Hawˇseˬ 2 - Akha

¹ Kʼoeˇ miˇ neh, nawˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ-ahˇ “Ngaˬ-euˬ tsawˇ haˬ” lehˇ hawˇ-eu, “Sahˬpaˬ Miˬyehˇ gaˬ-eu tsawˇ haˬ” lehˇ kuˇ-awˬ.

Saˇ jaˇ maˬ ziꞈ-eu Gawˬmaˬ, saˇ jaˇ maˬ ziꞈ-eu Iˇsaˬleˬlaˆ

² Ngaˬ-euˬ aˬ buˇ aˬ li deuˬ-oˇ, aˬ ma-ahˇ ja sawˇ mehˬ nehˬ-awˬ. Aˬ yawꞈ ngaˬ-euˬ miˬ zaˬ maˬ ngeuˇ. Ngaˇ gʼeh yawꞈ-euˬ yo zaˬ maˬ ngeuˇ. Meh maˬ laˇ geuꞈ-awˇ dehꞈ jawꞈ-euˬ, myaˆ pyawˬ kʼaˬ naˆ dzuiꞈ shawˇ dzeh-awˇ, Aˬ cawˬ yo zaˬ-ahˇ bahˬ mawꞈ-eu, nui ma kʼoeˇ siˬ laˆ byoˆ-awˬ lehˇ, naw maꞈ aˬ yawꞈ-ahˇ ja sawˇ-awˬ.

³ Dawˬ tsoˆ gʼoˆ-awˇ maˬ dehꞈ paˇ naˇ, aˬ yawꞈ dehꞈ doˆ le ngeh loꞈ-ehˇ, mehˬ tsoeˬ lehˆ neˇ-awˇ bi shaˬ ma. Koˆ dui dui-awˇ gui dui dui-eu, bawˇ tsahˬ bawˇ dahˇ tiˬ tsahˇ loꞈ-ehˇ, iˇ cuꞈ mehꞈ-awˇ bi shiˇ leˇ ma.

⁴ Yawꞈ neh baw-euˬ zaˬ deuˬ ahˇ kʼawꞈ, ngaˬ-euˬ nui ma gʼawˬ shaˬ maˬ gaˬ. Aˬ jeˬ miˇ nga lehˇ ehˇ naˇ, meh maˬ laˇ neh baw-euˬ zaˬ meh.

⁵ Zaˬ baw aˬ ma meh maˬ laˇ kʼoeˇ, shaꞈ dawˇ-eu maˬ baw ni dehꞈ-awˇ, dawˬ tmˇ heu loꞈ-ehˇ mˇ-eu meh. ‘Dzaˬ-eu dzaˇ muiˬ, dawˇ-eu iˇ cuꞈ, dm-eu saˬ paˇ, yawˇ zaˬ caꞈ hm, aˬ gaꞈ dzaˇ uiˇ, saˬ loˬ loˬ tsiˇ, heu deuˬ biꞈ-eu zaˬ kʼaˬ mehˬ nah, caw teh gʼeh ma’ lehˇ tmˇ-eu meh.

⁶ Kʼoeˇ baˬ da neh, yawꞈ-euˬ gaˇ ma. Aˬ gah duˬ gahˬ ngaˇ sheu uiˬ-awˇ, yawꞈ iˇ gaˇ ma maˬ bi mawˇ ni, lahˇ goˇ gawˬ -awˇ ciˬ tsoeˬ nehˬ ma.

⁷ Zaˬ kʼaˬ mehˬ nah yawꞈ caw teh kʼawꞈ, zaˬ kʼaˬ deuˬ-ahˇ maˬ teh miˇ-aˇ. Zaˬ kʼaˬ kʼoeˇ deuˬ-ahˇ poˆ doe kʼawꞈ, maˬ poˆ mawˇ nya-ehˇ pyeuꞈ laˇ-awˇ, ‘Kʼaˬdzeˇzaˬ yaw beh gʼaˬ jawˇgaˇ, ngaˇ paˇ gʼoꞈ poˆ-iˇ shaw-iˬ ma. Aˇ hu aˬ yawꞈ nehˬ-ehˇ dehꞈ ngeh, iˬ nah dehꞈ luꞈ-eu naˆ maˬ tseˇ, maˬ gaˇ dui dui law miˇ-a’ lehˇ, aˬ yawꞈ ehˇ-eu yaw duˬ baw meh.

⁸ Cehˇ, aˬ gaꞈ dzaˇ uiˇ, saˬ loˬ tsiˇ, heu deuˬ dawˬ tawˆ yawꞈ-ahˇ biꞈ-awˇ, Baˬlaˇ-ahˇ uˬ duˬ tahˬ leˇ ngeh, aˬ yawꞈ zmˬ-euˬ myawˬ gahˬ pyeuꞈ-eu, Pyuˇkʼoˇ shuiˇkʼoˇ biꞈ-euˬ kʼoeˇ gʼaˬ, ngaˇ meh lehˇ yawꞈ maˬ siˬ nya-a.

⁹ Kʼoeˇ baˬ da neh, yamˬ law tsaˬ ngeh, ngaˬ-euˬ cehˇ ngaˇ yuˇ kʼoꞈ jiˇ-awˇ, aˬ gaꞈ dzaˇ uiˇ yuˇ kʼoꞈ jiˇ ma. Aˬ yawꞈ gʼawˇ mawˇ bi dm gʼoeˬ-euˬ, yawˇ caꞈ hm hawˇ-eu saˬ paˇ deuˬ, ngaˇ yuˇ kʼoꞈ jiˇ-awˇ bi shaˬ ma.

¹⁰ Yawꞈ-euˬ zaˬ kʼaˬ deuˬ-euˬ mehˬ shi, yawꞈ-ahˇ neˇ myawˆ ni lehˆ dzeh-awˇ, ngaˬ-euˬ baoˬ uˬ moˆ bi shaˬ ngeh, ka kʼoꞈ nehˬ-eu gʼaˬ maˬ jawˇ-aˇ.

¹¹ Aˬ yawꞈ bawˬ-iˬ gʼeh-awˇ zahˇ tawˬ-eu, la shuiꞈ lah-awˇ, jawˇ nah tawˬ-eu, zahˇ sahˇ kʼoꞈ bawˬ-iˬ dawˬ tawˆ luꞈ-ahˇ, byoˆ-iˇ jiˇ ni ngaˇ jahˇ nehˬ ma.

¹² ‘Ngaˬ-euˬ zaˬ kʼaˬ deuˬ neh ngaˬ-ahˇ, byawˬ gʼa poeˬ biꞈ-euˬ meh’ ehˇ-eu, yawꞈ-euˬ aˬ gaꞈ baw duˆ hawˇ-eu, siˬguˬ aˇ bawˇ kʼoeˇdeuˬ dawˬtawˆ, ngaˇ laˆ piˬ laˆ byoˆ jiˇ nehˬ ma. Bawˇ tsahˬ bawˇ dahˇ bi pyeuꞈ-iˇ-awˇ, bawˇ tsahˬ jeˬ zaˬ yaw haiˬ deuˬ neh, bi dzaˬ bi dawˇ byoˆ jiˇ leꞈ ma.

¹³ Baˬlaˇ miˬ yehˇ-ahˇ bawˬ-iˬ gʼeh-awˇ, yaw saw jeˬ doꞈ damˬ-euˬ uˬ taꞈ, myawˬ guˇ geuꞈ-awˇ jahˇ gʼeh haw-awˇ, zaˬ kʼaˬ deuˬ nehˬ-ehˇ cah cah-ehˇ, ngaˬ-ahˇ aˬ yawꞈ ngehˇ-euˬ miˇ neh, aˬ yawꞈ-ahˇ ngaˇ kʼehˬ nehˬ ma lehˇ, Sahˬpaˬ Miˬyehˇ ehˇ taˬ-euˬ meh.

Sahˬpaˬ Miˬyehˇ yawˬ ha-euˬ tsawˇ haˬ-ahˇ gaˬ-eu

¹⁴ Kʼoeˇ baˬ da neh aˬ yawꞈ-ahˇ ngaˇ, bawˇ tsahˬ bawˇ dahˇ-ahˇ sheuˬ gʼeh-awˇ, dawˬ nahˬ yu ni ngehˬ-eu laꞈ kʼoeˇ, ngaˬ-ahˇ gaˬ kʼoꞈ laˇ ni mˇ ma.

¹⁵ Aˬ yawꞈ-euˬ aˬ gaꞈ yaˇ kmˇ deuˬ, aˬ yawꞈ-ahˇ ngaˇ paˇ biꞈ kʼoꞈ-awˇ, shaˬ zahˬ deh kʼawꞈ kuˇ-euˬ kʼoeˇ tsahˇ, noeˬ tmˬ duˬ laˇ gʼoˆ bi pyeuꞈ ma. Aˇ hu aˬ yawꞈ miˬ daꞈ geuꞈ-awˇ, Iˇjiˇtuˆ miˇ kʼahˬ laꞈ kʼoeˇ neh, doˆ laˇ ngeh ngehˬ cawˬ-euˬ loꞈ-ehˇ, ngaˬ-ahˇ ngehˬ cawˬ poˆ laˇ tehꞈ-a.

¹⁶ Aˬ yawꞈ-euˬ kʼaˬ dzeˇ zaˬ ma lehˇ, aˬ yawꞈ ngaˬ-ahˇ paˇ kuˇ poˆ-awˇ, ‘Baˬlaˇ’ lehˇ maˬ paˇ kuˇ-aˇ lehˇ, Sahˬpaˬ Miˬyehˇ ehˇ taˬ-euˬ meh.

¹⁷ Baˬlaˇ miˬ yehˇ-euˬ tsawˇ myahˇ kʼoeˇ, aˬ yawꞈ maˬ paˇ bi kuˇ poˆ ma.

¹⁸ Aˇ yamˬ kʼoeˇ yamˬ keuˆ laˇ ngeh jawˇ, ngaˬ-euˬ tsawˇ haˬ heu deuˬ kʼoeˇ taˆ, maˬ coeˬ maˬ ciˆ nehˬ-eu gʼaˇ duˬ, bawˇ tsahˬ jeˬ zaˬ dawˬ tawˆ hawˇ-eu, kʼoeˇ taˆ zaw-eu aˇ jiˇ maˬ ehˇ, miˇ tsa joe-eu deuˬ-ahˇ maˬ ehˇ, ngaˇ saˇ jaˇ dzaˬ taꞈ-eu lehˇ ma. Miˇ kʼahˬ heu kʼahˬ laꞈ kʼoeˇ jaˆ-eu, guiˇ deuˆ-eu keu ka dawˬ tawˆ luꞈ, mi cehˇ hawˇ-eu kaˆ dawˬ tawˆ luꞈ, ngaˇ laˆ piˬ laˆ byoˆ nehˬ jiˇ-awˇ, ngaˬ-euˬ tsawˇ haˬ heu deuˬ dawˬ tawˆ, nui saˇ oꞈ-awˇ ya dehꞈ tehꞈ-a.

¹⁹ Iˇsaˬleˬlaˆ-oˇ, nawˬ-ahˇ ngaˇ, ngaˬ-euˬ miˬ zaˬ bi geuꞈ-eu ma. Nawˬ-euˬ kʼoeˇ taˆ saˇ jaˇ ziꞈ-awˇ, nawˬ-ahˇ gaˬ-eu ngaˬ-euˬ nui gaˬ, nawˬ-ahˇ ngaˇ gʼawˬ shaˬ gaˬ-eu jeˬ, tiˬ jawˇ-iˬ maˬ bi tsehˆ leˇ-ehˇ, tiˬ jawˇ-iˬ maˬ paˇ dehꞈ gʼawˬ ma.

²⁰ Ngaˬ-euˬ saˇ jaˇ-ahˇ ngaˇ ziꞈ-awˇ, nawˬ-ahˇ ngaˬ-euˬ bi pyeuꞈ tsehˆ ma. Ngaˇ Sahˬpaˬ Miˬyehˇ ngeuˇ meh lehˇ, nawˇ yaw muiˬ-ehˇ siˬ duˬ tehꞈ-a.

^21-22 Aˇ nah aˇ yamˬ kʼoeˇ keuˆ laˇ ngeh, ngaˬ-euˬ tsawˇ jeuˬ Iˇsaˬleˬlaˆ shaˇ-euˬ dawˬ-ahˇ ngaˇ naˇ haˬ ma. Miˇ tsaˬ tahˬ kʼawˇ heu-euˬ kʼoeˇ taˆ, uˬ yehˇ yehˇ le ni ngaˇ jahˇ ma. Cehˇ, aˬ gaꞈ, saˬ loˬ heu deuˬ-ahˇ, miˇ tsaˬ neh bi loˆ le tehꞈ-a.

²³ Miˇ kʼahˬ heu kʼahˬ jawˇ duˬ laꞈ kʼoeˇ, ngaˬ-euˬ tsawˇ haˬ deuˬ ziꞈ leˇ-awˇ, baw le za le ni ngaˇ jahˇ ma. “Maˬ gaˬ-eu tsawˇ haˬ” lehˇ kuˇ-euˬ, kʼoeˇ deuˬ-ahˇ ngaˇ gaˬ poˆ nehˬ-awˇ, “Ngaˬ-euˬ tsawˇ haˬ maˬ ngeuˇ” ehˇ gaˇ, “Ngaˬ-euˬ tsawˇ haˬ ngeuˇ-eu ma” lehˇ, ngaˇ paˇ kuˇ poˆ ehˇ poˆ nehˬ ngeh, “Nawˇ nga maꞈ-euˬ Miˬyehˇ ma” lehˇ, ngaˬ-ahˇ yawꞈ maꞈ kuˇ laˇ tehꞈ-a.