Gawˇlawˇsehˇ 4 - Akha

¹ Baw leˬ deuˬ-oˇ, yawˬ ha-euˬ zaˬ kʼaˆ deuˬ-ahˇ yawˬ tsaˬ yaw dawˇ dawˇ-ehˇ haw nehˬ-awˬ. Naw maꞈ kʼawꞈ, mˬ kʼoeˇ taˆ naw maꞈ-euˬ Baw leˬ jawˇ ma lehˇ nui ma laꞈ kʼoeˇ noeˬ taˬ-awˬ.

Mehˬ-eu tsoˆ-eu dawˬ

² Aˬ myah luꞈ maˬ tsehˆ leˇ ni guiˬ lahˬ shaˇ-awˬ. Naw maꞈ guiˬ lahˬ shaˇ ngeh, Miˬyehˇ-euˬ guiˬ lahˬ-ahˇ ja ceuˬ ja ceuˬ-ehˇ, yaw beuˇ beuˇ-ehˇ shaˇ-awˬ.

³ Ka li-euˬ gaˇ kawˆ zaꞈ taˬ-euˬ jeˬ-ahˇ taꞈ-eu Miˬyehˇ dawˬ kawˬ nga maꞈ mehˬ ngeh, laˆ tsoeˬ-eu jeˬ maˬ jaˆ-ehˇ ya mehˬ ni Miˬyehˇ caw ba nehˬ laꞈ-eu gʼaˇ duˬ noeˬ keuˆ-awˇ guiˬ lahˬ shaˇ nehˬ laꞈ-awˬ. Aˬ jeˬ miˇ neh ehˇ naˇ, ngaˇ Miˬyehˇ dawˬ kawˬ mehˬ-euˬ miˇ neh nymˬ-mˇ tawˬ-ahˇ ya uˇ luꞈ-eu ma.

⁴ Kʼoeˇ miˇ neh, ngaˇ ya ngehˬ paˬ-ehˇ gʼeh-eu dawˬ kʼoeˇ deuˬ-ahˇ, aˬ cawˬ gʼoˆ shaw nya ni shawˇ jehˆ ni mehˬ nehˬ nya-eu gʼaˇ duˬ guiˬ lahˬ caw shaˇ nehˬ laꞈ-awˬ.

⁵ Ka li-ahˇ maˬ jah-eu tsawˇ haˬ deuˬ-euˬ mehˬ shi zaˬ siˬ tsawˇ gahˇ ahˇ-eu tsawˇ haˬ loꞈ-ehˇ dehꞈ-awˬ. Aˇ yamˬ kʼaˇ tsaˬ laˇ ngeh, yawˬ ha jah-eu tsawˇ haˬ pyeuꞈ-eu gaˇ kawˆ aˬ cawˬ-ahˇ bi siˬ bi mawˇ-awˬ.

⁶ Naw maꞈ neh ngehˬ-euˬ dawˬ deuˬ-aˬ, aˬ cawˬ-euˬ nui ma-ahˇ laˆ saˆ-awˇ, aˬ cawˬ naˇ haˬ mawꞈ-eu dawˬ deuˬ bi pyeuꞈ-awˬ. Kʼoeˇ uˬ taꞈ, tsawˇ haˬ yawˬ gʼaˬ na luꞈ-ahˇ dawˬ yaw muiˬ aˬ joˆ-ehˇ ya ngehˬ cawˬ kʼoꞈ nehˬ-eu gaˇ kawˆ siˬ nya-eu tsaˬ meh.

Aˇ saˬ saˬ-eu dawˬ

⁷ Ngaˬ-euˬ gaˇ kawˆ dawꞈ tawˆ luꞈ, Sahˬpaˬ Yeˬsuˇ-euˬ gaˇ laꞈ kʼoeˇ saˇ jaˇ ziꞈ-eu gaˇ mˇ cawˬ pyeuꞈ-eu aˬ dui-euˬ aˬ nyiˇ Duˇjiˇ naw maꞈ-ahˇ dzawˇ nehˬ laꞈ tehꞈ-a.

⁸ Kʼoeˇ miˇ neh, aˬ yawꞈ-ahˇ naw maꞈ jawˇ gaˇ ngaˇ kʼehˇ gʼeh laꞈ-eu ma. Nga maꞈ aˬ joˆ-ehˇ dehꞈ luꞈ jawˇ luꞈ-eu gaˇ kawˆ naw maꞈ-ahˇ bi dzawˇ mehˬ-awˇ, naw maꞈ laꞈ kʼaˬ bi cehˇ-eu gʼaˇ duˬ kʼehˇ gʼeh laꞈ-eu ma.

⁹ Nga maꞈ gaˬ dui dui-awˇ jah coeˇ-eu naw maꞈ-euˬ aˇ muˇ zaˬ tiˬ gʼaˬ pyeuꞈ-eu aˬ nyiˇ Awˬneˬsiˬmuˇ-ahˇ kʼawꞈ, aˬ yawꞈ nehˬ-ehˇ bi laˇ caw-eu ma. Heu gaˇ kʼaˇ pyeuꞈ luꞈ-eu yawˬ jeˬ na luꞈ aˬ nyaꞈ dzawˇ nehˬ laꞈ tehˬ-a.

¹⁰ Ngaˬ nehˬ-ehˇ tiˬ kawˆ loꞈ-ehˇ tawˬ-ahˇ uˇ luꞈ-eu Aˬliˬdaˬguˇ naw maꞈ-ahˇ dawˬ cawˬ puˬ ahˇ laꞈ-euˬ meh. Kʼoeˇ loꞈ-ehˇ duˇ ni, Baˬnaˬbaˇ-euˬ aˬ yuiꞈ aˬ nyiˇ tsaˬ-eu Maˬkuˆ kʼawꞈ, naw maꞈ-ahˇ dawˬ cawˬ puˬ ahˇ laꞈ-euˬ meh. (Maˬkuˆ laˇ naˇ, aˬ joˆ-ehˇ ya ha nehˬ-eu gaˇ kawˆ naw maꞈ-ahˇ mehˬ nehˬ gʼaˬ-euˬ ma.)

¹¹ Yuˇtuˬ lehˇ kʼawꞈ kuˇ-eu Yawˇshuˆ kʼoeˇ gʼaˬ kʼawꞈ, naw maꞈ-ahˇ dawˬ cawˬ puˬ ahˇ laꞈ-euˬ meh. Yuˇdaˆ tsawˇ haˬ laꞈ kʼoeˇ Ka li zaˬ pyeuꞈ laˇ-awˇ ngaˬ nehˬ-ehˇ tiˬ kawˆ loꞈ-ehˇ Miˬyehˇ Miˇkʼah gʼaˇ duˬ mˇ luꞈ-eu heu smˇ gʼaˬ jawˇ-eu tehꞈ ma. Aˬ yawꞈ maꞈ ngaˬ-ahˇ caw mˇ caw shaˇ nehˬ laꞈ dui dui-euˬ meh.

¹² Naw maꞈ-euˬ aˇ muˇ zaˬ tiˬ gʼaˬ pyeuꞈ-eu Yeˬsuˇ Ka li-euˬ gaˇ mˇ luꞈ-eu Iˇbaˬpaˬlaˇ kʼawꞈ, naw maꞈ-ahˇ dawˬ cawˬ puˬ ahˇ laꞈ-euˬ meh. Naw maꞈ gʼaˇ duˬ aˬ yawꞈ aˬ myah luꞈ guiˬ lahˬ shaˇ dui dui luꞈ meh. Naw maꞈ jah-eu laꞈ kʼoeˇ ziꞈ dah ni yawꞈ nya-eu gʼaˇ duˬ maˬ ehˇ, Ka li-ahˇ jah-eu paw ehˇ kʼaˇ maˬ za ni bi byah laˇ-eu gʼaˇ duˬ maˬ ehˇ, Miˬyehˇ-euˬ nui kʼahˇ-ahˇ tiˬ byah tiˬ loꞈ bi caw teh-eu gʼaˇ duˬ maˬ ehˇ, aˬ yawꞈ Miˬyehˇ-ahˇ guiˬ lahˬ shaˇ-eu maˬ tsehˆ leˇ-a.

¹³ Naw maꞈ gʼaˇ duˬ maˬ ehˇ, Lawˬdiˬciˆ meuˬ-ahˇ jawˇ-eu tsawˇ haˬ deuˬ gʼaˇ duˬ maˬ ehˇ, Heˬlaˬbawˇliˇ meuˬ-ahˇ jawˇ-eu tsawˇ haˬ deuˬ gʼaˇ duˬ maˬ ehˇ, aˬ yawꞈ aˇ naˆ ni leh jeh-awˇ gaˇ mˇ luꞈ-eu gaˇ kawˆ ngaˇ saˇ kiˇ kamˬ peuˬ ma.

¹⁴ Naˇ gawˇ laˆ saˆ-eu tsawˇ haˬ tiˬ gʼaˬ pyeuꞈ-eu aˬ dui zawˇ gaˬ-eu saˬ laˬ gʼoˬ Luˇkaꞈ hawˇ-eu Deˬmaˆ kʼawꞈ, naw maꞈ-ahˇ dawˬ cawˬ puˬ ahˇ laꞈ-euˬ meh.

¹⁵ Lawˬdiˬciˆ meuˬ-ahˇ jawˇ-eu aˬ yuiꞈ aˬ nyiˇ Ka li zaˬ deuˬ-ahˇ maˬ ehˇ, Noˬpaˇ hawˇ-eu aˬ yawꞈ-euˬ nymˇ-ahˇ tahˬ dzoeˇ-awˇ guiˬ lahˬ shaˇ-eu Ka li zaˬ aˇ muˇ-ahˇ maˬ ehˇ, nga maꞈ noeˬ mawˇ dui dui luꞈ-eu gaˇ kawˆ tiˬ poˆ tsaꞈ gaˬ nehˬ-awˬ.

¹⁶ Sahˬ boꞈ heu taꞈ-ahˇ naw maꞈ gui haw gʼaˬ ngeh, Lawˬdiˬciˆ meuˬ-ahˇ jawˇ-eu Ka li zaˬ aˇ muˇ-ahˇ kʼawꞈ, maˬ byehˇ ni tiˬ poˆ bi gui haw-awˬ. Kʼoeˇ loꞈ-ehˇ duˇ ni, Lawˬdiˬciˆ meuˬ-ahˇ jawˇ-eu aˬ yuiꞈ aˬ nyiˇ Ka li zaˬ deuˬ neh sha ha le-euˬ sahˬ boꞈ-ahˇ kʼawꞈ, maˬ byehˇ ni gui haw-awˬ.

¹⁷ Aˬgiˇpuˆ-ahˇ kʼawꞈ, “Sahˬpaˬ Yeˬsuˇ-euˬ gaˇ laꞈ kʼoeˇ nawˇ mˇ-eu gaˇ deuˬ-ahˇ yaw muiˬ paˬ-ehˇ mˇ luiˆ jiˇ-awˬ” lehˇ tiˬ poˆ tsaꞈ gaˬ nehˬ-awˬ.

¹⁸ Pawˇluˆ naw maꞈ-ahˇ dawˬ cawˬ puˬ ahˇ laꞈ-eu ma lehˇ ngaˬ-euˬ aˬ laꞈ neh boꞈ-euˬ ma. Ngaˇ shmˇ caˆ daˬ luꞈ gaˇ taˬ ngehˇ de. Miˬyehˇ-euˬ guiˬ lahˬ yaw dzahˇ naw maꞈ kʼoeˇ taˆ jaˆ luꞈ-uˇ.