Gawˇlawˇsehˇ 1 - Akha

¹ Miˬyehˇ nui ma tsaˬ-eu miˇ neh Yeˬsuˇ Ka li-euˬ gʼaˬ kʼehˇ geuꞈ luꞈ-eu ngaˇ Pawˇluˆ hawˇ-eu, aˬ dui-euˬ aˬ nyiˇ Tiˆmoˇseˬ nga nyaꞈ,

² Yeˬsuˇ Ka li laꞈ kʼoeˇ saˇ jaˇ ziꞈ-eu aˬ yuiꞈ aˬ nyiˇ Ka li zaˬ deuˬ pyeuꞈ-eu Gawˇlawˇsehˇ meuˬ-ahˇ jawˇ-eu Miˬyehˇ-euˬ tsawˇ haˬ deuˬ jawˇ gaˇ sahˬ boꞈ boꞈ ahˇ laꞈ-eu ma. Aˬ dui-euˬ Aˬda Miˬyehˇ-euˬ guiˬ lahˬ yaw dzahˇ hawˇ-eu nui saˇ oꞈ-eu jeˬ, naw maꞈ kʼoeˇ taˆ jaˆ luꞈ-uˇ.

Miˬyehˇ-euˬ guiˬ lahˬ-ahˇ ja ceuˬ-eu shaˇ dawˬ

³ Naw maꞈ gʼaˇ duˬ nga maꞈ guiˬ lahˬ kʼaˇ shaˇ ngeh, aˬ dui-euˬ Sahˬpaˬ Yeˬsuˇ Ka li-euˬ Aˬda Miˬyehˇ-euˬ guiˬ lahˬ-ahˇ ja ceuˬ-eu ma.

⁴ Aˬ jeˬ miˇ neh ehˇ naˇ, naw maꞈ Yeˬsuˇ Ka li-ahˇ jah luꞈ-eu gaˇ kawˆ hawˇ-eu, Miˬyehˇ-euˬ tsawˇ haˬ dawˬ tawˆ luꞈ-ahˇ naw maꞈ gʼoeˇ luꞈ gaˬ luꞈ-eu gaˇ kawˆ nga maꞈ ya gaˬ-euˬ ma.

⁵ Maˇ jawˆ ni gʼeh-eu Miˬyehˇ-euˬ dawˬ kawˬ pyeuꞈ-eu Laˬ kʼaˬ cehˇ-eu Guiˬ lahˬ dawˬ naw maꞈ-ahˇ mehˬ beh beh laˇ ngeh, kʼoeˇ gaˇ taꞈ leˇ-eu noeˬ tmˬ-eu jeˬ gaˇ kawˆ naw maꞈ ya gaˬ-euˬ meh. Naw maꞈ jah-eu kʼoeˇ hawˇ-eu gʼoeˇ-eu gaˬ-eu kʼoeˇ-aˬ, naw maꞈ noeˬ tmˬ-eu kʼoeˇ-euˬ laꞈ kʼoeˇ neh doˆ laˇ-euˬ meh. Naw maꞈ noeˬ tmˬ-eu kʼoeˇ-ahˇ, naw maꞈ gʼaˇ duˬ Miˬyehˇ neh mˬ kʼoeˇ taˆ jeˬ hmˬ taˬ-euˬ meh.

⁶ Miˬyehˇ-euˬ guiˬ lahˬ yaw dzahˇ gaˇ kawˆ naw maꞈ gaˬ dahˬ beh-awˇ yaw muiˬ paˬ-ehˇ ya siˬ duˬ ngeh nah neh naw maꞈ kʼoeˇ taˆ muiˬ-eu guiˬ lahˬ gʼawˬ mya jeˬ keuˆ le luꞈ-eu loꞈ-ehˇ, Laˬ kʼaˬ cehˇ-eu Guiˬ lahˬ dawˬ-aˬ, tsawˇ haˬ zaˬ kʼoeˇ taˆ muiˬ-eu guiˬ lahˬ gʼawˬ mya jeˬ maˬ tsehˆ leˇ ni bi keuˆ le luꞈ-awˇ, miˇ kʼahˬ doe ni gaˬ byah-iˇ luꞈ-eu meh.

⁷ Nga maꞈ-euˬ dah zaˇ Ka li-euˬ gaˇ-ahˇ saˇ jaˇ ziꞈ-awˇ mˇ luꞈ-eu gaˇ mˇ cawˬ Iˇbaˬpaˬlaˇ neh Miˬyehˇ gʼawˬ shaˬ gaˬ-eu guiˬ lahˬ yaw dzahˇ gaˇ kawˆ naw maꞈ-ahˇ mehˬ nehˬ-euˬ meh.

⁸ Yaw sahˇ Miˬyehˇ neh naw maꞈ-ahˇ biꞈ-euˬ gʼoeˇ-eu gaˬ-eu jeˬ gaˇ kawˆ, nga maꞈ-ahˇ aˬ yawꞈ dzawˇ nehˬ laꞈ-euˬ meh.

⁹ Kʼoeˇ miˇ neh, naw maꞈ-euˬ gaˇ kawˆ ya gaˬ-euˬ tiˬ nah neh, naw maꞈ gʼaˇ duˬ nga maꞈ guiˬ lahˬ maˬ tsehˆ leˇ ni shaˇ luꞈ-eu ma. Yaw sahˇ Miˬyehˇ neh biꞈ-euˬ zaˬ siˬ tsawˇ gahˇ hawˇ-eu noeˬ siˬ noeˬ mawˇ nya-eu jeˬ laꞈ kʼoeˇ, Miˬyehˇ-euˬ nui kʼahˇ-ahˇ siˬ nya-eu jeˬ naw maꞈ laꞈ kʼoeˇ byah laˇ ni shaˇ luꞈ-eu ma.

¹⁰ Kʼoeˇ miˇ neh, Sahˬpaˬ Yeˬsuˇ bi dehꞈ mawꞈ-eu loꞈ-ehˇ naw maꞈ dehꞈ nya laˇ-awˇ, aˬ yawꞈ nui kʼahˇ shiˇ-eu jeˬ-ahˇ naw maꞈ aˬ myah luꞈ mˇ nya laˇ tehꞈ-a. Naw maꞈ yaw dehꞈ dehꞈ-eu laꞈ kʼoeˇ yaw muiˬ jeˬ gʼawˬ mya ni doˆ laˇ-awˇ, Miˬyehˇ-ahˇ siˬ nya dzehˬ laˇ tehꞈ-a.

^11-12 Yawˬ jeˬ na luꞈ-ahˇ naw maꞈ nui ma gʼawˬ mahˇ ni taˬ-awˇ daˬ coeˇ ni, aˬ yawꞈ-euˬ yaw shehꞈ kʼahˬ sehˇ huiˬ-eu baoˬ-ahˇ neh doˆ le-euˬ gʼaˬ baˬ da neh naw maꞈ gʼaˬ kʼaˆ laˇ luꞈ-uˇ. Yaw shehꞈ-euˬ miˇ kʼahˬ laꞈ kʼoeˇ aˬ yawꞈ-euˬ tsawˇ haˬ deuˬ bi jawˇ-eu gʼaˇ duˬ lehˬ hmˬ taˬ-euˬ jawˇ duˬ-ahˇ naw maꞈ jawˇ leˇ nya ni jahˇ nehˬ laꞈ-euˬ Aˬda Miˬyehˇ-euˬ guiˬ lahˬ-ahˇ, laˬ kʼaˬ tiˬ cehˇ ja ceuˬ-awˬ.

¹³ Yaw zahˇ-euˬ baoˬ laꞈ kʼoeˇ aˬ yawꞈ aˬ dui-ahˇ ka kʼoꞈ nehˬ laꞈ-awˇ, aˬ yawꞈ-euˬ Zaˬmaˇ-euˬ miˇ kʼahˬ laꞈ kʼoeˇ aˬ dui-ahˇ sheuˬ ahˇ nehˬ laꞈ-euˬ meh.

¹⁴ Aˬ yawꞈ neh aˬ dui-ahˇ bi buˬ-iˇ laꞈ-euˬ meh. Kʼoeˇ-aˬ, aˬ dui-ahˇ iˬ baˇ pyehˬ nehˬ laꞈ-euˬ jeˬ pyeuꞈ-eu meh.

Ka li hawˇ-eu aˬ yawꞈ neh mˇ-euˬ gaˇ

¹⁵ Tsawˇ haˬ zaˬ deuˬ Ka li-ahˇ mawˇ nya-eu meh. Ka li-aˬ, maˬ mawˇ nya-eu Miˬyehˇ-ahˇ duˇ-eu meh. Ka liˬ-aˬ, kʼaˇ beh taˬ-euˬ jeˬ dawˬ tawˆ luꞈ kʼoeˇ taˆ huiˬ dzehˬ mahˇ dzehˬ-eu dehꞈ beh beh le-euˬ gʼaˬ meh.

¹⁶ Aˬ jeˬ miˇ neh ehˇ naˇ, mˬ hawˇ-eu miˇ kʼoeˇ taˆ kʼaˇ jaˆ kʼaˇ jawˇ-eu jeˬ dawˬ tawˆ luꞈ maˬ ehˇ, mawˇ nya-eu jeˬ hawˇ-eu maˬ mawˇ nya-eu jeˬ maˬ ehˇ, mˬ hawˇ-eu miˇ yawˬ kaˬ-ahˇ uˆ lahˇ-eu yaw sahˇ deuˬ pyeuꞈ-eu baoˬ deuˬ hawˇ-eu sahˬ paˬ sahˬ ma dawˬ tawˆ luꞈ maˬ ehˇ, Ka li-ahˇ gʼoe-awˇ Miˬyehˇ neh beh taˬ-euˬ meh. kʼaˇ jawˇ kʼaˇ jaˆ-eu jeˬ dawˬ tawˆ luꞈ aˬ yawꞈ-ahˇ gʼoe-eu laꞈ kʼoeˇ beh taˬ-awˇ, aˬ yawꞈ-euˬ gʼaˇ duˬ beh taˬ-euˬ meh.

¹⁷ Tiˬ jeˬ-iˬ maˬ beh mi naˆ-ehˇ Ka li dehꞈ luꞈ jawˇ luꞈ-awˇ, yawˬ jeˬ na luꞈ aˬ yawꞈ-euˬ laꞈ kʼoeˇ jawˇ duˬ dah-eu meh.

¹⁸ Aˬ yawꞈ-aˬ, aˬ yawꞈ-euˬ gʼawˇ mawˇ pyeuꞈ-eu Ka li zaˬ aˇ muˇ-euˬ uˬ duˬ pyeuꞈ-awˇ, gʼawˇ mawˇ kʼoeˇ-ahˇ yaw dehꞈ bi dehꞈ-eu gʼaˬ pyeuꞈ-eu meh. Kʼaˇ jawˇ kʼaˇ jaˆ-eu jeˬ dawˬ tawˆ luꞈ kʼoeˇ taˆ aˬ yawꞈ huiˬ dzehˬ mahˇ dzeh ni, shiˇ-euˬ gaˇ gʼoꞈ dehꞈ laˇ-euˬ dehꞈ beh beh le-euˬ gʼaˬ pyeuꞈ-eu meh.

¹⁹ Aˬ yawꞈ-euˬ laꞈ kʼoeˇ Miˬyehˇ-euˬ seuˆ dzeuꞈ aˇ gʼehˇ tiˬ byah ni bi ahˇ-eu gʼaˇ duˬ, Miˬyehˇ neh noeˬ tsehˆ taˬ-euˬ meh.

²⁰ Aˬ yawꞈ-ahˇ gʼoe-awˇ mˬ hawˇ-eu miˇ kʼoeˇ taˆ kʼaˇ jawˇ kʼaˇ jaˆ-eu jeˬ dawˬ tawˆ luꞈ Miˬyehˇ jawˇ gaˇ sheuˬ kʼoꞈ laꞈ-eu gʼaˇ duˬ, Miˬyehˇ neh noeˬ tsehˆ taˬ-euˬ meh. Aˬ yawꞈ-ahˇ laꞈ yaꞈ kʼoeˇ taˆ lawˇ nehˬ-eu laꞈ kʼoeˇ tsawˇ haˬ zaˬ Miˬyehˇ-ahˇ tsaˬ laˇ tsahˇ laˇ nya ni jahˇ-awˇ, mˬ kʼoeˇ taˆ hawˇ-eu miˇ tsaˬ kʼoeˇ taˆ kʼaˇ jawˇ kʼaˇ jaˆ-eu jeˬ dawˬ tawˆ luꞈ Miˬyehˇ jawˇ gaˇ bi sheuˬ kʼoꞈ laꞈ-euˬ meh.

²¹ Yaw beh naw maꞈ yaw haiˬ jeˬ noeˬ-euˬ mˇ-euˬ miˇ neh Miˬyehˇ nehˬ-ehˇ gaˇ mahˇ kaˬ luꞈ-awˇ, Miˬyehˇ-ahˇ muiˇ-eu tsawˇ haˬ deuˬ pyeuꞈ yaꞈ-euˬ meh.

²² Ehˇ kʼawꞈ, naw maꞈ-ahˇ muiˬ-eu shawˇ-eu laꞈ kʼoeˇ iˬ baˇ taˬ kʼaˇ maˬ za ni Miˬyehˇ mehˬ shi bi sheuˬ keuˆ gʼeh-eu gʼaˇ duˬ, aˬ yawꞈ-euˬ Zaˬmaˇ-euˬ shiˬ shaˬ jiˇ gʼawˇ mawˇ bi shiˇ dah-eu laꞈ kʼoeˇ, naw maꞈ Miˬyehˇ-ahˇ tsaˬ leˇ dzoeˇ leˇ nya ni Miˬyehˇ jahˇ-euˬ meh.

²³ Naw maꞈ jah-eu jeˬ laꞈ kʼoeˇ ziꞈ dah ni ya dehꞈ daˆ gʼeh-awˇ, Laˬ kʼaˬ cehˇ-eu Guiˬ lahˬ dawˬ ya gaˬ ngeh za taˬ-euˬ noeˬ tmˬ-eu jeˬ poˆ poˆ laˆ laˆ-ehˇ maˬ ya bi gʼeh-a. Ngaˇ Pawˇluˆ zaˬ kʼaˆ geuꞈ luꞈ-eu heu-aˬ, miˇ tsaˬ kʼoeˇ taˆ kʼaˇ jawˇ-eu tsawˇ haˬ yawˬ gʼaˬ na luꞈ-ahˇ mehˬ nehˬ-euˬ Laˬ kʼaˬ cehˇ-eu Guiˬ lahˬ dawˬ heu-euˬ gʼaˇ duˬ ma.

Ka li zaˬ aˇ muˇ gʼaˇ duˬ Pawˇluˆ zaˬ kʼaˆ geuˬ-eu

²⁴ Nymˬ-mˇ naw maꞈ gʼaˇ duˬ ngaˇ ya daˬ luꞈ-eu heu-ahˇ, ngaˇ laˬ kʼaˬ cehˇ ma. Aˬ jeˬ miˇ neh ehˇ naˇ, ngaˬ-euˬ shiˬ shaˬ jiˇ gʼawˇ mawˇ heu loꞈ-ehˇ ya daˬ luꞈ-eu heu-aˬ, Ka li aˬ yawꞈ-euˬ gʼawˇ mawˇ pyeuꞈ-eu Ka li zaˬ aˇ muˇ gʼaˇ duˬ aˬ yawꞈ ya daˬ-euˬ kʼoeˇ maˬ byah laˇ jiˇ-ehˇ jaˆ yaꞈ-euˬ deuˬ bi byah laˇ-eu gʼaˇ duˬ caw ba gaˇ duˇ-eu ma.

²⁵ Ngaˇ-aˬ, Ka li zaˬ aˇ muˇ-euˬ zaˬ kʼaˆ geuꞈ-eu gʼaˇ duˬ Miˬyehˇ neh kʼehˇ taˬ-euˬ tsawˇ haˬ ma. Naw maꞈ gʼaˇ duˬ muiˬ ni aˬ yawꞈ ngaˬ-ahˇ gaˇ heu hmˬ bi mˇ laꞈ-euˬ meh. Gaˇ heu-aˬ, aˬ yawꞈ-euˬ dawˬ tiˬ byah tiˬ loꞈ ja mehˬ-eu gʼaˇ duˬ pyeuꞈ-eu meh.

²⁶ Aˬ yawꞈ-euˬ dawˬ kʼoeˇ-aˬ, aˇ hu ba neh miˇ tsaˬ zaˬ dawˬ tawˆ luꞈ gʼaˇ duˬ zaꞈ taˬ-euˬ jeˬ pyeuꞈ-eu kʼawꞈ, nym-mˇ aˬ yawꞈ-euˬ tsawˇ haˬ deuˬ-ahˇ pah mehˬ nehˬ-euˬ meh.

²⁷ Miˬyehˇ-aˬ, aˬ yawꞈ-euˬ tsawˇ haˬ dawˬ tawˆ luꞈ gʼaˇ duˬ aˬ yawꞈ neh zaꞈ taˬ-euˬ jeˬ kʼoeˇ aˇ naˆ ni yaw shehꞈ kʼahˬ sehˇ byah-awˇ, aˇ naˆ ni zahˬ leˇ paˬ-ehˇ gʼeh-eu gaˇ kawˆ, aˬ yawꞈ-euˬ tsawˇ haˬ deuˬ-ahˇ bi siˬ bi mawˇ-eu lehˇ lehˬ hmˬ taˬ-euˬ meh. Zaꞈ taˬ-euˬ kʼoeˇ-aˬ, naw maꞈ laꞈ kʼoeˇ Ka li jawˇ-eu kʼoeˇ meh. Kʼoeˇ-aˬ, Miˬyehˇ zahˬ leˇ paˬ-ehˇ gʼeh-eu gʼaˬ pyeuꞈ-eu loꞈ-ehˇ, naw maꞈ kʼawꞈ bi pyeuꞈ laˇ-eu gʼaˇ duˬ ehˇ mawꞈ-euˬ meh.

²⁸ Kʼoeˇ miˇ neh, tsawˇ haˬ yawˬ gʼaˬ na luꞈ-ahˇ Ka li gaˇ kawˆ nga maꞈ mehˬ-eu ma. Yawˬ gʼaˬ na luꞈ-ahˇ Ka li laꞈ kʼoeˇ tsawˇ kʼaˆ kʼaˆ laˇ-euˬ tsawˇ haˬ loꞈ-ehˇ Miˬyehˇ mehˬ shi sheuˬ ha nehˬ leˇ nya-eu gʼaˇ duˬ, aˬ yawꞈ maꞈ ya mˇ-eu jeˬ hawˇ-eu ya yahˇ-eu jeˬ-ahˇ kʼaˇ siˬ kʼaˇ nya-eu loꞈ-ehˇ mehˬ-eu ma.

²⁹ Ngaˬ-euˬ laꞈ kʼoeˇ gaˇ mˇ luꞈ-eu Ka li neh biꞈ laꞈ-euˬ huiˬ dui dui-eu gʼaˬ-ahˇ gʼoe-eu laꞈ kʼoeˇ, kʼoeˇ loꞈ-ehˇ mˇ nya ni shaˬ shaˬ-ehˇ leh jeh luꞈ-eu ma.