HeˬByehˇ 3 - Akha

Moˇseˬ naˆ maˬ tseˇ Yeˬsuˇ huiˬ dzehˬ mahˇ dzehˬ-eu

¹ Aˬ cawˬ loꞈ-ehˇ Miˬyehˇ neh kuˆ-euˬ tsawˇ haˬ pyeuꞈ-eu ngaˬ-euˬ aˬ yuiꞈ aˬ nyiˇ deuˬ-oˇ, aˬ dui jah-eu jeˬ-euˬ Piˆma Yaw huiˬ gʼaˬ bi geuꞈ-eu gʼaˇ duˬ, Miˬyehˇ neh kʼehˇ gʼeh leꞈ-euˬ gʼaˬ pyeuꞈ-eu Yeˬsuˇ-euˬ gaˇ kawˆ shaˇ noeˬ haw sheˇ.

² Moˇseˬ Miˬyehˇ-euˬ nymˇ jiˇ laꞈ kʼoeˇ gaˇ mˇ-euˬ saˇ jaˇ ziꞈ-eu loꞈ-ehˇ, Miˬyehˇ-euˬ gaˇ mˇ-eu gʼaˇ duˬ aˬ yawꞈ-ahˇ tseˇ doˆ-eu gʼaˬ pyeuꞈ-eu Miˬyehˇ-ahˇ aˬ yawꞈ saˇ jaˇ ziꞈ-euˬ meh.

³ Nymˇ-ahˇ ciˬ huiˬ ciˬ mahˇ-eu naˆ maˬ tseˇ, nymˇ tsoˆ-euˬ gʼaˬ-ahˇ ciˬ huiˬ ciˬ mahˇ dzehˬ-eu meh. Kʼoeˇ gaˇ duˇ ni, Yeˬsuˇ-aˬ, Moˇseˬ naˆ maˬ tseˇ ciˬ huiˬ ciˬ mahˇ nehˬ-eu jeˬ-ahˇ za geuˇ-eu meh.

⁴ Nymˇ yawˬ nymˇ na luꞈ tsoˆ-euˬ yaw sahˇ baw-eu meh. Yawˬ jeˬ na luꞈ-ahˇ tsoˆ-euˬ gʼaˬ-aˬ, Miˬyehˇ meh.

⁵ Moˇseˬ-aˬ, Miˬyehˇ-euˬ nymˇ jiˇ laꞈ kʼoeˇ zaˬ kʼaˆ geuˬ-euˬ saˇ jaˇ ziꞈ-eu tsawˇ haˬ tiˬ gʼaˬ pyeuꞈ-awˇ, aˬ kaˇ mehˬ hu paw-euˬ gʼaˇ duˬ Miˬyehˇ aˬ geu jeˬ ehˇ-eu lehˇ gʼeh-eu gaˇ kawˆ, tsawˇ haˬ zaˬ-ahˇ aˬ yawꞈ toeˬ mehˬ-euˬ meh.

⁶ Ehˇ kʼawꞈ, Ka li-aˬ, Miˬyehˇ-euˬ nymˇ jiˇ-ahˇ haw-eu pyaˆ-eu gʼaˬ pyeuꞈ-eu saˇ jaˇ ziꞈ-eu Zaˬmaˇ meh. Aˬ dui kʼawꞈ, aˬ dui neh noeˬ tmˬ taˬ-euˬ jeˬ-ahˇ nui ma kʼaˬ duˬ ni taˬ-awˇ, ziꞈ dah ni tuˆ tehˬ taˬ naˇ, Miˬyehˇ-euˬ nymˇ jiˇ laꞈ kʼoeˇ jawˇ-eu aˬ yawꞈ-euˬ zaˬ deuˬ lehˇ ehˇ nya ma.

Miˬyehˇ-euˬ zaˬ deuˬ gʼaˬ naˬ ya naˬ tehꞈ-a

⁷ Kʼoeˇ miˇ neh, Muiˬ-eu shawˇ-eu Yaw sahˇ Miˬyehˇ neh ehˇ taˬ-euˬ loꞈ-ehˇ, “Iˬ nah Miˬyehˇ ehˇ luꞈ-eu dawˬ, naw maꞈ ya gaˬ gʼaˬ-euˬ ngeuˇ naˇ,

⁸ naw maꞈ-euˬ aˬ poeˬ aˬ bawˇ deuˬ, Miˬyehˇ-ahˇ puiˬ-eu aˇ yamˬ-ahˇ, yawꞈ maꞈ nui ma gʼahˇ-euˬ loꞈ-ehˇ, Kʼoeˇ ngeh nah bawˇ tsahˬ bawˇ dahˇ-ahˇ, Miˬyehˇ-ahˇ lawˬ haw-euˬ loꞈ-ehˇ, naw maꞈ-euˬ nui ma taˬ bi gʼahˇ.

⁹ Miˬyehˇ heu loꞈ-ehˇ ehˇ-eu meh. Oeˬ tseˇ kʼoꞈ oeˬ tseˇ myaˇ byah ni, ngaˬ neh mˇ mehˬ-euˬ gaˇ deuˬ-ahˇ, aˬ yawꞈ maˬ ya mawˇ duˬ-euˬ kʼawꞈ, ngaˬ-ahˇ kʼoeˇ gaˇ lawˬ haw-euˬ meh.

¹⁰ Kʼoeˇ baˬ da neh ziˇ kʼoeˇ ziˇ-ahˇ, ngaˇ nui ma pehˇ-awˇ ehˇ nehˬ-euˬ, ‘Tiˬjawˇ-iˬ saˇ jaˇ maˬ ziꞈ-ehˇ, ngaˬ-euˬ dawˬ-ahˇ maˬ naˇ haˬ-a.’

¹¹ Ngaˇnui ma pehˇdui dui laˇ-awˇ, heu loꞈ-ehˇ saˇ jaˇ dzaˬ-euˬ ma. ‘Yawꞈ maꞈ gʼaˬ naˬ bi naˬ-eu lehˇ, lehˬ hmˬ taˬ-euˬ miˇ kʼahˬ laꞈ kʼoeˇ, tiˬ jawˇ-iˬ maˬ bi uˇ leˇma.”’

¹² Jah-eu tsawˇ haˬ deuˬ pyeuꞈ-eu gaˬ-eu cawˬ deuˬ-oˇ, dehꞈ luꞈ-eu Miˬyehˇ-ahˇ byehˇ dzeh gaˇ keuˆ ni haiˬ-eu, maˬ jah-eu nui ma pi luꞈ-eu tsawˇ haˬ naw maꞈ laꞈ kʼoeˇ maˬ ya bi ahˇ ni yahˇ-awˬ.

¹³ Naw maꞈ tiˬ gʼaˬ-iˬ iˬ baˇ neh mehˇ shuiˇ maˬ bi shuiˇ gʼaˬ-ehˇ, nui ma maˬ ya gʼahˇ laˇ ni, “Iˬnah” lehˇ JaˇLiꞈ laꞈ kʼoeˇ ehˇ taˬ-euˬ dawˬ kʼoeˇ dawˬ aˬ dui-ahˇ kʼaˇ toeˬ ceh luꞈ kʼoeˇ keuˆ ni, yawˬ nah na luꞈ tiˬ gʼaˬ tiˇ gʼaˬ ngehˬ gʼeh-awˬ.

¹⁴ Aˬ jeˬ miˇ neh ehˇ naˇ, aˇ dahˬ beh ngeh neh aˬ dui ziꞈ dah ni jah-euˬ loꞈ-ehˇ, aˇ saˬ saˬ ngeh keuˆ ni ziꞈ naˇ, aˬ dui dawˬ tawˆ luꞈ Ka li-euˬ mˇ cawˬ shaˇ cawˬ deuˬ pyeuꞈ-eu ma.

¹⁵ Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ meh. “Iˬ nah Miˬyehˇ ehˇ luꞈ-eu dawˬ, naw maꞈ ya gaˬ gʼaˬ-euˬ ngeuˇ naˇ, Miˬyehˇ-ahˇ puiˬ-euˬ aˇ yamˬ-ahˇ, yawꞈ maꞈ nui ma gʼahˇ-euˬ loꞈ-ehˇ, naw maꞈ-euˬ nui ma taˬ bi gʼahˇ.”

¹⁶ Miˬyehˇ-euˬ dawˬ ya gaˬ-awˇ Miˬyehˇ-ahˇ puiˬ-euˬ tsawˇ haˬ deuˬ aˬ suˇ gʼaˬ-a. Iˇjiˇtuˆ miˇ kʼahˬ laꞈ kʼoeˇ Moˇseˬ neh sheuˬ doˆ nehˬ-euˬ tsawˇ haˬ kʼoeˇ deuˬ dawˬ tawˆ luꞈ maˬ ngeuˇ-a loˇ.

¹⁷ Oeˬ tseˇ kʼoꞈ byah ni Miˬyehˇ nui ma pehˇ-euˬ kʼoeˇ aˬ suˇ gʼaˬ-ahˇ pehˇ-euˬ ta. Iˬ baˇ mˇ-euˬ tsawˇ haˬ kʼoeˇ deuˬ-ahˇ pehˇ-euˬ maˬ ngeuˇ-a loˇ. Bawˇ tsahˬ bawˇ dahˇ-ahˇ coˬ dzeh-awˇ shiˇ-euˬ kʼoeˇ deuˬ-ahˇ pehˇ-euˬ maˬ ngeuˇ-a loˇ.

¹⁸ “Aˬ yawꞈ maꞈ-ahˇ ngaˇ biꞈ nehˬ-awˇ gʼaˬ naˬ bi naˬ-eu lehˇ lehˬ hmˬ taˬ-euˬ miˇ kʼahˬ laꞈ kʼoeˇ, aˬ yawꞈ maꞈ maˬ paˇ bi uˇ leˇ ma” lehˇ Miˬyehˇ ehˇ-awˇ saˇ jaˇ dzaˬ-euˬ kʼoeˇ, aˬ suˇ gʼaˬ-ahˇ ehˇ-euˬ ta. Aˬ yawꞈ-ahˇ puiˬ-euˬ tsawˇ haˬ kʼoeˇ deuˬ-ahˇ ehˇ-euˬ maˬ ngeuˇ-a loˇ.

¹⁹ Aˬ yawꞈ maꞈ maˬ jah-euˬ baˬ da neh, miˇ kʼahˬ kʼoeˇ kʼahˬ-ahˇ aˬ yawꞈ maꞈ maˬ ya uˇ leˇ-euˬ jeˬ pyeuꞈ-eu meh lehˇ aˬ dui ya siˬ ya mawˇ-euˬ ma.