Hawˇseˬ 9 - Akha

Iˇsaˬleˬlaˆ tsawˇ haˬ kʼehˬ-eu kʼaˆ-eu jeˬ-ahˇ ya daˬ meh lehˇ Hawˇseˬ ehˇ-eu

¹ Iˇsaˬleˬlaˆ tsawˇ haˬ deuˬ-oˇ, lawˇ ciꞈ zaˬ deuˬ byawˬ-eu loꞈ-ehˇ, bawˬ-iˬ gʼeh-eu jeˬ byehˇ dzeh jiˇ-awˬ. Naw maꞈ Miˬyehˇ-ahˇ byehˇ dzeh-awˇ, aˬ yawꞈ-ahˇ saˇ jaˇ maˬ ziꞈ-ehˇ, meh maˬ laˇ geuꞈ dzaˬ-eu loꞈ-ehˇ, miˇ kʼahˬ doe ni naw maꞈ gʼawˇ mawˇ, Baˬlaˇ miˬyehˇ-ahˇ ahˬ dzaˬ-awˇ, yawꞈ biꞈ laꞈ-euˬ lehˇ noeˬ-eu, cehˇ-ahˇ naw maꞈ nui kʼahˇ jaˆ meh.

² Ehˇ kʼawꞈ, gʼawˬ myahˇ ni maˬ gʼeh-ehˇ, naw maꞈ dzaˬ-eu dawˇ-eu gʼaˇ duˬ, cehˇ, saˬ loˬ tsiˇ, aˬ gaꞈ dzaˇ uiˇ, maˬ paˇ jaˆ-ehˇ pyeuꞈ-iˇ tehꞈ-a.

³ Sahˬpaˬ Miˬyehˇ-euˬ miˇ kʼahˬ-ahˇ, Iˇsaˬleˬlaˆ maˬ paˇ jawˇ ni, Iˇjiˇtuˆ-ahˇ gʼoꞈ-iˇ tehꞈ-a. Aˬshuˇliˆ miˇ kʼahˬ-ahˇ jawˇ-awˇ, maˬ shawˇ-eu dzaˇ ya dzaˬ tehꞈ-a.

⁴ Aˬ cawˬ miˇ kʼahˬ kʼoeˇ deuˬ laꞈ kʼoeˇ, yawꞈ maꞈ-euˬ Sahˬpaˬ Miˬyehˇ-ahˇ, lawˇ-eu shehˇ-eu maˬ mˇ nya-a. Yawꞈ maꞈ dzaˬ-eu dzaˇ kʼoeˇ deuˬ-aˬ, tsawˇ shiˇ hawˬ byawˇ lawˇ gaˇ duˇ-awˇ, kʼaˇ dzaˬ kʼaˇ dawˇ-eu tsawˇ haˬ deuˬ, maˬ shawˇ-eu tsawˇ haˬ pyeuꞈ-eu meh. Aˬ yawꞈ maꞈ dzaˬ-eu dzaˇ kʼoeˇ deuˬ, uˬ maˆ bi dehˆ laˇ-eu tehꞈ meh. Sahˬpaˬ Miˬyehˇ-euˬ nymˇ laꞈ kʼoeˇ, lawˇ gaˇ shehˇ gaˇ maˬ geuꞈ nya-a.

⁵ Sahˬpaˬ Miˬyehˇ-ahˇ taˬ huiˬ-eu, bawˬ-iˬ gʼeh-eu aˇ yamˬ tsaˬ laˇ naˇ, aˬ yawꞈ maꞈ aˬ joˆ-ehˇ jahˇ nmˇ.

⁶ Luˬ-iˇ seˇ-iˇ-eu keuˆ le-awˇ, aˬ yawꞈ maꞈ ya cehˆ byaˆ jiˇ ngeh, Iˇjiˇtuˆ neh bi nyehꞈ uiˬ-awˇ, Mehˇpiˇ meuˬ-ahˇ baꞈ pahˬ tehꞈ-a. Aˬ yawꞈ maꞈ-euˬ pyuˇ pahˬ hawˇ-eu, aˬ yawꞈ maꞈ-euˬ nymˇ dzahˇ zaˇ-ahˇ, aˬ gah baw duˆ uˆ byoˆ tehꞈ-a.

⁷ Oꞈ-eu geuˇ-eu loꞈ-ehˇ kʼehˬ-eu, kʼehˬ nah kʼaˆ nah keuˆ le luꞈ meh. Aˇ nah aˇ yamˬ kʼoeˇ keuˆ le ngeh, Iˇsaˬleˬlaˆ siˬ le tehꞈ-a. “Bawˇlawˇpeh heu gʼaˬ tsawˇ uˬ nga.” “Shaˆ ma heu gʼaˬ aˬ dzawˬ nga” lehˇ, naw maꞈ dawˬ doeˇ ngehˬ daˆ-euˬ meh. Naw maꞈ iˬ baˇ myaˬ-eu miˇ neh, naw maꞈ ngaˬ-ahˇ bye dui dui meh.

⁸ Iˇsaˬleˬlaˆ-ahˇ mehˬ nehˬ-eu, Bawˇlawˇpeh bi geuꞈ-eu gʼaˇ duˬ, Miˬyehˇ ngaˬ-ahˇ pyehˬ leꞈ-euˬ meh. Ehˇ kʼawꞈ, ngaˇ kʼaˇ iˇ kʼaˇ laˇ gaˇ, aˇ jiˇ lahˇ ju kʼmˇ-eu loꞈ-ehˇ, naw maꞈ ngaˬ-ahˇ kʼmˇ luꞈ-eu meh. Miˬyehˇ-euˬ miˇ kʼahˬ-ahˇ jawˇ-eu. Miˬyehˇ-euˬ tsawˇ haˬ heu deuˬ-aˬ, Bawˇlawˇpeh-ahˇ muiˇ-eu deuˬ meh.

⁹ Giˇbyaˬ meuˬ-ahˇ dehꞈ ngeh loꞈ-ehˇ aˬ yawꞈ maꞈ kʼaˇ mˇ kʼaˇ shaˇ-eu, ehˇ kʼaˇ maˬ za ni haiˬ-eu meh. Iˬ baˇ kʼoeˇ deuˬ-ahˇ maˬ ngehˇ ni, Miˬyehˇ kʼehˬ nehˬ kʼaˆ nehˬ tehꞈ-a.

Iˇsaˬleˬlaˆ-euˬ iˬ baˇ aˇ poeˬ

¹⁰ Sahˬpaˬ Miˬyehˇ ehˇ-eu dawˬ-aˬ, “Iˇsaˬleˬlaˆ tsawˇ haˬ deuˬ-ahˇ, yaw beh poˆ ngaˇ mawˇ dahˬ beh ngeh, kʼaˇ shuiꞈ deh ga gʼahˇ ceh dehꞈ-eu, aˬ gaꞈ baw duˆ-ahˇ duˇ-eu meh. Naw maꞈ-euˬ aˬ poeˬ aˬ piˬ deuˬ, yaw beh poˆ ngaˇ mawˇ dahˬ beh ngeh, awꞈ beh beh laˇ-awˇ siˬ luꞈ-eu, siˬ guˬ aˇ siˬ-ahˇ duˇ-eu meh. Ehˇ kʼawꞈ, Peˬoˇlaˬ gawˬ jawˬ-ahˇ laˇ ngeh, Baˬlaˇ-ahˇ uˬ duˬ tahˬ paˇ-awˇ, yawꞈ maꞈ gaˬ-eu miˬyehˇ loꞈ-ehˇ, jawꞈ dui dui gaˇ ya mawˇ-euˬ ma.

¹¹ Iˇsaˬleˬlaˆ yaw shehꞈ kʼahˬ sehˇ, aˇ jiˇ loꞈ-ehˇ zaw byoˆ gʼeh-awˇ, zaˬ ciˬ zaˬ cu maˬ paˇ baw ni, maˬ baw aˬ ma pyeuꞈ jiˇ tehꞈ-a.

¹² Zaˬ paˇ cu huiˬ law hawˇ kʼawꞈ ni, yaw dehꞈ tiˬ gʼaˬ-iˬ maˬ bi jawˇ. Aˬ yawꞈ maꞈ-ahˇ ngaˇ byehˇ dzeh ngeh, yaw kʼaˆ-ehˇ ya noeˬ shaˬ tehꞈ-a.”

¹³ Iˇsaˬleˬlaˆ-euˬ zaˬ deuˬ-ahˇ, shaˬ teh teh-awˇ sehꞈ-eu loꞈ-ehˇ, bi teh sehꞈ gaˇ ngaˇ mawˇ-euˬ ma.

¹⁴ Sahˬpaˬ Miˬyehˇ nawˇ mawꞈ-eu jeˬ, aˬ yawꞈ maꞈ-ahˇ nawˇ biꞈ nehˬ-awˬ. Maˬ baw aˬ ma bi pyeuꞈ jiˇ-awˇ, aˬ coeˇ gui jiˇ ni jahˇ nehˬ-awˬ.

Iˇsaˬleˬlaˆ-ahˇ Sahˬpaˬ Miˬyehˇ yaˇ kʼaˬ daˇ-eu

¹⁵ Sahˬpaˬ Miˬyehˇ ehˇ-eu dawˬ-aˬ, “Aˬ yawꞈ maꞈ yaw haiˬ mˇ-eu jeˬ, Giˇlaˇgaˬlaˇ-ahˇ dahˬ beh-awˇ, aˬ yawꞈ maꞈ-ahˇ ngaˇ bye-eu jeˬ, Giˇlaˇgaˬlaˇ-ahˇ beh-euˬ ma. Aˬ yawꞈ maꞈ haiˬ-eu baˬ da neh, miˇ kʼahˬ laꞈ nyiˇ teh dzeh nehˬ-awˇ, aˬ yawꞈ maꞈ-ahˇ maˬ paˇ gaˬ ma. Aˬ yawꞈ maꞈ-euˬ sahˬ paˬ sahˬ ma, dawˬ tawˆ luꞈ ngaˬ-ahˇ puiˬ-euˬ meh.

¹⁶ Iˇsaˬleˬlaˆ tsawˇ haˬ deuˬ-aˬ, aˇ bawˇ duˬ ciˇ gui-iˇ jiˇ-awˇ, aˇ siˬ maˬ siˬ le-eu loꞈ-ehˇ, zaˬ maˬ jawˇ ni pyeuꞈ-iˇ tehꞈ-a. Tiˬ gʼaˬ na paˇ jawˇ le-euˬ kʼawꞈ, aˬ yawꞈ maꞈ gaˬ-eu zaˬ kʼoeˇ-ahˇ, maˬ bi dzeuˇ-iˇ ni ngaˇ sehꞈ ma.”

Iˇsaˬleˬlaˆ gaˇ kawˆ Hawˇseˬ ehˇ-eu,

¹⁷ Ngaˬ-euˬ Miˬyehˇ-euˬ tsawˇ haˬ deuˬ, aˬ yawꞈ ehˇ dawˬ leuˇ-eu miˇ neh, byehˇ dzeh nehˬ gaˇ ya daˬ tehꞈ-a. Aˬ cawˬ miˇ kʼahˬ doe ni cah-awˇ, jawˇ duˬ maˬ dah ni shaˬ tehꞈ-a.