Hawˇseˬ 6 - Akha

Nui ma laꞈ kʼoeˇ keuˆ ni noeˬ poˆ-euˬ maˬ ngeuˇ-a

¹ Aˬ yawꞈ maꞈ heu loꞈ-ehˇ ehˇ-eu, “Laˇ-awˬ. Sahˬpaˬ Miˬyehˇ jawˇ gaˇ, aˬ dui paˇ gʼoꞈ poˆ leˇ kaˇ-euˇ. Aˬ dui-ahˇ aˬ yawꞈ laˆ naˇ-euˬ aˬ yawꞈ laˆ taˬ nehˬ laꞈ tehꞈ-a. Aˬ dui-ahˇ aˬ yawꞈ laˆ tahˬ-eu, aˬ yawꞈ lahˇ cuꞈ nehˬ laꞈ tehꞈ-a.

² Nyiˬ nah laꞈ kʼoeˇ bi beuˇ laˇ-awˇ, smˬ nah -ahˇ bi tuˇ poˆ laˇ-awˇ, aˬ yawꞈ mehˬ shi ya jawˇ tehꞈ-a.

³ Sahˬpaˬ Miˬyehˇ-ahˇ siˬ nya ni, aˬ dui leh jeh dui dui kaˇ-euˇ, Uˬ bya bya shawˇ laˇ-eu loꞈ-ehˇ, yehˇ gʼahˇ ahˇ dahˬ beh le luꞈ ngeh, miˇ tsaˬ tahˬ kʼawˇ-ahˇ yehˇ shehˬ-eu, uˬ yehˇ yaw duˬ baw-eu loꞈ-ehˇ, aˬ yawꞈ aˬ dui jawˇ gaˇ oe-eu, yaw duˬ baw meh” lehˇ ehˇ-eu meh.

⁴ Ehˇ kʼawꞈ, Sahˬpaˬ Miˬyehˇ ehˇ-eu, “Iˇsaˬleˬlaˆ-oˇ, nawˬ-ahˇ ngaˇ, aˬ joˆ-ehˇ ya jahˇ nehˬ paˬ nga, Yuˇdaˆ miˇ kʼahˬ-oˇ nawˬ-ahˇ ngaˇ, aˬ joˆ-ehˇ ya jahˇ nehˬ paˬ nga. Naw nyaꞈ ngaˬ-ahˇ gaˬ-eu jeˬ-aˬ, uˬ shawˬ tmˬ-eu mˬ dmˇ hawˇ-eu, uˬ shawˬ ga aˬ-euˬ ceuˬ loꞈ-ehˇ, tiˬ kʼehˇ laˇ kʼehˬ gmˬ-eu tehꞈ meh.

⁵ Kʼoeˇ baˬ da neh naw maꞈ jawˇ gaˇ, Bawˇlawˇpeh deuˬ ngaˇ pyehˬ leꞈ-awˇ, Yaˇ kʼaˬ daˇ-eu gaˇ kawˆ hawˇ-eu, ya luˬ ya seˇ-iˇ-eu gaˇ kawˆ, bi tsaꞈ bi dzawˇ gaˬ le-euˬ ma. Naw maꞈ yaw dawˇ dawˇ-ehˇ dehꞈ gaˇ, ngaˇ nui kʼahˇ jaˆ dui dui-eu ma.

⁶ Lawˇ-eu shehˇ-eu jeˬ ngaˇ maˬ mawꞈ. Ngaˬ-ahˇ aˬ myah luꞈ gaˬ-eu jeˬ, ngaˇ mawꞈ dui dui-eu tiˬ jeˬ ma. Miˬ dzaˬ dzah-awˇ lawˇ gaˇ maˬ mawꞈ. naw maꞈ ngaˬ-ahˇ siˬ nya-eu jeˬ, ngaˇ mawꞈ dui dui-eu tiˬ jeˬ ma.

⁷ “Aˬ daˬ miˇ kʼahˬ -ahˇ uˇ leˇ ngeh, yawꞈ maꞈ dawˬ ma saˇ jaˇ puiˬ-awˇ, ngaˬ-ahˇ maˬ jah ni byehˇ-euˬ meh.

⁸ Giˇlaˆ meuˬ lehˇ kuˇ-eu kʼoeˇ meuˬ, tsawˇ haˬ yaw haiˬ tiˬ teuˇ jawˇ-awˇ, shiˬ laˆ yoeˇ-eu maˬ tsehˆ leˇ-a.

⁹ Tahˇ joe baˬ maꞈ loꞈ-eu loꞈ-ehˇ, piˇ ma baˬ maꞈ gm-awˇ loꞈ meh. Muiˬ-eu shawˇ-eu Sheˬkmˬ meuˬ-ahˇ, le-eu gaˇ pehˇ tsawˇ haˬ sehꞈ-awˇ, maˇ maˇ ni yaw haiˬ mˇ-eu meh.

¹⁰ Iˇsaˬleˬlaˆ miˇ kʼahˬ laꞈ kʼoeˇ, maˬ haw peuˬ-eu jeˬ mawˇ-euˬ ma. Tahˬ pahˬ aˬ ma mawˇ kawˇ deuˬ-ahˇ, ngaˬ-euˬ tsawˇ haˬ uˬ duˬ tahˬ-awˇ, yawˬ haˇ yawˬ ha laˆ jawꞈ-euˬ meh.

¹¹ “Yuˇdaˆ miˇ kʼahˬ-oˇ, nawˬ-ahˇ kʼawꞈ, geuˇ-eu loꞈ-ehˇ kʼehˬ-eu gʼaˇ duˬ, aˇ nah aˇ yamˬ toꞈ gʼaˬ-euˬ ma. Ngaˬ-euˬ tsawˇ haˬ-ahˇ ngehˬ gʼeh-awˇ, paˇ bi dehꞈ dzaˬ laˇ ma ehˇ ngeh,