Hawˇseˬ 10 - Akha

¹ Iˇsaˬleˬlaˆ tsawˇ haˬ deuˬ-aˬ, aˇ siˬ tiˬ byah ni siˬ luꞈ-eu, aˬ gaꞈ baw duˆ-ahˇ duˇ-eu meh. Ngehˬ-ehˇ dehꞈ dzaˬ laˇ naˇ ngehˬ-ehˇ, lawˇ duˬ gʼawˬ mya ni tsoˆ lahˬ-awˇ, ngehˬ-ehˇ jaˆ laˇ naˇ ngehˬ-ehˇ, uˬ duˬ tahˬ-eu kʼaˬ lo kʼawˇ zeuˇ, muiˬ dui dui ni laˆ saˆ-eu meh.

² Nui ma yaw gʼoꞈ ahˇ-eu aˇ poeˬ, nymˬ-mˇ paˇ ya daˬ poˆ tehꞈ-a. Aˬ yawꞈ maꞈ-euˬ lawˇ duˬ kʼoeˇ deuˬ, Miˬyehˇ laˆ kʼehˬ laˆ kʼoeˆ nehˬ-awˇ, muiˬ-eu shawˇ-eu kʼawˇ zeuˇ kʼoeˇ deuˬ, laˆ piˬ laˆ byoˆ jiˇ nehˬ tehꞈ-a.

³ Aˬ yawꞈ maꞈ heu loˆ ehˇ tehꞈ-a. “Aˬ dui -euˬ Sahˬpaˬ Miˬyehˇ-ahˇ, aˬ dui maˬ guˆ-euˬ baˬ da neh, aˬ dui sahˬ paˬ maˬ paˇ jawˇ ma. Ehˇ kʼawꞈ, sahˬ paˬ jawˇ law hawˇ kʼawꞈ, aˬ jeˬ jahˇ nehˬ laꞈ nya nmˇ” lehˇ, aˬ yawꞈ maꞈ ya ehˇ gaˇ keuˆ meh.

⁴ Aˬ yawꞈ maꞈ dawˬ awˬ kʼawꞈ ngehˬ-awˇ, saˇ jaˇ dzaˬ-eu jaˬ myawꞈ tehꞈ meh. Yaw tsaˬ yaw dawˇ poˆ laˆ laˆ-awˇ, doꞈ kʼaˆ dui dui-eu baw duˆ deuˬ, deh ga dehꞈ byah-euˬ gaˇ duˇ meh.

⁵ Saˬmaˬliˆ meuˬ-ahˇ jawˇ-eu deuˬ, Beˬdeˬlaˇ meuˬ-ahˇ jaˆ luꞈ-eu, shuiˇ mawˇ neˇ mawˇ kawˇ byoˆ-euˬ gaˇ, guˆ dui dui-eu yaw dzuˬ dzuˬ meh. Mawˇ kawˇ kʼoeˇ-euˬ yaw shehꞈ kʼahˬ sehˇ, maˬ paˇ jaˆ-ehˇ pyeuꞈ-iˇ-euˬ gaˇ, kʼoeˇ gaˇ piˇ ma geuꞈ-eu deuˬ kʼawꞈ, miˇ kʼahˬ zaˬ nehˬ-ehˇ ngoeˇ tehꞈ-a.

⁶ Tahˬ pahˬ aˬ ma mawˇ kawˇ kʼoeˇ hmˬ, Aˬshuˇliˆ miˇ kʼahˬ-euˬ sahˬ paˬ, huiˬ dui mahˇ dui dui-eu gʼaˬ-ahˇ, ya baꞈ ha keuˆ nehˬ leˇ tehꞈ-a. Iˇsaˬleˬlaˆ tsawˇ haˬ deuˬ-aˬ, aˬ cawˬ ehˇ dawˬ geuꞈ-eu miˇ neh, daˬ ga-awˇ ya shaꞈ dawˇ tehꞈ-a.

⁷ Iˇsaˬleˬlaˆ-euˬ sahˬ paˬ-aˬ, daˇ kawˬ pawˬ jehꞈ bu-eu loꞈ-ehˇ, bi sheuˬ byoˆ gʼeh gaˇ keuˆ tehꞈ-a.

⁸ Iˇsaˬleˬlaˆ uˬ duˬ tahˬ-euˬ, tahˬ pahˬ aˬ ma kʼoeˇ deuˬ jaˆ-eu, Aˬbehˇ meuˬ-euˬ gawˬ duˇ uˬ du, jaˆ-eu uˬ duˬ tahˬ nymˇ kʼoeˇ deuˬ, ya luˬ ya seˇ-iˇ jiˇ tehꞈ-a. Lawˇ duˬ kʼoeˇ deuˬ jaˆ-eu kʼoeˇ taˆ, aˬ gah baw duˆ uˆ byoˆ tehꞈ-a. “Nga maꞈ-ahˇ byaˆ tehˬ le-awˬ” lehˇ, gawˬ jawˬ-ahˇ aˬ yawꞈ maꞈ guˇ-awˇ, “Nga maꞈ-ahˇ pymˬ tehˬ le-awˬ” lehˇ, gawˬ duˇ-ahˇ yawꞈ maꞈ guˇ tehꞈ-a.

Iˇsaˬleˬlaˆ-ahˇ yaˇ kʼaˬ daˇ ma lehˇ Sahˬpaˬ Miˬyehˇ ehˇ-eu

⁹ Sahˬpaˬ Miˬyehˇ ehˇ-eu dawˬ-aˬ, “Iˇsaˬleˬlaˆ tsawˇ haˬ deuˬ-aˬ, Giˇbyaˬ meuˬ-ahˇ aˇ dahˬ beh-euˬ, iˬ baˇ mˇ-eu maˬ naˬ-aˬ siˬ. Kʼoeˇ baˬ da neh Giˇbyaˬ meuˬ-ahˇ, guiˇ deuˆ-eu jeˬ keuˆ le tehꞈ-a.

¹⁰ Bahˬ dui dui-eu tsawˇ haˬ deuˬ-ahˇ, kʼehˬ-eu kʼaˆ-eu lehˇ ngaˇ oe ma. Iˬ baˇ aˇ dzehˬ dzeuˇ-eu miˇ neh, aˬ yawꞈ maꞈ-ahˇ kʼehˬ-eu gʼaˇ duˬ, tsawˇ jeuˬ dawˬ tawˆ gm leˇ tehꞈ-a.

¹¹ “Aˇ hu Iˇsaˬleˬlaˆ tsawˇ haˬ, yaw muiˬ paˬ-ehˇ dzaw nya taˬ-euˬ, cehˇ nawˬ-eu lehˇ lehˬ hmˬ taˬ-euˬ, mawˇ neˇ mawˇ kʼaˇ-ahˇ duˇ-eu meh. Ehˇ kʼawꞈ muiˬ-eu kʼawˬ lahˇ kʼoeˇ taˆ, nyoˬ tsehˬ laꞈ gʼahˬ baꞈ daˆ nehˬ-awˇ, myawˬ kʼaˆ bi mˇ dahˬ beh-euˬ ma. Yuˇdaˆ-ahˇ deh yaˇ bi tsehˬ-awˇ, aˬ yawꞈ jehˆ kaˆ bi gʼeu-euˬ ma.

¹² Aˬ yawꞈ maꞈ-ahˇ ngaˇ ehˇ nehˬ-euˬ, ‘Deh yaˇ yaw shuiꞈ tsehˬ paˇ geuꞈ-awˇ, yaw tsaˬ yaw dawˇ jeˬ ka paˇ-awˇ, ngaˬ-ahˇ gʼoe-eu laꞈ kʼoeˇ za-eu, guiˬ lahˬ yaw dzahˇ deuˬ yehˬ dzaˬ-awˬ. Sahˬpaˬ Miˬyehˇ jawˇ paw pyawˇ-eu aˇ yamˬ keuˆ laˇ-euˬ siˬ nya-awˬ. Naw maꞈ jawˇ gaˇ ngaˇ oe keuˆ-awˇ, guiˬ lahˬ yaw dzahˇ shehˆ daˆ nehˬ ma.’

¹³ Ehˇkʼawꞈ, naw maꞈ yaw haiˬ sehˬ-awˇ, yaw haiˬ jeˬ yehˬ dzaˬ taˬ-euˬ meh. Jaˬ myawꞈ mehˇ shuiˇ aˇ siˬ aˇ lu, naw maꞈ dzaˬ taˬ-euˬ jaˆ-eu meh. “Mahˬ laˆ lawˬ hawˇ-eu guiˇ zaˬ deuˬ, yaw myaˬ ma lehˇ naw maꞈ noeˬ-eu,

¹⁴ naw maꞈ kʼoeˇ taˆ guiˇ keuˆ le-awˇ, taˆ dawˬ tawˆ luꞈ cawˆ jiˇ tehꞈ-a. Sahˬpaˬ Shaˬlaˬmaˬ guiˇ deuˆ-awˇ, Behˬaˬbeˬlaˇ meuˬ laˆ cawˆ ngeh, aˬ ma hawˇ-eu zaˬ dawˬ tawˆ luꞈ, coeˇ tsehˆ nehˬ gaˇ duˇ leˇ tehꞈ-a.

¹⁵ Beˬdeˬlaˇ-ahˇ jawˇ-eu deuˬ-oˇ, naw maꞈ haiˬ dui dui-euˬ miˇ neh, kʼoeˇ naˆ ni gʼeh-eu kʼehˬ-eu jeˬ, naw maꞈ kʼoeˇ taˆ keuˆ le tehꞈ-a. Guiˇ deuˆ dahˬ beh doˆ laˇ ngeh neh, Iˇsaˬleˬlaˆ-euˬ sahˬ paˬ-aˬ, ya shiˇ tsehˆ-eu yaw duˬ baw meh.”