Gʼaˬkʼehˇ 23 - Akha

¹ Kʼoeˇ ngeh, Baꞈ dzah-ahˇ Pawˇluˆ haw tsoˆ taˬ-awˇ ehˇ-eu, “Aˬ yuiꞈ aˬ nyiˇ deuˬ-oˇ, iˬ nah keuˆ ni Miˬyehˇ mehˬ shi ngaˇ aˬ joˆ-ehˇ dehꞈ dzeuˇ jawˇ dzeuˇ laꞈ-euˬ gaˇ kawˆ ngaˬ-euˬ nui ma laꞈ kʼoeˇ shawˇ jehˆ ni jaˆ luꞈ ma.”

² Pawˇluˆ-euˬ mehˬ boeˬ-ahˇ tehˆ-eu gʼaˇ duˬ, Pawˇluˆ-euˬ dawˬ peh yawꞈ luꞈ-eu tsawˇ haˬ deuˬ-ahˇ Piˇ ma Yaw huiˬ gʼaˬ pyeuꞈ-eu Aˬnaˬniˇ neh dawˬ biꞈ nehˬ-euˬ meh.

³ Aˬ yawꞈ-ahˇ Pawˇluˆ ehˇ nehˬ-eu, “Lu boeˬ lehꞈ pyuˇ taˬ-euˬ kaˇ pyawˇ-oˇ, nawˇ-aˬ Miˬyehˇ neh bi diˬ-eu yaw duˬ baw meh. Zahˇ dawˬ kʼoꞈ dawˬ-ahˇ gʼoe-awˇ ngaˬ-ahˇ yaˇ kʼaˬ daˇ-eu lehˇ nawˇ teu gaˇ nuiˇ luꞈ-eu jeˬ maˇ-iˬ, aˬ jeˬ miˇ neh ngaˬ-ahˇ diˬ-awˬ lehˇ kʼehˇ-awˇ Zahˇ dawˬ kʼoꞈ dawˬ-ahˇ bahˬ-eu jeˬ mˇ te.”

⁴ Pawˇluˆ-euˬ dawˬ peh yawꞈ luꞈ-eu tsawˇ haˬ tiˬ gʼaˬ ehˇ-eu, “Miˬyehˇ-euˬ Piˇ ma Yaw huiˬ gʼaˬ-ahˇ coeˬ leˇ ni nawˇ teu naˆ naˆ-ehˇ ehˇ kʼmˬ te loˇ.”

⁵ Pawˇluˆ ehˇ-eu, “Aˬ yuiꞈ aˬ nyiˇ Iˇsaˬleˬlaˆ tsawˇ haˬ deuˬ-oˇ, aˬ yawꞈ Piˇ ma Yaw huiˬ gʼaˬ pyeuꞈ-eu ngaˇ maˬ siˬ nya-aˬ. ‘Nawˬ-euˬ tsawˇ jeuˬ-ahˇ uˆ lahˇ-eu gʼaˬ-ahˇ dawˬ yaw doeˇ taˬ ngehˬ’ lehˇ, Jaˇliꞈ laꞈ kʼoeˇ boꞈ taˬ-euˬ jaˆ-eu meh.”

⁶ Uiˬ laˇ taˬ-euˬ tsawˇ haˬ deuˬ laꞈ kʼoeˇ, tiˬ paˆ deuˬ Paˬliˬsehˇ deuˬ pyeuꞈ-awˇ tiˬ paˆ deuˬ Saˬduˬgehˇ deuˬ pyeuꞈ-eu Pawˇluˆ haw siˬ ngeh, Baꞈ dzah-ahˇ teˇ saˇ yaw kʼaˆ kʼaˆ-ehˇ guˇ-awˇ heu loꞈ-ehˇ ehˇ-eu meh. “Aˬ yuiꞈ aˬ nyiˇ Iˇsaˬleˬlaˆ tsawˇ haˬ deuˬ-oˇ, ngaˇ Paˬliˬsehˇ ma. Ngaˬ da kʼawꞈ Paˬliˬsehˇ meh. Shiˇ-euˬ tsawˇ haˬ deuˬ gʼoꞈ dehꞈ laˇ tehꞈ-a lehˇ ngaˇ noeˬ tmˬ-euˬ tiˬ jeˬ baˬ da neh, aˬ cawˬ neh bi nyehꞈ-awˇ heu loꞈ-ehˇ bi naˇ haˬ gaˇ ya daˬ luꞈ-eu ma.”

⁷ Aˬ yawꞈ kʼoeˇ loꞈ-ehˇ ehˇ gʼaˬ-eu nehˬ-ehˇ, Paˬliˬsehˇ deuˬ hawˇ-eu Saˬduˬgehˇ deuˬ yaw kaˬ ja dzaˬ-awˇ, uiˬ laˇ taˬ-euˬ tsawˇ haˬ deuˬ aˇ muˇ nyiˬ muˇ paˆ-iˇ-euˬ meh.

⁸ (Aˬ jeˬ miˇ neh ehˇ naˇ, Saˬduˬgehˇ deuˬ-aˬ, shiˇ-euˬ tsawˇ haˬ gʼoꞈ dehꞈ laˇ gaˇ maˬ jah-a. Mˬ taˆ gʼaˬ kʼehˇ jawˇ meh lehˇ ehˇ gaˇ kʼawꞈ maˬ jah-a. Yaw sahˇ jawˇ meh lehˇ ehˇ-eu jeˬ-ahˇ kʼawꞈ maˬ jah-a. Ehˇ kʼawꞈ, Paˬliˬsehˇ deuˬ-aˬ, kʼoeˇ smˇ jeˬ luꞈ-ahˇ jah-eu meh.)

⁹ Paˬliˬsehˇ aˇ muˇ-ahˇ taꞈ-eu Zahˇ dawˬ kʼoꞈ dawˬ mehˬ-eu saˬ laˬ tiˬ paˆ na deuˬ tsawˬ tuˇ laˇ-awˇ ehˇ-eu, “Tsawˇ haˬ heu gʼaˬ-euˬ yaw lehˬ tiˬ jeˬ-iˬ aˬ dui maˬ mawˇ-aˬ. Yaw sahˇ neh maˬ ngeuˇ naˇ, mˬ taˆ gʼaˬ kʼehˇ neh aˬ yawꞈ-ahˇ dawˬ ngehˬ cawˬ-euˬ maˬ siˬ tawˇ.”

¹⁰ Aˬ yawꞈ maꞈ yaw kaˬ ja dzaˬ-eu kʼoeˇ aˇ dzehˬ dzeuˇ-awˇ, Pawˇluˆ-ahˇ gʼeu paˆ gʼeu shaˆ paˬ-ehˇ pyeuꞈ laˇ taˬ-euˬ miˇ neh, Loˇmaˆ guiˇ maꞈ-ahˇ uˆ lahˇ-eu yaw huiˬ yaw mahˇ kʼoeˇ gʼaˬ kʼahˬ lahˇ laˇ-euˬ meh. Kʼoeˇ miˇ neh, tsawˇ haˬ aˇ maꞈ jawˇ gaˇ iˇ ka-awˇ, Pawˇluˆ-ahˇ gʼeu doˆ laˬ-iˇ-awˇ taˆ-ahˇ sheuˬ kʼoꞈ gʼeh-eu gʼaˇ duˬ aˬ yawꞈ-euˬ yehˇ deuˬ-ahˇ dawˬ biꞈ-euˬ meh.

¹¹ Kʼoeˇ ngeh miˇ, Sahˬ paˬ Yeˬsuˇ Pawˇluˆ-euˬ dawˬ peh yawꞈ le-awˇ ehˇ-eu, “Taˬ guˆ. Yeˬluˇsaˬlehˬ meuˬ laꞈ kʼoeˇ ngaˬ-euˬ gʼaˇ duˬ nawˇ saˇ kiˇ kamˬ gʼaˬ-euˬ meh. Loˇmaˆ meuˬ laꞈ kʼoeˇ kʼawꞈ, kʼoeˇ loꞈ-ehˇ ya kamˬ meh.”

Pawˇluˆ-ahˇ sehꞈ-eu lehˇ bawˬ kʼoeˬ-eu

¹² Uˬ bya bya laˇ ngeh, Yuˇdaˆ tsawˇ haˬ tiˬ deuˬ tahˬ dzoeˇ-awˇ, Pawˇluˆ-ahˇ maˬ ya sehꞈ kʼoeˇ keuˆ ni tiˬ jeˬ-iˬ maˬ dzaˬ maˬ dawˇ ni jawˇ ma lehˇ saˇ jaˇ dzaˬ-euˬ meh.

¹³ Kʼoeˇ loꞈ-ehˇ bawˬ kʼoeˬ-euˬ tsawˇ haˬ oeˬ tseˇ gʼaˬ dzehˬ-euˬ meh.

¹⁴ Kʼoeˇ naˇ, piˇ ma aˬ yuiꞈ deuˬ hawˇ-eu aˬ yuiꞈ aˬ tsu deuˬ jawˇ gaˇ aˬ yawꞈ maꞈ iˇ-awˇ ehˇ-eu, “Pawˇluˆ-ahˇ maˬ ya sehꞈ kʼoeˇ keuˆ ni tiˬ jeˬ-iˬ maˬ dzaˬ maˬ dawˇ ni jawˇ ma nga maꞈ tiˬ kawˆ loꞈ-ehˇ saˇ jaˇ dzaˬ gʼaˬ taˬ-euˬ ma.

¹⁵ Nymˬ-mˇ poˆ jawˇ-aˬ, Pawˇluˆ gaˇ kawˆ naw maꞈ yaw duˬ duˬ-ehˇ pyehˆ tseˇ duˬ mawꞈ nya lehˇ myahˇ-awˇ, aˬ yawꞈ-ahˇ naw maꞈ jawˇ gaˇ bi sheuˬ ha laˇ-eu gʼaˇ duˬ Loˇmaˆ guiˇ maꞈ-ahˇ uˆ lahˇ-eu yaw huiˬ yaw mahˇ kʼoeˇ gʼaˬ jawˇ gaˇ bi shaˇ leˇ-awˬ. Aˬ yawꞈ heu gaˇ maˬ ya oe keuˆ mi naˆ-ehˇ sehꞈ dzeh-eu gʼaˇ duˬ nga maꞈ lehˬ hmˬ-awˇ loꞈ ma.”

¹⁶ Aˬ yawꞈ maꞈ kʼoeˇ loꞈ-ehˇ bawˬ kʼoeˬ-euˬ gaˇ kawˆ, Pawˇluˆ-euˬ zaˬ oeˇ tiˬ gʼaˬ ya gaˬ-awˇ, taˆ-ahˇ le-awˇ Pawˇluˆ-ahˇ ehˇ nehˬ leˇ-euˬ meh.

¹⁷ Kʼoeˇ ngeh, Loˇmaˆ yehˇ kʼoeˇ taˆ aˬ yuiꞈ geuꞈ-eu tiˬ gʼaˬ-ahˇ Pawˇluˆ kuˇ-awˇ ehˇ nehˬ-eu, “Aˬ li heu gʼaˬ-ahˇ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ jawˇ gaˇ tiˬ poˆ sheuˬ ha nehˬ leˇ sheˇ. Aˬ yawꞈ dzawˇ nehˬ leˇ paˬ-ehˇ gʼeh-eu gaˇ kawˆ jaˆ te jeˇ.”

¹⁸ Yehˇ kʼoeˇ taˆ aˬ yuiꞈ geuꞈ-eu kʼoeˇ gʼaˬ, aˬ li kʼoeˇ li-ahˇ yaw huiˬ yaw mahˇ kʼoeˇ gʼaˬ jawˇ gaˇ sheuˬ gʼeh-awˇ ehˇ nehˬ-eu, “Aˬ li heu gʼaˬ nawˬ-ahˇ dzawˇ nehˬ paˬ-ehˇ gʼeh-eu gaˇ kawˆ jaˆ-eu miˇ neh, nawˇ jawˇ gaˇ tiˬ poˆ sheuˬ ha leˇ nehˬ laꞈ lehˇ tawˬ-ahˇ uˇ-eu Pawˇluˆ kʼoeˇ gʼaˬ ngaˬ-ahˇ kuˇ-awˇ ehˇ nehˬ laꞈ-euˬ meh.”

¹⁹ Yaw huiˬ yaw mahˇ kʼoeˇ gʼaˬ aˬ li kʼoeˇ li-euˬ aˬ laꞈ-ahˇ tsahˇ-awˇ, baˇ zaꞈ-ahˇ iˇ-awˇ ehˇ-eu, “Nawˇ ngaˬ-ahˇ aˬ jeˬ dzawˇ nehˬ mawꞈ-eu jaˆ te.”

²⁰ Aˬ li kʼoeˇ li ehˇ-eu, “Pawˇluˆ-euˬ gaˇ kawˆ yaw muiˬ paˬ-ehˇ ya siˬ duˬ ni Baꞈ dzah mehˬ shi pyehˆ tseˇ haw mawꞈ nya lehˇ myahˇ-awˇ, Pawˇluˆ-ahˇ Baꞈ dzah-ahˇ bi sheuˬ ha le-eu gʼaˇ duˬ ni shawˬ nah nawˬ-ahˇ bi shaˇ laˇ-eu lehˇ Yuˇdaˆ tsawˇ haˬ aˬ yuiꞈ aˬ tsu deuˬ bawˬ dzaˬ tsaˬ taˬ-euˬ meh.

²¹ Ehˇ kʼawꞈ, aˬ yawꞈ maꞈ ehˇ gaˇ taˬ naˇ haˬ. Aˬ jeˬ miˇ neh ehˇ naˇ, tsawˇ haˬ oeˬ tseˇ gʼaˬ dzehˬ ni dzuˇ zaꞈ-awˇ loꞈ luꞈ-eu meh. Pawˇluˆ-ahˇ maˬ ya sehꞈ kʼoeˇ keuˆ ni tiˬ jeˬ-iˬ maˬ dzaˬ maˬ dawˇ ni jawˇ ma lehˇ aˬ yawꞈ maꞈ saˇ jaˇ dzaˬ tsehˆ taˬ-euˬ meh. Nymˬ-mˇ aˬ yawꞈ maꞈ lehˬ hmˬ dah jiˇ taˬ-awˇ nawˬ neh ngehˬ tsehˆ ehˇ tsehˆ-euˬ dawˬ-ahˇ loꞈ luꞈ-eu tehꞈ meh.”

²² Kʼoeˇ ngeh, yaw huiˬ yaw mahˇ kʼoeˇ gʼaˬ ehˇ-eu, “Nawˇ ngaˬ-ahˇ heu loꞈ-ehˇ dzawˇ nehˬ laˇ-euˬ gaˇ kawˆ aˬ cawˬ tiˬ gʼaˬ-iˬ taˬ bi siˬ de.” Kʼoeˇ naˇ, aˬ li kʼoeˇ li-ahˇ bi gʼoꞈ-iˇ-euˬ meh.

Pawˇluˆ-ahˇ Sahˬ paˬ Peˬliˇ jawˇ gaˇ bi sheuˬ ha-iˇ-euˬ

²³ Kʼoeˇ ngeh, Loˇmaˆ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ kʼoeˇ gʼaˬ, aˬ yawꞈ-euˬ yehˇ deuˬ kʼoeˇ taˆ aˬ yuiꞈ bi geuꞈ-eu nyiˬ gʼaˬ-ahˇ kuˇ-awˇ ehˇ nehˬ-eu, “Yehˇ nyiˬ yaˇ gʼaˬ, mahˬ dziˬ-eu yehˇ shiꞈ tseˇ gʼaˬ hawˇ-eu, gahˬ baꞈ-eu yehˇ nyiˬ yaˇ gʼaˬ lehˬ hmˬ-awˇ, nymˇ ciꞈ naˬ liˬ gʼoeˬ laꞈ-ahˇ Gehˇsaˬliˇ meuˬ-ahˇ iˇ-eu gʼaˇ duˬ lehˬ hmˬ dah taˬ-awˬ.

²⁴ Pawˇluˆ bi dziˬ-eu mahˬ kʼawꞈ lehˬ hmˬ nehˬ-awˇ, sahˬ paˬ Peˬliˇ jawˇ gaˇ yaw muiˬ paˬ-ehˇ sheuˬ keuˆ na nehˬ-iˇ-awˬ.”

²⁵ Yaw huiˬ yaw mahˇ kʼoeˇ gʼaˬ sahˬ paˬ Peˬliˇ-ahˇ heu loꞈ-ehˇ sahˬ boꞈ boꞈ ahˇ gʼeh-euˬ meh.

²⁶ “Huiˬ-eu mahˇ-eu sahˬ paˬ Peˬliˇ jawˇ gaˇ, ngaˇ Gaˬlawˇdiˇ Luˇsiˆ sahˬ boꞈ boꞈ-awˇ dawˬ cawˬ puˬ ahˇ leꞈ-eu ma.

²⁷ Yuˇdaˆ tsawˇ haˬ deuˬ tsawˇ haˬ heu gʼaˬ-ahˇ nyehꞈ-awˇ sehꞈ-eu lehˇ gʼeh-eu meh. Aˬ yawꞈ Loˇmaˆ miˇ kʼahˬ zaˬ pyeuꞈ-eu gaˇ kawˆ ngaˇ ya siˬ-euˬ miˇ neh, ngaˬ-euˬ yehˇ deuˬ nehˬ-ehˇ iˇ-awˇ ka kʼoꞈ laˬ-iˇ-euˬ ma.

²⁸ Aˬ yawꞈ maꞈ aˬ yawꞈ-ahˇ aˬ jeˬ iˬ baˇ taˬ kʼaˇ za-eu nga lehˇ ngaˇ siˬ duˬ mawꞈ-eu miˇ neh, aˬ yawꞈ-ahˇ aˬ yawꞈ maꞈ-euˬ Baꞈ dzah-ahˇ sheuˬ gʼeh-euˬ ma.

²⁹ Aˬ yawꞈ-ahˇ sehꞈ paˬ-ehˇ maˬ ehˇ, tawˬ-ahˇ dawˆ paˬ-ehˇ maˬ ehˇ, aˬ yawꞈ neh mˇ-euˬ yaw lehˬ tiˬ jeˬ-iˬ ngaˇ maˬ mawˇ-aˬ. Aˬ yawꞈ-ahˇ iˬ baˇ taˬ-eu gaˇ kawˆ-aˬ, aˬ yawꞈ maꞈ-euˬ zahˇ dawˬ kʼoꞈ dawˬ-ahˇ taꞈ leˇ-eu gaˇ kawˆ tehꞈ meh.

³⁰ Aˬ yawꞈ-ahˇ aˬ cawˬ sehꞈ kʼoeˬ-eu lehˇ gʼeh-eu ngaˇ ya siˬ ngeh, tiˬ poˆ tehꞈ-ehˇ nawˇ jawˇ gaˇ bi sheuˬ ha le-eu gʼaˇ duˬ noeˬ tsehˆ-euˬ ma. Aˬ yawꞈ-ahˇ yaˇ kʼaˬ ja mawꞈ-eu tsawˇ haˬ deuˬ nawˬ-euˬ mehˬ shi ja-iˇ-awˬ lehˇ ngaˇ ehˇ nehˬ-euˬ ma.”

³¹ Yehˇ kʼoeˇ deuˬ-aˬ, aˬ yawꞈ maꞈ-ahˇ dawˬ biꞈ taˬ-euˬ loꞈ-ehˇ mˇ-euˬ meh. Aˬ yawꞈ maꞈ Pawˇluˆ-ahˇ sheuˬ-awˇ, uˬ ciꞈ kʼoeˇ miˇ laꞈ kʼoeˇ Aˬdiˇbaˬliˇ meuˬ-ahˇ keuˆ ni sheuˬ keuˆ gʼeh-euˬ meh.

³² Yawˬ nah yawˬ, kuiˇ zoˬ cah-eu yehˇ deuˬ taˆ-ahˇ gʼoꞈ-iˇ-awˇ, mahˬ dziˬ-eu yehˇ deuˬ tehꞈ-ehˇ aˬ yawꞈ-ahˇ sheuˬ ha-iˇ-euˬ meh.

³³ Aˬ yawꞈ maꞈ aˬ yawꞈ-ahˇ Gehˇsaˬliˇ meuˬ-ahˇ sheuˬ keuˆ gʼeh-awˇ, sahˬ boꞈ kʼoeˇ taꞈ sahˬ paˬ kʼoeˇ gʼaˬ-ahˇ biꞈ-awˇ, Pawˇluˆ-ahˇ kʼawꞈ aˬ yawꞈ-euˬ aˬ laꞈ laꞈ kʼoeˇ a nehˬ-euˬ meh.

³⁴ Sahˬ paˬ kʼoeˇ gʼaˬ sahˬ boꞈ kʼoeˇ taꞈ gui haw-awˇ, Pawˇluˆ-ahˇ miˇ kʼahˬ aˬ geu kʼahˬ-ahˇ jawˇ-eu gaˇ kawˆ naˇ haˬ ngeh, Giˇliˇciˆ miˇ kʼahˬ-ahˇ jawˇ-eu gaˇ kawˆ ya siˬ-euˬ meh.

³⁵ Aˬ yawꞈ ehˇ-eu, “Nawˬ-ahˇ yaˇ kʼaˬ ja mawꞈ-eu tsawˇ haˬ deuˬ oe keuˆ ngeh hawˇ-eu nawˬ-ahˇ kʼaˇ naˇ haˬ paˬ-ehˇ gʼeh-eu jeˬ naˇ haˬ ma.” Kʼoeˇ naˇ, Pawˇluˆ-ahˇ yaw muiˬ paˬ-ehˇ loꞈ-awˇ Heˬloˆ neh gawˬ taˬ yaꞈ-euˬ sahˬ paˬ-euˬ yawˇ nymˇ lahˇ laꞈ kʼoeˇ bi jawˇ-eu gʼaˇ duˬ dawˬ biꞈ-euˬ meh.