꞈ kʼawꞈ, nymˬ-mˇ iˇ cuꞈ shehˆ byawˬ taˬ gaˇ duˇ-eu meh.

²³ Nawˬ-euˬ sahˬ paˬ sahˬ ma deuˬ tahˇ joe pyeuꞈ-awˇ, smˇ kʼoeˬ-ahˇ mehˬ bawˬ gm-eu meh. Yawˬ gʼaˬ na luꞈ laꞈ nmꞈ nmꞈ nehˬ gaˇ gaˬ-awˇ, laꞈ sawˬ biꞈ gaˇ caw teh-eu meh. Aˬ da maˬ baw-eu zaˬ deuˬ gaˇ kawˆ doˆ laˇ ngeh, aˬ yawꞈ maꞈ gʼawˬ shaˬ gaˬ-awˇ yaˇ kʼaˬ maˬ daˇ-a. Miˬ coeˬ miˬ ma deuˬ laꞈ jeuˬ shaˇ leˇ ngeh, aˬ yawꞈ maꞈ myaˆ haw maˬ cawˬ-a.

²⁴ Kʼoeˇ miˇ neh Dawˬ tawˆ kʼoeˇ taˆ huiˬ-eu Sahˬpaˬ Miˬyehˇ, Iˇsaˬleˬlaˆ-euˬ baoˬ huiˬ-eu Miˬyehˇ, heu loꞈ-ehˇ ehˇ-eu meh. “Haw taˬ lawˬ. Ngaˬ-ahˇ muiˇ-eu deuˬ-ahˇ ngaˇ jahˇ kʼoꞈ ma. Aˬ yawꞈ maꞈ ngaˬ-ahˇ maˬ paˇ bi laˆ bahˬ ma.

²⁵ Nawˬ-ahˇ ngaˇ do yuˇ ma. Pyuˇ baw guiˇ-awˇ laˆ shawˇ geuꞈ-eu loꞈ-ehˇ, nawˬ-euˬ iˬ baˇ ngaˇ laˆ shawˇ ma.

²⁶ Aˇ hu-euˬ sahˬ paˬ sahˬ ma-ahˇ duˇ-eu sahˬ paˬ sahˬ ma deuˬ, nawˬ-ahˇ ngaˇ biꞈ paˇ ma. Kʼoeˇ ngeh jawˇ Yeˬluˇsaˬlehˬ meuˬ-oˇ nawˬ-ahˇ, yaw tsaˬ yaw dawˇ-euˬ meuˬ lehˇ kuˇ-awˇ, saˇ jaˇ ziꞈ-eu meuˬ nga lehˇ aˬ cawˬ ehˇ tehꞈ-a.”

²⁷ Ziˇoˬ meuˬ-ahˇ yaw sui yaw dawˇ jeˬ neh bi ka kʼoꞈ-awˇ, kʼoeˇ gaˇ jawˇ-eu noeˬ paˇ-euˬ tsawˇ haˬ deuˬ-ahˇ, yaw tsaˬ yaw dawˇ jeˬ neh bi ka kʼoꞈ tehꞈ-a.

²⁸ Ehˇ kʼawꞈ, puiˬ-eu deuˬ hawˇ-eu iˬ baˇ mˇ-eu deuˬ, tiˬ kawˆ loꞈ-ehˇ bi laˆ cawˆ-awˇ Sahˬpaˬ Miˬyehˇ-ahˇ byehˇ dzeh-euˬ deuˬ, bi laˆ meh jiˇ tehꞈ-a.

²⁹ Naw maꞈ uˬ duˬ tahˬ-eu aˇ bawˇ kʼoeˇ deuˬ baˬ da neh, naw maꞈ kʼoeˇ taˆ shaꞈ dawˇ-eu jeˬ keuˆ le-awˇ, naw maꞈ neh ka-euˬ muiˬ-eu shawˇ-eu yaˇ kmˇ baˬ da neh, naw maꞈ myaˆ pyawˬ ya cawˆ tehꞈ-a.

³⁰ Aˇ paꞈ ga-euˬ tsuiꞈ kaˆ aˇ bawˇ loꞈ-ehˇ, naw maꞈ ya nyoeˬ-iˇ-awˇ, iˇ cuꞈ maˬ jaˆ-eu yaˇ kmˇ loꞈ-ehˇ, naw maꞈ ya koˆ-iˇ tehꞈ-a.

³¹ Miˬ dzaˬ miˬ dzuiꞈ baˬ da neh gʼoˆ yoeˬ puiˆ dzaˬ-eu loꞈ-ehˇ, baoˬ ahˇ-eu tsawˇ haˬ neh mˇ-euˬ yaw haiˬ jeˬ yaw sahˇ deuˬ-ahˇ paˇ puiˆ dzaˬ-awˇ, deh miˆ nehˬ-eu gʼaˬ maˬ jawˇ-a.