HeˬByehˇ 9 - Akha

Mˬ kʼoeˇ taˆ uˬ duˬ tahˬ-eu hawˇ-eu miˇ tsaˬ kʼoeˇ taˆ uˬ duˬ tahˬ-eu

¹ Dawˬ ma saˇ jaˇ yaw beh hmˬ laꞈ kʼoeˇ, uˬ duˬ aˬ joˆ-ehˇ ya tahˬ-eu zahˇ sahˇ kʼoꞈ deuˬ ahˇ-awˇ, tsawˇ haˬ zaˬ neh jahˇ-euˬ uˬ duˬ tahˬ-eu jawˇ duˬ kʼawꞈ baw-eu meh.

² Muiˬ-eu shawˇ-eu Jawˇ duˬ lehˇ kuˇ-eu Sehˬgʼawˆ laꞈ nyiˇ lawˆ, gʼawˆ taˬ-euˬ meh. Kʼoeˇ-euˬ laꞈ kʼoeˇ, tsiˇ kʼmˬ doꞈ daˆ duˬ hawˇ-eu Miˬyehˇ-ahˇ lawˇ nehˬ-euˬ ka muˇ ciˬ daˆ-eu hawˬ jeh tiˬ jeh jaˆ-eu meh.

³ Lawˆ kaˬ saˬ paˇ nyiˬ hmˬ tiˬ hmˬ-euˬ naˇ kʼah paw, Muiˬ dui Shawˇ dui dui-eu Jawˇ duˬ lehˇ kuˇ-eu Sehˬgʼawˆ paˇ jaˆ-eu meh.

⁴ Kʼoeˇ-euˬ laꞈ kʼoeˇ, shuiˇ neh jahˇ taˬ-euˬ tsiˇ yaw saw jeˬ doꞈ damˬ-eu lawˇ duˬ maˬ ehˇ, maˬ naˆ kaˬ muˇ ahˇ-eu shuiˇ ciˬ cuˇ ciˬ ahˇ taˬ-euˬ shuiˇ yaw taˬ-euˬ Dawˬ ma saˇ jaˇ Bahˬ keuˆ maˬ ehˇ, baw nmˬ tsoꞈ-eu Aˬloˬ-euˬ gawˬ yoeˬ maˬ ehˇ, zahˇ dawˬ kʼoꞈ dawˬ tseˇ dawˬ boꞈ taˬ-euˬ kʼaˬ lo teˇ byaꞈ nyiˬ byaꞈ maˬ ehˇ, bi jaˆ-euˬ meh.

⁵ Dawˬ ma saˇ jaˇ Bahˬ keuˆ kʼoeˇ taˆ, Jeˬluˇbeˬ mawˇ kawˇ bi jaˆ-euˬ meh. Jeˬluˇbeˬ mawˇ kawˇ-euˬ aˬ dahˇ kʼoeˇ, iˬ baˇ pyehˬ nehˬ-eu jawˇ duˬ kʼoeˇ taˆ aˬ dahˇ cawˬ ja taˬ-euˬ meh. Ehˇ kʼawꞈ, jawˇ duˬ heu tsahˇ aˬ joˆ-ehˇ gʼeh-eu jawˇ duˬ pyeuꞈ-eu gaˇ kawˆ nymˬ-mˇ yaw duˬ duˬ-ehˇ maˬ dzawˇ duˬ nya-a siˬ.

⁶ Uˬ duˬ tahˬ-eu jawˇ duˬ kʼoeˇ tsahˇ-ahˇ taꞈ leˇ-awˇ, zahˇ sahˇ kʼoꞈ heu loꞈ-ehˇ jaˆ-eu meh. Piˇ ma deuˬ sehˬ gʼawˆ laꞈ nyiˇ lawˆ-ahˇ yawˬ nah na luꞈ uˇ leˇ-awˇ, yawˬ ha-euˬ gaˇ ya mˇ-eu meh.

⁷ Piˇma Yaw huiˬ gʼaˬ tehꞈ-ehˇ sehˬ gʼawˆ laꞈ kʼoeˇ lawˆ-ahˇ ya uˇ leˇ-awˇ, tiˬ kʼoꞈ tiˬ poˆ tehꞈ-ehˇ ya uˇ leˇ-eu meh. Aˬ yawꞈ kʼoeˇ loꞈ-ehˇ uˇ leˇ ngeh, yawˬ ha-euˬ iˬ baˇ gʼaˇ duˬ maˬ ehˇ, tsawˇ haˬ zaˬ deuˬ neh iˬ baˇ meh lehˇ maˬ siˬ nya-ehˇ mˇ lehˬ-euˬ iˬ baˇ gʼaˇ duˬ maˬ ehˇ, Miˬyehˇ-ahˇ lawˇ-eu gʼaˇ duˬ shiˬ ya yuˇ ahˇ gʼeh-eu meh.

⁸ Sehˬ gʼawˆ laꞈ nyiˇ lawˆ kʼoeˇ gaˇ kʼaˇ jaˆ kʼoeˇ keuˆ ni, Muiˬ dui shawˇ dui dui-eu Jawˇ duˬ kʼoeˇ tsahˇ-ahˇ uˇ leˇ-eu gaˇ ma maˬ pah laˇ-a siˬ lehˇ, uˬ duˬ tahˬ-eu jawˇ duˬ kʼoeˇ tsahˇ-euˬ zahˇ sahˇ kʼoꞈ-ahˇ taꞈ leˇ-awˇ Muiˬ-eu shawˇ-eu Yaw sahˇ Miˬyehˇ bya cehˆ ni mehˬ nehˬ laꞈ-eu meh.

⁹ Heu-aˬ, nymˬ-mˇ-euˬ aˇ yamˬ heu-ahˇ mehˬ nehˬ laꞈ-eu jeˬ pyeuꞈ-eu meh. Ehˇ mawꞈ-eu dawˬ tsuiꞈ-aꞈ, Miˬyehˇ-ahˇ damˬ nehˬ-euˬ jeˬ hawˇ-eu jeˬ zaˬ sehꞈ-awˇ lawˇ-eu shehˇ-eu jeˬ-aˬ, Miˬyehˇ-ahˇ uˬ duˬ tahˬ-eu tsawˇ haˬ-euˬ nui ma muiˬ laˇ shawˇ laˇ ni maˬ mˇ byah nehˬ nya-a lehˇ ehˇ mawꞈ-eu meh.

¹⁰ Aˬ jeˬ miˇ neh ehˇ naˇ, heu deuˬ-aˬ, dzaˬ-eu dawˇ-eu jeˬ hawˇ-eu muiˬ laˇ shawˇ laˇ ni mˇ-eu zahˇ sahˇ kʼoꞈ deuˬ-ahˇ tehꞈ-ehˇ taꞈ-eu meh. Heu deuˬ-aˬ, Miˬyehˇ zahˇ yaw shuiꞈ maˬ laˆ paˇ kʼoeˇ keuˆ ni tehꞈ-ehˇ geuꞈ nya-eu, laꞈ nyiˇ paw tehꞈ-ehˇ taꞈ leˇ-eu zahˇ sahˇ kʼoꞈ pyeuꞈ-eu meh.

¹¹ Ehˇ kʼawꞈ, Ka li-aˬ, nymˬ-mˇ heu gaˇ keuˆ le taˬ-euˬ yaw muiˬ jeˬ heu deuˬ-ahˇ biꞈ nehˬ laꞈ-eu Piˇma Yaw huiˬ gʼaˬ loꞈ-ehˇ oe keuˆ taˬ-euˬ meh. Aˬ yawꞈ gaˇ mˇ luꞈ-eu sehˬ gʼawˆ-aˬ, muiˬ dzehˬ byah dzehˬ-eu meh. Sehˬ gʼawˆ kʼoeˇ-aˬ, tsawˇ haˬ zaˬ neh gʼawˆ-euˬ sehˬ gʼawˆ maˬ ngeuˇ-eu uˬ taꞈ, beh taˬ-euˬ miˇ tsaˬ tahˬ kʼawˇ heu-ahˇ taꞈ-eu sehꞈ gʼawˆ maˬ ngeuˇ-a.

¹² Sehˬ gʼawˆ kʼoeˇ-ahˇ Yeˬsuˇ le uˇ-awˇ, Muiˬ dui shawˇ dui dui-eu Jawˇ duˬ-ahˇ mˬ maˬ maˬ byaˆ zaˇ ziˇ gʼaˇ duˬ tiˬ poˆ uˇ leˇ ngeh, ciꞈ myehꞈ hawˇ-eu mawˇ neˇ-euˬ shiˬ yuˇ ahˇ gʼeh-awˇ lawˇ leˇ-euˬ maˬ ngeuˇ-a. Aˬ yawꞈ-euˬ shiˬ yuˇ ahˇ gʼeh-awˇ, mˬ maˬ maˬ byaˆ zaˇ ziˇ ka kʼoꞈ-eu jeˬ-ahˇ aˬ dui za ni lawˇ leˇ-euˬ jeˬ pyeuꞈ-eu meh.

¹³ Ciˬ myehꞈ hawˇ-eu mawˇ neˇ-euˬ shiˬ hawˇ-eu, mawˇ neˇ mawˇ zaˬ dzah puiˆ-awˇ lawˇ-euˬ lehˇ kuˇ laˆ keuˬ-awˇ, maˬ shawˇ-eu tsawˇ haˬ-ahˇ byaˆ shehˬ naˇ shawˇ laˇ-eu meh.

¹⁴ Kʼoeˇ loꞈ-ehˇ jahˇ-eu baˬ da neh shawˇ laˇ nya naˇ, Ka li-euˬ shiˬ baˬ da neh aˇ naˆ ni paˇ shawˇ dzehˬ laˇ nmˇ. Mˬ maˬ maˬ byaˆ zaˇ ziˇ dehꞈ-eu Yaw sahˇ Miˬyehˇ-ahˇ gʼoe-eu laꞈ kʼoeˇ, byah dui dui-eu lawˇ-eu jeˬ loꞈ-ehˇ aˬ yawꞈ-euˬ gʼawˇ mawˇ Miˬyehˇ-ahˇ damˬ nehˬ-euˬ meh. Dehꞈ luꞈ-eu Miˬyehˇ-euˬ nui kʼahˇ aˬ dui mˇ nya ni, gaˇ dahˇ maˬ tsoeˬ-eu zahˇ sahˇ kʼoꞈ kʼoeˇ deuˬ neh maˬ shawˇ nehˬ laꞈ nya-euˬ aˬ dui-euˬ nui ma-ahˇ aˬ yawꞈ shawˇ nehˬ laꞈ tehꞈ-a.

¹⁵ Kʼoeˇ baˬ da neh, dawˬ ma saˇ jaˇ yaw shuiꞈ pyeuꞈ leˇ ni mˇ-eu gʼaˬ-aˬ, Ka li meh. Miˬyehˇ neh kuˇ doˆ-euˬ tsawˇ haˬ deuˬ mˬ maˬ maˬ byaˆ zaˇ ziˇ guiˬ lahˬ jeˬ biˇ za ni, aˬ yawꞈ kʼoeˇ loꞈ-ehˇ mˇ-euˬ meh. Dawˬ ma saˇ jaˇ yaw beh hmˬ-ahˇ gʼoe-awˇ dehꞈ luꞈ ngeh, Ka li shiˇ dah-awˇ tsawˇ haˬ zaˬ deuˬ-ahˇ yawˬ ha neh mˇ-euˬ iˬ baˇ-ahˇ bi buˬ-iˇ nya-euˬ miˇ neh, kʼoeˇ loꞈ-ehˇ mˇ pyeuꞈ nya-euˬ meh.

¹⁶ Jeˬ biˇ biꞈ-eu gʼaˇ duˬ boꞈ tsehˆ taˬ-euˬ sahˬ boꞈ jaˆ naˇ, jeˬ biˇ biꞈ-eu gʼaˬ maˇ maˇ ni shiˇ-euˬ gaˇ kawˆ yaw duˬ ya bi baw meh.

¹⁷ Aˬ jeˬ miˇ neh ehˇ naˇ, jeˬ biˇ biꞈ-eu gʼaˬ kʼaˇ dehꞈ kʼoeˇ keuˆ ni, jeˬ biˇ kʼoeˇ-ahˇ maˬ za nya-a siˬ. Jeˬ biˇ biꞈ-eu gʼaˬ shiˇ gʼaˬ miˇ tsa tehꞈ-ehˇ, jeˬ biˇ kʼoeˇ-ahˇ za nya-eu meh.

¹⁸ Kʼoeˇ miˇ neh, dawˬ ma saˇ jaˇ yaw beh hmˬ kʼawꞈ, tiˬ jeˬ paˬ sehꞈ dah-awˇ shiˬ neh mˇ taˬ-euˬ dawˬ ma saˇ jaˇ pyeuꞈ-eu meh.

¹⁹ Aˇ dahˬ beh ngeh Zahˇ dawˬ kʼoꞈ dawˬ laꞈ kʼoeˇ kʼaˇ boꞈ taˬ-euˬ zahˇ dawˬ kʼoꞈ dawˬ dawˬ tawˆ luꞈ, Iˇsaˬleˬlaˇ tsawˇ haˬ deuˬ-ahˇ Moˇseˬ ehˇ nehˬ-euˬ meh. Kʼoeˇ naˇ, mawˇ neˇ hawˇ-eu ciꞈ myehꞈ-euˬ shiˬ iˇ cuꞈ nehˬ-ehˇ keuˬ-awˇ, hiˇsoˆ baw nmˬ hawˇ-eu yawˇ caꞈ hm laˆ duiˆ-awˇ, Zahˇ dawˬ kʼoꞈ dawˬ hawˇ-eu Iˇsaˬleˬlaˇ tsawˇ haˬ dawˬ tawˆ luꞈ-ahˇ byaˆ shehˬ-euˬ meh.

²⁰ “Shiˬ heu-aˬ, naw maꞈ bi caw teh-eu gʼaˇ duˬ Miˬyehˇ neh naw maꞈ-ahˇ biꞈ-euˬ dawˬ ma saˇ jaˇ-euˬ shiˬ pyeuꞈ-eu meh” lehˇ, Moˇseˬ ehˇ-eu meh.

²¹ Kʼoeˇ loꞈ-ehˇ duˇ ni, Dawˬ ma saˇ jaˇ Sehˬ gʼawˆ-ahˇ maˬ ehˇ, uˬ duˬ tahˬ gaˇ zmˬ-eu mˇ myawˬ keu ka deuˬ kʼoeˇ taˆ maˬ ehˇ, shiˬ kʼoeˇ neh Moˇseˬ byaˆ shehˬ-euˬ meh.

²² Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ-aˬ, yawˬ jeˬ na luꞈ ehˇ gʼaˬ ni-ahˇ shiˬ neh ya shawˇ-awˇ, shiˬ shehˆ-awˇ neh tehꞈ-ehˇ iˬ baˇ pyehˬ nehˬ-eu jeˬ-ahˇ za nya-eu meh.

Yeˬsuˇ-euˬ gʼawˇ mawˇ lawˇ-awˇ iˬ baˇ yuˇ dzeh-euˬ meh

²³ Maˇ maˇ ni mˬ kʼoeˇ taˆ jaˆ-eu jeˬ maˬ ngeuˇ-ehˇ, kʼoeˇ-euˬ aˇ baˇ naˇ shmˇ loˆ ni tehꞈ-ehˇ gʼeh-eu deuˬ-ahˇ, kʼoeˇ loꞈ-ehˇ ya mˇ shawˇ-eu meh. Ehˇ kʼawꞈ, maˇ maˇ ni mˬ kʼoeˇ taˆ jaˆ-eu jeˬ-ahˇ shawˇ-eu gʼaˇ duˬ, kʼoeˇ naˆ maˬ tseˇ muiˬ dzehˬ-eu jeˬ ya lawˇ ya shehˇ-eu meh.

²⁴ Aˬ jeˬ miˇ neh ehˇ naˇ, maˇ maˇ ni gʼeh-eu jeˬ maˬ ngeuˇ-ehˇ, kʼoeˇ-euˬ aˇ baˇ naˇ shmˇ loˆ ni tehꞈ-ehˇ pyeuꞈ-eu, tsawˇ haˬ zaˬ neh jahˇ taˬ-euˬ Muiˬ-eu shawˇ-eu jawˇ duˬ-ahˇ Ka li uˇ leˇ-euˬ maˬ ngeuˇ-a. Maˇ maˇ ni mˬ kʼoeˇ taˆ aˬ yawꞈ le uˇ-awˇ, kʼoeˇ gaˇ aˬ duiˬ-euˬ dah zaˇ Miˬyehˇ mehˬ shi aˬ yawꞈ le keuˆ-euˬ meh.

²⁵ Yuˇdaˆ tsawˇ haˬ-euˬ Piˇma Yaw huiˬ gʼaˬ-aˬ, aˬ yawꞈ kʼoꞈ yawꞈ jeˬ zaˬ-euˬ shiˬ yuˇ-awˇ, Muiˬ dui shawˇ dui dui-eu Jawˇ duˬ-ahˇ uˇ leˇ-eu meh. Ehˇ kʼawꞈ, Ka li-aˬ, aˬ yawꞈ-euˬ gʼawˇ mawˇ gʼawˬ mya poˆ lawˇ-eu maˬ loˬ-a.

²⁶ Kʼoeˇ loꞈ-ehˇ ya lawˇ law nmˇ-aˬ, mˬ beh miˇ beh ngeh neh aˇ dahˬ beh-awˇ, aˬ yawꞈ gʼawˬ mya poˆ ya kamˇ shiˇ-euˬ tehꞈ-a. Ehˇ kʼawꞈ, nymˬ-mˇ miˇ tsaˬ heu aˇ saˬ saˬ-eu dawˬ peh peh laˇ-euˬ aˇ yamˬ heu laꞈ kʼoeˇ, mˬ maˬ maˬ byaˆ zaˇ ziˇ gʼaˇ duˬ gmˬ ni aˬ yawꞈ tiˬ poˆ tehꞈ-ehˇ doˆ le-awˇ, aˬ yawꞈ-euˬ gʼawˇ mawˇ lawˇ nehˬ-eu laꞈ kʼoeˇ, iˬ baˇ yuˇ dzeh le-euˬ meh.

²⁷ Tsawˇ haˬ yawˬ gʼaˬ na luꞈ tiˬ poˆ ya shiˇ-awˇ, shiˇ gʼaˬ ngeh Miˬyehˇ neh yaˇ kʼaˬ ya bi daˇ tehꞈ-a.

²⁸ Kʼoeˇ gaˇ duˇ ni, tsawˇ haˬ gʼawˬ mya ni-euˬ iˬ baˇ yuˇ dzeh-eu gʼaˇ duˬ, Ka li-euˬ gʼawˇ mawˇ tiˬ poˆ lawˇ dah-euˬ meh. Aˬ yawꞈ tiˬ poˆ paˇ doˆ le tehꞈ-a. Ehˇ kʼawꞈ, iˬ baˇ shawˇ-eu gʼaˇ duˬ oe-euˬ maˬ ngeuˇ-a. Aˬ yawꞈ-ahˇ loꞈ luꞈ-eu tsawˇ haˬ deuˬ-ahˇ ka kʼoꞈ-eu gʼaˇ duˬ oe-euˬ jeˬ pyeuꞈ-eu meh.