Hawˇseˬ 3 - Akha

Hawˇseˬ hawˇ-eu saˇ jaˇ maˬ ziꞈ-euˬ zaˬ miˬ zaˬ

¹ Sahˬpaˬ Miˬyehˇ ngaˬ-ahˇ heu loꞈ-ehˇ ehˇ-eu meh. “Nawˇ tiˬ poˆ paˇ iˇ-awˇ, zaˬ kʼaˬ tiˬ gʼaˬ nehˬ-ehˇ yuꞈ luꞈ-eu zaˬ miˬ zaˬ tiˬ gʼaˬ-ahˇ paˇ gaˬ-iˇ-awˬ. Iˇsaˬleˬlaˆ tsawˇ haˬ deuˬ miˬ yehˇ nui deuˬ mehˬ nah caw teh gʼeh-awˇ, tahˬ pahˬ aˬ ma mawˇ kawˇ-ahˇ lawˇ nehˬ-euˬ dzaˇ pyeuꞈ-eu aˬ gaꞈ aˇ siˬ aˇ yaˆ-ahˇ nui kʼahˇ jaˆ kʼawꞈ, aˬ yawꞈ maꞈ-ahˇ ngaˇ gaˬ-eu loꞈ-ehˇ, zaˬ miˬ zaˬ kʼoeˇ gʼaˬ-ahˇ nawˇ ya gaˬ meh.”

² Kʼoeˇ naˇ, pyuˇ maˇ byaˆ tseˇ ngaˬ byaˆ hawˇ-eu, lawˬ loeˇ shiꞈ puˬ baꞈ-awˇ, zaˬ miˬ zaˬ kʼoeˇ gʼaˬ-ahˇ ngaˇ zeuˇ tsehˆ-euˬ ma.

³ Meh maˬ laˇ maˬ geuꞈ ni ya dehꞈ-eu uˬ taꞈ, aˬ cawˬ nehˬ-ehˇ maˬ bahˬ ni ngaˬ-ahˇ gʼawˬ myahˇ ni ya dawˬ meh lehˇ, zaˬ miˬ zaˬ kʼoeˇ gʼaˬ-ahˇ ngaˇ ehˇ nehˬ-euˬ ma. Ngaˇ kʼawꞈ, aˇ yamˬ kʼoeˇ myah ni aˬ yawꞈ-ahˇ dawˬ ma lehˇ ehˇ nehˬ-euˬ ma.

⁴ Kʼoeˇ loꞈ-ehˇ duˇ ni, Iˇsaˬleˬlaˆ tsawˇ haˬ deuˬ kʼawꞈ, sahˬ paˬ maˬ baw, aˬ yuiꞈ aˬ tsu maˬ baw ni, lawˇ-eu shehˇ-eu jeˬ maˬ mˇ-ehˇ, uˬ duˬ tahˬ-eu zahˇ sahˇ kʼoꞈ-ahˇ taꞈ leˇ-eu muiˬ-eu shawˇ-eu kʼaˬ lo kʼawˇ zeuˇ deuˬ kʼawꞈ maˬ bi jaˆ-eu uˬ taꞈ, mah loˬ ja maw mˇ-eu gʼaˇ duˬ tahˬ pahˬ aˬ ma mawˇ kawˇ deuˬ kʼawꞈ maˬ bi jaˆ ni, aˇ yamˬ gʼawˬ myahˇ ni ya dehꞈ meh.

⁵ Ehˇ kʼawꞈ, Iˇsaˬleˬlaˆ tsawˇ haˬ deuˬ aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ hawˇ-eu, aˬ yawꞈ maꞈ-euˬ sahˬ paˬ Daˬbiˇ-euˬ tsuiꞈ laꞈ oˆ dehꞈ le-euˬ tsawˇ haˬ tiˬ gʼaˬ jawˇ paw paˇ gʼoꞈ kʼoꞈ laˇ-eu aˇ nah tiˬ nah jaˆ tehꞈ-a. Kʼoeˇ ngeh jawˇ, aˬ yawꞈ maꞈ Sahˬpaˬ Miˬyehˇ-ahˇ guˆ-awˇ, aˬ yawꞈ neh biꞈ-euˬ muiˬ-eu guiˬ lahˬ deuˬ za tehꞈ-a.