Iˇsaˬtaˆ 8 - Akha

Yuˇdaˆ tsawˇ haˬ deuˬ aˬ cawˬ-ahˇ jahˇ kʼoꞈ nya meh lehˇ dawˬ biꞈ-euˬ

¹ Kʼoeˇ ngeh nah-ahˇ, Yuˇdaˆ tsawˇ haˬ deuˬ-ahˇ muiˇ-eu gʼaˬ pyeuꞈ-eu Haˬmaˬ-euˬ pyuˇ shuiˇ myawˬ gahˬ dawˬ tawˆ luꞈ, sahˬ paˬ Dzeuˬsehˆ neh sahˬ paˬ miˬ zaˬ Iˇsaˬtaˆ-ahˇ biꞈ-euˬ meh. Mawˬdaˬkehˇ-aˬ, aˬ yawꞈ-euˬ aˬ yuiꞈ aˬ nyiˇ pyeuꞈ-eu gaˇ kawˆ sahˬ paˬ-ahˇ Iˇsaˬtaˆ neh ehˇ nehˬ-awˇ, kʼoeˇ ngeh neh naˇ Mawˬdaˬkehˇ gʼaˬ sahˬ paˬ-euˬ mehˬ shi le-eu a kawˬ-aˬ za-euˬ meh.

² Sahˬ paˬ-aˬ, Haˬmaˬ-euˬ laꞈ-ahˇ neh yuˇ kʼoꞈ-euˬ aˬ yawꞈ-euˬ jmˬ ahˇ-eu laꞈ behˬ kʼoeˇ hmˬ Mawˬdaˬkehˇ-ahˇ biꞈ-euˬ meh. Iˇsaˬtaˆ neh Mawˬdaˬkehˇ-ahˇ Haˬmaˬ-euˬ pyuˇ shuiˇ myawˬ gahˬ deuˬ-ahˇ bi haw bi pyaˆ-euˬ meh.

³ Kʼoeˇ naˇ, Iˇsaˬtaˆ gʼaˬ sahˬ paˬ-euˬ aˬ kuiˇ dawˬ peh ga byaˆ-awˇ, ngoeˇ ngoeˇ-ehˇ sahˬ paˬ-ahˇ dawˬ tiˬ poˆ paˇ ngehˬ cawˬ-euˬ meh. Aˬgaˆ -euˬ aˇ jeuˬ Haˬmaˬ neh Yuˇdaˆ tsawˇ jeuˬ kʼoeˇ taˆ mˇ taˬ-euˬ yaw haiˬ jeˬ-ahˇ laˆ naˬ nehˬ laꞈ lehˇ sahˬ paˬ-ahˇ aˬ yawꞈ shaˇ-euˬ meh.

⁴ Kʼoeˇ ngeh, sahˬ paˬ aˬ yawꞈ-ahˇ shuiˇ gawˬ yoeˬ cawˬ nehˬ-awˇ, aˬ yawꞈ tuˇ laˇ-awˇ heu loꞈ-ehˇ ehˇ-eu meh.

⁵ “Sahˬ paˬ-oˇ, nawˇ ngaˬ-ahˇ gʼawˬ shaˬ gaˬ-eu laꞈ kʼoeˇ, tsaˬ tehꞈ-a lehˇ noeˬ-awˇ mˇ nehˬ laꞈ nya naˇ, Aˬgaˆ aˇ jeuˬ Haˬmeˬdaˬtaˬ-euˬ aˬ li Haˬmaˬ neh miˇ kʼahˬ kʼahˬ ma heu kʼahˬ laꞈ kʼoeˇ kʼaˇ jawˇ-eu Yuˇdaˆ tsawˇ haˬ dawˬ tawˆ luꞈ-ahˇ sehꞈ jiˇ-awˬ lehˇ miˇ kʼahˬ doe ni pyehˬ taˬ-euˬ dawˬ kʼoeˇ dawˬ-ahˇ laˆ tsoeˬ-eu dawˬ tiˬ poˆ pyehˬ neh laꞈ sheˇ.

⁶ Ngaˬ-euˬ tsawˇ jeuˬ kʼoeˇ taˆ luˬ-iˇ seˇ-iˇ-eu jeˬ keuˆ le-awˇ, ngaˬ-euˬ aˬ yuiꞈ aˬ nyiˇ deuˬ bi sehꞈ jiˇ-eu keuˆ le-euˬ miˇ neh ngaˬ-ahˇ maˬ jawˇ tehˬ coeˇ nya.”

⁷ Kʼoeˇ naˇ, sahˬ paˬ miˬ zaˬ Iˇsaˬtaˆ hawˇ-eu Yuˇdaˆ tsawˇ haˬ Mawˬdaˬkehˇ aˬ nyaꞈ-ahˇ sahˬ paˬ Dzeuˬsehˆ heu loꞈ-ehˇ ehˇ nehˬ-euˬ meh. “Haw sheˇ. Yuˇdaˆ tsawˇ haˬ deuˬ kʼoeˇ taˆ yaw haiˬ jeˬ mˇ-euˬ baˬ da neh Haˬmaˬ-ahˇ bi paꞈ gʼeu sehꞈ-awˇ, aˬ yawꞈ-euˬ pyuˇ shuiˇ myawˬ gahˬ deuˬ Iˇsaˬtaˆ-ahˇ ngaˇ biꞈ-euˬ ma.

⁸ Ehˇ kʼawꞈ, sahˬ paˬ-euˬ jmˬ diˬ-awˇ sahˬ paˬ-euˬ tsawˇ myahˇ-ahˇ gʼoe-eu laꞈ kʼoeˇ miˇ kʼahˬ-ahˇ bi gaˬ doe taˬ-euˬ gaˇ kawˆ tiˬ hmˬ-ahˇ-aˬ, maˬ paˇ laˆ paˇ nya meh. Ehˇ kʼawꞈ, naw nyaꞈ ngaˬ-euˬ tsawˇ myahˇ-ahˇ gʼoe-awˇ ngaˬ-euˬ jmˬ diˬ-eu laꞈ kʼoeˇ Yuˇdaˆ tsawˇ haˬ deuˬ-ahˇ kʼaˇ boꞈ nehˬ mawꞈ-eu jeˬ boꞈ nehˬ-awˬ.”

⁹ Ba la smˇ siˬ tiˬ siˬ pyeuꞈ-eu Siˬbaˬ ba la nyiˬ tseˇ smˬ nah-ahˇ heu loꞈ-ehˇ jahˇ-euˬ meh. Sahˬ paˬ-euˬ sahˬ boꞈ boꞈ-eu tsawˇ haˬ deuˬ-ahˇ Mawˬdaˬkehˇ kuˇ uiˬ-awˇ, Gaˬlaˬnaˆ miˇ kʼahˬ-ahˇ neh Suˬdaˬ miˇ kʼahˬ-ahˇ keuˆ ni jaˆ-eu miˇ kʼahˬ tiˬ yaˇ nyiˬ tseˇ shiꞈ kʼahˬ laꞈ kʼoeˇ kʼaˇ jawˇ-eu Yuˇdaˆ tsawˇ haˬ deuˬ hawˇ-eu, miˇ kʼahˬ-ahˇ uˆ lahˇ-eu sahˬ paˬ sahˬ ma deuˬ hawˇ-eu yaw huiˬ yaw mahˇ dawˬ tawˆ luꞈ jawˇ gaˇ, aˬ yawꞈ neh kʼaˇ ehˇ-euˬ dawˬ deuˬ bi boꞈ ahˇ gʼeh-euˬ meh. Miˇ kʼahˬ aˬ yawꞈ kʼahˬ yawꞈ laꞈ kʼoeˇ kʼaˇ zmˬ luꞈ-eu dawˬ-ahˇ neh bi boꞈ-awˇ, Yuˇdaˆ tsawˇ haˬ deuˬ-ahˇ Yuˇdaˆ sahˬ boꞈ boꞈ ahˇ nehˬ-euˬ meh.

¹⁰ Mawˬdaˬkehˇ-aˬ, sahˬ paˬ Dzeuˬsehˆ-euˬ tsawˇ myahˇ-ahˇ gʼoe-eu laꞈ kʼoeˇ, kʼoeˇ loꞈ-ehˇ bi boꞈ-awˇ, sahˬ paˬ-euˬ jmˬ diˬ-euˬ meh. Sahˬ boꞈ kʼoeˇ deuˬ-ahˇ, sahˬ paˬ-euˬ mahˬ kuˆ-ahˇ uˇ-eu kawˇ dui dui-eu mahˬ deuˬ dziˬ-awˇ bi sha-iˇ-euˬ meh.

¹¹ Sahˬ boꞈ kʼoeˇ taꞈ laꞈ kʼoeˇ heu loꞈ-ehˇ boꞈ taˬ-euˬ meh. “Meuˬ aˬ yawꞈ meuˬ yawꞈ-ahˇ jawˇ-eu Yuˇdaˆ tsawˇ haˬ deuˬ yawˬ ha tsawˇ jeuˬ-ahˇ yawˬ ha deuˆ piˇ-eu gʼaˇ duˬ, aˇ muˇ muˇ-awˇ lehˬ hmˬ taˬ nya meh. Miˇ kʼahˬ aˬ geu kʼahˬ-ahˇ jawˇ-eu tsawˇ jeuˬ aˬ geu jeuˬ maˬ kaˬ, guiˇ deuˆ-eu keu ka baꞈ-awˇ aˬ yawꞈ maꞈ-ahˇ deuˆ laˇ naˇ, aˬ yawꞈ maꞈ kʼawꞈ paˇ deuˆ ceh ceh-eu laꞈ kʼoeˇ, tsawˇ haˬ kʼoeˇ deuˬ hawˇ-eu aˬ yawꞈ maꞈ-euˬ miˬ sawˇ zaˬ deuˬ tiˬ gʼaˬ-iˬ maˬ bi dzeuˇ-iˇ ni sehꞈ-awˇ, pyuˇ shuiˇ myawˬ gahˬ deuˬ yuˇ geuꞈ nya meh.

¹² Ba la tseˇ nyiꞈ siˬ tiˬ siˬ pyeuꞈ-eu Aˬdaˬlaˇ ba la tseˇ smˬ nah, Yuˇdaˆ tsawˇ haˬ deuˬ-ahˇ ya sehꞈ meh lehˇ ehˇ taˬ-euˬ kʼoeˇ nah-ahˇ neh dahˬ beh-awˇ, sahˬ boꞈ heu taꞈ laꞈ kʼoeˇ kʼaˇ ehˇ taˬ-euˬ dawˬ deuˬ-ahˇ Paˇshaˇ miˇ kʼahˬ kʼahˬ lah ni ya caw teh meh.

¹³ Aˇ nah kʼoeˇ nah keuˆ laˇ ngeh, aˬ yawꞈ maꞈ-ahˇ sehꞈ laˇ-eu tsawˇ haˬ deuˬ-ahˇ deuˆ ceh ceh-eu gʼaˇ duˬ, Yuˇdaˆ tsawˇ haˬ deuˬ lehˬ hmˬ dah taˬ nya ni, sahˬ boꞈ kʼoeˇ taꞈ-ahˇ zahˇ dawˬ kʼoꞈ dawˬ tiˬ hmˬ loꞈ-ehˇ ya bi tsaꞈ gaˬ-awˇ, miˇ kʼahˬ yawˬ kʼahˬ na luꞈ-ahˇ jawˇ-eu tsawˇ haˬ yawˬ gʼaˬ na luꞈ-ahˇ ya bi gaˬ doe-iˇ meh.”

¹⁴ Sahˬ paˬ neh dawˬ biꞈ-euˬ loꞈ-ehˇ, mahˬ dziˬ-eu deuˬ sahˬ paˬ-euˬ dziˬ mahˬ deuˬ-ahˇ tsawˬ dziˬ leˇ-awˇ, mahˬ pyehˬ pyehˬ kawˇ dui dui-eu laꞈ kʼoeˇ, sahˬ boꞈ sha-euˬ meh. Aˬ cawˬ naˆ maˬ tseˇ huiˬ dzehˬ-eu meuˬ pyeuꞈ-eu Suˇsaˬ meuˬ meuˬ ma laꞈ kʼoeˇ kʼawꞈ, sahˬ boꞈ kʼoeˇ taꞈ bi gaˬ doe jiˇ-euˬ meh.

¹⁵ Mawˬdaˬkehˇ-aˬ, paˇ puiˇ hawˇ-eu paˇ pyuˇ keuˬ taˬ-euˬ sahˬ paˬ sahˬ ma deuˬ dm-eu pehˇ kʼahˬ dm-awˇ, shawˇ jehˆ ni gʼeh-eu saˬ paˇ neh guꞈ taˬ-euˬ neˇ tseuˆ ni gʼeh-eu pehˇ kʼahˬ pehˇ mahˇ dm daˆ-awˇ, muiˬ dui jaˬ dui dui-eu shuiˇ uˬ kʼoˆ kʼoˆ-awˇ, sahˬ paˬ-euˬ nymˇ-ahˇ neh doˆ-iˇ ngeh, Suˇsaˬ meuˬ-euˬ gaˇ ma doe ni laˬ kʼaˬ cehˇ-awˇ guˇ-eu lawꞈ lawꞈ-ehˇ jaˆ-eu meh.

¹⁶ Aˇ yamˬ kʼoeˇ yamˬ-aˬ, Yuˇdaˆ tsawˇ haˬ gʼaˇ duˬ laˬ kʼaˬ cehˇ-awˇ nui saˇ za-eu uˬ taꞈ, byawˬ dui dui-awˇ nui kʼahˇ shiˇ dui dui-eu, gʼaˬ leˇ-euˬ aˇ yamˬ pyeuꞈ-eu meh.

¹⁷ Sahˬ paˬ-euˬ dawˬ kʼaˇ gaˬ keuˆ-iˇ-euˬ meuˬ yawˬ meuˬ na luꞈ laꞈ kʼoeˇ, Yuˇdaˆ tsawˇ haˬ deuˬ dzaˬ byawˬ dawˇ byawˬ byawˬ-awˇ nah lah lah-euˬ meh. Aˬ cawˬ tsawˇ jeuˬ gʼawˬ mya ni Yuˇdaˆ tsawˇ haˬ-ahˇ guˆ laˇ-awˇ, Yuˇdaˆ tsawˇ jeuˬ geuꞈ-euˬ meh.