Iˇsaˬtaˆ 3 - Akha

Yuˇdaˆ tsawˇ haˬ deuˬ-ahˇ laˆ luˬ laˆ seˇ-eu lehˇ Haˬmaˬ leh jeh-euˬ

¹ Aˇ yamˬ ui cuiˆ myahˇ laˇ ngeh jawˇ, sahˬ paˬ Dzeuˬsehˆ-aˬ, Haˬmaˬ lehˇ kuˇ-euˬ gʼaˬ-ahˇ sahˬ paˬ-euˬ gaˇ mˇ-eu yaw huiˬ yaw mahˇ dawˬ tawˆ luꞈ kʼoeˇ taˆ, aˬ cawˬ naˆ maˬ tseˇ huiˬ-eu aˇ yaˬ biꞈ nehˬ-euˬ meh. Haˬmaˬ-aˬ, Aˬgaˆ -euˬ aˇ jeuˬ Haˬmeˬdaˬtaˬ-euˬ aˬ li pyeuꞈ-eu meh.

² Sahˬ paˬ-euˬ gaˇ kʼaˇ mˇ-eu yaw huiˬ yaw mahˇ dawˬ tawˆ luꞈ, Haˬmaˬ-euˬ mehˬ shi pawˬ tsuiꞈ pawˬ dmˬ dmˬ-awˇ uˬ duˬ tahˬ moꞈ-eu laꞈ kʼoeˇ, Haˬmaˬ-ahˇ yaw zeu ya baw nehˬ meh lehˇ sahˬ paˬ dawˬ biꞈ-euˬ meh. Mawˬdaˬkehˇ tiˬ gʼaˬ maˬ ngeuˇ naˇ, dawˬ tawˆ luꞈ kʼoeˇ loꞈ-ehˇ jahˇ-awˇ yaw zeu baw nehˬ-euˬ meh.

³ “Aˬ jeˬ miˇ neh sahˬ paˬ-euˬ dawˬ-ahˇ maˬ naˇ haˬ te” lehˇ, sahˬ paˬ-euˬ gaˇ mˇ-eu yaw huiˬ yaw mahˇ kʼoeˇ deuˬ aˬ yawꞈ-ahˇ ehˇ-eu meh.

⁴ Tiˬ nah saˇ-iˬ tiˬ nah aˬ yawꞈ maꞈ aˬ yawꞈ-ahˇ kʼoeˇ loꞈ-ehˇ ehˇ tehˇ tehˬ kʼawꞈ, Haˬmaˬ-ahˇ aˬ yawꞈ yaw zeu maˬ baw nehˬ ni, “Ngaˇ Yuˇdaˆ tsawˇ haˬ pyeuꞈ-eu miˇ neh, Haˬmaˬ-euˬ mehˬ shi uˬ duˬ tahˬ moꞈ-awˇ yaw zeu baw nehˬ-eu jeˬ maˬ mˇ kʼmˬ-a” lehˇ aˬ yawꞈ maꞈ-ahˇ ehˇ kʼoꞈ nehˬ-euˬ meh. Kʼoeˇ miˇ neh, Haˬmaˬ gʼaˬ Mawˬdaˬkehˇ-ahˇ iˬ baˇ pyehˬ nehˬ nga loˇ lehˇ haw-eu gʼaˇ duˬ, Mawˬdaˬkehˇ neh ehˇ-euˬ dawˬ kʼoeˇ, Haˬmaˬ-ahˇ aˬ yawꞈ maꞈ dzawˇ nehˬ leˇ-euˬ meh.

⁵ Mawˬdaˬkehˇ gʼaˬ aˬ yawꞈ mehˬ shi pawˬ tsuiꞈ pawˬ dmˬ dmˬ-awˇ uˬ duˬ tahˬ moꞈ-eu jeˬ maˬ mˇ lehˇ noeˬ tsehˆ taˬ-euˬ gaˇ Haˬmaˬ ya siˬ duˬ ngeh, nui ma pehˇ dui dui leˇ-euˬ meh.

⁶ Kʼoeˇ uˬ taꞈ, Mawˬdaˬkehˇ Yuˇdaˆ tsawˇ haˬ pyeuꞈ-eu gaˇ kawˆ aˬ yawꞈ paˇ ya siˬ duˬ ngeh, Mawˬdaˬkehˇ tiˬ gʼaˬ-ahˇ tehꞈ-ehˇ maˬ kehˬ nehˬ ni, Paˇshaˇ miˇ kʼahˬ kʼahˬ ma laꞈ kʼoeˇ jawˇ-eu Yuˇdaˆ tsawˇ haˬ dawˬ tawˆ luꞈ-ahˇ ya sehꞈ jiˇ ni leh jeh ma lehˇ noeˬ tsehˆ-euˬ meh.

⁷ Sahˬ paˬ Dzeuˬsehˆ uˆ lahˇ-eu tseˇ nyiꞈ kʼoꞈ tiˬ kʼoꞈ ba la yaw beh siˬ pyeuꞈ-eu Niˬsaˬ ba la-ahˇ, Haˬmaˬ aˬ yawꞈ neh noeˬ taˬ-euˬ jeˬ aˇ dahˬ beh-awˇ mˇ-eu gʼaˇ duˬ, Puˬlmˬ lehˇ kuˇ-eu mehˇ beuˬ-eu laꞈ kʼoeˇ, ba la aˇ siˬ hawˇ-eu aˇ nah tseˇ-eu gʼaˇ duˬ dawˬ biꞈ-awˇ bi tseˇ duˬ ngeh, ba la tseˇ nyiꞈ siˬ tiˬ siˬ pyeuꞈ-eu Aˬdaˬlaˇ ba la tseˇ smˬ nah tiˬ nah-ahˇ tsaˬ leˇ-euˬ meh.

⁸ Kʼoeˇ naˇ, sahˬ paˬ-ahˇ Haˬmaˬ heu loꞈ-ehˇ ehˇ nehˬ-euˬ meh. “Nawˬ-euˬ miˇ kʼahˬ kʼahˬ ma laꞈ kʼoeˇ jaˆ-eu miˇ kʼahˬ yawˬ kʼahˬ na luꞈ jawˇ doe jiˇ taˬ-euˬ tsawˇ jeuˬ tiˬ jeuˬ jawˇ meh. Aˬ yawꞈ maꞈ-aˬ, aˬ cawˬ tsawˇ jeuˬ-ahˇ maˬ duˇ-eu zahˇ sahˇ kʼoꞈ tawˬ luꞈ-eu meh. Kʼoeˇ uˬ taꞈ, nawˬ-euˬ miˇ kʼahˬ zahˇ sahˇ kʼoꞈ deuˬ-ahˇ kʼawꞈ aˬ yawꞈ maꞈ maˬ naˇ haˬ geuꞈ-eu miˇ neh, aˬ yawꞈ maꞈ-ahˇ tiˬ jeˬ-iˬ maˬ jahˇ nehˬ ni kʼoeˇ loꞈ-ehˇ bi jawˇ-eu-aˬ, nawˬ-euˬ gʼaˇ duˬ tiˬ pawꞈ-iˬ maˬ muiˬ-a.

⁹ Sahˬ paˬ nawˇ nui ma tsaˬ naˇ, tsawˇ haˬ kʼoeˇ deuˬ-ahˇ sehꞈ-awˬ lehˇ dawˬ biꞈ gʼeh-awˬ. Nawˇ kʼoeˇ loꞈ-ehˇ jahˇ naˇ, miˇ kʼahˬ-ahˇ uˆ lahˇ-eu gaˇ laꞈ kʼoeˇ bi zmˬ-eu gʼaˇ duˬ, sahˬ paˬ-euˬ pyuˇ cehˇ jiˇ laꞈ kʼoeˇ pyuˇ nyiˬ seh oeˬ heˇ jawꞈ-i bi lahˬ laˇ ma lehˇ ngaˇ kamˬ tsehˆ peuˬ ma.”

¹⁰ Sahˬ paˬ-aˬ, aˬ yawꞈ-euˬ dawˬ kʼaˇ biꞈ gʼeh ngeh jmˬ diˬ-euˬ aˬ yawꞈ-euˬ laꞈ behˬ lehˆ doˆ-awˇ, Yuˇdaˆ tsawˇ haˬ-ahˇ muiˇ-eu gʼaˬ pyeuꞈ-eu Aˬgaˆ-euˬ aˇ jeuˬ Haˬmeˬdaˬtaˬ-euˬ aˬ li Haˬmaˬ-ahˇ biꞈ nehˬ-euˬ meh.

¹¹ Haˬmaˬ-ahˇ aˬ yawꞈ ehˇ nehˬ-eu. “Tsawˇ haˬ kʼoeˇ deuˬ hawˇ-eu aˬ yawꞈ maꞈ-euˬ pyuˇ-aˬ, nawˬ-euˬ meh. Aˬ yawꞈ maꞈ-ahˇ nawˇ kʼaˇ jahˇ nehˬ mawꞈ-eu loꞈ-ehˇ jahˇ nehˬ-awˬ.”

¹² Kʼoeˇ naˇ, ba la yaw beh siˬ tseˇ smˬ nah-ahˇ, sahˬ paˬ-euˬ sahˬ boꞈ boꞈ-eu tsawˇ haˬ deuˬ-ahˇ Haˬmaˬ kuˇ uiˬ-awˇ, aˬ yawꞈ neh kʼaˇ ehˇ-euˬ loꞈ-ehˇ bi boꞈ-awˇ, miˇ kʼahˬ kʼoeˇ kʼahˬ laꞈ kʼoeˇ kʼaˇ ngehˬ luꞈ-eu tsawˇ jeuˬ aˬ yawꞈ jeuˬ yawꞈ-euˬ dawˬ-ahˇ neh paˇ bi boꞈ doˆ jiˇ-awˇ, miˇ kʼahˬ-ahˇ uˆ lahˇ-eu deuˬ hawˇ-eu yaw huiˬ yaw mahˇ dawˬ tawˆ luꞈ-ahˇ bi biꞈ ha doe-iˇ-euˬ meh. Sahˬ boꞈ kʼoeˇ-ahˇ sahˬ paˬ Dzeuˬsehˆ-euˬ tsawˇ myahˇ zmˬ-awˇ boꞈ-eu laꞈ kʼoeˇ, sahˬ paˬ-euˬ laꞈ behˬ neh jmˬ diˬ taˬ-euˬ meh.

¹³ Cehˆ coeˬ coeˬ-awˇ sahˬ boꞈ sha-eu tsawˇ haˬ deuˬ miˇ kʼahˬ kʼahˬ ma kʼoeˇ kʼahˬ laꞈ kʼoeˇ jaˆ-eu miˇ kʼahˬ yawˬ kʼahˬ na luꞈ-ahˇ, sahˬ boꞈ kʼoeˇ sha-iˇ-euˬ meh. Aˬdaˬlaˬ ba la tseˇ smˬ nah kʼoeˇ nah laꞈ kʼoeˇ tehꞈ-ehˇ, tsawˇ kʼaˆ maˬ ehˇ, zaˬ guˬ maˬ ehˇ, zaˬ miˬ zaˬ maˬ ehˇ, zaˬ maˬ ehˇ, Yuˇdaˆ tsawˇ haˬ kʼaˇ ngeuˇ-eu dawˬ tawˆ luꞈ-ahˇ ya sehꞈ jiˇ meh lehˇ, sahˬ boꞈ kʼoeˇ taꞈ laꞈ kʼoeˇ boꞈ taˬ-euˬ meh. Aˬ yawꞈ maꞈ-ahˇ gʼawˬ shaˬ maˬ gaˬ ni bi sehꞈ dzeh jiˇ-awˇ, aˬ yawꞈ maꞈ-euˬ pyuˇ shuiˇ myawˬ gahˬ deuˬ ya yuˇ meh lehˇ boꞈ taˬ-euˬ meh.

¹⁴ Aˇ nah kʼoeˇ nah-ahˇ tsawˇ haˬ yawˬ gʼaˬ na luꞈ lehˬ hmˬ dah taˬ nya ni, sahˬ boꞈ kʼoeˇ taꞈ laꞈ kʼoeˇ boꞈ taˬ-euˬ gaˇ kawˆ deuˬ miˇ kʼahˬ yawˬ kʼahˬ na luꞈ laꞈ kʼoeˇ kʼaˇ jawˇ-eu tsawˇ haˬ yawˬ gʼaˬ na luꞈ-ahˇ ya bi gaˬ doe-eu meh lehˇ ehˇ taˬ-euˬ meh.

¹⁵ Sahˬ paˬ neh dawˬ biꞈ-euˬ loꞈ-ehˇ, gaˇ kawˆ kʼoeˇ Suˇsaˬ meuˬ-ahˇ jawˇ-eu tsawˇ haˬ dawˬ tawˆ luꞈ-ahˇ bi siˬ bi gaˬ-awˇ, cehˆ coeˬ coeˬ-awˇ sahˬ boꞈ sha-eu tsawˇ haˬ deuˬ neh miˇ kʼahˬ doe ni cehˆ gaˬ-iˇ-euˬ meh. Suˇsaˬ meuˬ laꞈ kʼoeˇ gaˇ kawˆ kʼoeˇ hmˬ baˬ da neh luiˬ gʼaˬ dui dui luꞈ ngeh, sahˬ paˬ hawˇ-eu Haˬmaˬ aˬ nyaꞈ tiˬ gaˇ nuiˇ-awˇ aˬ gaꞈ dzaˇ uiˇ dawˇ luꞈ-eu meh.