HeˬByehˇ 11 - Akha

Jah-eu jeˬ

¹ Jah-eu jeˬ-aˬ, noeˬ tmˬ taˬ-euˬ jeˬ aˬ diˇ pyeuꞈ laˇ tehꞈ-a lehˇ nui jah bi ahˇ-awˇ, maˬ ya mawˇ-euˬ jeˬ-ahˇ nui kʼaˬ bi tsmˬ-eu meh.

² Aˇ hu tsawˇ haˬ deuˬ-ahˇ Miˬyehˇ nui kʼahˇ shiˇ-euˬ kʼoeˇ-aˬ, aˬ yawꞈ maꞈ jah-euˬ miˇ neh meh.

³ Miˬyehˇ-euˬ dawˬ neh boeˬ boeˬ luˆ luˆ dawˬ tawˆ luꞈ-ahˇ beh-awˇ, maˬ mawˇ nya-eu jeˬ yuˇ-awˇ mawˇ nya-eu jeˬ jahˇ doˆ taˬ-euˬ meh lehˇ aˬ dui siˬ nya-eu heu-aˬ, jah-eu jeˬ baˬ da neh siˬ nya-eu jeˬ pyeuꞈ-eu meh.

⁴ Gaˬiˇnaˆ neh lawˇ-euˬ naˆ maˬ tseˇ muiˬ dzehˬ-eu jeˬ-ahˇ Aˬbeˬlaˆ lawˇ nya-euˬ kʼoeˇ-aˬ, jah-eu jeˬ baˬ da neh meh. Aˬ yawꞈ-euˬ jah-eu jeˬ baˬ da neh Miˬyehˇ aˬ yawꞈ-ahˇ yaw tsaˬ yaw dawˇ tsawˇ haˬ lehˇ sawˇ nehˬ-euˬ meh. Aˬ jeˬ miˇ neh ehˇ naˇ, aˬ yawꞈ neh damˬ-euˬ jeˬ-ahˇ Miˬyehˇ nui kʼahˇ shiˇ-eu meh. Aˬbeˬlaˆ shiˇ dzeuˇ-euˬ kʼawꞈ, aˬ yawꞈ-euˬ jah-eu jeˬ baˬ da neh iˬ nah keuˆ ni dawˬ ngehˬ luꞈ-a siˬ.

⁵ Eˇnawˆ maˬ shiˇ-euˬ tsawˇ haˬ pyeuꞈ-eu kʼoeˇ-aˬ, jah-eu jeˬ baˬ da neh meh. Aˬ yawꞈ-ahˇ Miˬyehˇ jawˇ gaˇ bi ciˬ daˆ leꞈ-awˇ, tsawˇ haˬ tiˬ gʼaˬ-iˬ aˬ yawꞈ-ahˇ maˬ paˇ ya mawˇ haw-aˬ. Aˬ jeˬ miˇ neh ehˇ naˇ, Miˬyehˇ neh aˬ yawꞈ-ahˇ ciˬ kʼoꞈ daˆ leꞈ-euˬ meh. Aˬ yawꞈ-ahˇ maˬ bi ciˬ kʼoꞈ daˆ leꞈ mi naˆ-ehˇ Miˬyehˇ nui kʼahˇ shiˇ ni aˬ yawꞈ dehꞈ-euˬ meh lehˇ Jaˇliꞈ laꞈ kʼoeˇ ehˇ taˬ-euˬ meh.

⁶ Jah-eu jeˬ maˬ ahˇ naˇ, tsawˇ haˬ tiˬ gʼaˬ-iˬ Miˬyehˇ nui kʼahˇ shiˇ ni maˬ dehꞈ nya-a. Aˬ jeˬ miˇ neh ehˇ naˇ, Miˬyehˇ jawˇ gaˇ kʼaˇ laˇ-eu tsawˇ haˬ yawˬ gʼaˬ na luꞈ, Miˬyehˇ aˬ diˇ jawˇ-eu gaˇ kawˆ hawˇ-eu, aˬ yawꞈ-ahˇ kʼaˇ poˆ-eu tsawˇ haˬ-ahˇ aˬ yawꞈ guiˬ lah biꞈ-eu gaˇ kawˆ ya jah meh.

⁷ Mehˬ hu paw pyeuꞈ laˇ-eu lehˇ gʼeh-eu maˬ ya mawˇ-eu gaˇ kawˆ deuˬ-ahˇ yahˇ-awˇ dehꞈ-eu gʼaˇ duˬ, Miˬyehˇ Noˇaˬ-ahˇ dawˬ biꞈ ngeh Noˇaˬ naˇ haˬ geuꞈ-euˬ kʼoeˇ-aˬ, jah-eu jeˬ baˬ da neh meh. Miˬyehˇ-euˬ ehˇ dawˬ-ahˇ aˬ yawꞈ naˇ haˬ-eu laꞈ kʼoeˇ, aˬ yawꞈ hawˇ-eu aˬ yawꞈ-euˬ nymˇ kʼahˬ zaˬ deuˬ ya buˬ-iˇ ni saˇ baoˬ tiˬ laˇ tsoˆ-euˬ meh. Kʼoeˇ loꞈ-ehˇ mˇ-eu laꞈ kʼoeˇ, Miˬyehˇ-ahˇ byehˇ dzeh-euˬ tsawˇ haˬ kʼoeˇ deuˬ-ahˇ aˬ yawꞈ gʼawˬ tsehˆ tsehˆ-awˇ, jah-eu baˬ da neh Miˬyehˇ-euˬ yaw tsaˬ yaw dawˇ jeˬ-ahˇ aˬ yawꞈ za-euˬ meh.;

⁸ Miˬyehˇ neh Aˬbyaˬhaˬ-ahˇ biꞈ-eu lehˇ saˇ jaˇ dzaˬ taˬ-euˬ miˇ kʼahˬ-ahˇ iˇ-eu gʼaˇ duˬ Miˬyehˇ kuˇ ngeh, Aˬbyaˬhaˬ naˇ haˬ geuꞈ-euˬ kʼoeˇ-aˬ, jah-eu jeˬ baˬ da neh meh. Yawˬ ha aˬ gaˇ ya iˇ-eu maˬ siˬ nya kʼawꞈ, aˬ yawꞈ-euˬ miˇ kʼahˬ-ahˇ byehˇ dzeh yaꞈ-awˇ doˆ-iˇ-euˬ meh.

⁹ Miˬyehˇ neh saˇ jaˇ dzaˬ taˬ-euˬ maˬ siˬ maˬ suˇ-eu miˇ kʼahˬ-ahˇ aˬ yawꞈ jawˇ-euˬ kʼoeˇ-aˬ, jah-eu jeˬ baˬ da neh meh. Aˬ yawꞈ-ahˇ duˇ ni Miˬyehˇ neh saˇ jaˇ dzaˬ-euˬ jeˬ-ahˇ za-euˬ Iˇtsaˆ hawˇ-eu Yaˬkoˆ loꞈ-ehˇ, sehˬ gʼawˆ gʼawˆ gʼawˆ-ehˇ aˬ yawꞈ jawˇ-euˬ meh.

¹⁰ Aˬ jeˬ miˇ neh ehˇ naˇ, Miˬyehˇ neh shaˇ noeˬ-awˇ tsoˆ taˬ-euˬ mˬ maˬ maˬ byaˆ zaˇ ziˇ ziꞈ-eu meuˬ-ahˇ Aˬbyaˬhaˬ noeˬ tmˬ taˬ-euˬ meh.

¹¹ Aˬbyaˬhaˬ mawˬ dui dui laˇ-awˇ, aˬ yawꞈ-euˬ nymˇ dahˬ zaˬ ciˬ zaˬ cu mˇ yamˬ dzeuˇ-euˬ kʼawꞈ zaˬ paˇ jawˇ le nya-euˬ kʼoeˇ-aˬ, jah-eu jeˬ baˬ da neh meh. Miˬyehˇ-aˬ, aˬ yawꞈ neh saˇ jaˇ dzaˬ-euˬ loꞈ-ehˇ mˇ byah tehꞈ-a lehˇ aˬ yawꞈ jah-euˬ meh.

¹² Ziˇ jiˇ-eu dawˬ peh peh le-euˬ tsawˇ haˬ kʼoeˇ tiˬ gʼaˬ o neh, mˬ taˆ tsehˬ-eu aˬ guiˇ hawˇ-eu iˬ ma laˆ shaˆ lawˇ deh-ahˇ jaˆ-eu kʼaˇ shuiˬ loꞈ-ehˇ myaˬ dui dui-eu zaˬ deuˬ uˆ deuˬ jeuˬ le o le-euˬ meh.

¹³ Tsawˇ haˬ heu deuˬ dawˬ tawˆ luꞈ, jah-eu jeˬ laꞈ kʼoeˇ shiˇ-euˬ meh. Miˬyehˇ neh saˇ jaˇ dzaˬ taˬ-euˬ jeˬ-ahˇ aˬ yawꞈ maꞈ maˬ za-aˬ. Ehˇ kʼawꞈ, Miˬyehˇ neh saˇ jaˇ dzaˬ taˬ-euˬ jeˬ byah laˇ gaˇ, gaˇ mahˇ kaˬ gaˇ neh aˬ yawꞈ maꞈ ya mawˇ-awˇ laˬ kʼaˬ cehˇ nui kʼahˇ shiˇ-eu laꞈ kʼoeˇ, aˬ yawꞈ maꞈ miˇ tsaˬ kʼoeˇ taˆ tiˬ kʼehˬ tiˬ yamˬ jawˇ naˬ mˇ-eu daˬ yah tehꞈ ma lehˇ ehˇ-eu meh.

¹⁴ Kʼoeˇ loꞈ-ehˇ ehˇ-eu tsawˇ haˬ deuˬ-aˬ, yawˬ ha-euˬ miˇ kʼahˬ-ahˇ noeˬ tmˬ luꞈ-eu tsawˇ haˬ deuˬ meh lehˇ bya cehˆ ni siˬ duˬ laˇ-eu meh.

¹⁵ Aˬ yawꞈ maꞈ neh byehˇ dzeh yaꞈ-euˬ miˇ kʼahˬ-ahˇ aˬ yawꞈ maꞈ maˬ paˇ shaˇ noeˬ meh. Kʼoeˇ loꞈ-ehˇ shaˇ noeˬ law nmˇ-aˬ, paˇ gʼoꞈ jawˇ le nya-eu meh.

¹⁶ Kʼoeˇ naˆ maˬ tseˇ muiˬ dzehˬ-eu mˬ taˆ miˇ kʼahˬ-ahˇ aˬ yawꞈ maꞈ noeˬ tsoˆ taˬ-euˬ meh. Kʼoeˇ miˇ neh, tsawˇ haˬ kʼoeˇ deuˬ Miˬyehˇ-ahˇ aˬ yawꞈ maꞈ-euˬ Miˬyehˇ ma lehˇ kuˇ gaˇ Miˬyehˇ maˬ shaꞈ dawˇ-a. Aˬ jeˬ miˇ neh ehˇ naˇ, aˬ yawꞈ maꞈ gʼaˇ duˬ meuˬ tiˬ meuˬ aˬ yawꞈ lehˬ hmˬ taˬ-euˬ meh.

¹⁷ Aˬbyaˬhaˬ-ahˇ Miˬyehˇ lawˬ haw ngeh aˬ yawꞈ-euˬ aˬ li Iˇtsaˆ lawˇ nehˬ-euˬ kʼoeˇ-aˬ, jah-eu jeˬ baˬ da neh meh. Aˬbyaˬhaˬ-aˬ, Miˬyehˇ nehˬ-ehˇ saˇ jaˇ dzaˬ taꞈ-euˬ tsawˇ haˬ pyeuꞈ kʼawꞈ, aˬ yawꞈ-euˬ aˬ li tiˬ gʼaˬ tehꞈ-ehˇ jawˇ-eu lawˇ nehˬ coeˇ-eu meh.

¹⁸ “Ngaˬ neh nawˬ-ahˇ biꞈ ma lehˇ saˇ jaˇ dzaˬ taˬ-euˬ zaˬ deuˬ uˆ deuˬ, Iˇtsaˆ o neh jeuˬ le o le tehꞈ-a” lehˇ, Aˬbyaˬhaˬ-ahˇ Miˬyehˇ ehˇ nehˬ-euˬ meh.

¹⁹ Iˇtsaˆ-ahˇ shiˇ-eu jeˬ laꞈ kʼoeˇ Miˬyehˇ bi gʼoꞈ dehꞈ laˇ nya meh lehˇ Aˬbyaˬhaˬnoeˬ-euˬ meh. Dawˬ yehˆ zmˬ-awˇ ya ehˇ naˇ, Iˇtsaˆ shiˇ dzeuˇ-euˬ paˇ za kʼoꞈ-euˬ gaˇ duˇ-eu meh.

²⁰ Yaˬkoˆ hawˇ-eu Iˇsawˇ aˬ nyaꞈ nmˇ mehˬ hu paw dehꞈ daˆ leꞈ ngeh guiˬ lahˬ za nya ni, Iˇtsaˆ dawˬ ngehˬ gʼeh nehˬ-euˬ kʼoeˇ-aˬ, jah-eu jeˬ baˬ da neh meh.

²¹ Yaˬkoˆ maˬ shiˇ mi naˆ-ehˇ Yoˇsehˆ-euˬ aˬ li nyiˬ li-ahˇ dawˬ ngehˬ gʼeh nehˬ yaꞈ-euˬ kʼoeˇ-aˬ, jah-eu jeˬ baˬ da neh meh. Aˬ yawꞈ-aˬ, yawˬ ha-euˬ gawˬ yoeˬ-ahˇ gʼoˆ toˆ shaˇ-awˇ Miˬyehˇ-ahˇ uˬ duˬ tahˬ-euˬ meh.

²² Yoˇsehˆ saꞈ maˬ gʼawˇ li mi naˆ-ehˇ, Iˇsaˬleˬlaˆtsawˇ haˬ deuˬ Iˇjiˇtuˆ miˇ kʼahˬ laꞈ kʼoeˇ neh ya doˆ-iˇ-eu gaˇ kawˆ ehˇ taˬ yaꞈ-awˇ, aˬ yawꞈ-ahˇ aˬ joˆ-ehˇ ya baꞈ pahˬ-eu gaˇ kawˆ mehˬ taˬ yaꞈ-euˬ kʼoeˇ-aˬ, jah-eu jeˬ baˬ da neh meh.

²³ Moˇseˬ dehꞈ le ngeh, aˬ yawꞈ-euˬ aˬ da aˬ ma aˬ yawꞈ-ahˇ ba la smˇ siˬ byah ni cu zaꞈ taˬ-euˬ kʼoeˇ-aˬ, jah-eu-jeˬ baˬ da neh meh. Zaˬ kʼoeˇ gʼaˬ muiˬ dui dui gaˇ aˬ yawꞈ nyaꞈ ya mawˇ-euˬ miˇ neh, sahˬ paˬ neh biꞈ taˬ-euˬ dawˬ-ahˇ maˬ naˇ haˬ ni kʼoeˇ loꞈ-ehˇ cu zaꞈ-euˬ meh.

²⁴ Moˇseˬ huiˬ loˆ laˇ ngeh, aˬ yawꞈ-ahˇ sahˬpaˬ zaˬ miˬ-euˬ aˬ li lehˇ kuˇ gaˇ maˬ gaˬ nahˇ-eu kʼoeˇ-aˬ, jah-eu jeˬ baˬ da neh meh.

²⁵ Iˬbaˇ-ahˇ tiˬ kʼehˇ laˇ kʼehˬ byawˬ gʼa muˆ gʼa-eu naˆ maˬ tseˇ, Miˬyehˇ-euˬ tsawˇ haˬ deuˬ nehˬ-ehˇ tiˬ kawˆ loꞈ-ehˇ kʼehˬ-eu kʼaˆ-eu jeˬ-ahˇ aˬ yawꞈ daˬ mawꞈ-eu meh.

²⁶ Ka li-euˬ gʼaˇ duˬ daˬ ga-eu jeˬ-ahˇ ya daˬ-eu-aˬ, Iˇjiˇtuˆ miˇ kʼahˬ laꞈ kʼoeˇ kʼaˇ jaˆ-eu pyuˇ shuiˇ myawˬ gahˬ dawˬ tawˆ luꞈ naˆ maˬ tseˇ poeˬ dui lawˬ dui dui ma lehˇ aˬ yawꞈ jah duˬ taˬ-euˬ meh. Aˬ jeˬ miˇ neh ehˇ naˇ, aˬ kaˇ za-eu laꞈ sawˬ-ahˇ aˬ yawꞈ noeˬ tsoˆ taˬ-euˬ meh.

²⁷ Sahˬ paˬ nui ma pehˇ gaˇ maˬ yahˇ ni Iˇjiˇtuˆ miˇ kʼahˬ-ahˇ neh Moˇseˬ doˆ-iˇ-euˬ kʼoeˇ-aˬ, jah-eu jeˬ baˬ da neh meh. Maˬ mawˇ nya-eu Miˬyehˇ-ahˇ aˬ yawꞈ ya mawˇ haw-euˬ loꞈ-ehˇ, naˇ kʼah nahˇ gʼoꞈ maˬ gʼoꞈ haw ni aˬ yawꞈ nui ma ziꞈ-euˬ meh.

²⁸ Baˬsaˬkaˬ Bawˬ-iˬ gʼeh-awˇ Iˇsaˬleˬlaˆ tsawˇ haˬ deuˬ-euˬ dehꞈ beh beh le-euˬ aˬ li deuˬ-ahˇ Shiˇ-eu jeˬ-euˬ Mˬ taˆ gʼaˬ kʼehˇ neh maˬ bi sehꞈ-eu gʼaˇ duˬ, aˬ yawꞈ dawˬ biꞈ-awˇ laˇ gʼoˆ-ahˇ shiˬ bi byaˆ shehˬ-euˬ kʼoeˇ-aˬ, jah-eu jeˬ baˬ da neh meh.

²⁹ Iˇsaˬleˬlaˆ tsawˇ haˬ deuˬ Iˬ ma laˆ shaˆ Yaw neˇ nyiˬ tsehˆ-ehˇ gui coˇ ni gʼeh-eu miˇ tsaˬ-ahˇ nawˬ-awˇ tsehˆ doˆ nya-euˬ kʼoeˇ-aˬ, jah-eu jeˬ baˬ da neh meh. Iˇjiˇtuˆ tsawˇ haˬ deuˬ kʼoeˇ loꞈ-ehˇ tsehˆ doˆ-eu lehˇ leh jeh ngeh, iˇ cuꞈ neh bi dahˬ pymˬ sehꞈ jiˇ-euˬ meh.

³⁰ Iˇsaˬleˬlaˆ tsawˇ haˬ deuˬ Yeˬliˇkoˇ meuˬ-ahˇ shiꞈ nah cah jawˬ nehˬ ngeh meuˬ lahˇ byaˆ-iˇ-euˬ kʼoeˇ-aˬ, jah-eu jeˬ baˬ da neh meh.

³¹ Laˬhaˇ lehˇ myahˇ-euˬ meh maˬ laˇ kʼoeˇ gʼaˬ Miˬyehˇ-euˬ ehˇ dawˬ maˬ naˇ haˬ-eu tsawˇ haˬ deuˬ nehˬ-ehˇ maˬ ya shiˇ caw-euˬ kʼoeˇ-aˬ, jah-eu jeˬ baˬ da neh meh. Aˬ jeˬ miˇ neh ehˇ naˇ, kʼoeˬ sho haw laˇ-euˬ Iˇsaˬleˬlaˆ tsawˇ haˬ deuˬ-ahˇ aˬ yawꞈ yaw muiˬ paˬ-ehˇ ha-euˬ meh.

³² Heu naˆ maˬ tseˇ paˇ ja siˬ loˇ. Giˇdoˬ, Baˬlehˇ, Saˬsoˬ, Yeˬpaˬtaˆ, Daˬbiˇ, Saˬmeuˬlaˆ aˬ ha maꞈ hawˇ-eu, Miˬyehˇ gʼaˇ duˬ ngehˬ dah-eu deuˬ-euˬ gaˇ kawˆ maˬ paˇ ja jiˇ coeˇ miˇ-a.

³³ Jah-eu jeˬ baˬ da neh aˬ cawˬ-euˬ miˇ kʼahˬ deuˬ-ahˇ aˬ yawꞈ maꞈ guiˇ deuˆ gʼaˬ-euˬ meh. Yaw tsaˬ yaw dawˇ jeˬ aˬ yawꞈ maꞈ mˇ-awˇ, Miˬyehˇ neh saˇ jaˇ dzaˬ taˬ-euˬ jeˬ-ahˇ za-euˬ meh. Aˇ laˬ jaˬ shiˇ-ahˇ mehˬ cuꞈ cuꞈ nya-euˬ meh.

³⁴ Guˆ dui dui laˇ paˬ-ehˇ gʼeh-eu miˬ dzaˬ-ahˇ laˆ miˆ nya-awˇ, mi cehˇ neh maˬ bi sehꞈ ni dzeuˇ-iˇ nya-euˬ meh. Aˬ yawꞈ maꞈ gʼaˬ baˬ dui dui-euˬ kʼawꞈ, gʼaˬ kʼaˆ dui dui laˇ-awˇ aˬ cawˬ tsawˇ jeuˬ-euˬ guiˇ maꞈ deuˬ-ahˇ deuˆ gʼaˬ nya-euˬ meh.

³⁵ Jah-eu jeˬ baˬ da neh, zaˬ miˬ zaˬ deuˬ shiˇ dzeuˇ-euˬ yawˬ ha-euˬ aˬ yuiꞈ aˬ nyiˇ deuˬ-ahˇ bi gʼoꞈ dehꞈ laˇ nya-euˬ meh. Tiˬ deuˬ-aˬ, muiˬ dzehˬ-eu gʼoꞈ dehꞈ laˇ-eu jeˬ-ahˇ za nya ni, bi buˬ bi law-iˇ-eu jeˬ-ahˇ maˬ ha geuꞈ-ehˇ bi kʼehˬ bi kʼaˆ sehꞈ leꞈ-euˬ meh.

³⁶ Tiˬ paˆ na deuˬ-aˬ, yehˬ bawˬ sehˇ lu-ehˇ bi ehˇ niˇ gʼa-awˇ, yahˬ caˆ neh bi juiꞈ-euˬ meh. Tiˬ paˆ na deuˬ-aˬ, shmˇ caˆ bi paꞈ-awˇ, tawˬ-ahˇ bi tsahˇ uˇ gʼeh-euˬ meh.

³⁷ Kʼaˬ lo neh bi biˬ sehꞈ-euˬ meh. Yehˬ ma neh bi yehˬ tsehˆ-euˬ meh. Mi cehˇ neh bi deuˆ sehꞈ-euˬ meh. Yawˇ baˆ kʼoˆ hawˇ-eu ciꞈ myehꞈ baˆ kʼoˆ dm dm-ehˇ cah-euˬ meh. Shaˬ dui dui-awˇ, kʼehˬ dui kʼaˆ dui bi dui-euˬ uˬ taꞈ, kʼaˇ gʼeh mawꞈ-eu jeˬ bi gʼeh-euˬ meh.

³⁸ Miˇ tsaˬ tahˬ kʼawˇ heu-aˬ, aˬ yawꞈ maꞈ loꞈ-ehˇ muiˬ-eu tsawˇ haˬ deuˬ-ahˇ maˬ geuˇ-a. Aˬ yawꞈ maꞈ-aˬ, gawˬ jawˬ gawˬ duˇ bawˇ tsahˬ bawˇ dahˇ doe ni pawˇ pawˇ-ehˇ, miˇ tsa dahˇ-eu lo kʼahˬ lo byoe doe ni jawˇ-euˬ meh.

³⁹ Aˬ yawꞈ maꞈ jah-eu jeˬ baˬ da neh kʼoeˇ naˆ naˆ-ehˇ gʼeh-eu jeˬ mˇ taˬ yaꞈ-euˬ jaˆ-eu meh. Ehˇ kʼawꞈ, Miˬyehˇ neh saˇ jaˇ dzaˬ taˬ-euˬ jeˬ-ahˇ, aˬ yawꞈ maˬ maˬ za-aˬ siˬ.

⁴⁰ Aˬ jeˬ miˇ neh ehˇ naˇ, kʼoeˇ naˆ maˬ tseˇ muiˬ-eu jeˬ aˬ dui gʼaˇ duˬ Miˬyehˇ laˆ saˆ taˬ-euˬ meh. Aˬ dui maꞈ nehˬ-ehˇ tiˬ kawˆ loꞈ-ehˇ aˬ yawꞈ maꞈ-ahˇ bi byah laˇ-eu gʼaˇ duˬ Miˬyehˇ shaˇ noeˬ taˬ-euˬ meh.