Haˬbaˬkuˆ 1 - Akha

¹ Heu-aˬ, Miˬyehˇ gʼaˇ duˬ ngehˬ dah-eu Haˬbaˬkuˆ-ahˇ, Sahˬpaˬ Miˬyehˇ neh bi siˬ bi mawˇ-euˬ dawˬ deuˬ meh.

Maˬ tsaˬ maˬ dawˇ-eu jeˬ-ahˇ Haˬbaˬkuˆ nui ma cawˆ-eu

² Sahˬpaˬ Miˬyehˇ-oˇ, aˇ myah ni, ngaˬ-euˬ shaˇ dawˬ maˬ naˇ haˬ-ehˇ, byehˇ dzeh nehˬ laꞈ-eu lehˇ gʼeh te. Yaw haiˬ jeˬ mˇ nga leh ˇ guˇ kʼawꞈ, nawˇ ka kʼoꞈ le-eu maˬ baw-a.

³ Maˬ tsaˬ maˬ dawˇ-eu jeˬ mˇ gaˇ, aˬ jeˬ miˇ neh bi haw laꞈ te. Yaw haiˬ jeˬ hawˇ-eu yaw cawˆ jeˬ, ngaˬ-euˬ mehˬ shi mˇ dui dui-awˇ, iˬ dehˬ iˬ ceh yaˇ kʼaˬ mehˬ dzaˬ, maˬ gui jiˇ coeˇ ni jaˆ luꞈ meh.

⁴ Zahˇ sahˇ kʼoꞈ deuˬ peuˬ-iˇ jiˇ-awˇ, yaw tsaˬ yaw dawˇ maˬ paˇ ziꞈ meh. Yaw muiˬ-ahˇ yaw haiˬ jawˬ lahˇ-awˇ, yaw tsaˬ yaw dawˇ buꞈ-iˇ-euˬ meh.

Sahˬpaˬ Miˬyehˇ ehˇ kʼoꞈ nehˬ-euˬ dawˬ

⁵ Sahˬpaˬ Miˬyehˇ aˬ yawꞈ-euˬ tsawˇ haˬ zaˬ-ahˇ ehˇ-eu, “Miˇ kʼahˬ tsawˇ jeuˬ-ahˇ haw taˬ yawˬ. Nawˇ zahˬ dui ya dui leˇ tehꞈ-a. Ehˇ mehˬ ngeh maˬ jah coeˇ-eu jeˬ, nawˇ dehꞈ luꞈ-eu aˇ yamˬ laꞈ kʼoeˇ, ngaˇ jahˇ nehˬ gaˇ ya mawˇ tehꞈ-a.

⁶ Haiˬ dui jawꞈ dui gʼeh dui dui-eu, Baˬbuˇloˬ tsawˇ jeuˬ kʼoeˇ jeuˬ-ahˇ, ciˬ tuˇ-awˇ baoˬ biꞈ-eu laꞈ kʼoeˇ, mˬ dzeˇ miˇ dzeˇ doˆ ni coeˬ-awˇ, aˬ cawˬ miˇ kʼahˬ ceh geuꞈ tehꞈ-a.

⁷ Dzawˬ dui dui-eu tsawˇ jeuˬ kʼoeˇ jeuˬ, miˇ kʼahˬ dawˬ tawˆ laˆ guˆ jiˇ-awˇ, nui ma huiˬ-eu mahˇ-eu mehˬ shi, maˬ mˇ kʼmˬ-eu jeˬ maˬ baw-a.

⁸ “Aˬ yawꞈ maꞈ-euˬ dziˬ mahˬ kʼoeˇ deuˬ, kʼaˬ zuiˬ naˆ maˬ tseˇ kawˇ dzehˬ-awˇ, uˬ ciꞈ gaˆ-eu kʼaˬ yehˇ maˬ tseˇ, guˆ laˇ paˬ-ehˇ gʼeh-eu uˬ taꞈ, gaˇ mahˇ kaˬ gaˇ neh coeˬ leꞈ-euˬ, mahˬ dziˬ kʼehˬ jiˇ jahˇ gʼeh haw-eu, kʼaˬ dzeˇ byoeˇ leꞈ-eu naˆ maˬ tseˇ, mahˬ pyehˬ teh kawˇ dui dui-eu meh.

⁹ “Haiˬ-eu gʼeh-eu aˇ dzehˬ dzeuˇ-awˇ, miˇ tsaˬ zaˬ laˇ baˇ-iˇ-eu meh. Kaˇ shuiꞈ tawˆ bymˇ taˬ-euˬ loꞈ-ehˇ, tsawˇ haˬ nyehꞈ uiˬ paꞈ uiˬ-eu meh.

¹⁰ Sahˬ paˬ deuˬ-ahˇ aˬ jaꞈ jaꞈ-awˇ, sahˬ ma deuˬ-ahˇ naˬ gʼa-eu meh. Taˆ tsoˆ ziꞈ taˬ-euˬ gaˇ uiˇ-awˇ, miˇ tsaˬ ciˬ goˇ daˆ keuˆ leꞈ-awˇ, deuˆ byoˆ deuˆ laˆ jiˇ nehˬ-eu meh.

¹¹ Kʼoeˇ naˇ, jaˬ lehˇ baw-eu loꞈ-ehˇ, mehˬ hu paw iˇ byoˆ gʼeh-eu meh. Aˬ yawꞈ maꞈ gʼoe-eu miˬyehˇ-aˬ, aˬ yawꞈ maꞈ-euˬ baoˬ kʼoeˇ tehꞈ meh.”

Haˬbaˬkuˆ nui ma cawˆ-eu

¹² Mˬ ga miˇ seu dahˬ beh ngeh neh, Sahˬpaˬ Miˬyehˇ nawˇ Miˬyehˇ meh. Ngaˬ-euˬ Miˬyehˇ Yaw shawˇ Gʼaˬ-oˇ, nga maꞈ bi shiˇ-eu gʼeh te loˇ. Nga maꞈ-ahˇ yaˇ kʼaˬ bi daˇ-awˇ, bi muiˬ bi shawˇ laˇ-eu gʼaˇ duˬ, Baˬbuˇloˬ-ahˇ nawˇ tseˇ doˆ-awˇ, baoˬ tiˬ byah ni biꞈ taˬ teˬ loˇ.

¹³ Nawˬ-euˬ myaˆ nuiˆ shawˇ dui dui-awˇ, yaw lehˬ mˇ gaˇ maˬ haw nahˇ kʼawꞈ, haiˬ-eu deuˬ yaw doeˇ mˇ dehˆ-awˇ, tsawˇ muiˬ deuˬ bi myoꞈ ahˇ jiˇ gaˇ, aˬ jeˬ gʼeh haw haw-ehˇ jawˇ te.

¹⁴ Uˆ lahˇ nehˬ-eu gʼaˬ maˬ jawˇ-eu, laˆ shaˆ ngaˬ shaˬ ngaˬ deˇ hawˇ-eu, aˬ jeˬ lu jeˬ aˇ mawˇ loꞈ-ehˇ, tsawˇ haˬ-ahˇ nawˇ sawˇ luꞈ te loˇ.

¹⁵ Aˇ gah gʼaˬ ngaˬ juiꞈ ka paꞈ-awˇ, za dzeh pymˬ-awˇ nyehꞈ doˆ jiˇ-awˇ, laˬ kʼaˬ cehˇ-eu maˬ ngeuˇ nga loˇ.

¹⁶ Za baˬ da neh smˇ muiˬ muiˬ-awˇ, yaw kuiˇ ya dzaˬ dehˆ-eu miˇ neh, za-ahˇ aˬ yawꞈ uˬ duˬ tahˬ-awˇ, lawˇ-eu shehˇ-eu jeˬ mˇ-euˬ meh.

¹⁷ Za kʼoeˇ aˬ yawꞈ paˇ byuˬ kʼaˇ-awˇ, miˇ kʼahˬ tsawˇ jeuˬ dawˬ tawˆ luꞈ-ahˇ, gʼawˬ shaˬ tiˬ pawꞈ-iˬ maˬ gaˬ ni, laˆ byoˆ leꞈ-eu lehˇ gʼeh ta loˇ.