Gʼaˬkʼehˇ 21 - Akha

Pawˇluˆ Yeˬluˇsaˬlehˬ meuˬ-ahˇ iˇ-euˬ

¹ Aˬ yawꞈ maꞈ-ahˇ gʼawˬ-iˇ gʼaˬ ngeh, saˇ baoˬ dziˬ-awˇ Gawˇsaˆ iˇ jaw lahˇ-ahˇ dawˇ coe ni iˇ gʼeh-euˬ ma. Yawˬ nah yawˬ Lawˇduˆ iˇ jaw lahˇ-ahˇ iˇ keuˆ-awˇ, kʼoeˇ gaˇ neh naˇ, Baˬdaˬlaˇ meuˬ-ahˇ iˇ-euˬ ma.

² Piˇniˇshaˆ miˇ kʼahˬ-ahˇ iˇ-eu lehˇ gʼeh-eu saˇ baoˬ tiˬ laˇ-ahˇ kʼoeˇ gaˇ tahˬ puˬ-awˇ, dziˬ-awˇ iˇ gʼeh-euˬ ma.

³ Guˇbaˬluˇ iˇ jaw lahˇ-ahˇ haw mawˇ laˇ gaˇ iˇ keuˆ ngeh, laꞈ oˆ paw pyawˬ-ahˇ Suˇliˆ miˇ kʼahˬ paw iˇ-euˬ ma. Saˇ baoˬ kʼoeˇ laˇ Duˇlu meuˬ-ahˇ myawˬ baꞈ doˆ-eu miˇ neh, nga maꞈ kʼoeˇ gaˇ naˬ-euˬ ma.

⁴ Jah-eu tsawˇ haˬ tiˬ deuˬ-ahˇ kʼoeˇ gaˇ ya mawˇ-awˇ, aˬ yawꞈ maꞈ nehˬ-ehˇ tiˬ jaw jawˇ-euˬ ma. Yaw sahˇ Miˬyehˇ-ahˇ gʼoe-eu laꞈ kʼoeˇ, Pawˇluˆ-ahˇ “Yeˬluˇsaˬlehˬ meuˬ-ahˇ taˬ le” lehˇ aˬ yawꞈ maꞈ ehˇ-eu meh.

⁵ Ehˇ kʼawꞈ, nga maꞈ aˬ yawꞈ maꞈ nehˬ-ehˇ jawˇ-eu aˇ yamˬ jiˇ laˇ ngeh, mehˬ hu paw iˇ-euˬ ma. Aˬ yawꞈ maꞈ hawˇ-eu aˬ yawꞈ maꞈ-euˬ miˬ sawˇ zaˬ dawˬ tawˆ luꞈ, meuˬ-ahˇ neh iˬ ma laˆ shaˆ lawˇ deh-ahˇ keuˆ ni nga maꞈ-ahˇ sheuˬ keuˆ ha le-awˇ, nga maꞈ dawˬ tawˆ luꞈ kʼoeˇ gaˇ pawˬ tsuiꞈ pawˬ dmˬ dmˬ-awˇ guiˬ lahˬ shaˇ-euˬ ma.

⁶ Kʼoeˇ naˇ, tiˬ gʼaˬ tiˇ gʼaˬ gʼoꞈ dawˬ tsaꞈ yaꞈ-awˇ, nga maꞈ saˇ baoˬ laꞈ kʼoeˇ uˇ-iˇ ngeh, aˬ yawꞈ maꞈ iˇ kahˇ paw gʼoꞈ leˇ-euˬ meh.

⁷ Duˇlu meuˬ-ahˇ neh saˇ baoˬ dziˬ gʼeh-awˇ Baˬdawˇleˬ meuˬ-ahˇ nga maꞈ iˇ keuˆ-euˬ ma. Kʼoeˇ gaˇ jawˇ-eu jah-eu tsawˇ haˬ deuˬ-ahˇ tahˬ puˬ-awˇ, aˬ yawꞈ maꞈ nehˬ-ehˇ tiˬ nah jawˇ-euˬ ma.

⁸ Yawˬ nah yawˬ paˇ doˆ-iˇ-awˇ, Gehˇsaˬliˇ meuˬ-ahˇ iˇ keuˆ-euˬ ma. Piˇliˇpuˆ lehˇ myahˇ-euˬ Laˬ kʼaˬ cehˇ-eu Guiˬ lahˬ dawˬ mehˬ-eu gʼaˬ-euˬ nymˇ-ahˇ nga maꞈ yaꞈ-euˬ ma. Yeˬluˇsaˬlehˬ meuˬ laꞈ kʼoeˇ gaˇ bi caw mˇ-eu gʼaˇ duˬ tsawˇ haˬ shiꞈ gʼaˬ tseˇ doˆ ngeh, aˬ yawꞈ kʼawꞈ ahˇ-eu meh.

⁹ Aˬ yawꞈ-aˬ, Miˬyehˇ gʼaˇ duˬ ngehˬ dah-eu smˇ miˇ maˬ iˇ-euˬ aˬ buˇ oeˬ buˇ jawˇ-eu meh.

¹⁰ Yuˇdaˆ miˇ kʼahˬ-ahˇ jawˇ-eu Aˬgaˬbuˇ lehˇ myahˇ-euˬ Miˬyehˇ gʼaˇ duˬ ngehˬ dah-eu gʼaˬ oe keuˆ ngeh, nga maꞈ kʼoeˇ gaˇ jawˇ-eu gʼawˬ mya nah byah laˇ-euˬ ma.

¹¹ Nga maꞈ jawˇ gaˇ aˬ yawꞈ oe-awˇ, Pawˇluˆ-euˬ joꞈ paꞈ yuˇ-awˇ, aˬ yawꞈ-euˬ aˬ kuiˇ hawˇ-eu aˬ laꞈ-ahˇ paꞈ-awˇ heu loꞈ-ehˇ ehˇ-eu meh. “Joꞈ paꞈ heu kahˇ-euˬ yaw sahˇ-ahˇ Yeˬluˇsaˬlehˬ meuˬ-ahˇ jawˇ-eu Yuˇdaˆ tsawˇ haˬ deuˬ heu loꞈ-ehˇ paꞈ-awˇ, aˬ cawˬ tsawˇjeuˬ-euˬ laꞈ-ahˇ a ahˇ nehˬ tehꞈ-a lehˇ, Muiˬ-eu shawˇ-eu Yaw sahˇ Miˬyehˇ ehˇ-eu meh.”

¹² Dawˬ kʼoeˇ dawˬ-ahˇ nga maꞈ ya gaˬ ngeh, nga maꞈ hawˇ-eu kʼoeˇ gaˇ jawˇ-eu tsawˇ haˬ deuˬ Pawˇluˆ-ahˇ Yeˬluˇsaˬ lehˬ meuˬ-ahˇ taˬ iˇ lehˇ shaˇ-euˬ ma.

¹³ Ehˇ kʼawꞈ, aˬ yawꞈ ehˇ-eu, “Aˬ jeˬ miˇ neh naw maꞈ ngoeˇ ngoeˇ-ehˇ ngaˬ-euˬ nui ma tsawˬ paˆ-iˇ ni jahˇ nehˬ laꞈ te. Yeˬluˇsaˬlehˬ meuˬ-ahˇ aˬ cawˬ neh bi paꞈ-eu tehꞈ-ehˇ maˬ ngeuˇ ni, Sahˬpaˬ Yeˬsuˇ-euˬ gʼaˇ duˬ kʼoeˇ gaˇ shiˇ dah gaˇ keuˆ ni ngaˇ leh hmˬ taˬ-euˬ ma.”

¹⁴ Nga maꞈ aˬ yawꞈ-ahˇ maˬ ja pyawˇ nya-eu miˇ neh, “SahˬpaˬMiˬyehˇ nui ma tsaˬ-eu loꞈ-ehˇ pyeuꞈ laˇ luꞈ-uˇ” lehˇ ehˇ-awˇ ciˬ cuˇ ni jawˇ-euˬ ma.

¹⁵ Kʼoeˇ gaˇ ui cuiˆ gʼawˬ myahˇ ni jawˇ gʼaˬ ngeh, nga maꞈ mˇ myawˬ lehˬ hmˬ-awˇ, Yeˬluˇsaˬlehˬ meuˬ-ahˇ iˇ-euˬ ma.

¹⁶ Gehˇsaˬliˇ meuˬ-ahˇ jawˇ-eu zaˬ lahˇ tiˬ paˆ na deuˬ nga maꞈ-euˬ mehˬ nah caw teh le-awˇ, nga maꞈ yaꞈ leˇ-eu lehˇ gʼeh-eu Maˬnaˬsoˬ lehˇ myahˇ-euˬ gʼaˬ-euˬ nymˇ-ahˇ, nga maꞈ-ahˇ sheuˬ ha laˇ-euˬ meh. Aˬ yawꞈ-aˬ, Guˇbaˬluˇ iˇ jaw lahˇ-ahˇ jawˇ-euˬ tsawˇ haˬ pyeuꞈ-awˇ, jah-eu tsawˇ haˬ pyeuꞈ laˇ-euˬ myahˇ laˇ-euˬ meh.

Yaˬkoˆ jawˇ gaˇ Pawˇluˆ dawˬ deh gʼa iˇ-euˬ

¹⁷ Nga maꞈ Yeˬluˇsaˬlehˬ meuˬ-ahˇ iˇ keuˆ ngeh, jah-eu tsawˇ haˬ deuˬ nga maꞈ-ahˇ laˬ kʼaˬ tiˬ cehˇ ha geuꞈ nehˬ laꞈ-euˬ meh.

¹⁸ Yawˬ nah yawˬ, Pawˇluˆ nga maꞈ Yaˬkoˆ jawˇ gaˇ dawˬ deh gʼa-iˇ-euˬ ma. Ka li zaˬ aˇ muˇ kʼoeˇ taˆ aˬ yuiꞈ aˬ tsu geuꞈ luꞈ-eu deuˬ dawˬ tawˆ luꞈ, kʼoeˇ gaˇ uiˬ laˇ-euˬ meh.

¹⁹ Aˬ yawꞈ maꞈ-ahˇ Pawˇluˆ dawˬ cawˬ puˬ nehˬ-awˇ, aˬ yawꞈ-ahˇ gʼoe-awˇ Miˬyehˇ aˬ cawˬ-euˬ tsawˇ jeuˬ tsawˇ ca deuˬ gʼaˇ duˬ aˬ joˆ-ehˇ mˇ-euˬ shaˇ-euˬ gaˇ kawˆ, tiˬ jeˬ saˇ-iˬ tiˬ jeˬ dzawˇ nehˬ-euˬ meh.

²⁰ Aˬ yawꞈ kʼoeˇ loꞈ-ehˇ dzawˇ nehˬ gaˇ ya gaˬ ngeh, aˬ yawꞈ maꞈ dawˬ tawˆ luꞈ Miˬyehˇ-ahˇ ja ceuˬ-euˬ meh. Kʼoeˇ naˇ, Pawˇluˆ-ahˇ aˬ yawꞈ maꞈ heu loꞈ-ehˇ ehˇ nehˬ-euˬ meh. “Aˬ nyiˇ Pawˇluˆ-oˇ, jah-eu tsawˇ haˬ pyeuꞈ laˇ-euˬ Yuˇdaˆ tsawˆ haˬ aˇ myaˆ ni jawˇ-eu hawˇ-eu, aˬ yawꞈ maꞈ Zahˇ dawˬ kʼoꞈ dawˬ-ahˇ aˇ naˆ ni nui ma keuˆ luꞈ-eu nawˇ mawˇ luꞈ meh.

²¹ Aˬ cawˬ tsawˇ jeuˬ-euˬ miˇ kʼahˬ deuˬ laꞈ kʼoeˇ kʼaˇ jawˇ-eu Yuˇdaˆ tsawˇ haˬ deuˬ-ahˇ, Moˇseˬ-euˬ Zahˇ dawˬ kʼoꞈ dawˬ-ahˇ byehˇ dzeh ni nawˇ mehˬ nehˬ tsoˆ nehˬ-awˇ, aˬ yawꞈ maꞈ-euˬ zaˬ deuˬ-ahˇ baˆ kʼoˆ mehˬ dzaˬ maˬ yehˬ nehˬ-ehˇ, Yuˇdaˆ tsawˇ haˬ-euˬ zahˇ sahˇ kʼoꞈ-ahˇ maˬ caw teh ni dehꞈ-eu gʼaˇ duˬ nawˇ mehˬ luꞈ-eu gaˇ kawˆ, aˬ yawꞈ maꞈ ya gaˬ gʼaˬ-euˬ meh.

²² Nawˇ oe keuˆ-euˬ gaˇ kawˆ aˬ yawꞈ maꞈ ya gaˬ-eu yaw duˬ baw tehꞈ-a. Aˬ joˆ-ehˇ jahˇ nmˇ.

²³ Nga maꞈ nawˬ-ahˇ heu loꞈ-ehˇ bi jahˇ mawꞈ miˇ-a. Dawˬ ma saˇ jaˇ dzaˬ luꞈ-eu tsawˇ haˬ oeˬ gʼaˬ heu gaˇ jawˇ meh.

²⁴ Aˬ yawꞈ maꞈ nehˬ-ehˇ le-awˇ gʼawˇ mawˇ shawˇ-eu zahˇ jahˇ leˇ-awˬ. Aˬ yawꞈ maꞈ uˬ jehˆ jehˆ dzeh nya ni aˬ yawꞈ maꞈ gʼaˇ duˬ aˇ poeˬ biꞈ nehˬ-awˬ. Kʼoeˇloꞈ-ehˇ jahˇ naˇ, nawˬ-euˬ gaˇ kawˆ aˬ cawˬ kʼaˇ ehˇ-eu loꞈ-ehˇ maˬ ngeuˇ law hawˇ ngaˬ lehˇ yawˬ gʼaˬ na luꞈ ya siˬ duˬ-eu uˬ taꞈ, nawˇ kʼawꞈ Moˇseˬ-euˬ Zahˇ dawˬ kʼoꞈ dawˬ-ahˇ caw teh-awˇ dehꞈ luꞈ gaˇ aˬ yawꞈ maꞈ ya mawˇ tehꞈ-a.

²⁵ Ehˇ kʼawꞈ, jah-eu tsawˇ haˬ pyeuꞈ laˇ-euˬ aˬ cawˬ tsawˇ jeuˬ deuˬ-ahˇ nga maꞈ sahˬ boꞈ boꞈ ahˇ gʼeh-awˇ, tahˬ pahˬ aˬ ma mawˇ kawˇ-ahˇ lawˇ nehˬ gʼaˬ-eu dzaˇ-ahˇ aˬ yawꞈ maꞈ maˬ dzaˬ-eu gʼaˇ duˬ maˬ ehˇ, shiˬ maˬ dzaˬ-euˬ gʼaˇ duˬ maˬ ehˇ, shiˬ maˬ sehꞈ doˆ-euˬ shaˬ jiˇ maˬ dzaˬ-eu gʼaˇ duˬ maˬ ehˇ, maˬ tsaˬ maˬ dawˇ-eu kʼaˬ miˬ sheu-eu jeˬ maˬ mˇ-eu gʼaˇ duˬ maˬ ehˇ, nga maꞈ bawˬ dzaˬ tsehˆ gʼaˬ-euˬ gaˇ kawˆ ehˇ nehˬ-euˬ ma.”

²⁶ Kʼoeˇ naˇ, tsawˇ haˬ kʼoeˇ oeˬ gʼaˬ-ahˇ Pawˇluˆ kuˇ-awˇ, yawˬ nah yawˬ aˬ yawꞈ maꞈ nehˬ-ehˇ gʼawˇ mawˇ shawˇ-eu zahˇ jahˇ-euˬ meh. Uˬ duˬ tahˬ nymˇ nymˇ ma laꞈ kʼoeˇ aˬ yawꞈ uˇ leˇ-awˇ, aˬ yawꞈ maꞈ gʼawˇ mawˇ shawˇ-eu zahˇ jahˇ-eu kʼoeˇ aˇ myaˆ nah ga leˇ-eu, aˬ geu ngeh nah aˇ saˬ saˬ-eu hawˇ-eu, aˬ yawꞈ gʼaˬ yawꞈ gʼaˇ duˬ lawˇ-eu jeˬ aˬ joˆ-ehˇ lehˬ hmˬ taˬ-euˬ gaˇ kawˆ ehˇ nehˬ leˇ-euˬ meh.

Uˬ duˬ tahˬ nymˇ nymˇ ma laꞈ kʼoeˇ Pawˇluˆ-ahˇ paꞈ-euˬ

²⁷ Ehˇ kʼawꞈ, gʼawˇ mawˇ shawˇ-eu zahˇ jahˇ-eu aˇ yamˬ shiꞈ nah kʼoeˇ jiˇ-eu dawˬ peh peh laˇ ngeh, Aˬshaˆ miˆ kʼahˬ-ahˇ jawˇ-eu Yuˇdaˆ tsawˇ haˬ tiˬ paˆ na deuˬ, Uˬ duˬ tahˬ nymˇ nymˇ ma laꞈ kʼoeˇ Pawˇluˆ-ehˇ haw mawˇ-euˬ meh. Aˬ yawꞈ maꞈ tsawˇ haˬ aˇ maꞈ dawˬ tawˆ luꞈ-ahˇ laˆ luiˬ-awˇ, Pawˇluˆ-ahˇ tsuˆ tehˬ taˬ-euˬ meh.

²⁸ Aˬ yawꞈ maꞈ guˇ-awˇ ehˇ-eu, “Iˇsaˬleˬlaˆ tsawˇ haˬ deuˬ-oˇ, caw ba le-awˬ. Tsawˇ haˬ heu gʼaˬ yawˬ gaˇ na luꞈ iˇ doe-awˇ, Iˇsaˬleˬlaˆ tsawˇ haˬ maˬ ehˇ, Moˇseˬ-euˬ Zahˇ dawˬ kʼoꞈ dawˬ maˬ ehˇ, Uˬ duˬ tahˬ nymˇ nymˇ ma heu maˬ ehˇ, maˬ tsaˬ-a lehˇ mehˬ mehˬ-ehˇ cah-eu meh. Nymˬ-mˇ poˆ jawˇ-aˬ, Uˬ duˬ tahˬ nymˇ nymˇ ma laꞈ kʼoeˇ keuˆ ni aˬ cawˬ tsawˇ jeuˬ paˇ sheuˬ ahˇ laꞈ-awˇ, muiˬ-eu shawˇ-eu jawˇ duˬ-ahˇ laˆ jawꞈ laˇ-euˬ ngaˇ.”

²⁹ (Eˇpeˇsu meuˬ-ahˇ jawˇ-eu Daˬloˇbeˬ lehˇ myahˇ-euˬ tiˬ gʼaˬ Pawˇluˆ nehˬ-ehˇ meuˬ laꞈ kʼoeˇ cah luꞈ gaˇ yaw beh neh aˬ yawꞈ maꞈ mawˇ taˬ-euˬ miˇ neh, Pawˇluˆ neh aˬ yawꞈ-ahˇ Uˬ duˬ tahˬ nymˇ nymˇ ma laꞈ kʼoeˇ sheuˬ laꞈ-euˬ tehꞈ-a lehˇ noeˬ-awˇ kʼoeˇ loꞈ-ehˇ ehˇ-eu jeˬ pyeuꞈ-eu meh.)

³⁰ Meuˬ meuˬ lah-ehˇ luiˬ gʼa laˇ-awˇ, baˬ maꞈ puˇ jeˬ-ehˇ cehˆ gʼeh laꞈ-awˇ, Pawˇluˆ-ahˇ tsuˆ tehˬ-awˇ Uˬ duˬ tahˬ nymˇ nymˇ ma laꞈ nyiˇ gʼeu doˆ leꞈ-euˬ meh. Uˬ duˬ tahˬ nymˇ nymˇ ma-euˬ laˇ gʼoˆ deuˬ tiˬ poˆ tehꞈ-ehˇ piˬ tehˬ-euˬ meh.

³¹ Tsawˇ haˬ aˇ maꞈ kʼoeˇ deuˬ Pawˇluˆ-ahˇ sehꞈ-eu lehˇ leh jeh-eu meh. Kʼoeˇ ngeh, Yeˬluˇsaˬlehˬ meuˬ meuˬ lah-ehˇ luiˬ gʼa luꞈ-eu gaˇ kawˆ, Loˇmaˆ guiˇ maꞈ kʼoeˇ taˆ uˆ lahˇ-eu yaw huiˬ yaw mahˇ jawˇ gaˇ gaˬ keuˆ leˇ-euˬ meh.

³² Yaw huiˬ yaw mahˇ kʼoeˇ gʼaˬ, guiˇ maꞈ kʼoeˇ taˆ aˬ yuiꞈ bi geuꞈ-eu deuˬ hawˇ-eu yehˇ deuˬ-ahˇ sheuˬ-awˇ, tiˬ poˆ tehꞈ-ehˇ tsawˇ haˬ aˇ maꞈ uiˬ leˇ taˬ-euˬ gaˇ cehˆ gʼeh-euˬ meh. Aˬ yawꞈ yehˇ sheuˬ-awˇ oe keuˆ-euˬ gaˇ tsawˇ haˬ kʼoeˇ deuˬ ya mawˇ ngeh, Pawˇluˆ-ahˇ diˬ luꞈ-eu naˬ leˇ-euˬ meh.

³³ Yaw huiˬ yaw mahˇ kʼoeˇ gʼaˬ Pawˇluˆ jawˇ gaˇ iˇ-awˇ, aˬ yawꞈ-ahˇ nyehꞈ-awˇ shmˇ caˆ nyiˬ caˆ yuˇ-awˇ paꞈ-eu gʼaˇ duˬ dawˬ biꞈ-euˬ meh. Kʼoeˇ naˇ, “Tsawˇ haˬ heu gʼaˬ aˬ suˇ gʼaˬ-a. Aˬ yawꞈ aˬ jeˬ jahˇ taˬ” lehˇ naˇ haˬ-euˬ meh.

³⁴ Tsawˇ haˬ aˇ maꞈ kʼoeˇ maꞈ tiˬ gʼaˬ tiˬ jeˬ ehˇ ehˇ-ehˇ lawꞈ gʼa-eu miˇ neh, yaw huiˬ yaw mahˇ kʼoeˇ gʼaˬ maˬ naˇ haˬ duˬ nya-ehˇ, Pawˇluˆ-ahˇ taˆ-ahˇ sheuˬ gʼeh-eu gʼaˇ duˬ aˬ yawꞈ-euˬ tsawˇ haˬ deuˬ-ahˇ dawˬ biꞈ-euˬ meh.

³⁵ Pawˇluˆ dawˬ dzm dawˬ tehꞈ-ahˇ le keuˆ ngeh, tsawˇ haˬ aˇ maꞈ kʼoeˇ maꞈ aˬ yawꞈ-ahˇ diˬ-eu lehˇ yaw kʼaˆ-ehˇ leh jeh-eu miˇ neh, yehˇ kʼoˇ deuˬ neh aˬ yawꞈ-ahˇ ciˬ gʼeh-euˬ meh.

³⁶ Tsawˇ haˬ aˇ maꞈ kʼoeˇ maꞈ “Aˬ yawꞈ-ahˇ sehꞈ-awˬ” lehˇ guˇ guˇ-ehˇ, aˬ yawꞈ-euˬ mehˬ nah caw teh gʼeh laꞈ-euˬ meh.

Tsawˇ haˬ aˇ maꞈ-ahˇ Pawˇluˆ dawˬ ngehˬ-euˬ

³⁷ Yehˇ kʼoeˇ deuˬ Pawˇluˆ-ahˇ taˆ laꞈ kʼoeˇ sheuˬ uˇ leꞈ-eu lehˇ gʼeh ngeh, yaw mahˇ kʼoeˇ gʼaˬ-ahˇ Pawˇluˆ ehˇ nehˬ-eu, “Ngaˇ nawˬ-ahˇ dawˬ ngehˬ cawˬ mawꞈ nya.” Yaw huiˬ yaw mahˇ kʼoeˇ gʼaˬ ehˇ-eu, “Nawˇ Heˬlaˬsaˇ dawˬ siˬ nya hawˇ ngaˬ laˬ.

³⁸ Toˆ-ehˇ ngeuˇ naˇ, miˇ nah huˬ nah miˇ kʼahˬ-ahˇ puiˬ-awˇ, guiˇ deuˆ-eu keu ka baꞈ luꞈ-eu aˬ cawˬ-ahˇ sehꞈ-euˬ tsawˇ haˬ oeˬ heˇ gʼaˬ sheuˬ-awˇ bawˇ tsahˬ bawˇ dahˇ-ahˇ iˇ doˆ taˬ-euˬ Iˇjiˇtuˆ tsawˇ haˬ kʼoeˇ gʼaˬ nawˇ maˬ ngeuˇ law hawˇ ngaˬ laˬ.”

³⁹ Pawˇluˆ ehˇ-eu, “Ngaˇ-aˬ, Giˇliˇciˆ miˇ kʼahˬ Daˬsuˆ meuˬ-ahˇ dehꞈ le-euˬ Yuˇdaˆ tsawˇ haˬ pyeuꞈ-awˇ, huiˬ-eu meuˬ kʼoeˇ meuˬ-euˬ miˇ kʼahˬ zaˬ pyeuꞈ-eu ma. Tsawˇ haˬ teu deuˬ-ahˇ dawˬ tiˬ poˆ bi ngehˬ laꞈ sheˇ.”

⁴⁰ Yaw huiˬ yaw mahˇ kʼoeˇ gʼaˬ Pawˇluˆ-ahˇ dawˬ ngehˬ-eu aˬ kawˬ-aˬ biꞈ-euˬ meh. Kʼoeˇ ngeh, Pawˇluˆ dawˬ dzm kʼoeˇ taˆ yawꞈ-awˇ, tsawˇ haˬ kʼoeˇ deuˬ-ahˇ ciˬ cuˇ ni jawˇ-eu gʼaˇ duˬ laꞈ dzawˇ dzawˇ nehˬ-euˬ meh. Aˬ yawꞈ maꞈ ciˬ cuˇ ni jawˇ ngeh, aˬ yawꞈ Heˬbyehˇ dawˬ ngehˬ-awˇ heu loꞈ-ehˇ ehˇ nehˬ-euˬ meh.