Hawˇseˬ 8 - Akha

Tahˬ pahˬ aˬ ma mawˇ kawˇ-ahˇ uˬ duˬ tahˬ gaˇ Sahˬpaˬ Miˬyehˇ muiˇ-eu

¹ Sahˬpaˬ Miˬyehˇ ehˇ-eu dawˬ-aˬ, “Daˇ heh ciˬ tsehꞈ-awˇ baw gaˬ-awˬ. Ngaˬ-euˬ dawˬ ma saˇ jaˇ hawˇ-eu, ngaˬ-euˬ zahˇ dawˬ kʼoꞈ dawˬ deuˬ-ahˇ, ngaˬ-euˬ tsawˇ haˬ puiˬ-euˬ miˇ neh, muiˇ-eu deuˬ kʼaˬ dzeˇ ma loꞈ-ehˇ, ngaˬ-euˬ miˇ kʼahˬ heu kʼahˬ laꞈ kʼoeˇ, byoeˇ uˇ leꞈ-eu lehˇ gʼeh-eu meh.

² Nga maꞈ-euˬ Miˬyehˇ-oˇ nawˬ-ahˇ, nawˬ-euˬ Iˇsaˬleˬlaˆ tsawˇ jeuˬ siˬ nya ma lehˇ yawꞈ maꞈ guˇ kʼawꞈ,

³ yaw muiˬ jeˬ-ahˇ byehˇ-euˬ miˇ neh, muiˇ-eu deuˬ neh bi kʼehˬ tehꞈ-a.

⁴ “Aˬ yawꞈ maꞈ sahˬ paˬ ka-euˬ kʼawꞈ, ngaˬ-ahˇ maˬ gʼoe-ehˇ mˇ-euˬ meh. Aˬ yuiꞈ aˬ tsu tseˇ doˆ-euˬ kʼawꞈ, ngaˬ-ahˇ maˬ gʼoe-ehˇ mˇ-euˬ meh. Aˬ yawꞈ maꞈ-euˬ pyuˇ kʼoˇ shuiˇ kʼoˇ, tahˬ pahˬ aˬ ma mawˇ kawˇ kʼaˇ-awˇ, yawˬ ha ya luˬ ya seˇ-iˇ ni, yawˬ haˇ yawˬ ha bymˬ luꞈ-eu meh.

⁵ Saˬmaˬliˆ meuˬ uˬ duˬ tahˬ-eu, shuiˇ mawˇ neˇ mawˇ kawˇ kʼoeˇ kawˇ-ahˇ, ngaˇ tiˬ pawꞈ-iˬ maˬ haw nahˇ nya. Mawˇ kawˇ kʼoeˇ-ahˇ uˬ duˬ tahˬ-eu, aˬ myah byehˇ dzeh-eu lehˇ gʼeh ta.

⁶ Iˇsaˬleˬlaˆ ba jiˬ tehˆ-euˬ, mawˇ kawˇ kʼoeˇ miˬ yehˇ maˬ ngeuˇ-a. Saˬmaˬliˆ-euˬ mawˇ neˇ mawˇ kawˇ, kʼehꞈjiˇ kʼoeˆjiˇ gaˇkeuˆ tehꞈ-a.

⁷ Jaˬ lehˇ aˇ yoeˬ sehˬ-euˬ miˇ neh, jaˬ lehˇ lehˇ ma ya yehˬ tehꞈ-a. Cehˇ nmˇ maˬ myah laˇ-euˬ cehˇ yaˇ, hawˬ mˇ saꞈ-awˇ maˬ dzaˬ nya-a. Paˇ mˇ saꞈ dzaˬ nya law hawˇ kʼawꞈ, aˬ cawˬ tsawˇ jeuˬ dzaˬ jiˇ tehꞈ-a.

⁸ Iˇsaˬleˬlaˆ-euˬ miˇ kʼahˬ kʼawꞈ, aˬ cawˬ-euˬ miˇ kʼahˬ deuˬ loꞈ-ehˇ, saˇ baoˬ yaw pehꞈ-ahˇ duˇ-eu meh.

⁹ Bawˇ tsahˬ mahˬ tahˬ laˆ-ahˇ duˇ-eu, nui ma gʼahˇ-eu Iˇsaˬleˬlaˆ, Aˬshuˇliˆ miˇ kʼahˬ-ahˇ le-awˇ, caw ba laꞈ lehˇ shaˇ leˇ-euˬ meh. Aˬ cawˬ-ahˇ pyuˇ shuiˇ tawˆ nehˬ-awˇ, yawˬ ha-ahˇ bi haw piˇ-euˬ meh.

¹⁰ Aˬ yawꞈ maꞈ-ahˇ kuˇ uiˬ jiˇ-awˇ, ngaˇ kʼehˬ nehˬ-eu lehˇ gʼeh-eu ma. Aˬshuˇliˆ miˇ kʼahˬ-euˬ sahˬ paˬ, yawꞈ maꞈ-ahˇ kʼehˬ le kʼaˆ le gaˇ, gʼawˬ myahˇ maˬ gʼeh-ehˇ ya daˬ meh.

¹¹ “Iˇsaˬleˬlaˆ tsawˇ haˬ deuˬ neh, iˬ baˇ bi shawˇ laˇ-eu gʼaˇ duˬ, lawˇ duˬ paˇ tsoˆ lahˬ-euˬ kʼoeˇ-aˬ, iˬ baˇ mˇ lahˬ lahˬ gaˇ duˇ meh.

¹² Zahˇ dawˬ kʼoꞈ dawˬ aˇ muiˇ aˇ seh, aˬ yawꞈ maꞈ-ahˇ boꞈ mehˬ nehˬ kʼawꞈ, maˬ gaˬ maˬ mawˇ haw-euˬ loꞈ-ehˇ, myaˆ haw maˬ cawˬ ni byehˇ tehꞈ-a.

¹³ Lawˇ gaˇ shehˇ gaˇ gaˬ-eu laꞈ kʼoeˇ, ngaˬ-ahˇ shaˬ jiˇ lawˇ nehˬ laꞈ-awˇ, lawˇ dzaˇ aˬ yawꞈ maꞈ dzaˬ-eu meh. Sahˬpaˬ Miˬyehˇ pyeuꞈ-eu ngaˇ-aˬ, kʼoeˇ loˇ mˇ gaˇ laꞈ kʼaˬ maˬ cehˇ. Aˬ yawꞈ maꞈ neh mˇ-euˬ iˬ baˇ, ngaˇ maˬ ngehˇ ni kʼehˬ poˆ nehˬ-awˇ, Iˇjiˇtuˆ paw bi gʼoꞈ-iˇ ma.

¹⁴ “Iˇsaˬleˬlaˆ tsawˇ haˬ deuˬ-aˬ, beh-euˬ yaw sahˇ gʼaˬ-ahˇ ngehˇ-awˇ, sahˬpaˬ hawˇ nymˇ tsoˆ luꞈ-eu meh. Yuˇdaˆ tsawˇ haˬ meuˬ teˬ lahˬ-awˇ, ziꞈ dah ni gawˬ ziꞈ taˬ-euˬ meh. Ehˇ kʼawꞈ ngaˇ miˬ dzaˬ pyehˬ gʼeh-awˇ, aˬ yawꞈ maꞈ-euˬ hawˇ nymˇ hawˇ-eu meuˬ deuˬ-ahˇ bi puiˆ dzaˬ jiˇ ma.”