Iˇsaˬtaˆ 4 - Akha

Iˇsaˬtaˆ-ahˇ Mawˬdaˬkehˇ laꞈ jeuˬ shaˇ-euˬ

¹ Pyeuꞈ laˇ-euˬ gaˇ kawˆ kʼoeˇ deuˬ dawˬ tawˆ luꞈ-ahˇ Mawˬdaˬkehˇ ya siˬ ngeh, noeˬ shaˬ noeˬ zahˬ-eu laꞈ kʼoeˇ aˬ yawꞈ dm luꞈ-eu mehˬ tsoeˬ cehˬ pyaˬ-euˬ meh. Kʼoeˇ naˇ, guˬ daˇ pehˇ zeuˇ mehˬ tsoeˬ dm-awˇ, uˬ duˬ-ahˇ kʼaˬ lehˇ tawˆ daˆ-awˇ, meuˬ gʼahˇ lahˇ ceh ngoeˇ ngoeˇ-ahˇ cah-euˬ meh.

² Sahˬ paˬ-euˬ hawˇ nymˇ gʼoˆ kʼehˬ-ahˇ aˬ yawꞈ cah keuˆ-awˇ naˬ leˇ-euˬ meh. Aˬ jeˬ miˇ neh ehˇ naˇ, guˬ daˇ pehˇ zeuˇ mehˬ tsoeˬ dm luꞈ-eu tsawˇ haˬ kʼoeˇ gaˇ maˬ ya uˇ leˇ-a.

³ Sahˬ paˬ-euˬ dawˬ gaˬ keuˆ-iˇ-euˬ miˇ kʼahˬ yawˬ kʼahˬ na luꞈ laꞈ kʼoeˇ, Yuˇdaˆ tsawˇ haˬ deuˬ yaw kʼaˆ-ehˇ guˇ guˇ-ehˇ ngoeˇ luꞈ-eu meh. Aˬ yawꞈ maꞈ maˬ dzaˬ maˬ dawˇ ni ngoeˇ ngoeˇ-ehˇ jawˇ-awˇ, myaˬ tiˬ paˆ guˬ daˇ pehˇ zeuˇ mehˬ tsoeˬ dm-awˇ, kʼaˬ lehˇ tsahˬ-ahˇ joe-euˬ meh.

⁴ Iˇsaˬtaˆ-euˬ zaˬ miˬ zaˬ zaˬ kʼaˆ deuˬ hawˇ-eu sahˬ paˬ-euˬ zaˬ miˬ zaˬ deuˬ-ahˇ haw-eu pyaˆ-eu deuˬ, Mawˬdaˬkehˇ kʼoeˇ loꞈ-ehˇ gʼeh luꞈ-eu gaˇ kawˆ Iˇsaˬtaˆ-ahˇ ehˇ nehˬ ngeh, aˬ yawꞈ nui ma cawˆ dui dui-euˬ meh. Mawˬdaˬkehˇ guˬ daˇ pehˇ zeuˇ mehˬ tsoeˬ lehˆ-awˇ bi dm paˇ-eu gʼaˇ duˬ aˬ yawꞈ neh mehˬ tsoeˬ bi biꞈ ha-iˇ kʼawꞈ, Mawˬdaˬkehˇ maˬ dm paˇ-a.

⁵ Kʼoeˇ naˇ, Iˇsaˬtaˆ-aˬ, aˬ yawꞈ-euˬ zaˬ kʼaˆ bi geuꞈ-eu gʼaˇ duˬ sahˬ paˬ neh kʼehˇ-euˬ sahˬ paˬ-euˬ zaˬ miˬ zaˬ deuˬ-ahˇ haw-eu pyaˆ-eu Haˬtehˆ lehˇ myahˇ-euˬ gʼaˬ-ahˇ, Mawˬdaˬkehˇ jawˇ gaˇ kʼehˇ gʼeh-awˇ, aˬ jeˬ miˇ neh kʼoeˇ loꞈ-ehˇ noeˬ shaˬ luꞈ-eu gaˇ kawˆ bi pyehˆ tseˇ duˬ-euˬ meh.

⁶ Sahˬ paˬ-euˬ hawˇ nymˇ gʼoˆ kʼehˬ-ahˇ jaˆ-eu meuˬ-euˬ pu kaˬ-ahˇ, Mawˬdaˬkehˇ jawˇ gaˇ Haˬtehˆ iˇ-euˬ meh.

⁷ Aˬ yawꞈ kʼoeˇ taˆ kʼaˇ keuˆ le taˬ-euˬ jeˬ dawˬ tawˆ luꞈ hawˇ-eu, Yuˇdaˆ tsawˇ haˬ dawˬ tawˆ luꞈ bi sehꞈ jiˇ naˇ sahˬ paˬ-euˬ pyuˇ cehˇ jiˇ-ahˇ pyuˇ aˇ myaˆ ni bi lahˬ laˇ ma lehˇ sahˬ paˬ-ahˇ Haˬmaˆ neh kamˬ taˬ-euˬ gaˇ kawˆ, Haˬtehˆ-ahˇ Mawˬdaˬkehˇ dzawˇ nehˬ-euˬ meh.

⁸ Yuˇdaˆ tsawˇ haˬ deuˬ-ahˇ sehꞈ-awˬ lehˇ dawˬ biꞈ-awˇ, Suˇsaˬ meuˬ-ahˇ pyehˬ taˬ-euˬ sahˬ boꞈ tiˬ taꞈ Haˬtehˆ-ahˇ aˬ yawꞈ mehˬ nehˬ-euˬ meh. Sahˬ boꞈ kʼoeˇ taꞈ Iˇsaˬtaˆ jawˇ gaˇ yuˇ gʼeh nehˬ-awˇ, kʼaˇ pyeuꞈ laˇ-euˬ gaˇ kawˆ dawˬ tawˆ luꞈ dzawˇ mehˬ nehˬ-awˇ, aˬ yawꞈ-euˬ tsawˇ jeuˬ-ahˇ maˬ sehꞈ ni gʼawˬ shaˬ bi gaˬ nehˬ-eu gʼaˇ duˬ sahˬ paˬ-ahˇ shaˇ ju-iˇ-awˬ lehˇ Iˇsaˬtaˆ-ahˇ shaˇ leˇ-eu gʼaˇ duˬ, Haˬtehˆ-ahˇ Mawˬdaˬkehˇ ehˇ nehˬ-euˬ meh.

⁹ Mawˬdaˬkehˇ neh kʼaˇ ehˇ nehˬ-euˬ yawˬ jeˬ na luꞈ, Iˇsaˬtaˆ-ahˇ Haˬtehˆ dzawˇ mehˬ nehˬ leˇ-euˬ meh.

¹⁰ Kʼoeˇ naˇ, Iˇsaˬtaˆ neh Haˬtehˆ-ahˇ mehˬ-awˇ, Mawˬdaˬkehˇ-ahˇ heu loꞈ-ehˇ paˇ bi ehˇ kʼoꞈ nehˬ-iˇ-euˬ meh.

¹¹ “Zaˬ miˬ zaˬ maˬ ehˇ, kʼaˬ dzeˇ zaˬ maˬ ehˇ, tsawˇ haˬ aˬ geu gʼaˬ maˬ kaˬ, sahˬ paˬ neh maˬ bi kuˇ-euˬ gaˇ sahˬ paˬ jawˇ-eu laꞈ kʼoeˇ lawˆ-ahˇ uˇ leˇ naˇ, sehꞈ gaˇ ya daˬ-eu meh. Zahˇ sahˇ kʼoꞈ kʼoeˇ loꞈ-ehˇ jaˆ-eu gaˇ kawˆ-ahˇ, sahˬ paˬ-ahˇ nui noeˬ nui duˇ biꞈ-eu yaw huiˬ tiˬ gʼaˬ-ahˇ neh, miˇ kʼahˬ zaˬ tiˬ gʼaˬ-ahˇ keuˆ ni, huiˬ zaˬ nyiˇ zaˬ dawˬ tawˆ luꞈ siˬ nya luꞈ-eu meh. Kʼoeˇ loꞈ-ehˇ pyeuꞈ laˇ ngeh, maˬ bi sehꞈ ni dzeuˇ-iˇ nya-eu gaˇ kawˆ tiˬ kawˆ tehꞈ-ehˇ jaˆ-eu meh. Sahˬ paˬ neh aˬ yawꞈ-euˬ shuiˇ gawˬ yoeˬ cawˬ nehˬ-euˬ gʼaˬ-aˬ, maˬ bi sehꞈ ni ya buˬ-iˇ-eu meh. Ngaˬ-euˬ gʼawˇ mawˇ sahˬ paˬ jawˇ gaˇ ya le-eu gʼaˇ duˬ smˬ tseˇ nah ca-a siˬ.”

¹² Iˇsaˬtaˆ-euˬ dawˬ-ahˇ Mawˬdaˬkehˇ ya gaˬ gʼaˬ ngeh,

¹³ heu loꞈ-ehˇ paˇ bi ehˇ kʼoꞈ leˇ-euˬ meh. “Nawˇ-aˬ sahˬ paˬ-euˬ nymˇ laꞈ kʼoeˇ ya jawˇ-eu miˇ neh, Yuˇdaˆ tsawˇ haˬ heu myaˆ ni gʼeh-eu laꞈ kʼoeˇ nawˇ tiˬ gʼaˬ ya law-iˇ ma lehˇ tehꞈ-ehˇ taˬ noeˬ.

¹⁴ Heu loꞈ-ehˇ keuˆ le teuˇ le-euˬ aˇ yamˬ-ahˇ nawˇ maˬ ngehˬ maˬ tmˇ ni jawˇ te lehˇ ngeuˇ naˇ, Yuˇdaˆ tsawˇ haˬ-ahˇ ngehˬ gʼeh dah teˬ-eu jeˬ mˬ kʼoeˇ taˆ neh oe-awˇ, aˬ yawꞈ maꞈ-ahˇ ka kʼoꞈ tehꞈ-a. Ehˇ kʼawꞈ, nawˇ gʼaˬ-aˬ ya shiˇ-awˇ, nawˬ da-euˬ tsuiꞈ dahˬ-iˇ tehꞈ-a. Ehˇ kʼawꞈ aˬ suˇ gʼaˬ ehˇ nya nmˇ. Heu loꞈ-ehˇ gʼeh-eu aˇ yamˬ aˇ law-ahˇ gaˇ dahˇ bi tsoeˬ-eu gʼaˇ duˬ nawˬ-ahˇ sahˬ paˬ-euˬ miˬ zaˬ bi pyeuꞈ laˇ-euˬ maˬ siˬ tawˇ.”

¹⁵ Iˇsaˬtaˆ gʼaˬ, Mawˬdaˬkehˇ-ahˇ heu loꞈ-ehˇ paˇ bi ehˇ nehˬ-iˇ-euˬ meh.

¹⁶ “Nawˇ iˇ-awˇ Suˇsaˬ meuˬ-ahˇ kʼaˇ jawˇ-eu Yuˇdaˆ tsawˇ haˬ dawˬ tawˆ luꞈ-ahˇ tiˬ gaˇ tehꞈ-ehˇ kuˇ uiˬ-awˇ, smˬ nah keuˆ ni tiˬ jeˬ-iˬ maˬ dzaˬ maˬ dawˇ ni lah-eu daw-eu laꞈ kʼoeˇ, ngaˬ-euˬ gʼaˇ duˬ guiˬ lahˬ shaˇ-awˬ. Ngaˇ hawˇ-eu ngaˬ-euˬ zaˬ kʼaˆ zaˬ miˬ zaˬ deuˬ kʼawꞈ, kʼoeˇ loꞈ-ehˇ lah ma. Kʼoeˇ naˇ, zahˇ sahˇ kʼoꞈ-ahˇ bahˬ kʼawꞈ ehˬ-ehˇ ngeuˇ-iˬ. Sahˬ paˬ jawˇ gaˇ ngaˇ le ma. Kʼoeˇ loꞈ-ehˇ mˇ-eu baˬ da neh ngaˇ ya shiˇ naˇ kʼawꞈ, nui kʼahˇ shiˇ ma.”

¹⁷ Kʼoeˇ naˇ, Mawˬdaˬkehˇ luˆ-iˇ-awˇ, Iˇsaˬtaˆ neh kʼaˇ ehˇ nehˬ-euˬ yawˬ jeˬ na luꞈ mˇ-iˇ-euˬ meh.