Gaˬlaˬtiˆ 2 - Akha

Pawˇluˆ hawˇ-eu gʼaˬ kʼehˇ nui deuˬ

¹ Tseˇ oeˬ kʼoꞈ paˇ gʼeh-awˇ, Baˬnaˬbaˆ nga nyaꞈ Tiˇtuˆ sheuˬ-awˇ Yeˬluˇsaˬlehˬ meuˬ-ahˇ paˇ iˇ-euˬ ma.

² Miˬyehˇ ngaˬ-ahˇ pah mehˬ nehˬ laꞈ-euˬ miˇ neh iˇ-euˬ ma. Aˬ yuiꞈ aˬ tsu deuˬ nehˬ-ehˇ ciˬ cuˇ ni tahˬ dzoeˇ-awˇ, Yuˇdaˆ tsawˇ haˬ maˬ ngeuˇ-eu deuˬ-ahˇ Laˬ kʼaˬ cehˇ-eu Guiˬ lahˬ dawˬ mehˬ-euˬ gaˇ kawˆ ngaˇ dzawˇ nehˬ-euˬ ma. Ngaˬ neh mˇ dzeuˇ yaꞈ-euˬ jeˬ hawˇ-eu nymˬ-mˇ mˇ luꞈ-eu jeˬ yawꞈ ngehꞈ-ehˇ maˬ bi pyeuꞈ-iˇ mawꞈ-eu miˇ neh, kʼoeˇ loꞈ-ehˇ dzawˇ nehˬ-euˬ ma.

³ Ngaˬ-euˬ gaˇ mˇ cawˬ Tiˇtuˆ-aˬ, Heˬlaˬsaˇ tsawˇ haˬ pyeuꞈ-eu meh. Ehˇ kʼawꞈ, aˬ yawꞈ-ahˇ baˆ kʼoˆ mehˬ dzaˬ ya yehˬ meh lehˇ maˬ bi ka tiˇ-aˬ.

⁴ Tiˬ paˆ na deuˬ-aˬ, aˬ yawꞈ-ahˇ baˆ kʼoˆ mehˬ dzaˬ bi yehˬ mawꞈ-eu meh. Tsawˇ haˬ kʼoeˇ deuˬ Ka li-ahˇ jah-eu tsawˇ haˬ jahˇ geuꞈ-awˇ, nga maꞈ-euˬ aˇ muˇ laꞈ kʼoeˇ uˇ kʼoeˬ laˇ-awˇ, Yeˬsuˇ Ka li laꞈ kʼoeˇ nga maꞈ Zahˇ dawˬ kʼoꞈ dawˬ dawˬ tawˆ luꞈ-ahˇ maˬ caw teh ni mˇ nya shaˇ nya-eu a kawˬ-aˬ za taˬ-euˬ gaˇ kawˆ-ahˇ kʼoeˬ sho haw laˇ-euˬ meh. Aˬ yawꞈ maꞈ-aˬ, nga maꞈ-ahˇ Zahˇ dawˬ kʼoꞈ dawˬ-euˬ zaˬ kʼaˆ bi geuꞈ mawꞈ-eu meh.

⁵ Ehˇ kʼawꞈ, Laˬ kʼaˬ cehˇ-eu Guiˬ lahˬ dawˬ-euˬ yaw tsaˬ yaw dawˇ jeˬ naw maꞈ nehˬ-ehˇ ziꞈ dah ni jaˆ nya ni, aˬ yawꞈ maꞈ-euˬ ehˇ dawˬ nga maꞈ tiˬ pawꞈ-iˬ maˬ geuꞈ nehˬ-aˬ.

⁶ Aˬ yuiꞈ aˬ tsu bi geuꞈ taˬ-euˬ tsawˇ haˬ kʼoeˇ deuˬ kʼawꞈ, ngaˬ-euˬ gʼaˇ duˬ tehꞈ law nmˇ-aˬ teu naˆ naˆ-ehˇ beu gaˇ meh lehˇ maˬ noeˬ nya. Aˬ jeˬ miˇ neh ehˇ naˇ, Miˬyehˇ-aˬ, tsawˇ haˬ zaˬ-ahˇ laꞈ nyiˇ paw tehꞈ-ehˇ haw-awˇ daˇ-eu maˬ ngeuˇ-a. Ngaˇ ehˇ-eu aˬ yuiꞈ aˬ tsu kʼoeˇ deuˬ-aˬ, ngaˬ-ahˇ nui noeˬ nui duˇ yaw shuiꞈ tiˬ jeˬ-iˬ maˬ biꞈ lahˬ laꞈ-aˬ.

⁷ Kʼoeˇ uˬ taꞈ, Yuˇdaˆ tsawˇ haˬ deuˬ-ahˇ Laˬ kʼaˬ cehˇ-eu Guiˬ lahˬ dawˬ mehˬ-eu gʼaˇ duˬ Beˬtuˆluˆ-ahˇ Miˬyehˇ neh gaˇ biꞈ taˬ-euˬ loꞈ-ehˇ, aˬ cawˬ tsawˇ jeuˬ-ahˇ Laˬ kʼaˬ cehˇ-eu Guiˬ lahˬ dawˬ mehˬ-eu gʼaˇ duˬ Miˬyehˇ neh ngaˬ-ahˇ gaˇ biꞈ taˬ-euˬ meh lehˇ aˬ yawꞈ maꞈ haw mawˇ-eu meh.

⁸ Aˬ jeˬ miˇ neh ehˇ naˇ, Beˬtuˆluˆ-ahˇ Yuˇdaˆ tsawˇ haˬ deuˬ gʼaˇ duˬ gʼaˬ kʼehˇ bi geuꞈ-euˬ loꞈ-ehˇ, ngaˬ-ahˇ kʼawꞈ aˬ cawˬ tsawˇ jeuˬ gʼaˇ duˬ gʼaˬ kʼehˇ bi geuꞈ-eu lehˇ Miˬyehˇ-euˬ baoˬ neh kʼehˇ taˬ-euˬ meh.

⁹ Aˬ yuiꞈ aˬ tsu geuꞈ luˬ-eu deuˬ pyeuꞈ-eu, Yaˬkoˆ, Beˬtuˆluˆ, Yoˇhaˬ aˬ ha maꞈ kʼawꞈ, Miˬyehˇ neh ngaˬ-ahˇ huiˬ-eu gaˇ heu hmˬ bi mˇ-euˬ meh lehˇ jah-eu meh. Kʼoeˇ miˇ neh, Baˬnaˬbaˆ nga nyaꞈ-ahˇ laꞈ tsaꞈ tsaꞈ-awˇ mˇ cawˬ shaˇ cawˬ loꞈ-ehˇ ha geuꞈ nehˬ laꞈ-euˬ meh. Baˬnaˬbaˆ nga nyaꞈ-aˬ, aˬ cawˬ tsawˇ jeuˬ jawˇ gaˇ mˇ leˇ-awˇ, aˬ yawꞈ maꞈ-aˬ, Yuˇdaˆ tsawˇ haˬ deuˬ jawˇ gaˇ gaˇ mˇ-eu gʼaˇ duˬ yawˬ gʼaˬ na luꞈ nui ma tsaˬ-euˬ ma.

¹⁰ Aˬ yawꞈ maꞈ shaˇ-eu-aˬ, aˬ yawꞈ maꞈ aˇ muˇ laꞈ kʼoeˇ shaˬ-eu zahˬ-eu tsawˇ haˬ deuˬ-ahˇ noeˬ keuˆ nehˬ laꞈ lehˇ shaˇ-eu tehꞈ meh. Gaˇ kawˆ kʼoeˇ hmˬ-ahˇ ngaˇ mˇ-eu nui ma keuˆ dui dui luꞈ ma.

Aˬdiˇawˬ meuˬ laꞈ kʼoeˇ Beˬtuˆluˆ-ahˇ Pawˇluˆ dehˬ-euˬ

¹¹ Ehˇ kʼawꞈ, Aˬdiˇawˬ meuˬ-ahˇ Beˬtuˆluˆ laˇ keuˆ ngeh, aˬ yawꞈ neh mˇ-euˬ maˬ tsaˬ-eu miˇ neh, aˬ cawˬ mehˬ shi aˬ yawꞈ-ahˇ ngaˇ dehˬ-euˬ ma.

¹² Yaˬkoˆ neh kʼehˇ gʼeh laꞈ-euˬ tsawˇ haˬ deuˬ maˬ laˇ keuˆ siˬ kʼoeˇ-aˬ, aˬ cawˬ tsawˇ jeuˬ Ka li zaˬ deuˬ nehˬ-ehˇ Beˬtuˆluˆ dzaˬ taꞈ dawˇ taꞈ-euˬ meh. Ehˇ kʼawꞈ, tsawˇ haˬ kʼoeˇ deuˬ laˇ keuˆ ngeh jawˇ, aˬ cawˬ tsawˇ jeuˬ nehˬ-ehˇ maˬ dzaˬ maˬ dawˇ taꞈ ni pyeuꞈ-iˇ-euˬ meh. Aˬ jeˬ miˇ neh ehˇ naˇ, Yuˇdaˆ tsawˇ haˬ maˬ ngeuˇ-eu deuˬ-ahˇ kʼawꞈ baˆ kʼoˆ mehˬ dzaˬ bi yehˬ mawꞈ-eu nui ma ahˇ-eu tsawˇ haˬ kʼoeˇ deuˬ-ahˇ aˬ yawꞈ guˆ-eu meh.

¹³ Yuˇ daˆ tsawˇ haˬ Ka li zaˬ nui deuˬ kʼawꞈ, nui ma baˬ-iˇ jiˇ-awˇ, Beˬtuˆluˆ kʼaˇ mˇ-eu mehˬ nah caw teh-euˬ meh. Baˬnaˬbaˆ-ahˇ keuˆ ni kʼoeˇ loꞈ-ehˇ pyeuꞈ-iˇ taˬ-euˬ meh.

¹⁴ Laˬ kʼaˬ cehˇ-eu Guiˬ lahˬ dawˬ-euˬ yaw tsaˬ yaw dawˇ jeˬ-ahˇ tsaˬ ni aˬ yawꞈ maꞈ maˬ cah-eu miˇ neh, aˬ yawꞈ maꞈ dawˬ tawˆ luꞈ-euˬ mehˬ shi Beˬtuˆluˆ-ahˇ ngaˇ heu loꞈ-ehˇ ehˇ nehˬ-euˬ ma. “Nawˇ-aˬ, Yuˇdaˆ tsawˇ haˬ pyeuꞈ-eu kʼawꞈ, Yuˇdaˆ tsawˇ haˬ loꞈ-ehˇ maˬ dehꞈ ni, aˬ cawˬ tsawˇ jeuˬ loꞈ-ehˇ dehꞈ-eu meh. Toˆ-ehˇ ngeuˇ naˇ, aˬ cawˬ tsawˇ jeuˬ deuˬ Yuˇdaˆ tsawˇ haˬ loꞈ-ehˇ dehꞈ ni nawˇ aˬ joˆ-ehˇ sheuˬ pyawˇ nya nmˇ.”

Aˬ geu jeˬ tsawˇ jeuˬ maˬ kaˬ jah-eu jeˬ baˬ da neh ka kʼoꞈ-eu jeˬ za-eu

¹⁵ Aˬ dui maꞈ-aˬ, dehꞈ le ngeh neh maˇ maˇ ni Yuˇdaˆ tsawˇ haˬ ma. Aˬ yawꞈ maꞈ ehˇ-eu loꞈ-ehˇ, “aˬ cawˬ tsawˇ jeuˬ iˬ baˇ zaˬ deuˬ” maˬ ngeuˇ.

¹⁶ Ehˇ kʼawꞈ, tsawˇ haˬ tiˬ gʼaˬ-aˬ, Zahˇ dawˬ kʼoꞈ dawˬ-ahˇ mˇ byah-eu miˇ neh maˬ ngeuˇ-ehˇ, Yeˬsuˇ Ka li-ahˇ jah-eu baˬ da neh tehꞈ-ehˇ Miˬyehˇ-ahˇ tsaˬ leˇ tsahˇ leˇ nya-eu meh lehˇ aˬ dui siˬ nya ma. Aˬ jeˬ miˇ neh ehˇ naˇ, Zahˇ dawˬ kʼoꞈ dawˬ-ahˇ mˇ byah-awˇ Miˬyehˇ-ahˇ tsaˬ leˇ tsahˇ leˇ nya-eu tsawˇ haˬ tiˬ gʼaˬ-iˬ maˬ jawˇ-a.

¹⁷ Toˆ-ehˇ ngeuˇ naˇ, Ka li laꞈ kʼoeˇ Miˬyehˇ-ahˇ aˬ dui tsaˬ leˇ tsahˇ leˇ nya ni leh jeh luꞈ ngeh, aˬ dui kʼawꞈ Yuˇdaˆ tsawˇ haˬ maˬ ngeuˇ-eu deuˬ naˆ ni iˬ baˇ zaˬ pyeuꞈ luꞈ-eu ngeuˇ naˇ, Ka li-aˬ iˬ baˇ-euˬ gʼaˇ duˬ mˇ luꞈ shaˇ luꞈ ta loˇ. Maˬ ngeuˇ-a.

¹⁸ Ngaˬ neh deh pyaˆ-euˬ Zahˇ dawˬ kʼoꞈ dawˬ-ahˇ ngaˇ paˇ gawˬ muiˬ naˇ, ngaˇ-aˬ, Zahˇ dawˬ kʼoꞈ dawˬ-ahˇ mˇ bahˬ-euˬ tsawˇ haˬ tiˬ gʼaˬ meh.

¹⁹ Ehˇ kʼawꞈ ngaˇ-aˬ, Zahˇ dawˬ kʼoꞈ dawˬ-ahˇ taꞈ leˇ-awˇ shiˇ gʼaˬ-euˬ tsawˇ haˬ ma. Miˬyehˇ-euˬ gʼaˇ duˬ dehꞈ nya ni Zahˇ dawˬ kʼoꞈ dawˬ neh bi sehꞈ-euˬ tsawˇ haˬ ma. Ngaˇ-aˬ, Ka li nehˬ-ehˇ laꞈ yaꞈ kʼoeˇ taˆ kamˇ shiˇ gʼaˬ-euˬ ma.

²⁰ Kʼoeˇ miˇ neh, ngaˇ dehꞈ luꞈ-eu heu-aˬ, ngaˇ maˬ paˇ ngeuˇ ma. Ka li ngaˬ-euˬ laꞈ kʼoeˇ dehꞈ luꞈ-eu jeˬ pyeuꞈ-eu ma. Nymˬ-mˇ ngaˇ yaw dehꞈ dehꞈ luꞈ-eu heu-aˬ, ngaˬ-ahˇ gaˬ-awˇ ngaˬ-euˬ gʼaˇ duˬ gʼawˇ mawˇ damˬ nehˬ le-euˬ Miˬyehˇ-euˬ Zaˬmaˇ-ahˇ jah-eu jeˬ laꞈ kʼoeˇ dehꞈ luꞈ-eu ma.

²¹ Miˬyehˇ gʼawˬ shaˬ gaˬ-eu guiˬ lahˬ-ahˇ ngaˇ maˬ byehˇ dzeh. Ehˇ kʼawꞈ, Zahˇ dawˬ kʼoꞈ dawˬ baˬ da neh tsawˇ haˬ zaˬ Miˬyehˇ-ahˇ tsaˬ leˇ tsahˇ leˇ nya meh lehˇ ngeuˇ naˇ, Ka li shiˇ-euˬ-aˬ, tiˬ jeˬ-iˬ gaˇ dahˇ maˬ tsoeˬ gaˇ duˇ meh.