HeˬByehˇ 5 - Akha

¹ Piˇ ma yaw huiˬ gʼaˬ kʼaˇ bi geuꞈ-euˬ yawˬ gʼaˬ na luꞈ-ahˇ, jeˬ zaˬ sehꞈ-awˇ lawˇ-eu gʼaˇ duˬ maˬ ehˇ, iˬ baˇ shawˇ-eu lawˇ-eu shehˇ-eu jeˬ mˇ-eu gʼaˇ duˬ maˬ ehˇ, tsawˇ haˬ zaˬ-euˬ dah zaˇ Miˬyehˇ-euˬ gaˇ bi mˇ-eu lehˇ tsawˇ haˬ zaˬ laꞈ kʼoeˇ Miˬyehˇ neh tseˇ doˆ-euˬ meh.

² Aˬ yawꞈ kʼawꞈ, gʼaˬ baˬ duˬ gʼawˬ mya ni jaˆ-eu loꞈ-ehˇ, maˬ siˬ nya-ehˇ mˇ lehˬ shaˇ lehˬ-euˬ deuˬ kʼoeˇ taˆ nui ma nahˬ yu ni taˬ nya-eu meh.

³ Aˬ yawꞈ gʼaˬ baˬ duˬ gʼawˬ mya ni jaˆ-eu miˇ neh, aˬ cawˬ-euˬ iˬ baˇ gʼaˇ duˬ tehꞈ-ehˇ maˬ ngeuˇ ni, yawˬ ha-euˬ iˬ baˇ gʼaˇ duˬ kʼawꞈ ya lawˇ ya shehˇ-eu meh.

⁴ Tsawˇ haˬ tiˬ gʼaˬ-iˬ yawˬ haˇ yawˬ ha piˇ ma yaw huiˬ gʼaˬ maˬ tsaˬ geuꞈ nya-a. Aˬloˬ-ahˇ Miˬyehˇ neh kuˇ-euˬ gaˇ duˇ ni, Miˬyehˇ neh kuˇ-euˬ tsawˇ haˬ tehꞈ-ehˇ piˇ ma yaw huiˬ gʼaˬ geuꞈ nya-eu meh.

⁵ Kʼoeˇ loꞈ-ehˇ duˇ ni, Ka li kʼawꞈ, yawˬ haˇ yawˬ ha ciˬ huiˬ ciˬ mahˇ-awˇ piˇ ma yaw huiˬ gʼaˬ tsaˬ geuꞈ-euˬ maˬ ngeuˇ-a. Miˬyehˇ aˬ yawꞈ-ahˇ ehˇ nehˬ-euˬ, “Nawˇ ngaˬ-euˬ Zaˬ maˇ ma. Iˬ nah ngaˇ nawˬ Da ma”

⁶ Yawˬ tsahˇ yawˬ laꞈ kʼoeˇ kʼawꞈ heu loꞈ-ehˇ paˇ ehˇ taˬ-euˬ meh. “Maˬlaˬkiˇsaˬdehˇ neh tawˬ-euˬ, piˇ ma-euˬ gaˇ nawˇ ya tawˬ-awˇ, mˬ maˬ maˬ byaˆ zaˇ ziˇ jiˇ ni, nawˇ piˇ ma ya geuꞈ daˆ leꞈ meh.”

⁷ Yeˬsuˇ miˇ tsaˬ kʼoeˇ taˆ dehꞈ ngeh, shiˇ-eu jeˬ laꞈ kʼoeˇ aˬ yawꞈ-ahˇ bi buˬ-iˇ nya-eu Miˬyehˇ-ahˇ, teˇ saˇ yaw kʼaˆ-ehˇ guˇ guˇ-ehˇ myaˆ biˇ doˆ-eu laꞈ kʼoeˇ guiˬ lahˬ shaˇ dui dui-euˬ meh. Aˬ yawꞈ Miˬyehˇ-ahˇ yaw zeu baw-awˇ Miˬyehˇ-euˬ nui noeˬ geuꞈ-euˬ miˇ neh, aˬ yawꞈ-euˬ shaˇ dawˬ-ahˇ Miˬyehˇ naˇ haˬ nehˬ-euˬ meh.

⁸ Aˬ yawꞈ Miˬyehˇ-euˬ Zaˬmaˇ pyeuꞈ-eu kʼawꞈ, shaˬ-eu zahˬ-eu jeˬ-ahˇ daˬ-eu laꞈ kʼoeˇ, Miˬyehˇ-euˬ ehˇ dawˬ naˇ haˬ-eu jeˬ-ahˇ siˬ nya laˇ-euˬ meh.

⁹ Aˬ yawꞈ laꞈ kʼoeˇ byah laˇ paˬ-ehˇ gʼeh-eu jeˬ bi byah laˇ gʼaˬ jiˇ ngeh, aˬ yawꞈ-euˬ dawˬ-ahˇ kʼaˇ naˇ haˬ geuꞈ-eu tsawˇ haˬ deuˬ-ahˇ mˬ maˬ maˬ byaˆ zaˇ ziˇ ka kʼoꞈ-eu jeˬ maˬ tsehˆ leˇ ni biꞈ-eu gʼaˬ pyeuꞈ laˇ-euˬ meh.

¹⁰ Kʼoeˇ naˇ, Miˬyehˇ neh aˬ yawꞈ-ahˇ piˇ ma yaw huiˬ gʼaˬ bi geuꞈ-awˇ, Maˬlaˬkiˇsaˬdehˇ neh tawˬ-euˬ piˇ ma-euˬ gaˇ tawˬ daˆ leꞈ-eu gʼaˬ bi geuꞈ-euˬ meh.

Jah-eu jeˬ-ahˇ maˬ ya byehˇ dzeh ni yahˇ-awˬ

¹¹ Gaˇ kawˆ heu hmˬ-ahˇ taꞈ leˇ-awˇ, ehˇ paˬ-ehˇ gʼeh-eu gʼawˬ mya ni jaˆ-eu ma. Ehˇ kʼawꞈ, naw maꞈ gʼoˆ shaw nya ni ehˇ mehˬ-eu ui cuiˆ yaw kʼaˆ meh. Aˬ jeˬ miˇ neh ehˇ naˇ, naw maꞈ gʼoˆ shaw-eu yaw myaꞈ meh.

¹² Aˇ yamˬ myahˇ laˇ-euˬ gaˇ shaˇ sawˇ naˇ, naw maꞈ-aˬ, aˬ cawˬ-ahˇ mehˬ nya tsoˆ nya deˇ laˇ-euˬ meh. Ehˇ kʼawꞈ, Miˬyehˇ-euˬ dawˬ-ahˇ taꞈ leˇ-awˇ dzaw dahˬ ya beh-eu gaˇ kawˆ deuˬ-ahˇ keuˆ ni, naw maꞈ-ahˇ paˇ mehˬ poˆ nehˬ paˬ-ehˇ gʼeh-eu meh. Naw maꞈ dzaˇ yaw gʼahˇ dzaˬ nya deˇ laˇ-euˬ kʼawꞈ, aˬ coeˇ dawˇ zaˬ-euˬ aˇ tiˆ-ahˇ dehꞈ luꞈ-a siˬ.

¹³ Aˬ coeˇ kʼaˇ dawˇ kʼoeˇ keuˆ ni, yaw muiˬ yaw doeˇ maˬ tseˇ paˆ nya laˇ-euˬ aˇ neˇ zaˬ nahˬ-ahˇ duˇ-a siˬ.

¹⁴ Dzaˇ yaw gʼahˇ-aˬ, yaw muiˬ yaw doeˇ tseˇ paˆ geuꞈ nya-eu huiˬ loˆ laˇ-euˬ tsawˇ haˬ deuˬ-euˬ gʼaˇ duˬ meh.