Iˇsaˬtaˆ 9 - Akha

Yuˇdaˆ tsawˇ haˬ deuˬ aˬ cawˬ-ahˇ sehꞈ-euˬ

¹ Sahˬ paˬ neh miˇ kʼahˬ-ahˇ bi siˬ bi gaˬ taˬ-euˬ dawˬ byah laˇ-eu aˇ nah hawˇ-eu, Yuˇdaˆ tsawˇ haˬ-ahˇ muiˇ-eu tsawˇ haˬ deuˬ Yuˇdaˆ tsawˇ jeuˬ-ahˇ zuiˆ gʼaˬ ma lehˇ noeˬ tmˬ taˬ-euˬ aˇ nah pyeuꞈ-eu, Aˬdaˬlaˬ ba la tseˇ smˬ nah keuˆ laˇ-euˬ meh. Ehˇ kʼawꞈ, Yuˇdaˆ tsawˇ haˬ deuˬ neh aˬ yawꞈ maꞈ-ahˇ muiˇ-eu tsawˇ haˬ kʼoeˇ deuˬ-ahˇ, tahˬ poˆ-ehˇ paˇ bi gʼaˬ leˇ-euˬ meh.

² Sahˬ paˬ Dzeuˬsehˆ-euˬ miˇ kʼahˬ laꞈ kʼoeˇ kʼaˇ jaˆ-eu Yuˇdaˆ tsawˇ haˬ-euˬ meuˬ deuˬ laꞈ kʼoeˇ, Yuˇdaˆ tsawˇ haˬ deuˬ uiˬ leˇ-awˇ, aˬ yawꞈ maꞈ-ahˇ sehꞈ laˇ-eu tsawˇ haˬ deuˬ-ahˇ deuˆ-eu lehˇ lehˬ hmˬ taˬ-euˬ meh. Yawˬ gaˇ na luꞈ aˬ cawˬ aˬ yawꞈ maꞈ-ahˇ guˆ-awˇ, tiˬ gʼaˬ-iˬ maˬ yawꞈ daˬ leˇ peuˬ-a.

³ Miˇ kʼahˬ yawˬ kʼahˬ na luꞈ laꞈ kʼoeˇ kʼaˇ jawˇ-eu sahˬ paˬ sahˬ ma geuꞈ-eu deuˬ maˬ ehˇ, sahˬ paˬ-euˬ gaˇ mˇ-eu deuˬ maˬ ehˇ, yaw huiˬ yaw mahˇ deuˬ maˬ ehˇ, dawˬ tawˆ luꞈ Mawˬdaˬkehˇ-ahˇ guˆ-eu miˇ neh, Yuˇdaˆ tsawˇ haˬ deuˬ-ahˇ caw ba nehˬ-euˬ meh.

⁴ Mawˬdaˬkehˇ-aˬ, sahˬ paˬ-euˬ nymˇ laꞈ kʼoeˇ baoˬ ahˇ-eu tsawˇ haˬ tiˬ gʼaˬ pyeuꞈ laˇ taˬ-awˇ, tiˬ nah saˇ-iˬ tiˬ nah aˬ yawꞈ-euˬ baoˬ huiˬ laˇ luꞈ-eu gaˇ kawˆ, miˇ kʼahˬ doe ni siˬ byah gaˬ byah taˬ-euˬ meh.

⁵ Kʼoeˇ miˇ neh, Yuˇdaˆ tsawˇ haˬ deuˬ, aˬ yawꞈ maꞈ-ahˇ muiˇ-eu tsawˇ haˬ deuˬ-ahˇ kʼaˇ jahˇ mawꞈ-eu jeˬ jahˇ nehˬ nya-eu meh. Aˬ yawꞈ maꞈ mi cehˇ yuˇ-awˇ, muiˇ-eu deuˬ-ahˇ sehꞈ-euˬ meh.

⁶ Aˬ cawˬ naˆ maˬ tseˇ huiˬ dzehˬ-eu meuˬ meuˬ ma pyeuꞈ-eu Suˇsaˬ meuˬ-ahˇ, Yuˇdaˆ tsawˇ haˬ deuˬ neh aˬ cawˬ tsawˇ jeuˬ ngaˬ yaˇ gʼaˬ sehꞈ-euˬ meh.

^7-10 Aˬ yawꞈ maꞈ neh sehꞈ-euˬ deuˬ laꞈ kʼoeˇ, Haˬmeˬdaˬtaˬ-euˬ aˬ li pyeuꞈ-eu aˬ yawꞈ maꞈ-ahˇ muiˇ-eu Haˬmaˬ-euˬ aˬ li tseˇ gʼaˬ ahˇ-eu meh. Aˬ yawꞈ maꞈ-aˬ, Paˬshaˬdaˬtaˬ, Daˬlaˬpoˬ, Aˬsaˇpaˬdaˇ, Pawˇlaˬdaˇ, Aˬdaˬliˇyaˆ, Aˬliˇdaˬdaˇ, Paˬmaˆshaˬtaˬ, Aˬliˇsaiˇ, Aˬliˇdaiˇ hawˇ-eu Baiˬzaˬdaˬ heu deuˬ meh. Yuˇdaˆ tsawˇ haˬ deuˬ kʼoeˇ loꞈ-ehˇ tsawˇ haˬ sehꞈ-euˬ kʼawꞈ, myawˬ maˬ yuˇ geuꞈ nehˬ-a.

¹¹ Aˬ yawꞈ ngeh nah-ahˇ neh, Suˇsaˬ meuˬ laꞈ kʼoeˇ tsawˇ haˬ aˇ myaˆ gʼaˬ sehꞈ-euˬ gaˇ kawˆ sahˬ paˬ-ahˇ gaˬ keuˆ leˇ-euˬ meh.

¹² Sahˬ paˬ miˬ zaˬ Iˇsaˬtaˆ-ahˇ sahˬ paˬ ehˇ nehˬ-eu, “Suˇsaˬ meuˬ laꞈ kʼoeˇ tehꞈ-ehˇ Yuˇdaˆ tsawˇ haˬ deuˬ neh sehꞈ-euˬ tsawˇ haˬ deuˬ Haˬmaˬ-euˬ aˬ li tseˇ li ahˇ leˇ-ehˇ ngaˬ yaˇ gʼaˬ byah laˇ taˬ-euˬ meh. Nui paw nui gaˇ aˇ myaˆ gʼaˬ sehꞈ-euˬ maˬ paˇ ehˇ nya ngaˇ. Nymˬ-mˇ nawˇ aˬ jeˬ paˇ mawꞈ te. Nawˇ kʼaˇ mawꞈ-eu jeˬ za tehꞈ-a. Nawˇ aˬ jeˬ mawꞈ-eu nya lehˇ ehˇ-awˬ. Nawˇ kʼaˇ geuꞈ mawꞈ-eu jeˬ ngaˇ biꞈ ma.”

¹³ Iˇsaˬtaˆ ehˇ-eu, “Sahˬ paˬ-oˇ, nawˇ nui ma tsaˬ naˇ, Yuˇdaˆ tsawˇ haˬ deuˬ iˬ nah mˇ-euˬ loꞈ-ehˇ ni shawˬ nah paˇ bi mˇ poˆ-eu a kawˬ-aˬ biꞈ nehˬ-awˬ. Kʼoeˇ naˇ, Haˬmaˬ-euˬ aˬ li kʼoeˇ tseˇ gʼaˬ-ahˇ tsawˇ haˬ paꞈ gʼeu sehꞈ-eu kʼawˇ zeuˇ-ahˇ bi paꞈ gʼeu-awˬ lehˇ dawˬ biꞈ-awˬ.”

¹⁴ Iˇsaˬtaˆ neh ehˇ-euˬ loꞈ-ehˇ bi jahˇ-eu gʼaˇ duˬ sahˬ paˬ dawˬ biꞈ-awˇ, Suˇsaˬ meuˬ doe ni bi tsaꞈ gaˬ doe-iˇ-euˬ meh. Haˬmaˬ-euˬ aˬ li kʼoeˇ tseˇ gʼaˬ-euˬ gʼawˇ mawˇ-ahˇ kʼawꞈ, tsawˇ haˬ dawˬ tawˆ luꞈ mawˇ gaˇ byaˬ taˬ-euˬ meh.

¹⁵ Aˬdaˬlaˇ ba la tseˇ oeˬ nah-ahˇ Suˇsaˬ meuˬ-ahˇ jawˇ-eu Yuˇdaˆ tsawˇ haˬ deuˬ tiˬ gaˇ uiˬ leˇ-awˇ, meuˬ laꞈ kʼoeˇ tsawˇ haˬ smˬ yaˇ gʼaˬ paˇ sehꞈ-euˬ meh. Ehˇ kʼawꞈ, aˬ yawꞈ maꞈ myawˬ maˬ yuˇ geuꞈ nehˬ-a.

¹⁶ Miˇ kʼahˬ nui deuˬ doe ni jawˇ-eu Yuˇdaˆ tsawˇ haˬ deuˬ kʼawꞈ, aˇ muˇ muˇ leˇ muˇ leˇ-ehˇ, aˬ cawˬ tsawˇ jeuˬ neh maˬ bi sehꞈ-eu gʼaˇ duˬ lehˬ hmˬ taˬ-euˬ meh. Tsawˇ haˬ shiꞈ muiˇ ngaˬ heˇ gʼaˬ-ahˇ sehꞈ-eu laꞈ kʼoeˇ, aˬ cawˬ tsawˇ jeuˬ neh aˬ yawꞈ maꞈ-ahˇ maˬ bi sehꞈ ni aˬ yawꞈ maꞈ laˆ dzeuˇ-euˬ meh. Aˬ yawꞈ maꞈ tsawˇ haˬ kʼoeˇ loꞈ-ehˇ sehꞈ kʼawꞈ, myawˬ gahˬ maˬ yuˇ geuꞈ-a.

¹⁷ Aˬdaˬlaˬ ba la tseˇ smˬ nah ngeh nah-ahˇ, aˬ yawꞈ maꞈ kʼoeˇ loꞈ-ehˇ jahˇ-euˬ meh. Tseˇ oeˬ nah tiˬ nah keuˆ laˇ ngeh, aˬ yawꞈ maꞈ tsawˇ haˬ maˬ paˇ sehꞈ ni, byawˬ gʼa-awˇ nah lah lah-euˬ meh.

¹⁸ Suˇsaˬ meuˬ-ahˇ jawˇ-eu Yuˇdaˆ tsawˇ haˬ deuˬ-aˬ, tseˇ ngaˬ nah ngeh nah-ahˇ hawˇ-eu nah lah lah-euˬ meh. Aˬ jeˬ miˇ neh ehˇ naˇ, tseˇ smˬ nah hawˇ-eu tseˇ oeˬ nah-ahˇ, aˬ yawꞈ maꞈ-ahˇ muiˇ-eu deuˬ-ahˇ aˬ yawꞈ ma ꞈsehꞈ-awˇ, tseˇ ngaˬ nah ngeh nah hawˇ-eu maˬ sehꞈ ni naˬ-euˬ meh.

¹⁹ Kʼoeˇ miˇ neh, meuˬ yaw nyiˇ deuˬ-ahˇ jawˇ-eu Yuˇdaˆ tsawˇ haˬ deuˬ-aˬ, Aˬdaˬlaˬ ba la tseˇ oeˬ nah tiˬ nah-ahˇ laˬ kʼaˬ cehˇ-awˇ lah-eu daw-eu aˇ nah lehˇ sawˇ taˬ-awˇ, dzaˬ byawˬ dawˇ byawˬ byawˬ-awˇ, tiˬ gʼaˬ tiˇ gʼaˬ dzaˬ dzaˬ dawˇ dawˇ laꞈ sawˬ biꞈ-euˬ meh.

Puˬlmˬ bawˬ-iˬ

^20-21 Pyeuꞈ laˇ-euˬ gaˇ kawˆ kʼoeˇ deuˬ dawˬ tawˆ luꞈ-ahˇ Mawˬdaˬkehˇ boꞈ ahˇ taˬ-awˇ, yawˬ kʼoꞈ na luꞈ Aˬdaˬlaˬ ba la tseˇ oeˬ nah hawˇ-eu tseˇ ngaˬ nah-ahˇ lah-eu daw-eu gʼaˇ duˬ, sahˬ paˬ Dzeuˬsehˆ uˆ lahˇ-eu miˇ kʼahˬ doe ni kʼaˇ jawˇ-eu Yuˇdaˆ tsawˇ haˬ deuˬ-ahˇ sahˬ boꞈ boꞈ ahˇ nehˬ-euˬ meh.

²² Aˇ nah kʼoeˇ nyiˬ nah-ahˇ Yuˇdaˆ tsawˇ haˬ deuˬ aˬ yawꞈ maꞈ-ahˇ muiˇ-eu deuˬ-euˬ laꞈ-ahˇ neh ya buˬ ya law-iˇ-awˇ, ba la kʼoeˇ siˬ laꞈ kʼoeˇ noeˬ shaˬ noeˬ zahˬ-eu aˇ yamˬ kʼoeˇ yamˬ, laˬ kʼaˬ cehˇ nui saˇ za-eu aˇ yamˬ pyeuꞈ laˇ-euˬ meh. Aˇ nah kʼoeˇ nyiˬ nah-ahˇ bawˬ-iˬ gʼeh-awˇ dzaˬ taꞈ dawˇ taꞈ-eu laꞈ kʼoeˇ, tiˬ gʼaˬ tiˇ gʼaˬ dzaˬ dzaˬ dawˇ dawˇ laꞈ sawˬ biꞈ taꞈ-awˇ, shaˬ-eu zahˬ-eu tsawˇ haˬ deuˬ-ahˇ caw ba nehˬ-awˬ lehˇ Yuˇdaˆ tsawˇ haˬ deuˬ-ahˇ ehˇ nehˬ-euˬ meh.

²³ Mawˬdaˬkehˇ neh kʼoeˇ loꞈ-ehˇ mehˬ nehˬ tsoˆ nehˬ-euˬ dawˬ-ahˇ Yuˇdaˆ tsawˇ haˬ deuˬ caw teh-awˇ mˇ-eu laꞈ kʼoeˇ, aˬ yawꞈ kʼoꞈ yawꞈ aˇ yamˬ kʼoeˇ yamˬ-ahˇ bawˬ-iˬ gʼeh-eu zahˇ sahˇ kʼoꞈ pyeuꞈ doˆ laˇ-euˬ meh.

²⁴ Aˬgaˆ aˇ jeuˬ Haˬmeˬdaˬtaˬ-euˬ aˬ li pyeuꞈ-eu Yuˇdaˆ tsawˇ haˬ-ahˇ muiˇ-eu Haˬmaˬ gʼaˬ Puˬlmˬ lehˇ kuˇ-eu mehˇ beuˬ-eu laꞈ kʼoeˇ, Yuˇdaˆ tsawˇ haˬ deuˬ-ahˇ sehꞈ-eu aˇ nah tseˇ-euˬ meh. Yuˇdaˆ tsawˇ haˬ deuˬ-ahˇ sehꞈ byoˆ jiˇ-eu lehˇ aˬ yawˬ lehˬ hmˬ-euˬ meh.

²⁵ Ehˇ kʼawꞈ, Iˇsaˬtaˆ gʼaˬ sahˬ paˬ jawˇ gaˇ le ngeh, sahˬ paˬ dawˬ biꞈ-awˇ sahˬ boꞈ bi pyehˬ gʼeh-eu laꞈ kʼoeˇ, Haˬmaˬ neh Yuˇdaˆ tsawˇ haˬ deuˬ-ahˇ jahˇ coeˬ nehˬ-eu lehˇ lehˬ hmˬ taˬ-euˬ jeˬ, Haˬmaˬ-euˬ uˬ duˬ-ahˇ paˇ bi keuˆ le-euˬ meh.

²⁶ Kʼoeˇ miˇ neh, lah-eu daw-eu aˇ nah kʼoeˇ nyiˬ nah-ahˇ Puˬlmˬ lehˇ kuˇ-eu meh. Mawˬdaˬkehˇ neh boꞈ-euˬ sahˬ boꞈ kʼoeˇ taꞈ hawˇ-eu aˬ yawꞈ maꞈ kʼoeˇ taˆ keuˆ le-euˬ yawˬ jeˬ na luꞈ baˬ da neh,

²⁷ Yuˇdaˆ tsawˇ haˬ deuˬ yawˬ ha-euˬ gʼaˇ duˬ maˬ ehˇ, zaˬ deuˬ uˆ deuˬ-euˬ ziˇ gʼaˇ duˬ maˬ ehˇ, Yuˇdaˆ tsawˇ haˬ kʼaˇ pyeuꞈ laˇ-euˬ aˬ cawˬ tsawˇ jeuˬ deuˬ gʼaˇ duˬ maˬ ehˇ, aˬ yawꞈ kʼoꞈ yawꞈ aˇ nah kʼoeˇ nyiˬ nah keuˆ laˇ ngeh, aˇ yamˬ tsaˬ tsaˬ ni Mawˬdaˬkehˇ neh mehˬ taˬ tsoˆ taˬ-euˬ loꞈ-ehˇ lah-eu daw-eu gʼaˇ duˬ, zahˇ sahˇ kʼoꞈ taˬ-euˬ meh.

²⁸ Aˬ kaˇ keuˆ le-eu ziˇ yawˬ ziˇ na luꞈ laꞈ kʼoeˇ, Yuˇdaˆ tsawˇ haˬ nymˇ jiˇ yawˬ jiˇ na luꞈ, miˇ kʼahˬ aˬ geu kʼahˬ hawˇ-eu meuˬ aˬ geu meuˬ-ahˇ jawˇ-eu maˬ kaˬ, Puˬlmˬ bawˬ-iˬ gʼeh-eu aˇ nah kʼoeˇ nyiˬ nah-ahˇ aˬ myah luꞈ ya noeˬ keuˆ meh lehˇ, zahˇ sahˇ kʼoꞈ taˬ-euˬ meh.

²⁹ Aˬbiˇheˬlaˆ-euˬ aˬ buˇ pyeuꞈ-eu sahˬ paˬ miˬ zaˬ Iˇsaˬtaˆ gʼaˬ kʼawꞈ, Mawˬdaˬkehˇ nehˬ-ehˇ tiˬ kawˆ loꞈ-ehˇ, yaw beh Mawˬdaˬkehˇ neh boꞈ taˬ-euˬ Puˬlmˬ bawˬ-iˬ gaˇ kawˆ sahˬ boꞈ kʼoeˇ taꞈ-ahˇ, aˬ yawꞈ-euˬ baoˬ dawˬ tawˆ luꞈ zmˬ-awˇ tiˬ poˆ paˇ boꞈ tehˬ-euˬ meh.

³⁰ Sahˬ boꞈ kʼoeˇ taꞈ-aˬ, Yuˇdaˆ tsawˇ haˬ dawˬ tawˆ luꞈ-ahˇ boꞈ nehˬ-euˬ sahˬ boꞈ tiˬ taꞈ pyeuꞈ-awˇ, sahˬ paˬ Dzeuˬsehˆ uˆ lahˇ-eu miˇ kʼahˬ tiˬ yaˇ nyiˬ tseˇ shiꞈ kʼahˬ luꞈ-ahˇ pyehˬ byah gʼeh-euˬ meh. Sahˬ boꞈ kʼoeˇ taꞈ laꞈ kʼoeˇ nui saˇ oꞈ-eu jeˬ Yuˇdaˆ tsawˇ haˬ deuˬ kʼoeˇ taˆ keuˆ le luꞈ-uˇ lehˇ boꞈ taˬ-euˬ meh.

³¹ Kʼoeˇ uˬ taꞈ, aˬ yawꞈ maꞈ neh zahˇ sahˇ kʼoꞈ taˬ taˬ-euˬ, maˬ dzaˬ maˬ dawˇ ni ya lah ya daw-eu aˇ yamˬ hawˇ-eu tsawˇ ngoeˇ ya ngoeˇ-eu aˇ yamˬ baw-eu loꞈ-ehˇ, Puˬlmˬ bawˬ-iˬ gʼeh-eu aˇ nah kʼoeˇ nyiˬ nah-ahˇ, aˬ yawꞈ maꞈ hawˇ-eu aˬ kaˇ aˬ yawꞈ maꞈ-euˬ zaˬ deuˬ uˆ deuˬ aˇ yamˬ tsaˬ ni ya lah ya daw-eu gʼaˇ duˬ mehˬ taˬ tsoˆ taˬ-euˬ meh. Mawˬdaˬkehˇ hawˇ-eu sahˬ paˬ miˬ zaˬ Iˇsaˬtaˆ neh kʼoeˇ loꞈ-ehˇ mehˬ taˬ tsoˆ taˬ-euˬ jeˬ pyeuꞈ-eu meh.

³² Puˬlmˬ bawˬ-iˬ zahˇ sahˇ kʼoꞈ-ahˇ taꞈ leˇ-awˇ, Iˇsaˬtaˆ neh ziꞈ dah ni mehˬ tsaˬ tsoˆ yaꞈ-euˬ gaˇ kawˆ, sahˬ boꞈ laꞈ kʼoeˇ boꞈ ahˇ taˬ-euˬ meh.