Gʼaˬkʼehˇ 3 - Akha

Aˬ kuiˇ yaw cawˆ tiˬ gʼaˬ-ahˇ laˆ taˬ nehˬ-euˬ

¹ Tiˬ nah-aˬ, guiˬ lahˬ shaˇ yamˬ pyeuꞈ-eu uˬ ciꞈ uˬ taw paw naˬ liˬ smˇ laꞈ kʼoeˇ yamˬ-ahˇ, Beˬtuˆluˆ hawˇ-eu Yoˇhaˬ aˬ nyaꞈ Uˬ duˬ tahˬ nymˇ nymˇ ma-ahˇ le-euˬ meh.

² Haw muiˬ dui dui-eu Lahˇ kʼehˬ lehˇ kuˇ-eu lahˇ kʼehˬ kʼoeˇ kʼehˬ-ahˇ, dehꞈ le ngeh neh aˬ kuiˇ yaw cawˆ tiˬ gʼaˬ jawˇ-eu meh. Uˬ duˬ tahˬ nymˇ nymˇ ma-ahˇ kʼaˇ laˇ-eu tsawˇ haˬ deuˬ-ahˇ pyuˇ bi shaˇ-eu gʼaˇ duˬ, yawˬ nah na luꞈ aˬ yawꞈ-ahˇ lahˇ kʼehˬ kʼoeˇ kʼehˬ-ahˇ baꞈ taˬ laˇ-eu meh.

³ Beˬtuˆluˆ hawˇ-eu Yoˇhaˬ aˬ nyaꞈ uˇ leˇ-eu lehˇ gʼeh gaˇ aˬ yawꞈ ya mawˇ ngeh, tiˬ jeˬ paˬ biꞈ laꞈ lehˇ shaˇ-euˬ meh.

⁴ Beˬtuˆluˆ hawˇ-eu Yoˇhaˬ aˬ nyaꞈ tsawˇ haˬ kʼoeˇ gʼaˬ-ahˇ haw tsoˆ taˬ-awˇ, “Nga nyaꞈ-ahˇ haw sheˇ” lehˇ, Beˬtuˆluˆ ehˇ nehˬ-euˬ meh.

⁵ Aˬ yawꞈ nyaꞈ tiˬ jeˬ paˬ biꞈ laꞈ tehꞈ-a lehˇ noeˬ-awˇ, aˬ yawꞈ haw tsoˆ taˬ-euˬ meh.

⁶ Ehˇ kʼawꞈ, Beˬtuˆluˆ ehˇ-eu, “Ngaˇ pyuˇ maˬ ahˇ. Ehˇ kʼawꞈ, ngaˇ ahˇ-eu jeˬ nawˬ-ahˇ biꞈ ma. Naˬzaˬlehˇ tsawˇ haˬ Yeˬsuˇ Ka li-euˬ tsawˇ myahˇ uˬ moˆ tuˇ-awˇ gaˇ ma cah gʼeh-awˬ lehˇ, ngaˇ nawˬ-ahˇ dawˬ biꞈ-eu ma.”

⁷ Kʼoeˇ loꞈ-ehˇ ehˇ gʼaˬ-awˇ, tsawˇ haˬ kʼoeˇ gʼaˬ-euˬ aˇ maˇ laꞈ-ahˇ nyehꞈ tehˬ-awˇ tsahˇ tuˇ nehˬ-euˬ meh. Ja pyuˬ ni tsawˇ haˬ kʼoeˇ gʼaˬ-euˬ aˬ kuiˇ pehˬ zaˬ hawˇ-eu kuiˇ myaˆ puˇ gʼaˬ ahˇ laˇ-euˬ meh.

⁸ Aˬ yawꞈ tsawˬ diˇ laˇ-awˇ, gawˬ yawꞈ yawꞈ-awˇ gaˇ ma cah-euˬ meh. Kʼoeˇ naˇ, aˬ yawꞈ tsawˬ tsawˬ-ehˇ cah-awˇ, Miˬ-ehˇ-ahˇ ja ceuˬ-eu laꞈ kʼoeˇ, aˬ yawꞈ nyaꞈ nehˬ-ehˇ Uˬ duˬtahˬ nymˇ nymˇ ma-ahˇ le-euˬ meh

⁹ Aˬ yawꞈ gaˇ ma cah-awˇ Miˬyehˇ-ahˇ ja ceuˬ luꞈ gaˇ, kʼoeˇ gaˇ jawˇ-eu tsawˇ haˬ deuˬ ya mawˇ-euˬ meh.

¹⁰ Aˬ yawꞈ-aˬ, Haw muiˬ dui dui-eu Lahˇ kʼehˬ-ahˇ nuiˇ-awˇ shaˇ dzaˬ shaˇ dawˇ luꞈ-eu kʼoeˇ gʼaˬ pyeuꞈ-eu gaˇ kawˆ aˬ yawꞈ maꞈ haw siˬ ngeh, aˬ yawꞈ kʼoeˇ loꞈ-ehˇ pyeuꞈ laˇ-euˬ gaˇ zahˬ dui dui leˇ-euˬ meh.

Uˬ duˬ tahˬ nymˇ nymˇ ma laꞈ kʼoeˇ Beˬtuˆluˆ dawˬ mehˬ mehˬ-euˬ

¹¹ Sawˇlaˬmoˬ-euˬ guiˇ ga ceuˬ lehˇ kuˇ-eu tsahˇ-ahˇ, tsawˇ haˬ kʼoeˇ gʼaˬ Beˬtuˆluˆ hawˇ-eu Yoˇhaˬ-ahˇ gʼeu tehˬ-awˇ jawˇ ngeh, aˬ cawˬ zahˬ leˇ-awˇ cehˆ gʼeh laꞈ-euˬ meh.

¹² Cehˆ gʼeh laꞈ-euˬ tsawˇ haˬ kʼoeˇ deuˬ-ahˇ Beˬtuˆluˆ mawˇ ngeh, heu loꞈ-ehˇ ehˇ nehˬ-euˬ meh. “Aˬ yuiꞈ aˬ nyiˇ Iˇsaˬleˬlaˆ tsawˇ haˬ deuˬ-oˇ, aˬ jeˬ miˇ neh gaˇ kawˆ heu-ahˇ zahˬ leˇ-awˇ nga nyaꞈ-ahˇ haw te. Nga nyaꞈ-euˬ baoˬ hawˇ-eu nga nyaꞈ muiˬ-eu shawˇ-eu baˬ da neh tsawˇ haˬ heu gʼaˬ gaˇ ma cah nya laˇ ni jahˇ nehˬ nya-eu ngaˇ lehˇ naw maꞈ noeˬ te loˇ.

¹³ Aˬbyaˬhaˬ, Iˇtsaˆ hawˇ-eu Yaˬkoˆ-euˬ Miˬyehˇ pyeuꞈ-eu aˬ dui maꞈ-euˬ aˬ poeˬ aˬ bawˇ deuˬ-euˬ Miˬyehˇ neh, a yawꞈ-euˬ Zaˬ kʼaˆ Yeˬsuˇ-ahˇ muiˬ-eu shawˇ-eu yaw shehꞈ kʼahˬ sehˇ biꞈ nehˬ-euˬ meh. Ehˇ kʼawꞈ, aˬ yawꞈ-ahˇ miˇ kʼahˬ sahˬ paˬ sahˬ ma deuˬ-euˬ aˬ laꞈ laꞈ kʼoeˇ naw maꞈ a nehˬ-awˇ, aˬ yawꞈ-ahˇ pyehˬ nehˬ-eu gʼaˇ duˬ sahˬ paˬ Piˇlaˆ noeˬ tsehˆ gʼaˬ-euˬ kʼawꞈ, sahˬ paˬ Piˇlaˆ mehˬ shi aˬ yawꞈ-ahˇ naw maꞈ iˬ baˆ poˆ-euˬ meh.

¹⁴ Aˬ yawꞈ-aˬ, muiˬ-eu shawˇ-eu yaw tsaˬ yaw dawˇ tsawˇ haˬ meh. Ehˇ kʼawꞈ, naw maꞈ aˬ yawꞈ-ahˇ byehˇ dzeh-awˇ, aˬ yawꞈ-euˬ dah zaˇ aˬ cawˬ-ahˇ sehꞈ-euˬ tsawˇ haˬ tiˬ gʼaˬ-ahˇ pyehˬ nehˬ-awˬ lehˇ, sahˬ paˬ Piˇlaˆ-ahˇ naw maꞈ shaˇ-euˬ meh.

¹⁵ Dehꞈ-eu gaˇ ma sheuˬ mehˬ-eu gʼaˬ-ahˇ naw maꞈ sehꞈ-euˬ meh. Ehˇkʼawꞈ, Miˬyehˇ neh aˬ yawꞈ-ahˇ paˇ bi gʼoꞈ dehꞈ laˇ-euˬ meh. Nga nyaꞈ siˬ duˬ mawˇ duˬ-euˬ ma.

¹⁶ Kuiˇ cawˆ heu gʼaˬ aˬ yawꞈ tsawˇ myahˇ-euˬ baoˬ baˬ da neh gʼaˬ paˇ ahˇ laˇ-euˬ meh. Naw maꞈ ya siˬ ya mawˇ-euˬ gaˇ kawˆ heu-aˬ, aˬ yawꞈ-euˬ tsawˇ myahˇ-ahˇ jah-eu jeˬ baˬ da neh pyeuꞈ laˇ-euˬ meh. Naw maꞈ mawˇ luꞈ-eu loꞈ-ehˇ, tsawˇ haˬ heu gʼaˬ muiˬ laˇ-euˬ-aˬ, Yeˬsuˇ-ahˇ jah-eu jeˬ baˬ da neh meh.

¹⁷ “Aˬ yuiꞈ aˬ nyiˇ deuˬ-oˇ, naw maꞈ hawˇ-eu naw maꞈ-euˬ aˬ yuiꞈ aˬ tsu deuˬ neh Yeˬsuˇ-ahˇ jahˇ nehˬ-euˬ heu-aˬ, naw maꞈ maˬ siˬ nya-eu miˇ neh meh lehˇ ngaˇ siˬ duˬ ma.

¹⁸ Kʼehˬ-eu kʼaˆ-eu jeˬ-ahˇ Ka li ya daˬ-euˬ gaˇ kawˆ, Miˬyehˇ gʼaˇ duˬ ngehˬ dah-eu deuˬ-ahˇ gʼoe-awˇ aˇ hu ba neh Miˬyehˇ neh ehˇ taˬ-euˬ jaˆ-eu loꞈ-ehˇ, dawˬ kʼoeˇ dawˬ byah laˇ ni Miˬyehˇ heu loꞈ-ehˇ bi pyeuꞈ laˇ-euˬ meh.

¹⁹ Naw maꞈ-euˬ iˬ baˇ bi pyehˬ nehˬ-eu gʼaˇ duˬ, iˬ baˇ noeˬ poˆ-awˇ Miˬyehˇ jawˇ paw gʼoꞈ kʼoꞈ laˇ-awˬ. Naw maꞈ kʼoeˇ loꞈ-ehˇ jahˇ naˇ,

²⁰ guiˬ lahˬ saꞈ laˇ gʼaˬ byah-eu aˇ yamˬ Sahˬpaˬ Miˬyehˇ biꞈ leꞈ-awˇ, naw maꞈ gʼaˇ duˬ Miˬyehˇ neh tseˇ doˆ taˬ-euˬ Ka li pyeuꞈ-eu Yeˬsuˇ-ahˇ, aˬ yawꞈ pyehˬ gʼeh leꞈ tehꞈ-a.

²¹ Muiˬ-eu shawˇ-eu Yaw sahˇ Miˬyehˇ gʼaˇ duˬ ngehˬ dah-eu deuˬ-ahˇ gʼoe-awˇ yawˬ jeˬ na luꞈ yaw shuiꞈ beˬ paˇ jiˇ-eu aˇ yamˬ maˬ keuˆ laˇ kʼoeˇ keuˆ ni, mˬ kʼoeˇ taˆ aˬ yawꞈ ya jawˇ tawˬ meh.

²² Aˬ jeˬ miˇ neh ehˇ naˇ, Moˇseˬ neh heu loꞈ-ehˇ ehˇ taˬ-euˬ jaˆ-eu meh. ‘Naw maꞈ-euˬ Miˬyehˇ pyeuꞈ-eu SahˬpaˬMiˬyehˇ-aˬ, ngaˬ-ahˇ kʼehˇ gʼeh leꞈ-euˬ loꞈ-ehˇ, naw maꞈ jawˇ gaˇ Miˬyehˇ gʼaˇ duˬ ngeh dah-eu tiˬ gʼaˬ kʼehˇ gʼeh leꞈ tehꞈ-a. Aˬ yawꞈ-aˬ, naw maꞈ-euˬ aˇ jeuˬ aˇ ca pyeuꞈ-awˇ, aˬ yawꞈ kʼaˇ ehˇ-eu jeˬ naw maꞈ ya naˇ haˬ geuꞈ tehꞈ-a.

²³ Miˬyehˇ gʼaˇ duˬ ngehˬ dah-eu kʼoeˇ gʼaˬ-euˬ ehˇ dawˬ maˬ kʼaˇ naˇ haˬ-eu aˬ geu gʼaˬ maˬ kaˬ, Miˬyehˇ-euˬ tsawˇ haˬ laꞈ kʼoeˇ bi sawˇ dzeh-awˇ, laˆ luˬ laˆ seˇ nehˬ gaˇ ya daˬ tehꞈ-a’ lehˇ ehˇ taˬ-euˬ meh.

²⁴ Saˬmeuˬlaˆ-euˬ ziˇ-ahˇ neh naˇ, Miˬyehˇ gʼaˇ duˬ kʼaˇ ngehˬ dah ka leꞈ-euˬ yawˬ gʼaˬ na luꞈ, iˬ nah aˇ yamˬ heu laꞈ kʼoeˇ pyeuꞈ laˇ luꞈ-eu gaˇ kawˆ ehˇ taˬ yaꞈ-euˬ jaˆ-eu meh.

²⁵ Miˬyehˇ neh aˬ yawꞈ gʼaˇ duˬ ngehˬ dah-eu deuˬ-ahˇ gʼoe-awˇ saˇ jaˇ dzaˬ taˬ-euˬ-aˬ, naw maꞈ gʼaˇ duˬ pyeuꞈ-awˇ, naw maꞈ-euˬ aˬ poeˬ aˬ bawˇ deuˬ hawˇ-eu Miˬyehˇ yaw kaˬ dzaˬ taˬ-euˬ dawˬ ma saˇ jaˇ kʼoeˇ, naw maꞈ-ahˇ kʼawꞈ taꞈ-eu meh. Miˬyehˇ neh Aˬbyaˬhaˬ-ahˇ ‘Nawˬ-euˬ zaˬ nawˬ-euˬ uˆ deuˬ-ahˇ gʼoe-awˇ, miˇ tsaˬ kʼoeˇ taˆ kʼaˇ jawˇ-eu tsawˇ jeuˬ dawˬ tawˆ luꞈ-ahˇ ngaˇ guiˬ lahˬ biꞈ ma lehˇ ehˇ nehˬ-euˬ dawˬ kʼoeˇ dawˬ, naw maꞈ-ahˇ kʼawꞈ ehˇ mawꞈ-eu meh.

²⁶ Kʼoeˇ miˇ neh, naw maꞈ yawˬ gʼaˬ na luꞈ maˬ muiˬ maˬ jaˬ-eu jeˬ laꞈ kʼoeˇ maˬ paˇ dehꞈ ni iˬ baˇ bi noeˬ poˆ-awˇ guiˬ lahˬ biꞈ-eu gʼaˇ duˬ, Miˬyehˇ aˬ yawꞈ-euˬ Zaˬ kʼaˆ-ahˇ tseˇ doˆ-awˇ , naw maꞈ jawˇ gaˇ jeˬ huˬ pyehˬ gʼeh leꞈ-euˬ meh.”