Haˬgaiˇ 2 - Akha

Yaw shehꞈ kʼahˬ sehˇ huiˬ-eu Uˬ duˬ tahˬ nymˇ nymˇ ma

¹ Aˬ yawꞈ ngeh kʼoꞈ ba la shiꞈ siˬ tiˬ siˬ nyiˬ tseˇ tiꞈ nah -ahˇ, Miˬyehˇ gʼaˇ duˬ ngehˬ dah-eu Haˬgaiˇ jawˇ gaˇ, Sahˬpaˬ Miˬyehˇ-euˬ dawˬ tiˬ poˆ paˇ keuˆ le-euˬ meh.

² Yuˇdaˆ miˇ kʼahˬ-ahˇ uˆ lahˇ-eu gʼaˬ pyeuꞈ-eu Shaˬtiˇlaˆ-euˬ aˬ li Zeˬluˇbaˬbeˬlaˇ hawˇ-eu piˇ ma yaw huiˬ gʼaˬ pyeuꞈ-eu Yeˬhawˇzaˬdaˆ-euˬ aˬ li Yawˇshuˆ-ahˇ maˬ ehˇ, tsawˇ haˬ dawˬ tawˆ luꞈ-ahˇ maˬ ehˇ, heu loꞈ-ehˇ ehˇ nehˬ-awˬ lehˇ, Haˬgaiˇ-ahˇ Sahˬpaˬ Miˬyehˇ ehˇ nehˬ-euˬ meh.

³ “Aˇ hu Uˬ duˬ tahˬ nymˇ nymˇ ma heu nymˇ yaw shehꞈ kʼahˬ sehˇ aˇ naˆ ni huiˬ gaˇ haw mawˇ-euˬ tiˬ gʼaˬ-iˬ maˬ jawˇ loˇ. Nymˬ-mˇ aˬ jeˬ-ahˇ duˇ nga lehˇ haw sheˇ. Geuꞈ paˬ-ehˇ gʼeh-eu aˬ jeˬ paˇ ahˇ-eu nga.

⁴ Ehˇ kʼawꞈ, naw maꞈ tiˬ gʼaˬ-iˬ nui ma taꞈ cawˆ. Zeˬluˇbaˬbeˬlaˇ-oˇ, Piˇ ma yaw huiˬ gʼaˬ pyeuꞈ-eu Yeˬhawˇzaˬdaˆ-euˬ aˬ li Yawˇshuˆ-oˇ, Miˇ kʼahˬ zaˬ dawˬ tawˆ luꞈ-oˇ, nui ma taˬ cawˆ. Naw maꞈ nehˬ-ehˇ ngaˇ jawˇ ma.

⁵ Iˇjiˇtuˆ miˇ kʼahˬ laꞈ kʼoeˇ naw maꞈ doˆ laˇ ngeh neh, naw maꞈ nehˬ-ehˇ aˬ myah luꞈ ngaˇ jawˇ ma lehˇ saˇ jaˇ dzaˬ taˬ-euˬ ma. Iˬ nah keuˆ ni naw maꞈ nehˬ-ehˇ ngaˇ jawˇ luꞈ ma. Teu miˇ neh taˬ guˆ.

⁶ “Gʼawˬ myahˇ maˬ gʼeh-ehˇ, mˬ hawˇ-eu miˇ-ahˇ maˬ ehˇ, iˬ ma laˆ shaˆ hawˇ-eu dahˇ taˆ maˬ ehˇ, ngaˇ ngawˬ nyeh ma.

⁷ Miˇ tsaˬ tsawˇ jeuˬ dawˬ tawˆ luꞈ ngaˇ ngawˬ zuˆ ka-awˇ, aˬ yawꞈ maꞈ-euˬ pyuˇ shuiˇ dawˬ tawˆ luꞈ heu gaˇ bi laˇ keuˆ jiˇ-awˇ, Uˬ duˬ tahˬ nymˇ nymˇ ma bi byah laˇ ma.

⁸ Miˇ tsaˬ kʼoeˇ taˆ kʼaˇ jaˆ-eu pyuˇ shuiˇ dawˬ tawˆ luꞈ ngaˬ-euˬ ma.

⁹ Uˬ duˬ tahˬ nymˇ nymˇ ma yaw shuiꞈ heu, yaw oeˇ naˆ maˬ tseˇ yaw shehꞈ kʼahˬ sehˇ huiˬ-awˇ, kʼoeˇ gaˇ ngaˬ-euˬ tsawˇ haˬ deuˬ bi baw bi za le-awˇ, nui saˇ bi oꞈ ma” lehˇ, Baoˬ huiˬ-eu Sahˬpaˬ Miˬyehˇ ehˇ-eu meh.

Miˬyehˇ gʼaˇ duˬ ngehˬ dah-eu gʼaˬ piˇ ma deuˬ-ahˇ mehˬ bawˬ mˇ-euˬ

¹⁰ Sahˬ paˬ Daˬliˇ uˆ lahˇ-eu nyiˬ kʼoꞈ tiˬ kʼoꞈ ba la gʼoeˬ siˬ tiˬ siˬ nyiˬ tseˇ oeˬ nah-ahˇ, Baoˬ huiˬ-eu Sahˬpaˬ Miˬyehˇ-euˬ dawˬ Haˬgaiˇ jawˇ gaˇ tiˬ poˆ oe keuˆ-euˬ meh.

¹¹ Sahˬpaˬ Miˬyehˇ ehˇ-eu, “Piˇ ma deuˬ-ahˇ dawˬ heu dawˬ naˇ haˬ-awˇ bi shaˇ noeˬ-awˬ.

¹² Tsawˇ haˬ tiˬ gʼaˬ shaˬ jiˇ lawˇ-euˬ yuˇ-awˇ pehˇ kʼahˬ neh dehˬ kaˬ-awˇ yuˇ gʼeh-eu ehˇ-awˬ. Kʼoeˇ naˇ, kaˬ muˇ maˬ ehˇ, jahˇ jaꞈ taˬ-euˬ dzaˇ maˬ ehˇ, aˬ gaꞈ dzaˇ uiˇ maˬ ehˇ, saˬ loˬ tsiˇ maˬ ehˇ, dzaˇ tiˬ jeˬ-ahˇ pehˇ kʼahˬ kʼoeˇ kahˇ neh ya laˆ ciˆ shaw naˇ, kʼaˇ laˆ ciˆ-euˬ dzaˇ kʼoeˇ shawˇ laˇ ta loˇ lehˇ naˇ haˬ-awˬ.” Dawˬ kʼoeˇ dawˬ naˇ haˬ ngeh, “Maˬ ngeuˇ-a” lehˇ piˇ ma deuˬ ehˇ-eu meh.

¹³ Kʼoeˇ naˇ, Haˬgaiˇ heu loꞈ-ehˇ paˇ naˇ haˬ-euˬ meh. “Tsawˇ haˬ tiˬ gʼaˬ na shiˇ taˬ-euˬ jeˬ-ahˇ toeˬ ciˆ naˇ, maˬ shawˇ-eu tsawˇ haˬ pyeuꞈ-iˇ-eu meh. Tsawˇ haˬ kʼoeˇ gʼaˬ dzaˇ kʼoeˇ deuˬ-ahˇ toeˬ ciˆ naˇ, dzaˇ kʼoeˇ deuˬ maˬ shawˇ-eu dzaˇ pyeuꞈ-iˇ meh loˇ” lehˇ naˇ haˬ ngeh, “Ngeuˇ meh” lehˇ piˇ ma deuˬ ehˇ-eu meh.

¹⁴ Kʼoeˇ naˇ, Haˬgaiˇ ehˇ-eu, “Miˇ kʼahˬ heu kʼahˬ laꞈ kʼoeˇ kʼaˇ jawˇ-eu tsawˇ haˬ hawˇ-eu, aˬ yawꞈ-maꞈ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ, kʼoeˇ gaˇ duˇ meh lehˇ, Sahˬpaˬ Miˬyehˇ ehˇ-eu meh. Kʼoeˇ miˇ neh aˬ yawꞈ maꞈ neh kʼaˇ lawˇ kʼaˇ shehˇ-euˬ jeˬ dawˬ tawˆ luꞈ maˬ shawˇ-a.”

Guiˬ lahˬ biꞈ ma lehˇ Sahˬpaˬ Miˬyehˇ ehˇ-eu

¹⁵ Sahˬpaˬ Miˬyehˇ ehˇ-eu, “Naw maꞈ Uˬ duˬ tahˬ nymˇ nymˇ ma tsoˆ muiˬ-eu aˇ dahˬ maˬ beh kʼoeˇ keuˆ ni, naw maꞈ kʼoeˇ taˆ aˬ joˆ-ehˇ keuˆ le-euˬ gaˇ kawˆ maˬ noeˬ duˬ-aˬ siˬ loˇ.

¹⁶ Cehˇ pyuˇ nyiˬ muiˇ ahˇ ma lehˇ naw maꞈ noeˬ-euˬ kʼawꞈ, tiˬ muiˇ tehꞈ-ehˇ ahˇ-eu maˬ ngeuˇ-a loˇ. Aˬ gaꞈ dzaˇ uiˇ tiˬ yaˇ tsaꞈ dahˬ ma lehˇ noeˬ-euˬ kʼawꞈ, oeˬ tseˇ tsaꞈ tehꞈ-ehˇ dahˬ-eu maˬ ngeuˇ-a loˇ.

¹⁷ Naw maꞈ neh kʼaˇ ka taˬ-euˬ jeˬ bi cawˆ-iˇ jiˇ-eu lehˇ, lahˇ dui dui-eu jaˬ lehˇ hawˇ-eu, uˬ yehˇ aˇ siˬ deuˬ ngaˇ pyehˬ gʼeh leꞈ kʼawꞈ, naw maꞈ nui ma maˬ paˇ laˇ-a.

¹⁸ Iˬ nah ba la gʼoeˬ siˬ tiˬ siˬ nyiˬ tseˇ oeˬ nah heu nah-aˬ, Uˬ duˬ tahˬ nymˇ nymˇ ma-euˬ dawˬ pehˬ gawˬ gʼaˬ-euˬ aˇ nah meh. Iˬ nah neh dahˬ beh-awˇ, mehˬ hu paw aˬ joˆ-ehˇ pyeuꞈ laˇ nga lehˇ haw taˬ-awˬ.

¹⁹ Naw maꞈ dzaˬ-eu cehˇ maˬ paˇ ahˇ-ehˇ, aˬ gaꞈ baw duˆ, siˬ guˬ aˇ bawˇ, aˇ ka uˆ aˇ bawˇ hawˇ-eu, saˬ loˬ aˇ bawˇ heu deuˬ aˇ siˬ maˬ siˬ le dah-euˬ kʼawꞈ, nymˬ-mˇ neh dahˬ beh-awˇ naw maꞈ-ahˇ ngaˇ guiˬ lahˬ biꞈ ma.”

Zeˬluˇbaˬbeˬlaˇ-ahˇ Sahˬpaˬ Miˬyehˇ saˇ jaˇ biꞈ-euˬ

²⁰ Ba la kʼoeˇ siˬ nyiˬ tseˇ oeˬ nah aˬ yawꞈ nah-ahˇ, Sahˬpaˬ Miˬyehˇ-euˬ dawˬ, Haˬgaiˇ jawˇ gaˇ paˇ keuˆ le-euˬ meh.

²¹ Dawˬ kʼoeˇ-aˬ, Yuˇdaˆ miˇ kʼahˬ-ahˇ uˆ lahˇ luꞈ-eu Zeˬluˇbaˬbeˬlaˇ gʼaˇ duˬ pyeuꞈ-eu meh. “Mˬ hawˇ-eu miˇ-ahˇ ngaˇ ngawˬ nyeh -eu lehˇ gʼeh-eu ma.

²² Miˇ kʼahˬ deuˬ bi ga ka jiˇ-awˇ, baoˬ bi byoˆ-iˇ jiˇ-eu lehˇ gʼeh-eu ma. Mahˬ laˆ lawˬ deuˬ hawˇ-eu laˆ lawˬ teh-eu deuˬ-ahˇ ngaˇ ngawˬ pyaˆ dzeh ma. Mahˬ deuˬ shiˇ-awˇ, mahˬ laˆ lawˬ teh-eu deuˬ tiˬ gʼaˬ tiˇ gʼaˬ sehꞈ tehꞈ-a.

²³ Ngaˬ-euˬ zaˬ kʼaˆ pyeuꞈ-eu Shaˬtiˇlaˆ-euˬ aˬ li Zeˬluˇbaˬbeˬlaˇ-oˇ, aˇ nah kʼoeˇ nah-ahˇ ngaˇ nawˬ-ahˇ sheuˬ laˬ le-awˇ, ngaˬ-euˬ tsawˇ myahˇ uˬ moˆ uˆ lahˇ-eu gʼaˬ bi geuꞈ ma. Nawˇ-aˬ, ngaˬ neh tseˇ doˆ-euˬ tsawˇ haˬ ma” lehˇ, Baoˬ huiˬ-eu Sahˬpaˬ Miˬyehˇ ehˇ-eu meh.