Iˇsaˬtaˆ 10 - Akha

Dzeuˬsehˆ hawˇ-eu Mawˬdaˬkehˇ neh mˇ yaꞈ-euˬ huiˬ-eu gaˇ deuˬ

¹ Sahˬ paˬ Dzeuˬsehˆ-aˬ, aˬ yawꞈ-euˬ miˇ kʼahˬ kʼahˬ ma laꞈ kʼoeˇ, iˬ ma laˆ shaˆ lawˇ deh-ahˇ jawˇ-eu deuˬ-ahˇ maˬ ehˇ, dahˇ taˆ jawˇ-eu deuˬ-ahˇ maˬ ehˇ, myawˬ kʼaˆ bi mˇ-euˬ meh.

² Aˬ yawꞈ neh mˇ-euˬ huiˬ dui dui-eu gaˇ deuˬ hawˇ-eu zahˬ leˇ paˬ-ehˇ gʼeh-eu gaˇ deuˬ maˬ ehˇ, Mawˬdaˬkehˇ-ahˇ huiˬ-eu aˇ tiˆ-ahˇ yuˇ daˆ nehˬ-awˇ gaˇ bi mˇ-euˬ gaˇ kawˆ aˇ dahˬ beh gaˇ neh aˇ saˬ saˬ gaˇ keuˆ ni maˬ ehˇ, Paˇshaˇ sahˬ paˬ deuˬ hawˇ-eu Miˇdiˬyaˬ sahˬ paˬ deuˬ gaˇ kawˆ boꞈ taˬ-euˬ sahˬ boꞈ laꞈ kʼoeˇ boꞈ ahˇ taˬ-euˬ meh.

³ Yuˇdaˆ tsawˇ haˬ Mawˬdaˬkehˇ-aˬ, sahˬ paˬ Dzeuˬsehˆ-euˬ laꞈ oˆ teˬ ni gʼeh-eu gʼaˬ pyeuꞈ-eu meh. Yuˇdaˆ tsawˇ haˬ deuˬ aˬ yawꞈ-ahˇ nui kʼahˇ shiˇ-awˇ, taˬ huiˬ taˬ mahˇ-euˬ meh. Aˬ yawꞈ-euˬ tsawˇ jeuˬ gʼaˇ duˬ gaˇ dahˇ tsoeˬ-eu muiˬ-eu gaˇ deuˬ aˬ yawꞈ mˇ-awˇ, aˬ yawꞈ maꞈ-euˬ zaˬ deuˬ uˆ deuˬ dawˬ tawˆ luꞈ kʼoeˇ taˆ, nui saˇ oꞈ-eu jeˬ aˬ yawꞈ mˇ yaꞈ-euˬ meh.