HeˬByehˇ 7 - Akha

Piˇ ma Maˬlaˬkiˇsaˬdehˇ

¹ Maˬlaˬkiˇsaˬdehˇ kʼoeˇ gʼaˬ-aˬ, Saˬleˬ meuˬ-euˬ sahˬ paˬ pyeuꞈ-awˇ, Huiˬ dui Mahˇ dui dui-eu Miˬyehˇ-euˬ piˇ ma pyeuꞈ-eu meh. Sahˬ paˬ oeˬ gʼaˬ-ahˇ Aˬbyaˬhaˬ guiˇ deuˆ gʼaˬ-awˇ gʼoꞈ laˇ ngeh, Maˬlaˬkiˇsaˬdehˇ aˬ yawꞈ-ahˇ tahˬ puˬ le-awˇ, dawˬ ngehˬ gʼeh nehˬ-euˬ meh.

² Aˬbyaˬhaˬ gʼeh, aˬ yawꞈ neh guiˇ kʼaˇ deuˆ za laꞈ-euˬ jeˬ dawˬ tawˆ luꞈ laꞈ kʼoeˇ, tseˇ bymˇ tiˬ bymˇ yuˇ doˆ-awˇ aˬ yawꞈ-ahˇ biꞈ nehˬ-euˬ meh. (Maˬlaˬkiˇsaˬdehˇ lehˇ ehˇ-eu tsawˇ myahˇ heu myahˇ-euˬ dawˬ tsuiꞈ yaw beh hmˬ-aˬ, “Yaw tsaˬ yaw dawˇ jeˬ-euˬ Sahˬpaˬ” lehˇ ehˇ mawꞈ-eu meh. Dawˬ tsuiꞈ nyiˬ hmˬ tiˬ hmˬ pyeuꞈ-eu aˬ yawꞈ-ahˇ “Saˬleˬ meuˬ-euˬ Sahˬpaˬ” lehˇ ehˇ-eu kʼoeˇ-aˬ, “Nui saˇ oꞈ-eu jeˬ-euˬ Sahˬpaˬ” lehˇ ehˇ mawꞈ-eu meh.)

³ Maˬlaˬkiˇsaˬdehˇ-euˬ aˬ da aˬ ma hawˇ-eu aˬ poeˬ aˬ bawˇ deuˬ gaˇ kawˆ boꞈ taˬ-euˬ tiˬ gaˇ-iˬ maˬ jaˆ-a. Aˬ yawꞈ dehꞈ le-euˬ gaˇ kawˆ hawˇ-eu shiˇ-euˬ gaˇ kawˆ boꞈ taˬ-euˬ kʼawꞈ maˬ jaˆ-a. Aˬ yawꞈ-aˬ, Miˬyehˇ-euˬ Zaˬmaˇ-ahˇ duˇ-awˇ, mˬ maˬ maˬ byaˆ zaˇ ziˇ piˇ ma pyeuꞈ-eu meh.

⁴ Toˆ-ehˇ ngeuˇ naˇ, aˬ yawꞈ aˇ naˆ ni huiˬ-eu mahˇ-eu gaˇ kawˆ naw maꞈ noeˬ mawˇ nya tehꞈ-a. Aˬ dui-euˬ tsawˇ myahˇ doˆ dui dui-eu aˬ poeˬ pyeuꞈ-eu Aˬbyaˬhaˬ gʼeh, guiˇ kʼaˇ deuˆ za-euˬ jeˬ dawˬ tawˆ luꞈ laꞈ kʼoeˇ tseˇ bymˇ tiˬ bymˇ aˬ yawꞈ-ahˇ biꞈ-euˬ meh.

⁵ Leˬbiˇ-euˬ zaˬ deuˬ uˆ deuˬ pyeuꞈ-eu piˇ ma deuˬ-ahˇ, yawˬ ha-euˬ tsawˇ jeuˬ Iˇsaˬleˬlaˆ tsawˇ haˬ deuˬ tseˇ bymˇ tiˬ bymˇ ya damˬ nehˬ meh lehˇ, Zahˇ dawˬ kʼoꞈ dawˬ laꞈ kʼoeˇ ehˇ taˬ-euˬ jaˆ-eu meh. Yawˬ ha-euˬ tsawˇ jeuˬ kʼoeˇ-aˬ, yawˬ ha loꞈ-ehˇ Aˬbyaˬhaˬ-euˬ zaˬ deuˬ uˆ deuˬ pyeuꞈ-eu kʼawꞈ, kʼoeˇ loꞈ-ehˇ ya damˬ nehˬ-eu meh.

⁶ Maˬlaˬkiˇsaˬdehˇ-aˬ, Leˬbiˇ-euˬ tsuiꞈ-ahˇ maˬ taꞈ-a. Ehˇ kʼawꞈ, Aˬbyaˬhaˬ neh damˬ nehˬ-euˬ tseˇ bymˇ tiˬ bymˇ ha geuꞈ-awˇ, Miˬyehˇ neh saˇ jaˇ dzaˬ-euˬ jeˬ-ahˇ za-euˬ gʼaˬ pyeuꞈ-eu Aˬbyaˬhaˬ-ahˇ dawˬ ngeh gʼeh nehˬ-euˬ meh.

⁷ Dawˬ ngehˬ gʼeh nehˬ-eu gʼaˬ-aˬ, dawˬ bi ngehˬ gʼeh nehˬ-euˬ gʼaˬ naˆ maˬ tseˇ huiˬ dzehˬ meh lehˇ, tsawˇ haˬ yawˬ gʼaˬ na luꞈ siˬ nya meh. Piˇ ma deuˬ-ahˇ tseˇ bymˇ tiˬ bymˇ taꞈ nehˬ-euˬ kʼoeˇ-aˬ, shiˇ nya-eu tsawˇ haˬ zaˬ deuˬ-ahˇ taꞈ nehˬ-euˬ jeˬ pyeuꞈ-eu meh.

⁸ Ehˇ kʼawꞈ, Maˬlaˬkiˇsaˬdehˇ-ahˇ tseˇ bymˇ tiˬ bymˇ taꞈ nehˬ-euˬ kʼoeˇ-aˬ, Jaˇliꞈ laꞈ kʼoeˇ ehˇ taˬ-euˬ loꞈ-ehˇ, tiˬ jawˇ-iˬ maˬ shiˇ-eu gʼaˬ-ahˇ taꞈ nehˬ-euˬ jeˬ pyeuꞈ-eu meh.

⁹ Kʼoeˇ loꞈ-ehˇ ehˇ naˇ, Aˬbyaˬhaˬ tseˇ bymˇ tiˬ bymˇ biꞈ ngeh, Leˬbiˇ kʼawꞈ tseˇ bymˇ tiˬ bymˇ biꞈ-euˬ gaˇ duˇ-eu meh. (Leˬbiˇ-euˬ zaˬ deuˬ-aˬ, tseˇ bymˇ tiˬ bymˇ za-euˬ tsawˇ haˬ deuˬ meh.)

¹⁰ Aˬ jeˬ miˇ neh ehˇ naˇ, kʼoeˇ ngeh yamˬ-ahˇ Leˬbiˇ maˬ dehꞈ le dah-euˬ kʼawꞈ, Aˬbyaˬhaˬ-ahˇ Maˬlaˬkiˇsaˬdehˇ tahˬ puˬ ngeh, Leˬbiˇ kʼawꞈ aˬ yawꞈ-euˬ aˬ poeˬ Aˬbyaˬhaˬ-euˬ gʼawˇ mawˇ laꞈ kʼoeˇ jawˇ luꞈ meh lehˇ ehˇ nya meh.

¹¹ Iˇsaˬleˬlaˆ tsawˇ haˬ deuˬ-ahˇ biꞈ-euˬ Zahˇ dawˬ kʼoꞈ dawˬ-aˬ, Leˬbiˇ tsawˇ jeuˬ piˇ ma geuꞈ gaˇ taꞈ leˇ-awˇ biꞈ-euˬ Zahˇ dawˬ kʼoꞈ dawꞈ pyeuꞈ-eu meh. Nymˬ-mˇ-aˬ, Leˬbiˇ tsawˇ jeuˬ piˇ ma deuˬ neh mˇ byah jiˇ-euˬ law nmˇ-aˬ, Aˬloˬ-ahˇ maˬ taꞈ-ehˇ Maˬlaˬkiˇsaˬdehˇ-ahˇ taꞈ-eu piˇ ma yawˬ jeuˬ yawˬ doˆ laˇ-eu maˬ paˇ loˬ meh.

¹² Aˬ jeˬ miˇ neh ehˇ naˇ, piˇ ma yawˬ jeˬ yawˬ laˆ paˇ naˇ, zahˇ dawˬ kʼoꞈ dawˬ kʼawꞈ ya laˆ paˇ-eu meh.

¹³ Gaˇ kawˆ heu-ahˇ taꞈ leˇ-awˇ aˬ dui ehˇ luꞈ-eu kʼoeˇ gʼaˬ-aˬ, Leˬbiˇ tsawˇ jeuˬ maˬ ngeuˇ-eu tsawˇ jeuˬ yawˬ jeuˬ yawˬ pyeuꞈ-awˇ, aˬ yawꞈ-euˬ tsawˇ jeuˬ laꞈ kʼoeˇ tiˬ gʼaˬ-iˬ piˇ ma geuꞈ-awˇ lawˇ duˬ-ahˇ gaˇ maˬ mˇ haw-aˬ.

¹⁴ Aˬ yawꞈ Yuˇdaˆ tsawˇ jeuˬ laꞈ kʼoeˇ dehꞈ le-euˬ meh lehˇ yawˬ gʼaˬ na luꞈ siˬ nya-meh. Piˇ ma bi geuꞈ-eu gaˇ kawˆ Moˇseˬ ehˇ ngeh, tsawˇ jeuˬ heu jeuˬ-ahˇ maˬ ehˇ-aˬ.

Maˬlaˬkiˇsaˬdehˇ-ahˇduˇ-eu piˇ ma yawˬ gʼaˬ yawˬ

¹⁵ Nymˬ-mˇ ehˇ luꞈ-eu gaˇ kawˆ heu aˬ dui-ahˇ mawˇ duˬ dzehˬ laˇ-euˬ meh. Piˇ ma yawˬ jeuˬ yawˬ pyeuꞈ-eu Maˬlaˬkiˇsaˬdehˇ-ahˇ duˇ-eu piˇ ma tiˬ gʼaˬ doˆ laˇ-euˬ meh.

¹⁶ Tsawˇ haˬ zaˬ-euˬ zahˇ sahˇ kʼoꞈ neh aˬ yawꞈ-ahˇ piˇ ma bi geuꞈ-euˬ maˬ ngeuˇ-a. Tiˬ jawˇ-iˬ maˬ cawˆ-iˇ nya-eu dehꞈ-eu jeˬ-euˬ baoˬ neh bi geuꞈ-euˬ meh.

¹⁷ Aˬ jeˬ miˇ neh ehˇ naˇ, “Nawˇ-aˬ, Maˬlaˬkiˇsaˬdehˇ neh tawˬ dzeuˇ yaꞈ-euˬ gaˇ-ahˇ tawˬ daˆ leꞈ-eu, mˬ maˬ maˬ byaˆ zaˇ ziˇ piˇ ma ya geuꞈ tehꞈ-a” lehˇ, Jaˇliꞈ laꞈ kʼoeˇ ehˇ taˬ-euˬ meh.

¹⁸ Zahˇ sahˇ kʼoꞈ yaw oeˇ kʼoeˇ-aˬ, gʼaˬ baˬ-awˇ gaˇ dahˇ maˬ tsoeˬ-eu miˇ neh, maˬ zmˬ ni bi jaˆ-euˬ meh.

¹⁹ Aˬ jeˬ miˇ neh ehˇ naˇ, Moˇseˬ-ahˇ gʼoe-awˇ Miˬyehˇ neh biꞈ-euˬ Zahˇ dawˬ kʼoꞈ dawˬ kʼoeˇ-aˬ, tiˬ jeˬ-ahˇ-iˬ byah laˇ ni maˬ mˇ byah nehˬ nya-a. Nymˬ-mˇ-aˬ, aˬ dui-ahˇ Miˬyehˇ jawˇ paw bi peh dzehˬ laˇ-euˬ muiˬ dzehˬ-eu noeˬ tmˬ-eu jeˬ-ahˇ aˬ dui za-euˬ ma.

²⁰ Kʼoeˇ uˬ taꞈ, Miˬyehˇ neh kamˬ taˬ-euˬ dawˬ kʼawꞈ jaˆ-eu ma. Piˇ ma kʼoeˇ deuˬ-ahˇ piˇ ma ka nehˬ ngeh, Miˬyehˇ kamˬ taˬ-euˬ maˬ jaˆ-a.

²¹ Ehˇ kʼawꞈ, Yeˬsuˇ-aˬ, Miˬyehˇ neh kamˬ-awˇ piˇ ma bi pyeuꞈ laˇ-euˬ meh. Aˬ jeˬ miˇ neh ehˇ naˇ, aˬ yawꞈ-ahˇ piˇ ma ka nehˬ ngeh Miˬyehˇ heu loꞈ-ehˇ ehˇ nehˬ-euˬ meh. “Sahˬpaˬ Miˬyehˇ kamˬ tsehˆ-euˬ jeˬ, maˬ poˆ maˬ paˇ nya-a. Mˬ maˬ maˬ byaˆ zaˇ ziˇ, nawˇ piˇ ma ya geuꞈ meh.”

²² Beu gaˇ duˬ kʼoeˇ loꞈ-ehˇ jaˆ-eu baˬ da neh, Yeˬsuˇ-aˬ, muiˬ dzehˬ byah dzehˬ-eu dawˬ ma saˇ jaˇ heu hmˬ-euˬ yaw duˬ yaw ciˇ pyeuꞈ-eu meh.

²³ Beu gaˇ duˬ heu loꞈ-ehˇ tiˬ hmˬ paˇ jaˆ-a siˬ. Piˇ ma kʼoeˇ deuˬ-aˬ, gʼawˬ mya gʼaˬ jawˇ-eu meh. Aˬ yawꞈ maꞈ ziˇ dehꞈ jiˇ-euˬ baw-eu miˇ neh, tiˬ gʼaˬ tehꞈ-ehˇ gʼawˬ myahˇ ni maˬ mˇ daˆ leꞈ nya-a.

²⁴ Ehˇ kʼawꞈ, Yeˬsuˇ-aˬ, mˬ maˬ maˬ byaˆ zaˇ ziˇ dehꞈ-eu miˇ neh, aˬ yawꞈ piˇ ma geuꞈ-awˇ mˇ-euˬ gaˇ-ahˇ yawˬ gʼaˬ yawˬ ya mˇ daˆ leꞈ-eu maˬ baw-a.

²⁵ Kʼoeˇ miˇ neh, nymˬ-mˇ maˬ ehˇ, aˬ kaˇ mehˬ hu paw aˬ geu yamˬ-ahˇ maˬ ehˇ, aˬ yawꞈ-ahˇ gʼoe-awˇ Miˬyehˇ jawˇ gaˇ kʼaˇ laˇ-eu tsawˇ haˬ-ahˇ aˬ yawꞈ ka kʼoꞈ nehˬ nya-eu meh. Aˬ jeˬ miˇ neh ehˇ naˇ, tsawˇ haˬ zaˬ-euˬ dah zaˇ Miˬyehˇ-ahˇ tahˬ shaˇ -eu gʼaˇ duˬ aˬ yawꞈ mˬ maˬ maˬ byaˆ zaˇ ziˇ dehꞈ-eu meh.

²⁶ Kʼoeˇ baˬ da neh, Yeˬsuˇ-aˬ, aˬ dui kʼaˇ loˬ-eu jeˬ mˇ byah nehˬ nya-eu Piˇma Yaw huiˬ gʼaˬ pyeuꞈ-eu meh. Aˬ yawꞈ-aˬ, yaw muiˬ yaw shawˇ meh. Ehˇ kʼaˇ tiˬ pawꞈ-iˬ maˬ za-eu uˬ taꞈ, iˬ baˇ tiˬ pawꞈ-iˬ maˬ ahˇ-a. Iˬ baˇ zaˬ deuˬ nehˬ-ehˇ maˬ bi keuˬ ni aˬ yawꞈ-ahˇ Miˬyehˇ yuˇ doˆ taˬ-awˇ, mˬ naˆ maˬ tseˇ goˇ-eu tiˆ-ahˇ ciˬ huiˬ ciˬ mahˇ keuˆ nehˬ-euˬ meh.

²⁷ Piˇ ma yaw huiˬ nui deuˬ-ahˇ aˬ yawꞈ maˬ duˇ-a. Aˬ yawꞈ maꞈ loꞈ-ehˇ yawˬ nah na luꞈ yawˬ ha-euˬ iˬ baˇ gʼaˇ duˬ jeˬ hu lawˇ gʼaˬ shehˇ gʼaˬ ngeh, aˬ cawˬ-euˬ i baˇ gʼaˇ duˬ ya lawˇ ya shehˇ-eu heu deuˬ-ahˇ aˬ yawꞈ mˇ-eu maˬ loˬ-a. Aˬ yawꞈ-euˬ gʼawˇ mawˇ lawˇ nehˬ-euˬ kʼoeˇ-aˬ, tiˬ poˆ lawˇ-awˇ mˬ maˬ maˬ byaˆ zaˇ ziˇ gmˬ-eu lawˇ-euˬ jeˬ pyeuꞈ-eu meh.

²⁸ Moˇseˬ-ahˇ gʼoe-awˇ Miˬyehˇ neh biꞈ-euˬ Zahˇ dawˬ kʼoꞈ dawˬ kʼoeˇ-aˬ, piˇ ma yaw huiˬ gʼaˬ geuꞈ-eu gʼaˇ duˬ maˬ byah maˬ loꞈ-eu deuˬ-ahˇ bi geuꞈ-euˬ meh. Ehˇ kʼawꞈ, Zahˇ dawˬ kʼoꞈ dawˬ-euˬ jeˬ nah hawˇ-eu oe-euˬ Miˬyehˇ neh kamˬ tsehˆ taˬ-euˬ saˇ jaˇ kʼoeˇ-aˬ, mˬ maˬ maˬ byaˆ zaˇ ziˇ byah-eu loꞈ-eu aˬ yawꞈ-euˬ Zaˬmaˇ-ahˇ Piˇma Yaw huiˬ gʼaˬ bi geuꞈ-euˬ meh.