Gaˬlaˬtiˆ 1 - Akha

¹ Gʼaˬ kʼehˇ bi geuꞈ-eu gʼaˇ duˬ tsawˇ haˬ zaˬ neh kuˇ-euˬ maˬ ngeuˇ-ehˇ, tsawˇ haˬ zaˬ neh gʼaˬ kʼehˇ ka nehˬ-euˬ kʼawꞈ maˬ ngeuˇ ni, Yeˬsuˇ Ka li hawˇ-eu aˬ yawꞈ-ahˇ bi gʼoꞈ dehꞈ laˇ-euˬ Aˬda Miˬyehˇ neh kuˇ-euˬ gʼaˬ pyeuꞈ-eu ngaˇ Pawˇluˆ hawˇ-eu

² heu gaˇ kʼaˇ jawˇ-eu aˬ yuiꞈ aˬ nyiˇ Ka li zaˬ dawˬ tawˆ luꞈ, Gaˬlaˬtiˆ miˇ kʼahˬ-ahˇ jawˇ-eu Ka li zaˬ aˇ muˇ deuˬ jawˇ ga dawˬ cawˬ puˬ ahˇ leꞈ-eu ma.

³ Aˬ dui-euˬ Aˬda Miˬyehˇ hawˇ-eu Sahˬpaˬ Yeˬsuˇ Ka li-euˬ guiˬ lahˬ yaw dzahˇ hawˇ-eu nui saˇ oꞈ-eu jeˬ, naw maꞈ kʼoeˇ taˆ keuˆ le luꞈ-uˇ.

⁴ Haiˬ dui dui-eu ziˇ heu ziˇ-ahˇ aˬ dui ya buˬ-iˇ ni aˬ dui-euˬ Aˬda Miˬyehˇ nui ma tsaˬ-eu loꞈ-ehˇ, aˬ dui-euˬ iˬ baˇ aˇ poeˬ Ka li aˬ yawꞈ-euˬ gʼawˇ mawˇ lawˇ nehˬ-euˬ meh.

⁵ Mˬ maˬ maˬ byaˆ zaˇ ziˇ Miˬyehˇ yaw shehꞈ kʼahˬ sehˇ huiˬ luꞈ-uˇ. Aˬ miˬ.

Laˬ kʼaˬ cehˇ-eu Guiˬ lahˬ dawˬ tiˬ jeˬ tehꞈ meh.

⁶ Ka li-euˬ guiˬ lahˬ yaw dzahˇ laꞈ kʼoeˇ naw maꞈ-ahˇ kuˇ-euˬ gʼaˬ-ahˇ naw maꞈ yaw awˇ laꞈ-ehˇ byehˇ dzeh-awˇ, Laˬ kʼaˬ cehˇ-eu Guiˬ lahˬ dawˬ yawˬ hmˬ yawˬ-ahˇ ha geuꞈ-eu kawˇ dui dui gaˇ ngaˇ zahˬ dui dui leˇ nya.

⁷ Maˇ maˇ ni ehˇ naˇ, Laˬ kʼaˬ cehˇ-eu Guiˬ lahˬ dawˬ yawˬ hmˬ yawˬ maˬ jaˆ-a. Ehˇ kʼawꞈ, naw maꞈ-ahˇ laˆ bahˬ-awˇ Ka li-euˬ Laˬ kʼaˬ cehˇ-eu Guiˬ lahˬ dawˬ-ahˇ yuˇ pyawˆ mawꞈ-eu tsawˇ haˬ tiˬ deuˬ jawˇ-eu miˇ neh, ngaˇ heu loꞈ-ehˇ ehˇ-eu ma.

⁸ Nga maꞈ maˬ ehˇ, mˬ taˆ gʼaˬ kʼehˇ-ahˇ keuˆ ni maˬ ehˇ, nga maꞈ neh naw maꞈ-ahˇ mehˬ-euˬ Laˬ kʼaˬ cehˇ-eu Guiˬ lahˬ dawˬ heu-ahˇ beu gaˇ-eu Laˬ kʼaˬ cehˇ-eu Guiˬ lahˬ dawˬ yawˬ hmˬ yawˬ mehˬ naˇ, kʼaˇ mehˬ-euˬ gʼaˬ kʼoeˇ taˆ yaˬ kʼehˇ yaˬ-eu jeˬ keuˆ le luꞈ-uˇ.

⁹ Yaw beh nga maꞈ neh ehˇ dzeuˇ-euˬ dawˬ-ahˇ nymˬ-mˇ ngaˇ paˇ ehˇ poˆ-eu ma. Tsawˇ haˬ tiˬ gʼaˬ na, naw maꞈ neh ha geuꞈ dzeuˇ-euˬ Laˬ kʼaˬ cehˇ-eu Guiˬ lahˬ dawˬ-ahˇ beu gaˇ-eu Laˬ kʼaˬ cehˇ-eu Guiˬ lahˬ dawˬ yawˬ hmˬ yawˬ mehˬ laˇ naˇ, aˬ yawꞈ kʼoeˇ taˆ yaˬ kʼehˇ yaˬ-eu jeˬ keuˆ le luꞈ-uˇ.

¹⁰ Tsawˇ haˬ zaˬ ngaˬ-ahˇ nui ma tsaˬ ni ngaˇ mˇ luꞈ-eu nga loˇ. Maˬ ngeuˇ. Miˬyehˇ nui ma tsaˬ-eu jeˬ-ahˇ ngaˇ mawꞈ-eu ma. Tsawˇ haˬ zaˬ nui kʼahˇ shiˇ-eu jeˬ-ahˇ ngaˇ leh jeh luꞈ-eu nga loˇ. Kʼoeˇ loꞈ-ehˇ mˇ naˇ, ngaˇ Ka li-euˬ zaˬ kʼaˆ maˬ paˇ ngeuˇ-aˇ.

Pawˇluˆ aˬ joˆ-ehˇ gʼaˬ kʼehˇ pyeuꞈ laˇ-euˬ gaˇ kawˆ

¹¹ Aˬ yuiꞈ aꞈ nyiˇ Ka li zaˬ deuˬ-oˇ, ngaˇ mehˬ luꞈ-eu Laˬ kʼaˬ cehˇ-eu Guiˬ lahˬ dawˬ heu-aˬ, tsawˇ haˬ zaˬ jawˇ gaˇ neh doˆ le-euˬ maˬ ngeuˇ-eu naw maꞈ bi siˬ nya mawꞈ miˇ-a.

¹² Tsawˇ haˬ zaˬ neh mehˬ nehˬ laꞈ-euˬ kʼawꞈ maˬ ngeuˇ-a. Yeˬsuˇ Ka li neh ngaˬ-ahˇ pah mehˬ nehˬ laꞈ-euˬ meh.

¹³ Ngaˇ Yuˇdaˆ tsawˇ haˬ uˬ duˬ tahˬ-eu zahˇ sahˇ kʼoꞈ tawˬ luꞈ ngeh aˬ joˆ-ehˇ dehꞈ yaꞈ-euˬ gaˇ kawˆ naw maꞈ-ahˇ ja mehˬ gʼaˬ-euˬ ma. Miˬyehˇ-euˬ Ka li zaˬ aˇ muˇ-ahˇ gʼawˬ shaˬ maˬ gaˬ ni kʼehˬ nehˬ kʼaˆ nehˬ-awˇ, ngaˇ kʼaˇ gʼeh nya gaˇ keuˆ ni laˆ cawˆ-eu jeˬ mˇ-euˬ ma.

¹⁴ Ngaˬ nehˬ-ehˇ aˇ kʼoꞈ tiˬ kawˆ loꞈ-ehˇ jaˆ-eu Yuˇdaˆ tsawˇ haˬ deuˬ naˆ maˬ tseˇ, Yuˇdaˆ tsawˇ haˬ uˬ duˬ tahˬ-eu zahˇ sahˇ kʼoꞈ-ahˇ ngaˇ caw teh-euˬ ma. Aˬ dui-euˬ aˬ poeˬ aˬ bawˇ deuˬ neh tawˬ ka leꞈ-euˬ deuˬ-ahˇ, aˬ yawꞈ maꞈ naˆ maˬ tseˇ ngaˇ nui ma keuˆ dui dui-euˬ ma.

¹⁵ Ehˇ kʼawꞈ, ngaˇ maˬ dehꞈ doˆ le mi naˆ-ehˇ Miˬyehˇ gʼawˬ shaˬ gaˬ-eu jeˬ neh ngaˬ-ahˇ tseˇ doˆ gʼaˬ-awˇ, aˬ yawꞈ-euˬ gaˇ bi mˇ-eu gʼaˇ duˬ ngaˬ-ahˇ kuˇ-euˬ meh.

¹⁶ Aˬ yawꞈ-euˬ gaˇ kawˆ Yuˇdaˆ tsawˇ haˬ deuˬ-ahˇ bi mehˬ-eu gʼaˇ duˬ, aˬ yawꞈ-euˬ Zaˬmaˇ neh ngaˬ-ahˇ pah mehˬ nehˬ laꞈ-euˬ meh. Tsawˇ haˬ zaˬ tiˬ gʼaˬ-ahˇ-iˬ, ngaˇ nui noeˬ nui duˇ maˬ shaˇ haw-aˬ.

¹⁷ Yeˬluˇsaˬlehˬ meuˬ-ahˇ ngaˬ-euˬ aˬ hu neh gʼaˬ kʼehˇ geuꞈ luꞈ-eu deuˬ jawˇ gaˇ kʼawꞈ, ngaˇ maˬ iˇ haw-aˬ. Tiˬ poˆ tehꞈ-ehˇ Aˬleˬbyaˇ miˇ kʼahˬ-ahˇ iˇ-awˇ, Daˬmaˬsehˇ meuˬ-ahˇ gʼoꞈ laˇ-euˬ ma.

¹⁸ Aˇ nah ba smˇ kʼoꞈ gʼeh-awˇ neh hawˇ-eu Yeˬluˇsaˬlehˬ meuˬ-ahˇ ngaˇ iˇ-awˇ, Beˬtuˆluˆ jawˇ gaˇ dawˬ deh gʼa leˇ-euˬ ma. Aˬ yawꞈ nehˬ-ehˇ tseˇ ngaˬ nah byah ni ngaˇ jawˇ-euˬ ma.

¹⁹ Sahˬpaˬ Yeˬsuˇ-euˬ aˬ nyiˇ Yaˬkoˆ maˬ ngeuˇ naˇ, gʼaˬ kʼehˇ tiˬ gʼaˬ-iˬ ngaˇ maˬ mawˇ-aˬ.

²⁰ Ngaˇ boꞈ luꞈ-eu heu-aˬ, jaˬ myawꞈ myawꞈ-eu maˬ ngeuˇ. Miˬyehˇ-euˬ mehˬ shi boꞈ-eu jeˬ pyeuꞈ-eu ma.

²¹ Kʼoeˇ naˇ, Suˇliˆ miˇ kʼahˬ hawˇ-eu Giˇliˇciˆ miˇ kʼahˬ-ahˇ ngaˇ le-euˬ ma.

²² Kʼoeˇ ngeh keuˆ ni-aˬ, Yuˇdaˆ miˇ kʼahˬ-ahˇ jawˇ-eu Ka li zaˬ aˇ muˇ deuˬ ngaˬ-ahˇ tsawˇ tsaˬ maˬ tsoˆ nya-a siˬ.

²³ “Aˬ dui maꞈ-ahˇ kʼehˬ nehˬ kʼaˆ nehˬ laꞈ-euˬ tsawˇ haˬ kʼoeˇ gʼaˬ, yaw beh aˬ yawꞈ laˆ cawˆ-eu lehˇ leh jeh-euˬ jah-eu heu-euˬ gaˇ kawˆ dawˬ mehˬ mehˬ luꞈ meh jeˇ” lehˇ, aˬ cawˬ ja-eu ya gaˬ-euˬ tehꞈ-a siˬ.

²⁴ Kʼoeˇ sawˇ miˇ tsa hawˇ-eu, ngaˬ-euˬ baˬ da neh Miˬyehˇ-euˬ yaw shehꞈ kʼahˬ sehˇ-ahˇ aˬ yawꞈ maꞈ ja ceuˬ laˇ-euˬ meh.