Gaˬlaˬtiˆ 6 - Akha

¹ Aˬ yuiꞈ aˬ nyiˇ Ka li zaˬ deuˬ-oˇ, tsawˇ haˬ tiˬ gʼaˬ na mˇ lehˬ naˇ, naw maꞈ laꞈ kʼoeˇ guiˬ lahˬ saꞈ laˇ paw gʼaˬ kʼaˆ-eu deuˬ aˬ yawꞈ-ahˇ ciˬ tuˇ nehˬ-eu tsaˬ meh. Ehˇ kʼawꞈ, nui nahˬ nui yu ahˇ-eu laꞈ kʼoeˇ ciˬ tuˇ nehˬ-awˬ. Yawˬ ha kʼawꞈ, muˇ juˇ juˇ-eu mehˬ nah maˬ ya caw teh gʼeh ni yahˇ-awˬ.

² Tiˬ gʼaˬ tiˇ gʼaˬ kʼaˆ behˆ caw pi-eu laꞈ kʼoeˇ, Ka li-euˬ zahˇ dawˬ kʼoꞈ dawˬ-ahˇ mˇ byah-awˬ.

³ Tsawˇ haˬ tiˬ gʼaˬ na, tiˬ jeˬ-iˬ maˬ mˇ maˬ shaˇ nya kʼawꞈ maˬ gaˇ ma lehˇ noeˬ naˇ, yawˬ haˇ yawˬ ha jaˬ myawꞈ myawꞈ gaˇ duˇ-eu meh.

⁴ Yawˬ gʼaˬ na luꞈ yawˬ ha aˬ joˆ-ehˇ mˇ luꞈ shaˇ luꞈ-eu gaˇ kawˆ shaˇ noeˬ-eu tsaˬ meh. Yawˬ ha yaw muiˬ jeˬ mˇ-euˬ miˇ neh kʼahˬ sehˇ jehˆ mawꞈ naˇ, aˬ cawˬ neh mˇ taˬ-euˬ jeˬ-ahˇ ciˬ cehˆ maˬ cehˆ ni jehˆ-eu tsaˬ meh.

⁵ Aˬ jeˬ miˇ neh ehˇ naˇ, tsawˇ haˬ yawˬ gʼaˬ na luꞈ yawˬ ha ya pi-eu kʼaˆ behˆ yawˬ ha jaˆ meh.

⁶ Miˬyehˇ dawˬ kawˬ dzaw luꞈ-eu tsawˇ haˬ-aˬ, yawˬ ha kʼaˇ jaˆ-eu yaw muiˬ jeˬ dawˬ tawˆ luꞈ yawˬ ha-ahˇ mehˬ nehˬ laꞈ-eu gʼaˬ-ahˇ biˇ nehˬ-eu tsaˬ meh.

⁷ Naw maꞈ taˬ noeˬ lehˬ. Tsawˇ haˬ tiˬ gʼaˬ-iˬ Miˬyehˇ-ahˇ maˬ myawꞈ dzeuˇ nya-a. Yawˬ ha neh kʼaˇ sehˬ-euˬ jeˬ yawˬ ha ya yehˬ-eu meh.

⁸ Shiˬ shaˬ jiˇ nui kʼahˇ-ahˇ taꞈ-eu siˬ yoeˬ sehˬ naˇ, shiˇ-eu jeˬ ya yehˬ tehꞈ-a. Yaw sahˇ Miˬyehˇ-ahˇ taꞈ-eu siˬ yoeˬ sehˬ naˇ, mˬ maˬ maˬ byaˆ zaˇ ziˇ dehꞈ-eu jeˬ ya yehˬ tehꞈ-a.

⁹ Kʼoeˇ miˇ neh, gʼaˬ byehˆ maˬ byehˆ ni yaw muiˬ jeˬ mˇ kaˇ-euˇ. Aˬ dui nui ma maˬ cawˆ naˇ, aˇ yamˬ keuˆ laˇ ngeh ya yehˬ tehꞈ-a.

¹⁰ Kʼoeˇ miˇ neh, kʼaˇ yehꞈ laˇ ngeh tsawˇ haˬ yawˬ gʼaˬ na luꞈ-ahˇ yaw muiˬ jeˬ mˇ nehˬ kaˇ-euˇ. Jah-eu jeˬ laꞈ kʼoeˇ aˬ dui-euˬ aˬ yuiꞈ aˬ nyiˇ pyeuꞈ-eu deuˬ-ahˇ, aˬ cawˬ-ahˇ naˆ maˬ tseˇ yaw muiˬ jeˬ mˇ nehˬ kaˇ-euˇ.

Aˇ saˬ saˬ-eu dawˬ

¹¹ Ngaˬ-euˬ aˬ laꞈ neh naw maꞈ-ahˇ boꞈ nehˬ-euˬ sahˬ boꞈ aˇ mawˇ heu deuˬ aˇ naˆ ni huiˬ gaˇ haw sheˇ.

¹² Naw maꞈ-ahˇ baˆ kʼoˆ mehˬ dzaˬ bi yehˬ-eu lehˇ ciˬ tehˬ luꞈ-eu tsawˇ haˬ kʼoeˇ deuˬ-aˬ, laꞈ nyiˇ paw tehꞈ-ehˇ yaw muiˬ jahˇ geuꞈ-awˇ, kʼahˬ sehˇ jehˆ-eu tsawˇ haˬ deuˬ meh. Ka li-euˬ laꞈ yaꞈ baˬ da neh kʼehˬ-eu kʼaˆ-eu jeˬ-ahˇ maˬ ya daˬ ni, aˬ yawꞈ maꞈ kʼoeˇ loꞈ-ehˇ mˇ nya-eu jeˬ pyeuꞈ-eu meh.

¹³ Baˆ kʼoˆ mehˬ dzaˬ yehˬ-euˬ tsawˇ haˬ deuˬ kʼawꞈ, Zahˇ dawˬ kʼoꞈ dawˬ mehˬ nah maˬ caw teh-a. Shiˬ shaˬ jiˇ gʼawˇ mawˇ-ahˇ taꞈ-eu zahˇ heu hmˬ-ahˇ naw maꞈ mˇ ni aˬ yawꞈ maꞈ jahˇ nya ma lehˇ kʼahˬ sehˇ jehˆ mawꞈ-eu miˇ neh, naw maꞈ-ahˇ baˆ kʼoˆ mehˬ dzaˬ bi yehˬ mawꞈ-eu meh.

¹⁴ Ngaˇ tehꞈ law nmˇ-aˬ, aˬ dui-euˬ Sahˬpaˬ Yeˬsuˇ Ka li-euˬ laꞈ yaꞈ gaˇ kawˆ tehꞈ-ehˇ kʼahˬ sehˇ jehˆ ma. Laꞈ yaꞈ baˬ da neh, miˇ tsaˬ heu-ahˇ taꞈ-eu jeˬ ngaˬ-euˬ gʼaˇ duˬ yaw shiˇ-ahˇ duˇ-awˇ, ngaˇ kʼawꞈ miˇ tsaˬ-ahˇ taꞈ-eu jeˬ-euˬ gʼaˇ duˬ yaw shiˇ-ahˇ duˇ-eu ma.

¹⁵ Baˆ kʼoˆ mehˬ dzaˬ yehˬ-euˬ maˬ ehˇ, maˬ yehˬ-euˬ maˬ ehˇ, huiˬ-eu gaˇ kawˆ maˬ ngeuˇ-a. Tsawˇ haˬ yaw shuiꞈ pyeuꞈ laˇ-eu tehꞈ-ehˇ huiˬ dui dui-eu gaˇ kawˆ pyeuꞈ-eu meh.

¹⁶ Yaw dehꞈ dehꞈ ngeh zahˇ sahˇ kʼoꞈ heu hmˬ mehˬ nah kʼaˇ caw teh-eu tsawˇ haˬ deuˬ kʼoeˇ taˆ, nui saˇ oꞈ-eu jeˬ hawˇ-eu Miˬyehˇ-euˬ gʼawˬ shaˬ gaˬ-eu guiˬ lahˬ jaˆ luꞈ-uˇ. Aˬ yawꞈ maꞈ hawˇ-eu Miˬyehˇ-euˬ tsawˇ haˬ dawˬ tawˆ luꞈ kʼoeˇ taˆ jaˆ luꞈ-uˇ.

¹⁷ Aˇ saˬ saˬ-eu dawˬ heu loꞈ-ehˇ ehˇ-eu ma. Iˬ nah taꞈ naˇ, tsawˇ haˬ tiˬ gʼaˬ-iˬ ngaˬ-ahˇ taˬ paˇ laˆ suˬ saˬ nehˬ laꞈ. Aˬ jeˬ miˇ neh ehˇ naˇ, ngaˬ-euˬ gʼawˇ mawˇ kʼoeˇ taˆ daˬ luꞈ-eu aˬ cawˬ neh bi kʼehˬ-euˬ maˇ byawꞈ heu deuˬ-aˬ, ngaˇ Yeˬsuˇ-euˬ zaˬ kʼaˆ meh lehˇ saˇ kiˇ kamˬ luꞈ meh.

¹⁸ Aˬ yuiꞈ aˬ nyiˇ Ka li zaˬ deuˬ-oˇ, aˬ dui-euˬ Sahˬpaˬ Yeˬsuˇ Ka li-euˬ guiˬ lahˬ yaw dzahˇ naw maꞈ kʼoeˇ taˆ jaˆ luꞈ-uˇ. Aˬ miˬ.