Iˇsaˬtaˆ 1 - Akha

Sahˬ paˬ-euˬ miˬ zaˬ Baˬshaˬtiˇ sahˬ paˬ-ahˇ yaw zeu maˬ baw-euˬ

¹ Heu-aˬ, Gaˬlaˬnaˆ miˇ kʼahˬ-ahˇ neh Suˬdaˬ miˇ kʼahˬ-ahˇ keuˆ ni jaˆ-eu miˇ kʼahˬ tiˬ yaˇ nyiˬ tseˇ shiꞈ kʼahˬ-ahˇ uˆ lahˇ-euˬ sahˬ paˬ Dzeuˬsehˆ-euˬ ziˇ-ahˇ pyeuꞈ laˇ-euˬ gaˇ kawˆ deuˬ meh.

² Aˇ yamˬ kʼoeˇ yamˬ laꞈ kʼoeˇ, sahˬ paˬ Dzeuˬsehˆ-aˬ, Paˇshaˇ miˇ kʼahˬ-euˬ meuˬ meuˬ ma pyeuꞈ-eu Suˇsaˬ meuˬ-ahˇ jawˇ-awˇ uˆ lahˇ luꞈ-eu meh.

³ Aˬ yawꞈ uˆ lahˇ-eu smˇ kʼoꞈ tiˬ kʼoꞈ-ahˇ, aˬ yawꞈ-euˬ laꞈ oˆ gaˇ mˇ luꞈ-eu yaw huiˬ yaw mahˇ deuˬ hawˇ-eu miˇ kʼahˬ-ahˇ haw luꞈ pyaˆ luꞈ-eu sahˬ paˬ sahˬ ma deuˬ-ahˇ aˬ yawꞈ dzaˬ byawˇ lawˇ nehˬ-euˬ meh. Paˇshaˇ miˇ kʼahˬ hawˇ-eu Meˬdiˇ miˇ kʼahˬ-euˬ guiˇ maꞈ deuˬ maˬ ehˇ, aˬ yawꞈ-euˬ miˇ kʼahˬ deuˬ-ahˇ uˆ lahˇ-eu sahˬ paˬ sahˬ ma geuꞈ luꞈ-eu deuˬ maˬ ehˇ, dzaˬ byawˇ-ahˇ laˇ uiˬ taˬ-euˬ meh.

⁴ Ba la koꞈ siˬ siˬ lah ni, aˬ yawꞈ-euˬ miˇ kʼahˬ laꞈ kʼoeˇ jaˆ-eu pyuˇ shuiˇ myawˬ gahˬ deuˬ hawˇ-eu, aˬ yawꞈ-euˬ yaw shehꞈ kʼahˬ sehˇ byaˬ mehˬ nehˬ-euˬ meh.

⁵ Kʼoeˇ loꞈ-ehˇ jahˇ gʼaˬ-awˇ, Suˇsaˬ meuˬ laꞈ kʼoeˇ kʼaˇ jawˇ-eu tsawˇ haˬ deuˬ-ahˇ, smˇ muiˬ hawˇ-eu iˇ shaˬ maˬ tseˇ paˆ ni, aˬ yawꞈ hawˬ byawˇ paˇ lawˇ nehˬ-euˬ meh. Sahˬpaˬ-euˬ nymˇ-ahˇ jaˆ-eu yaˇ kmˇ laꞈ kʼoeˇ, tiˬ jaw keuˆ ni kʼoeˇ loꞈ-ehˇ bi dzaˬ bi dawˇ-euˬ meh.

⁶ Yaˇ kmˇ kʼoeˇ-ahˇ pyuˇ laꞈ ma dawˆ tsoꞈ taˬ-euˬ muiˬ dui dui-eu kʼaˬ lo lo ba kʼawˇ zeuˇ deuˬ ka tuˇ taˬ-awˇ, pyuˇ laꞈ ma kʼoeˇ deuˬ-ahˇ, neˇ leuˬ leuˬ-eu shawˇ jehˆ ni gʼeh-eu saˬ paˇ aˇ caˆ neh, saˬ paˇ paˇ puiˇ hawˇ-eu paˇ pyuˇ paꞈ gʼeu-awˇ laˆ saˆ muiˬ taˬ-euˬ miˇ neh, haw muiˬ dui dui-eu meh. Yaˇ kʼmˇ kʼoeˇ laꞈ kʼoeˇ, aˇ poeˬ kʼaˆ-eu kʼaˬ lo pyuˇ, lo neˇ, lo guiˇ hawˇ-eu lo puiˇ deuˬ kʼawˬ taˬ-euˬ kʼoeˇ taˆ, shuiˇ neh jahˇ taˬ-euˬ nuiˇ duˬ jawˇ duˬ laˆ saˆ taˬ-awˇ bi jaˆ-euˬ meh.

⁷ Tiˬ kʼmˬ tiˇ kʼmˬ maˬ duˇ leˇ-eu shuiˇ kʼmˬ maˬ deuˬ-ahˇ sahˬ paˬ-euˬ aˬ gaꞈ dzaˇ uiˇ shehˆ ahˇ-awˇ tiˬ dehˆ bi dawˇ-euˬ meh.

⁸ Yawˬ gʼaˬ na luꞈ-ahˇ yawˬ ha kʼaˇ dawˇ coeˇ-eu bi dawˇ-eu gʼaˇ duˬ, sahˬ paˬ-euˬ nymˇ-ahˇ zaˬ kʼaˆ geuꞈ luꞈ-eu deuˬ-ahˇ sahˬ paˬ dawˬ biꞈ-awˇ, liˬ gʼaˬ-euˬ maˬ baw ni liˬ nehˬ-euˬ meh.

⁹ Kʼoeˇ ngeh, sahˬ paˬ-euˬ miˬ zaˬ Baˬshaˬtiˇ gʼaˬ, sahˬ paˬ-euˬ nymˇ laꞈ kʼoeˇ zaˬ miˬ zaˬ deuˬ-ahˇ dzaˬ byawˇ lawˇ luꞈ-eu meh.

¹⁰ Dzaˬ byawˇ lawˇ-euˬ shiꞈ nah tiˬ nah keuˆ laˇ-awˇ, sahˬ paˬ aˬ gaꞈ dzaˇ uiˇ dawˇ luꞈ ngeh, aˬ yawꞈ-euˬ nui ma laꞈ kʼoeˇ laˬ kʼaˬ cehˇ laˇ-awˇ, zaˬ miˬ zaˬ deuˬ-ahˇ haw-eu pyaˆ-eu sahˬ paˬ-euˬ zaˬ kʼaˆ pyeuꞈ-eu Meˬhuˇmaˬ, Biˇzaˬdaˬ, Haˬbawˇnaˆ, Biˇgaˬdaˬ, Aˬbaˬgaˬdaˬ, Zehˇdaˬ hawˇ-eu Gaˬkaˆ aˬ ha shiꞈ gʼaˬ-ahˇ aˬ yawꞈ kuˇ-euˬ meh.

¹¹ “Sahˬ paˬ miˬ zaˬ Baˬshaˬtiˇ-ahˇ sahˬ paˬ miˬ zaˬ ya kʼoˆ-eu shuiˇ uˬ kʼoˆ bi kʼoˆ-awˇ sheuˬ uˇ laꞈ-awˬ” lehˇ aˬ ha shiꞈ gʼaˬ-ahˇ sahˬ paˬ dawˬ biꞈ-euˬ meh. Sahˬ paˬ miˬ zaˬ kʼoeˇ gʼaˬ seuˆ dzeuꞈ aˇ gʼehˇ muiˬ dui dui-eu miˇ neh, aˬ yawꞈ-euˬ miˬ zaˬ aˇ gʼehˇ aˇ naˆ ni muiˬ-eu gaˇ kawˆ yaw huiˬ yaw mahˇ deuˬ hawˇ-eu aˬ yawꞈ-euˬ daˬ yah deuˬ bi haw mawˇ-eu gʼaˇ duˬ kʼoeˇ loꞈ-ehˇ bi sheuˬ uˇ laꞈ-eu lehˇ gʼeh-eu meh.

¹² Ehˇ kʼawꞈ, sahˬ paˬ kʼoeˇ loꞈ-ehˇ dawˬ biꞈ-euˬ gaˇ kawˆ sahˬ paˬ miˬ zaˬ Baˬshaˬtiˇ-ahˇ zaˬ kʼaˆ kʼoeˇ deuˬ ehˇ nehˬ ngeh, Baˬshaˬtiˇ gʼaˬ sahˬ paˬ jawˇ gaˇ maˬ iˇ ni jawˇ-euˬ meh. Aˬ yawꞈ kʼoeˇ loꞈ-ehˇ maˬ iˇ ni jawˇ-euˬ miˇ neh, sahˬ paˬ nui ma pehˇ-euˬ meh.

¹³ Kʼoeˇ loꞈ-ehˇ gʼeh-eu gaˇ doˆ laˇ ngeh, miˇ kʼahˬ-euˬ zahˇ hawˇ-eu yaˇ kʼaˬ daˇ-eu paw tsawˇ gahˇ ahˇ-eu deuˬ-ahˇ sahˬ paˬ ya naˇ haˬ-eu zahˇ sahˇ kʼoꞈ jaˆ-eu miˇ neh, aˬ joˆ-ehˇ ya mˇ ya shaˇ-eu gaˇ kawˆ siˬ duˬ-eu aˬ yawꞈ-ahˇ nui noeˬ nui duˇ biꞈ-eu tsawˇ haˬ deuˬ-ahˇ kuˇ uiˬ-euˬ meh.

¹⁴ Miˇ kʼahˬ zahˇ sahˇ kʼoꞈ-ahˇ taꞈ leˇ-awˇ aˬ yawꞈ tiˬ kʼehˬ maˬ taˬ ni gʼoe luꞈ-eu deuˬ-aˬ, Gaˬsheˬnaˆ, Sheˬdaˬ, Aˬdaˬmaˬdaˇ, Taˬshiˆ, Meˬyehˇ, Maˬseˬnaˬ hawˇ-eu Meˬmuˇkaˬ heu deuˬ meh. Aˬ yawꞈ maꞈ-aˬ, aˬ yawꞈ-euˬ miˇ kʼahˬ laꞈ kʼoeˇ aˬ cawˬ naˆ maˬ tseˇ huiˬ-eu gaˇ tawˬ luꞈ-awˇ, Paˇshaˇ miˇ kʼahˬ hawˇ-eu Meˬdiˇ miˇ kʼahˬ kʼoeˇ taˆ yaw huiˬ yaw mahˇ geuꞈ luꞈ-eu shiꞈ gʼaˬ pyeuꞈ-eu meh.

¹⁵ “Ngaˇ sahˬ paˬ Dzeuˬsehˆ neh ngaˬ-euˬ zaˬ kʼaˆ deuˬ-ahˇ pyehˬ gʼeh-awˇ bi ehˇ nehˬ-iˇ-euˬ dawˬ-ahˇ sahˬ paˬ miˬ zaˬ Baˬshaˬtiˇ maˬ naˇ haˬ geuꞈ-a. Miˇ kʼahˬ-euˬ zahˇ-ahˇ taꞈ leˇ-awˇ aˬ yawꞈ-ahˇ aˬ dui maꞈ aˬ joˆ-ehˇ ya jahˇ nehˬ nmˇ” lehˇ aˬ yawꞈ maꞈ-ahˇ aˬ yawꞈ naˇ haˬ-euˬ meh.

¹⁶ Kʼoeˇ ngeh, sahˬ paˬ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ-ahˇ Meˬmuˇkaˬ gʼaˬ heu loꞈ-ehˇ ehˇ nehˬ-euˬ meh. “Sahˬ paˬ miˬ zaˬ Baˬshaˬtiˇ-aˬ, sahˬ paˬ-ahˇ tehꞈ-ehˇ maˬ ngeuˇ ni, sahˬ paˬ-euˬ gaˇ mˇ-eu yaw huiˬ yaw mahˇ deuˬ hawˇ-eu miˇ kʼahˬ zaˬ dawˬ tawˆ luꞈ-ahˇ mˇ bahˬ-euˬ meh.

¹⁷ Sahˬ paˬ miˬ zaˬ kʼoeˇ loꞈ-ehˇ jahˇ-euˬ gaˇ kawˆ ya gaˬ naˇ, miˇ kʼahˬ heu kʼahˬ-ahˇ jawˇ-eu zaˬ miˬ zaˬ dawˬ tawˆ luꞈ, yawˬ ha-euˬ kʼaˬ dzeˇ zaˬ-ahˇ taˬ nyiˇ tehꞈ-a. ‘Sahˬ paˬ Dzeuˬsehˆ neh aˬ yawꞈ-euˬ miˬ zaˬ Baˬshaˬtiˇ-ahˇ kuˇ-euˬ kʼawꞈ miˬ zaˬ gʼaˬ maˬ iˇ nehˬ-aˬ’ lehˇ aˬ yawꞈ maꞈ ehˇ tehꞈ-a.

¹⁸ Sahˬ paˬ miˬ zaˬ kʼoeˇ loꞈ-ehˇ mˇ-euˬ gaˇ kawˆ-ahˇ, Paˇshaˇ miˇ kʼahˬ hawˇ-eu Meˬdiˇ miˇ kʼahˬ-ahˇ sahˬ paˬ-euˬ gaˇ mˇ luꞈ-eu yaw huiˬ yaw mahˇ deuˬ-euˬ miˬ zaˬ deuˬ ya gaˬ ngeh, uˬ ciꞈ maˬ ciꞈ-iˇ dah mi naˆ-ehˇ yawˬ ha-euˬ kʼaˬ dzeˇ zaˬ deuˬ-ahˇ gaˇ kawˆ kʼoeˇ ja mehˬ nehˬ tehꞈ-a. Yawˬ gaˇ na luꞈ miˬ zaˬ deuˬ yawˬ ha-euˬ kʼaˬ dzeˇ zaˬ deuˬ-ahˇ kʼoeˇ loꞈ-ehˇ ja nehˬ-eu miˇ neh, kʼaˬ dzeˇ zaˬ deuˬ yawˬ ha-euˬ miˬ zaˬ-ahˇ nui ma ya pehˇ tehꞈ-a.

¹⁹ Sahˬ paˬ-oˇ, nawˇ nui ma tsaˬ naˇ, Baˬshaˬtiˇ gʼaˬ sahˬ paˬ-euˬ mehˬ shi tiˬ jawˇ-iˬ maˬ paˇ ya laˇ meh lehˇ dawˬ biꞈ gʼeh-awˬ. Dawˬ heu dawˬ tiˬ jawˇ-iˬ maˬ poˆ maˬ paˇ laˇ nya ni, Paˇshaˇ miˇ kʼahˬ hawˇ-eu Meˬdiˇ miˇ kʼahˬ-euˬ zahˇ sahˇ kʼoꞈ sahˬ boꞈ laꞈ kʼoeˇ bi boꞈ ahˇ taˬ-awˬ. Kʼoeˇ naˇ, aˬ yawꞈ naˆ maˬ tseˇ maˬ gaˇ dzehˬ-eu zaˬ miˬ zaˬ tiˬ gʼaˬ-ahˇ sahˬ paˬ miˬ zaˬ-euˬ aˇ yaˬ biꞈ nehˬ-awˬ.

²⁰ Nawˬ neh biꞈ-euˬ dawˬ kʼoeˇ dawˬ huiˬ dui dui-eu miˇ kʼahˬ heu kʼahˬ-ahˇ gaˬ byah ngeh, iˇ shaˬ deuˬ maˬ ehˇ, smˇ muiˬ deuˬ maˬ ehˇ, zaˬ miˬ zaˬ yawˬ gʼaˬ na luꞈ yawˬ ha-euˬ kʼaˬ dzeˇ zaˬ-ahˇ yaw zeu baw tehꞈ-a.”

²¹ Meˬmuˇkaˬ neh ehˇ-euˬ dawˬ kʼoeˇ dawˬ-ahˇ, sahˬ paˬ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ nui kʼahˇ shiˇ-awˇ, aˬ yawꞈ neh kʼaˇ ehˇ-euˬ loꞈ-ehˇ sahˬ paˬ mˇ-euˬ meh.

²² Kʼoeˇ naˇ, kʼaˬ dzeˇ zaˬ yawˬ gʼaˬ na luꞈ yawˬ ha-euˬ nymˇ jiˇ-ahˇ ya uˆ lahˇ-awˇ, kʼaˬ dzeˇ zaˬ-euˬ dawˬ-ahˇ ya naˇ haˬ geuꞈ meh lehˇ, aˬ yawꞈ uˆ lahˇ-eu miˇ kʼahˬ yawˬ kʼahˬ na luꞈ-ahˇ, yawˬ ha miˇ kʼahˬ-ahˇ kʼaˇ zmˬ-eu dawˬ-ahˇ neh boꞈ-awˇ bi tsaꞈ gaˬ doe-iˇ-euˬ meh.