HeˬByehˇ 10 - Akha

¹ Yuˇdaˆ tsawˇ haˬ-euˬ Zahˇ dawˬ kʼoꞈ dawˬ-aˬ, maˇ maˇ ni gʼeh-eu jeˬ maˬ ngeuˇ-a. Keuˆ le luꞈ-eu maˇ maˇ ni gʼeh-eu yaw muiˬ jeˬ-euˬ aˇ baˇ naˇ shmˇ loˆ ni tehꞈ meh. Tiˬ jawˇ-iˬ lawˇ gʼaˬ shehˇ gʼaˬ-euˬ maˬ baw ni, aˬ yawꞈ tiˬ jeˬ tehꞈ-ehˇ gʼawˬ mya kʼoꞈ gʼawˬ mya la ya lawˇ ya shehˇ poˆ-eu meh. Toˆ-ehˇ ngeuˇ naˇ, Zahˇ dawˬ kʼoꞈ dawˬ kʼoeˇ, kʼoeˇ loꞈ-ehˇ lawˇ poˆ shehˇ poˆ poˆ-eu laꞈ kʼoeˇ, Miˬyehˇ jawˇ gaˇ laˇ-eu tsawˇ haˬ deuˬ-ahˇ byah-eu tsawˇ haˬ aˬ joˆ-ehˇ bi pyeuꞈ laˇ nya nmˇ.

² Miˬyehˇ-ahˇ uˬ duˬ tahˬ-eu tsawˇ haˬ deuˬ maˇ maˇ ni iˬ baˇ bi shawˇ gʼaˬ jiˇ-euˬ ngeuˇ naˇ, yawˬ haˇ yawˬ ha iˬ baˇ ahˇ ma lehˇ maˬ paˇ noeˬ-ehˇ, lawˇ-eu shehˇ-eu jeˬ dawˬ tawˆ luꞈ naˬ jiˇ tehꞈ-a.

³ Ehˇ kʼawꞈ, aˬ yawꞈ kʼoꞈ yawꞈ lawˇ-eu shehˇ-eu kʼoeˇ-aˬ, aˬ yawꞈ maꞈ iˬ baˇ ahˇ-eu gaˇ kawˆ aˬ yawꞈ maꞈ-ahˇ bi siˬ-eu tiˬ jeˬ pyeuꞈ-eu meh.

⁴ Aˬ jeˬ miˇ neh ehˇ naˇ, mawˇ neˇ hawˇ-eu ciꞈ myehꞈ-euˬ shiˬ-aˬ, tsawˇ haˬ zaˬ-ahˇ iˬ baˇ tiˬ jawˇ-iˬ maˬ shawˇ nehˬ nya-a.

⁵ Kʼoeˇ baˬ da neh, Ka li miˇ tsaˬ heu kʼoeˇ taˆ zaꞈ le-eu lehˇ gʼeh ngeh, aˬ yawꞈ Miˬyehˇ-ahˇ heu loꞈ-ehˇ ehˇ nehˬ-euˬ meh. “Lawˇ nehˬ-eu jeˬ, damˬ nehˬ-eu jeˬ, heu deuˬ-ahˇ nawˇ maˬ geuꞈ mawꞈ-a. Ehˇ kʼawꞈ ngaˬ-ahˇ gʼawˇ mawˇ tiˬ mawˇ, nawˬ neh laˆ saˆ nehˬ laꞈ-euˬ meh.

⁶ Lawˇ duˬ kʼoeˇ taˆ jeˬ zaˬ puiˆ-awˇ, iˬ baˇ shawˇ-eu lawˇ-eu kʼoeˇ-ahˇ, nawˇ laˬ kʼaˬ cehˇ-eu maˬ ngeuˇ-a.

⁷ Kʼoeˇ naˇ, ngaˇ heu dawˬ ngehˬ-euˬ ma. ‘Zahˇ dawˬ kʼoꞈ dawˬ sahˬ boꞈ laꞈ kʼoeˇ, ngaˬ-euˬ gaˇ kawˆ ehˇ-euˬ loꞈ-ehˇ, nawˬ-euˬ nui kʼahˇ mˇ byah-eu lehˇ, Miˬyehˇ-oˇ ngaˇ oe taˬ-euˬ ma.”’

⁸ “Lawˇ-eu shehˇ-eu jeˬ hawˇ-eu damˬ-eu jeˬ-ahˇ maˬ ehˇ, lawˇ duˬ kʼoeˇ taˆ jeˬ zaˬ dzah puiˆ-awˇ iˬ baˇ shawˇ-eu lawˇ-eu jeˬ-ahˇ maˬ ehˇ, nawˇ maˬ geuꞈ mawꞈ-eu uˬ taꞈ, laˬ kʼaˬ kʼawꞈ maˬ cehˇ-a” lehˇ, aˬ yawꞈ yaw beh ehˇ-euˬ meh. Lawˇ-eu shehˇ-eu kʼoeˇ deuˬ dawˬ tawˆ luꞈ, Zahˇ dawˬ kʼoꞈ dawˬ-ahˇ tsaˬ ni mˇ-euˬ jeˬ pyeuꞈ-eu kʼawꞈ, aˬ yawꞈ kʼoeˇ loꞈ-ehˇ ehˇ-euˬ meh.

⁹ Kʼoeˇ naˇ, “Miˬyehˇ-oˇ, nawˬ-euˬ nui kʼahˇ mˇ byah-eu gʼaˇ duˬ ngaˇ oe-euˬ ma” lehˇ aˬ yawꞈ ehˇ-euˬ meh. Kʼoeˇ miˇ neh, lawˇ-eu shehˇ-eu yaw oeˇ dawˬ tawˆ luꞈ-ahˇ Miˬyehˇ byehˇ-awˇ, kʼoeˇ-euˬ dah zaˇ Ka li lawˇ dah-euˬ meh.

¹⁰ Yeˬsuˇ Ka li-aˬ, Miˬyehˇ bi mˇ mawꞈ-eu jeˬ-ahˇ mˇ byah-euˬ miˇ neh, aˬ dui iˬ baˇ-ahˇ law-iˇ-euˬ ma. Mˬ maˬ maˬ byaˆ zaˇ ziˇ gmˬ ni aˬ yawꞈ-euˬ gʼawˇ mawˇ lawˇ dah-euˬ miˇ neh, aˬ dui-euˬ iˬ baˇ shawˇ laˇ gʼaˬ-euˬ meh.

¹¹ Yuˇdaˆ tsawˇ haˬ piˇ ma aˬ yawꞈ gʼaˬ yawꞈ, yawˬ nah na luꞈ piˇ ma-euˬ gaˇ ya mˇ-awˇ, aˬ yawꞈ tiˬ jeˬ-ahˇ gʼawˬ mya poˆ ya lawˇ ya shehˇ poˆ-eu meh. Ehˇ kʼawꞈ, aˬ yawꞈ maꞈ neh lawˇ-euˬ shehˇ-euˬ kʼoeˇ iˬ baˇ maˬ shawˇ nya-a.

¹² Ka li-aˬ, iˬ baˇ shawˇ-eu gʼaˇ duˬ tiˬ poˆ tehꞈ-ehˇ lawˇ-euˬ kʼawꞈ, mˬ maˬ maˬ byaˆ zaˇ ziˇ gmˬ-eu lawˇ-eu jeˬ pyeuꞈ-awˇ, nymˬ-mˇ Miˬyehˇ-euˬ aˇ maˇ paw nuiˇ luꞈ-eu meh.

¹³ Aˬ yawꞈ-ahˇ muiˇ-eu deuˬ-ahˇ Miˬyehˇ neh tsahˇ uiˬ laꞈ-awˇ, aˬ yawꞈ maꞈ kʼoeˇ taˆ aˬ yawꞈ-euˬ aˬ kuiˇ cawˬ daˆ duˬ bi geuꞈ gaˇ dawˬ keuˆ luꞈ-eu meh.

¹⁴ Aˬ yawꞈ tiˬ poˆ tehꞈ-ehˇ lawˇ-euˬ laꞈ kʼoeˇ, i baˇ shawˇ-iˇ-euˬ tsawˇ haˬ deuˬ mˬ maˬ maˬ byaˆ zaˇ ziˇ byah-eu tsawˇ haˬ pyeuꞈ ni mˇ luiˆ jiˇ-euˬ meh.

¹⁵ Muiˬ-eu shawˇ-eu Yaw sahˇ Miˬyehˇ kʼawꞈ, aˬ yawꞈ-euˬ gʼaˇ duˬ aˬ dui-ahˇ heu loꞈ-eh saˇ kiˇ kamˬ-eu meh. Yaw beh ehˇ-eu,

¹⁶ “Sahˬpaˬ Miˬyehˇ ehˇ-eu, Dawˬ ma saˇ jaˇ heu hmˬ, mehˬ hu paw-euˬ aˇ yamˬ laꞈ kʼoeˇ, aˬ yawꞈ maꞈ nehˬ-ehˇ ngaˇ dzaˬ ma. Aˬ yawꞈ maꞈ-euˬ nui noeˬ laꞈ kʼoeˇ, zahˇ dawˬ kʼoꞈ dawˬ dawˆ ahˇ nehˬ-awˇ, nui ma laꞈkʼoeˇ boꞈ myahˬ nehˬ ma.”

¹⁷ Kʼoeˇ naˇ, Yaw sahˇ Miˬyehˇ tiˬ poˆ paˇ ehˇ-eu, “Aˬ yawꞈ maꞈ-euˬ iˬ baˇ hawˇ-eu, aˬ yawꞈ maꞈ-euˬ yaw haiˬ jeˬ-ahˇ, maˬ juiˇ taˬ ni byehˇ byoˆ nehˬ ma.”

¹⁸ Kʼoeˇ miˇ neh, kʼoeˇ deuˬ dawˬ tawˆ luꞈ-ahˇ iˬ baˇ pyehˬ nehˬ gʼaˬ ngeh jawˇ, iˬ baˇ shawˇ-eu lawˇ-eu jeˬ maˬ paˇ loˬ meh.

Miˬyehˇ dawˬ peh jiˆ uˇ leˇ kaˇ-euˇ

¹⁹ Kʼoeˇ miˇ neh aˬ yuiꞈ aˬ nyiˇ Ka li zaˬ deuˬ-oˇ, Yeˬsuˇ shiˇ dah-euˬ baˬ da neh Muiˬ dui Shawˇ dui dui-eu Jawˇ duˬ laꞈ kʼoeˇ aˬ dui kʼaˬ duˬ ni uˇ leˇ nya laˇ-euˬ ma.

²⁰ Saˬ paˇ lawˆ kaꞈ nyiˬ paˆ-ehˇ, dehꞈ-eu gaˇ ma pyeuꞈ-eu gaˇ ma yaw shuiꞈ tiˬ kahˇ aˬ yawꞈ shaˇ dahˇ-euˬ meh. Saˬ paˇ lawˆ kaˬ kʼoeˇ-aˬ, aˬ yawꞈ-euˬ gʼawˇ mawˇ pyeuꞈ-eu meh.

²¹ Miˬyehˇ-euˬ nymˇ-ahˇ haw-eu pyaˆ-eu huiˬ dui dui-eu piˇ ma tiˬ gʼaˬ aˬ dui jawˇ-eu ma.

²² Kʼoeˇ miˇ neh, dawˇ coe ni gʼeh-eu nui ma hawˇ-eu ziꞈ dah ni gʼeh-eu jah-eu jeˬ ahˇ-eu laꞈ kʼoeˇ, Miˬyehˇ-euˬ dawˬ peh aˬ dui jiˆ uˇ leˇ kaˇ-euˇ. Iˬ baˇ-ahˇ kʼahˬ lahˇ-eu jeˬ bi tsiˬ shawˇ gʼaˬ-euˬ nui ma hawˇ-eu, shawˇ jehˆ ni gʼeh-eu iˇ cuꞈ neh bi tsiˬ shawˇ gʼaˬ-euˬ gʼawˇ mawˇ laꞈ kʼoeˇ aˬ dui jiˆ uˇ leˇ kaˇ-euˇ.

²³ Aˬ dui neh jah duˬ taˬ-euˬ noeˬ tmˬ-eu jeˬ-ahˇ ziꞈ dah ni tuˆ tehˬ taˬ kaˇ-euˇ. Aˬ jeˬ miˇ neh ehˇ naˇ, Miˬyehˇ-aˬ, aˬ yawꞈ neh saˇ jaˇ dzaˬ taˬ-euˬ loꞈ-ehˇ mˇ byah nehˬ laꞈ tehꞈ-a lehˇ aˬ dui jah-eu ma.

²⁴ Aˬ cawˬ-ahˇ gʼoeˇ nya gaˬ nya-awˇ yaw muiˬ jeˬ mˇ nya ni, aˬ dui ti gʼaˬ tiˇ gʼaˬ kʼahˇ kʼoꞈ-awˇ ngehˬ gʼeh kaˇ-euˇ.

²⁵ Aˬ cawˬ loꞈ-ehˇ maˬ gʼeh ni, tiˬ kawˆ loꞈ-ehˇ tahˬ dzoeˇ-awˇ uˬ duˬ tahˬ-eu gaˇ heu hmˬ maˬ byehˇ ni mˇ daˆ leꞈ kaˇ-euˇ. Sahˬpaˬ Miˬyehˇ yaˇ kʼaˬ daˇ le-eu Aˇnah dawˬ peh peh le-euˬ naw maꞈ siˬ luꞈ mawˇ luꞈ-eu loꞈ-ehˇ, tiˬ gʼaˬ tiˇ gʼaˬ gʼaˬ biꞈ tehˇ tehꞈ kaˇ-euˇ.

²⁶ Yaw tsaˬ yaw dawˇ jeˬ-ahˇ aˬ dui siˬ nya gʼaˬ miˇ tsa, diˇ daˬ-ehˇ iˬ baˇ mˇ daˆ leꞈ-eu ngeuˇ naˇ, aˬ dui gʼaˇ duˬ iˬ baˇ shawˇ-eu lawˇ-eu shehˇ-eu jeˬ maˬ paˇ baw meh.

²⁷ Aˬ dui kʼoeˇ taˆ keuˆ le-eu yaˇ kʼaˬ daˇ-eu jeˬ hawˇ-eu Miˬyehˇ-ahˇ puiˬ-eu tsawˇ haˬ deuˬ-ahˇ laˆ luˬ laˆ seˇ le-eu, guˆ dui dui laˇ paˬ-ehˇ gʼeh-eu miˬ dzaˬ-ahˇ guˆ guˆ-ehˇ dawˬ-eu jeˬ maˬ ngeuˇ naˇ, aˬ dui gʼaˇ duˬ nui jeˬ noeˬ tmˬ kʼaˇ maˬ paˇ za meh.

²⁸ Miˬyehˇ neh Moˇseˬ-ahˇ biꞈ-euˬ Zahˇ dawˬ kʼoꞈ dawˬ-ahˇ maˬ naˇ haˬ geuꞈ-eu tsawˇ haˬ-aˬ, aˬ yawꞈ neh mˇ lehˬ-euˬ gaˇ kawˆ saˇ kiˇ kamˬ-eu tsawˇ kaˬ nyiˬ gʼaˬ smˇ gʼaˬ jawˇ naˇ, gʼawˬ shaˬ maˬ gaˬ ni sehꞈ gaˇ ya daˬ-eu meh.

²⁹ Toˆ-ehˇ ngeuˇ naˇ, Miˬyehˇ-euˬ Zaˬ maˇ-ahˇ nawˬ tehˬ taˬ-awˇ, yawˬ ha-euˬ iˬ baˇ-ahˇ shawˇ nehˬ-euˬ Miˬyehˇ-euˬ dawˬ ma saˇ jaˇ shiˬ-ahˇ poeˬ sawˇ lawˬ maˬ baw-eu loꞈ-ehˇ sawˇ-awˇ, Miˬyehˇ gʼawˬ shaˬ gaˬ-eu guiˬ lahˬ yaw dzahˇ mehˬ nehˬ laꞈ-euˬ Yaw sahˇ Miˬyehˇ-ahˇ yehˬ bawˬ sehˇ lu-ehˇ ehˇ-eu tsawˇ haˬ-aˬ, aˇ naˆ ni doeˇ dzehˬ-eu kʼehˬ-eu kʼaˆ-eu jeˬ-ahˇ ya daˬ nmˇ lehˇ shaˇ noeˬ haw-awˬ.

³⁰ Aˬ jeˬ miˇ neh ehˇ naˇ,“Laꞈ poˇ poˆ-eu jeˬ-aˬ, ngaˬ-euˬ gaˇ ma. Ngaˇ jahˇ kʼoꞈ nehˬ ma” lehˇ ehˇ-eu kʼoeˇ dawˬ hawˇ-eu, “Aˬ yawꞈ-euˬ tsawˇ haˬ deuˬ-ahˇ Sahˬpaˬ Miˬyehˇ yaˇ kʼaˬ daˇ tehꞈ-a” lehˇ ehˇ-eu kʼoeˇ dawˬ, aˬ suˇ gʼaˬ neh ehˇ-euˬ dawˬ pyeuꞈ-eu gaˇ kawˆ aˬ dui siˬ nya ma.

³¹ Dehꞈ luꞈ-eu Miˬyehˇ-euˬ laꞈ-ahˇ ya uˇ keuˆ-iˇ-eu jeˬ-aˬ, guˆ dui dui laˇ paˬ-ehˇ gʼeh-eu meh.

³² Dzeuˇ laˇ ngeh naw maꞈ aˬ joˆ-ehˇ pyeuꞈ dzeuˇ yaꞈ-euˬ gaˇ noeˬ mawˇ-awˬ. Miˬyehˇ-euˬ yaw shehꞈ-ahˇ naw maꞈ ya mawˇ gʼaˬ ngeh, kʼehˬ-eu kʼaˆ-eu gʼawˬ mya jeˬ-ahˇ naw maꞈ ya daˬ-euˬ meh. Ehˇ kʼawꞈ, naw maꞈ daˬ dzeuˇ oˇ dzeuˇ laꞈ-euˬ meh.

³³ Tiˬ poˆ-aˬ, aˬ cawˬ-euˬ mehˬ shi yehˬ bawˬ sehˇ lu-ehˇ gʼeh nehˬ gaˇ ya daˬ-euˬ meh. Tiˬ poˆ na, kʼoeˇ loꞈ-ehˇ gʼeh nehˬ-eu jeˬ-ahˇ ya daˬ-euˬ tsawˇ haˬ deuˬ nehˬ-ehˇ naw maꞈ caw daˬ-euˬ meh.

³⁴ Tawˬ-ahˇ dawˆ nehˬ gaˇ ya daˬ-euˬ tsawˇ haˬ deuˬ nehˬ-ehˇ naw maꞈ caw daˬ-awˇ, naw maꞈ kʼaˇ jaˆ-eu jeˬ dawˬ tawˆ luꞈ aˬ cawˬ yuˇ geuꞈ jiˇ ngeh, yawˬ ha-euˬ mˇ myawˬ smˬ-iˇ-euˬ jeˬ-ahˇ naw maꞈ nui ma maˬ cawˆ ni daˬ-euˬ meh. Aˬ jeˬ miˇ neh ehˇ naˇ, kʼoeˇ naˆ maˬ tseˇ muiˬ-eu mˬ maˬ maˬ byaˆ zaˇ ziˇ ziꞈ-eu myawˬ gahˬ jaˆ te siˬ lehˇ naw maꞈ siˬ nya-eu meh.

³⁵ Kʼoeˇ miˇ neh, naw maꞈ nui ma ziꞈ-eu jeˬ-ahˇ taˬ byehˇ dzeh. Aˬ jeˬ miˇ neh ehˇ naˇ, kʼoeˇ baˬ da neh huiˬ dui dui-eu laꞈ sawˬ naw maꞈ za tehꞈ-a.

³⁶ Miˬyehˇ-euˬ nui kʼahˇ mˇ byah-awˇ aˬ yawꞈ neh saˇ jaˇ dzaˬ taˬ-euˬ jeˬ-ahˇ za nya ni, nui ma gʼawˬ mahˇ ni ya taˬ meh.

³⁷ Aˬ jeˬ miˇ neh ehˇ naˇ, Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ meh. “Aˇ yamˬ tiˬ kʼehˇ laˇ kʼehˬ dzeuˇ naˇ, oe-eu lehˇ gʼeh luꞈ-eu kʼoeˇ gʼaˬ, maˬ nyi naˬ ni oe keuˆ tehꞈ-a.

³⁸ Ehˇ kʼawꞈ tsaˬ-eu dawˇ-eu tsawˇ haˬ, jah-eu baˬ da neh dehꞈ tehꞈ-a. Aˬ yawꞈ ngaˬ-ahˇ byehˇ dzeh laꞈ naˇ, aˬ yawꞈ-ahˇ ngaˇ nui kʼahˇ maˬ shiˇ.”

³⁹ Ehˇ kʼawꞈ, aˬ dui-aˬ, mehˬ nah paw zeuˆ pyawˇ-awˇ luˬ-iˇ seˇ-iˇ-eu paw iˇ luꞈ-eu tsawˇ haˬ maˬ ngeuˇ. Jah-eu nui ma ahˇ-awˇ, ka kʼoꞈ-eu jeˬ za-euˬ tsawˇ haˬ ma.