HeˬByehˇ 8 - Akha

Yeˬsuˇ aˬ duiˬ-euˬ Piˇma Yaw huiˬgʼaˬ

¹ Aˬ dui ehˇ luꞈ-eu gaˇ kawˆ heu dawˬ tawˆ luꞈ-euˬ uˬ dzah-aˬ, heu loꞈ-ehˇ ehˇ mawꞈ-eu ma. Mˬ kʼoeˇ taˆ uˆ lahˇ luꞈ-eu Sahˬpaˬ pyeuꞈ-eu Miˬyehˇ-euˬ dzoeˬ dzaˬ nuiˇ mahˬ-euˬ aˇ maˇ paw nuiˇ luꞈ-eu Piˇma Yaw huiˬ tiˬ gʼaˬ aˬ dui jawˇ-eu ma.

² Aˬ yawꞈ-aˬ, tsawˇ haˬ zaˬ neh tsoˆ-euˬ sehˬ gʼawˆ maˬ ngeuˇ-eu, Sahˬpaˬ Miˬyehˇ neh tsoˆ-euˬ maˇ maˇ ni gʼeh-eu sehˬ gʼawˆ laꞈ kʼoeˇ, Muiˬ dui shawˇ dui dui-eu Jawˇduˬ-ahˇ gaˇ mˇ-eu Piˇma Yaw huiˬ gʼaˬ pyeuꞈ-eu meh.

³ Piˇ ma yawˬ huiˬ gʼaˬ kʼaˇ geuꞈ-eu yawˬ gʼaˬ na luꞈ, Miˬyehˇ-ahˇ damˬ nehˬ-eu jeˬ hawˇ-eu lawˇ-eu shehˇ-eu jeˬ ya mˇ-eu meh. Kʼoeˇ loꞈ-ehˇ duˇ ni, aˬ dui-euˬ Piˇma Yaw huiˬ gʼaˬ kʼawꞈ, Miˬyehˇ-ahˇ ya lawˇ ya shehˇ meh.

⁴ Aˬ yawꞈ-aˬ, mˬ kʼoeˇ taˆ-euˬ piˇ ma pyeuꞈ-eu meh. Aˬ yawꞈ miˇ tsaˬ kʼoeˇ taˆ jawˇ law nmˇ-aˬ, piˇ ma maˬ ya geuꞈ-a. Aˬ jeˬ miˇ neh ehˇ naˇ, Yuˇdaˆ tsawˇ haˬ-euˬ Zahˇ dawˬ kʼoꞈ dawˬ laꞈ kʼoeˇ kʼaˇ ehˇ taˬ-euˬ loꞈ-ehˇ lawˇ nehˬ shehˇ nehˬ-eu piˇ ma deuˬ jawˇ luꞈ-eu meh.

⁵ Aˬ yawꞈ maꞈ piˇ ma geuꞈ-awˇ mˇ luꞈ-eu kʼoeˇ-aˬ, mˬ kʼoeˇ taˆ mˇ luꞈ-eu jeˬ-euˬ naˇ shmˇ aˇ baˇ loˆ ni tehꞈ meh. Aˬ yawꞈ maꞈ-aˬ, Moˇseˬ neh kʼaˇ mˇ-euˬ loꞈ-ehˇ mˇ luꞈ-eu tehꞈ meh. Moˇseˬ aˬ yawꞈ Dawˬ ma saˇ jaˇ Sehˬ gʼawˆ tsoˆ-eu lehˇ gʼeh ngeh, “Yawˬ jeˬ na luꞈ gawˬ jawˬ kʼoeˇ taˆ nawˬ-ahˇ mehˬ nehˬ-euˬ Sehˬ gʼawˆ-ahˇ duˇ leˇ ni yaw duˬ duˬ-ehˇ tsoˆ-awˬ” lehˇ, aˬ yawꞈ-ahˇ Miˬyehˇ ehˇ nehˬ-euˬ meh.

⁶ Miˬyehˇ hawˇ-eu aˬ yawꞈ-euˬ tsawˇ haˬ yaw kaˬ-ahˇ Yeˬsuˇ neh lehˬ hmˬ taˬ-euˬ dawˬ ma saˇ jaˇ kʼoeˇ-aˬ, muiˬ dzehˬ byah dzehˬ-eu saˇ jaˇ dawˬ-ahˇ gʼoe-awˇ mˇ taˬ-euˬ miˇ neh, dawˬ ma saˇ jaˇ yaw oeˇ naˆ maˬ tseˇ muiˬ dzehˬ byah dzehˬ-eu dawˬ ma saˇ jaˇ pyeuꞈ-eu meh. Kʼoeˇ loꞈ-ehˇ duˇ ni, piˇ ma kʼoeˇ deuˬ mˇ luꞈ-eu gaˇ naˆ maˬ tseˇ huiˬ dzehˬ-eu gaˇ, Yeˬsuˇ-ahˇ aˬ nehˬ taˬ-euˬ meh.

⁷ Dawˬ ma saˇ jaˇ yaw beh hmˬ ehˇ kʼaˇ maˬ za law nmˇ-aˬ, dawˬ ma saˇ jaˇ nyiˬ hmˬ tiˬ hmˬ mˇ poˆ-eu maˬ loˬ-aˇ.

⁸ Ehˇ kʼawꞈ, Miˬyehˇ aˬ yawꞈ-euˬ tsawˇ haˬ kʼoeˇ deuˬ-ahˇ iˬ baˇ taˬ kʼaˇ za-awˇ, heu loꞈ-ehˇ ehˇ taˬ-euˬ meh. “Iˇ saˬ leˬ laˇ tsawˇ haˬ hawˇ-eu, Yuˇdaˆ tsawˇ haˬ kʼoeˇ deuˬ nehˬ-ehˇ, dawˬ ma saˇ jaˇ yaw shuiꞈ tiˬ hmˬ, ngaˇ paˇ ya dzaˬ poˆ-eu aˇ yamˬ, aˇ nah paˇ keuˆ le luꞈ meh lehˇ, Sahˬpaˬ Miˬyehˇ ehˇ taˬ-euˬ meh.

⁹ Dawˬ ma saˇ jaˇ yaw shuiꞈ kʼoeˇ-aˬ, aˬ yawꞈ maꞈ-euˬ aˬ poeˬ deuˬ-ahˇ, Iˇjiˇtuˆ miˇ kʼahˬ laꞈ kʼoeˇ neh, ngaˬ neh sheuˬ doˆ nehˬ laꞈ ngeh nah, dzaˬ-euˬ dawˬ ma saˇ jaˇ pyeuꞈ-eu, yaw oeˇ kʼoeˇ dawˬ-ahˇ maˬ duˇ-a. Ngaˬ-euˬ dawˬ ma saˇ jaˇ kʼoeˇ-ahˇ, yawꞈ maꞈ saˇ jaˇ puiˬ-euˬ miˇ neh, myaˆ haw maˬ cawˬ ni byehˇ-euˬ ma.

¹⁰ Nymˬ-mˇ dawˬ ma saˇ jaˇ heu hmˬ, aˬ kaˇ mehˬ hu aˇ yamˬ laꞈ kʼoeˇ, Iˇsaˬleˬlaˇ tsawˇ haˬ nehˬ-ehˇ, ngaˇ dzaˬ taꞈ mˇ taꞈ geuꞈ ma lehˇ, Sahˬpaˬ Miˬyehˇ ehˇ taˬ-euˬ meh. Aˬ yawꞈ maꞈ-euˬ nui noeˬ laꞈ kʼoeˇ, zahˇ dawˬ kʼoꞈ dawˬ dawˆ ahˇ nehˬ-awˇ, nui ma laꞈ kʼoeˇ boꞈ myahˬ nehˬ ma. Ngaˇ yawꞈ maꞈ-euˬ Miˬyehˇ geuꞈ-awˇ, Yawꞈ maꞈ ngaˬ-euˬ tsawˇ haˬ geuꞈ ma.

¹¹ Yawˬ ha tsawˇ jeuˬ yaw kaˬ hawˇ-eu, yawˬ ha miˇ kʼahˬ zaˬ deuˬ yaw kaˬ, ‘Sahˬpaˬ Miˬyehˇ-ahˇ siˬ-awˬ’lehˇ, mehˬ nehˬ tsoˆ nehˬ-eu maˬ loˬ-aˇ. Huiˬ zaˬ nyiˇ zaˬ yawˬ gʼaˬ na luꞈ, ngaˬ-ahˇ siˬ nya jiˇ laˇ tehꞈ-a.

¹² Aˬ yawꞈ maꞈ-ahˇ iˬ baˇ pyehˬ-awˇ, yaw lehˬ yaw ca dawˬ tawˆ luꞈ-ahˇ, maˬ juiˇ taˬ ni byehˇ byoˆ nehˬ ma.”

¹³ Dawˬ ma saˇ jaˇ yaw shuiꞈ gaˇ kawˆ Miˬyehˇ ehˇ-eu laꞈ kʼoeˇ, yaw beh dzaˬ taˬ-euˬ dawˬ ma saˇ jaˇ kʼoeˇ hmˬ bi oeˇ-iˇ-euˬ meh. Myahˇ laˇ-awˇ oeˇ-iˇ-euˬ jeˬ-aˬ, gʼawˬ myahˇ maˬ gʼeh-ehˇ piˬ-iˇ byoˆ-iˇ tehꞈ-a.