Hawˇseˬ 5 - Akha

¹ Piˇ ma deuˬ-oˇ, naˬ bawˇ gaˬ-awˬ. Iˇsaˬleˬlaˆ tsawˇ haˬ deuˬ-oˇ, naˬ bawˇ ciˬ kʼmˇ-awˇ naˇ haˬ-awˬ. Sahˬpaˬ-euˬ nymˇ kʼahˬ zaˬ deuˬ-oˇ, yaw muiˬ paˬ-ehˇ naˇ haˬ taˬ-awˬ. Naw maꞈ-ahˇ yaˇ kʼaˬ daˇ-eu dawˬ, keuˆ le luꞈ gaˇ naˇ haˬ taˬ-awˬ. Naw maꞈ dehꞈ leꞈ jawˇ leꞈ-euˬ-aˬ, Miˇ zaˬ paˬ-ahˇ jeˬ beuˆ tahˇ-awˇ, Taˬbawˬ meuˬ-ahˇ baw gʼaꞈ kʼmˇ-awˇ,

² Aˬkaˬshaˆ meuˬ iˇ kʼehˬ laˇ kʼehˬ, shaˬ duˬ duˬ tsehˆ-euˬ gaˇ duˇ meh. Naw maꞈ dawˬ tawˆ-ahˇ ngaˇ kʼehˬ ma.

³ Iˇsaˬleˬlaˆ aˬ joˇ gʼeh-eu, dawˬ tawˆ luꞈ ngaˇ siˬ nya jiˇ ma. Aˬ yawꞈ ngaˬ-ahˇ maˬ zaꞈ nya-a. Aˬyawꞈ ngaˬ-ahˇ saˇ jaˇ puiˬ-awˇ, aˬ yawꞈ-euˬ tsawˇ haˬ deuˬ ngaˬ-ahˇ, uˬ duˬ tahˬ laˇ-eu maˬ geuˇ-a.”

Miˬ yehˇ nui deuˬ-ahˇ uˬ duˬ maˬ tahˬ ni yahˇ-awˬ lehˇ Hawˇseˬ ehˇ-eu

⁴ Miˬyehˇ jawˇ gaˇ maˬ gʼoꞈ leˇ ni, aˬ yawꞈ maꞈ neh mˇ-euˬ yaw lehˬ, aˬ yawꞈ maꞈ-ahˇ gʼeu tehˬ-eu meh. Miˬ yehˇ nui deuˬ-ahˇ gʼoe-eu jeˬ, nui ma laꞈ kʼoeˇ ciˇ tahˬ iˇ-awˇ, Sahˬpaˬ Miˬyehˇ-ahˇ maˬ siˬ-a.

⁵ Iˇsaˬleˬlaˆ yaw doeˇ mˇ-euˬ, yawˬ ha-ahˇ paˇ guˇ poˆ luꞈ meh. Yawˬ ha neh mˇ-euˬ iˬ baˇ-ahˇ, yawˬ ha pehˆ toˆ-awˇ coˬ-iˇ gaˇ, Yuˇdaˆ tsawˇ haˬ coˬ caw tehꞈ-a.

⁶ Yawˇ hawˇ-eu mawˇ neˇ lawˇ lawˇ-ehˇ, Sahˬpaˬ Miˬyehˇ-ahˇ poˆ leˇ kʼawꞈ, yawꞈ maꞈ-ahˇ byehˇ dzeh-euˬ miˇ neh, maˬ poˆ mawˇ nya ni shaˬ tehꞈ-a.

⁷ Aˬ yawꞈ maꞈ Sahˬpaˬ Miˬyehˇ-ahˇ, Saˇ jaˇ maˬ ziꞈ ni dehꞈ-euˬ meh. Yawꞈ maꞈ-euˬ aˬ buˇ aˬ li deuˬ, aˬ yawꞈ-ahˇ maˬ taꞈ-eu zaˬ meh. Kʼoeˇ baˬ da neh yawꞈ maꞈ hawˇ-eu, yawꞈ maꞈ-euˬ deh yaˇ dawˬ tawˆ luꞈ, nymˬ-mˇ ya cawˆ-iˇ jiˇ tehꞈ-a.

Yuˇdaˆ hawˇ-eu Iˇsaˬleˬlaˆ guiˇ deuˆ-eu

⁸ Giˇbyaˬ meuˬ-ahˇ coiˇ doi baw-awˬ. Laˬmahˇ meuˬ-ahˇ daˇ heh baw-awˬ. Behˬdaˬbeˬ meuˬ-ahˇ laˆ luiˬ-awˬ. Beˬyaˬmiˬ tsawˇ jeuˬ guiˇ deuˆ-awˬ.

⁹ Kʼehˬ-eu kʼaˆ-eu aˇ nah keuˆ ngeh, Iˇsaˬleˬlaˆ ya cawˆ-iˇ meh. Iˇsaˬleˬlaˆ tsawˇ haˬ deuˬ-oˇ, ya cawˆ-iˇ-eu yaw duˬ baw meh.

¹⁰ Sahˬpaˬ Miˬyehˇ ehˇ-eu dawˬ-aˬ, “Yuˇdaˆ miˇ kʼahˬ sahˬ paˬ sahˬ ma, Iˇsaˬleˬlaˆ-ahˇ ceh laˇ-awˇ, miˇ kʼahˬ ceh geuꞈ taˬ-euˬ miˇ neh, Lawˇ baˬ iˇ jeuˬ oe-eu loꞈ-ehˇ, aˬ yawꞈ maꞈ-ahˇ ngaˇ kʼehˬ nehˬ ma.

¹¹ Aˬ cawˬ kʼehˬ nehˬ kʼaˆ nehˬ-euˬ gaˇ, Iˇsaˬleˬlaˆ ya daˬ luꞈ ngeh, maˬ caw ba nehˬ nya-eu deuˬ-ahˇ, laꞈ jeuˬ shaˇ-iˇ-euˬ baˬ da neh, yawꞈ-ahˇ oꞈ-eu miˇ tsaˬ pehˇ tsahˇ, aˬ cawˬ neh bi kʼaˆ geuꞈ-euˬ meh.

¹² Kʼoeˇ miˇ neh Iˇsaˬleˬlaˆ-ahˇ, luˬ-iˇ seˇ-iˇ ni ngaˇ jahˇ-awˇ, Yuˇdaˆ tsawˇ haˬ deuˬ-euˬ kʼoeˇ taˆ, yaw cawˆ jeˬ ngaˇ bi keuˆ le ma.

¹³ “Yawˬ ha naˇ gawˇ aˇ naˆ kʼaˆ-eu, Iˇsaˬleˬlaˆ-ahˇ siˬ leˇ-awˇ, yawˬ ha maˇ naˇ aˇ naˆ naꞈ-eu, Yuˇdaˆ miˇ kʼahˬ-ahˇ siˬ leˇ ngeh, huiˬ-eu Suˇliˆ sahˬ paˬ jawˇ gaˇ, Iˇsaˬleˬlaˆ tahˬ shaˇ-euˬ meh. Ehˇ kʼawꞈ, naˇ gawˇ maˬ yaˇ nya-ehˇ, maˇ naˇ maˬ laˆ taˬ nehˬ nya-a.

¹⁴ Haiˬ-eu aˇ laˬ jaˬ shiˇ loꞈ-ehˇ, Iˇsaˬleˬlaˆ-ahˇ tsawˬ kawꞈ ma. Gʼeh-eu aˇ laˬ jaˬ shiˇ loꞈ-ehˇ, Yuˇdaˆ miˇ kʼahˬ-ahˇ tsawˬ kawꞈ ma. Cehˬ pyaˬ cehˬ shaˇ-awˇ bi ga-awˇ, kawꞈ tehˬ-awˇ gʼeu byoˆ gʼeh nehˬ ngeh, ka kʼoꞈ nehˬ-eu gʼaˬ maˬ jawˇ-aˇ.

¹⁵ “Yawꞈ maꞈ iˬ baˇ noeˬ poˆ leˇ-awˇ, ngaˬ-euˬ myaˆ pyawˬ maˬ poˆ kʼoeˇ keuˆ, yawꞈ maꞈ-ahˇ ngaˇ byehˇ dzeh nehˬ ma. Yawꞈ maꞈ shaˬ zahˬ mˇ doeˇ laꞈ ngeh, ngaˬ-ahˇ poˆ laˇ-eu baw tehꞈ-a.”