Hawˇseˬ 11 - Akha

¹ Sahˬpaˬ Miˬyehˇ ehˇ-eu dawˬ-aˬ, “Iˇsaˬleˬlaˆ yaw nyiˇ gʼeh ngeh, aˬ yawꞈ-ahˇ ngaˇ gaˬ dui dui-awˇ, ngaˬ-euˬ aˬ li tiˬ gʼaˬ loꞈ-ehˇ, Iˇjiˇtuˆ miˇ kʼahˬ laꞈ kʼoeˇ neh, ngaˬ neh sheuˬ kʼoꞈ doˆ laꞈ-euˬ ma.

² Ehˇ kʼawꞈ, ngehˬ kuˇ ngehˬ iˇ iˇ-awˇ, ngaˬ-ahˇ gaˇ mahˇ kaˬ-iˇ-euˬ meh. Baˬlaˇ miˬyehˇ-ahˇ lawˇ nehˬ-awˇ, tahˬ pahˬ aˬ ma mawˇ kawˇ deuˬ-ahˇ, tsiˇ yaw saw doꞈ damˬ nehˬ-euˬ meh.

³ Iˇsaˬleˬlaˆ cah nya laˇ ni, cah dzawˇ dzawˇ nehˬ-euˬ gʼaˬ ngaˇ ma. Ngaˬ neh ciˬ huiˬ ciˬ mahˇ-euˬ kʼawꞈ, aˬ yawꞈ maꞈ-ahˇ ngaˇ haw meh lehˇ, tiˬ pawꞈ-iˬ maˬ noeˬ doˆ leˇ-a.

⁴ Nui gaˬ shaˬ coeˇ byah-eu laꞈ kʼoeˇ, aˬ yawꞈ maꞈ-ahˇ ngaˇ tsahˇ-euˬ ma. Aˬ yawꞈ maꞈ-ahˇ ciˬ cuˇ cuˇ-awˇ, baˬ ba tiˬ gaˇ ciˬ tawꞈ-euˬ ma. Ngaˬ-euˬ gʼawˇ mawˇ awˆ kʼoꞈ nehˬ-awˇ, aˬ yawꞈ maꞈ-ahˇ bi dzaˬ-euˬ ma.

⁵ “Iˇjiˇtuˆ miˇ kʼahˬ paw iˇ-awˇ, aˬ yawꞈ maꞈ gʼoꞈ jawˇ-iˇ tehꞈ-a. Aˬshuˇliˆ dzoeˬ dzaˬ-eu uˬ moˆ, aˬ yawꞈ maꞈ gʼoꞈ jawˇ leˇ tehꞈ-a. Aˬ jeˬ miˇ neh ehˇ naˇ, ngaˇ jawˇ gaˇ maˬ gʼoꞈ laˇ mawꞈ-a.

⁶ Aˬ yawꞈ maꞈ-euˬ meuˬ deuˬ kʼoeˇ taˆ, guiˇ deuˆ mi cehˇ deuˬ oe keuˆ-awˇ, meuˬ lahˇ laˇ gʼoˆ pyaˆ jiˇ tehꞈ-a. Yawˬ ha nui noeˬ geuꞈ-eu miˇ neh, laˆ cawˆ nehˬ gaˇ ya daˬ tehꞈ-a.

⁷ Ngaˬ-ahˇ byehˇ-awˇ cehˆ-eu gʼaˇ duˬ, ngaˬ-euˬ tsawˇ haˬ zeuˆ pyawˇ-euˬ meh. Kʼaˆ baꞈ kah dui dui-eu miˇ neh, aˬ yawꞈ maꞈ guˇ guˇ-ehˇ ngoeˇ kʼawꞈ, baꞈ ka nehˬ-eu gʼaˬ maˬ jawˇ-aˇ.

⁸ “Iˇsaˬleˬlaˆ-oˇ, nawˬ-ahˇ ngaˇ, aˬ joˆ-ehˇ gʼeh-awˇ byehˇ coeˇ nmˇ. Aˬdaˬmaˬ-ahˇ kʼehˬ-euˬ loꞈ-ehˇ, nawˬ-ahˇ ngaˇ aˬ joˆ-ehˇ kʼehˬ nmˇ. Zeˬbymˬ-ahˇ jahˇ nehˬ-euˬ loꞈ-ehˇ, nawˬ-ahˇ ngaˇ aˬ joˆ-ehˇ jahˇ nmˇ. Nawˬ-ahˇ gaˬ dui dui-eu miˇ neh, kʼoeˇ loꞈ-ehˇ jahˇ nehˬ-eu gʼaˇ duˬ, ngaˬ-euˬ nui ma maˬ gʼaˬ leˇ nya.

⁹ Ngaˬ-euˬ nui pehˇ huiˬ-eu baˬ da, nawˬ-ahˇ ngaˇ maˬ paˇ kʼehˬ nehˬ ma. Iˇsaˬleˬlaˆ-oˇ, nawˬ-ahˇ ngaˇ, tiˬ jawˇ-iˬ maˬ paˇ laˆ cawˆ ma. Aˬ jeˬ miˇ neh ehˇ naˇ, ngaˇ Miˬyehˇ ma. Tsawˇ haˬ maˬ ngeuˇ. Muiˬ-eu shawˇ-eu gʼaˬ pyeuꞈ-eu ngaˇ, naw maꞈ nehˬ-ehˇ jawˇ-eu gʼaˬ ma. Nui naꞈ nui pehˇ ahˇ-eu laꞈ kʼoeˇ, naw maꞈ jawˇ gaˇ maˬ paˇ oe ma.

¹⁰ “Aˇ laˬ jaˬ shiˇ lmˬ-eu loꞈ-ehˇ, muiˇ-eu deuˬ-ahˇ ngaˇ lmˬ nehˬ ngeh, ngaˬ-euˬ tsawˇ haˬ deuˬ ngaˇ jawˇ gaˇ, nahˇ ma ga kʼehˬ paw pyawˬ-ahˇ neh, guˆ guˆ-ehˇ cehˆ gʼoꞈ laꞈ tehꞈ-a.

¹¹ Iˇjiˇtuˆ miˇ kahˬ paw dzeˇ neh, aˇ jiˇ loꞈ-ehˇ zaw kʼoꞈ laꞈ-awˇ, Aˬshuˇliˆ miˇ kʼahˬ paw dzeˇ neh, kʼaˬ kʼoeˬ loꞈ-ehˇ gʼoꞈ le tehꞈ-a. Aˬ yawꞈ maꞈ-ahˇ iˇ kahˇ keuˆ ni, ngaˇ sheuˬ kʼoꞈ keuˆ nehˬ jiˇ ma” lehˇ, Sahˬpaˬ Miˬyehˇ ehˇ taˬ-euˬ meh.

Iˇsaˬleˬlaˆ hawˇ-eu Yuˇdaˆ yaw lehˬ yaw ca

¹² Sahˬpaˬ Miˬyehˇ ehˇ-eu dawˬ-aˬ, “Iˇsaˬleˬlaˆ tsawˇ haˬ ngaˬ-ahˇ, jaˬ myawꞈ mehˇ shuiˇ sheu lahˇ-euˬ meh. Saˇ jaˇ ziꞈ-awˇ muiˬ-eu shawˇ-eu, ngaˇ loꞈ-ehˇ gʼeh-eu Miˬyehˇ-ahˇ, Yuˇdaˆ tsawˇ haˬ iˬ nah keuˆ ni, maˬ tsehˆ leˇ ni puiˬ luꞈ-eu meh.”