Gʼaˬkʼehˇ 12 - Akha

Yaˬkoˆ-ahˇ sehꞈ-awˇ Beˬtuˆluˆ-ahˇ nyehꞈ-euˬ

¹ Aˇ yamˬ kʼoeˇ yamˬ laꞈ kʼoeˇ, Ka li zaˬ aˇ muˇ laꞈ kʼoeˇ uˇ-eu tsawˇ haˬ tiˬ paˆ na deuˬ-ahˇ, sahˬ paˬ Heˬloˆ neh kʼehˬ-euˬ meh.

² Yoˇhaˬ nehˬ-ehˇ tiˬ mehˇ nmˇ pyeuꞈ-eu Yaˬkoˆ-ahˇ aˬ yawꞈ mi cehˇ neh sehꞈ-euˬ meh.

³ Aˬ yawꞈ kʼoeˇ loꞈ-ehˇ jahˇ miˇ-ahˇ Yuˇdaˆ tsawˇ haˬ deuˬ nui ma tsaˬ gaˇ aˬ yawꞈ ya mawˇ ngeh, tiˬ tiˆ paˇ kʼaˬ dzehˬ laˇ-awˇ, Beˬtuˆluˆ-ahˇ nyehꞈ-euˬ meh. (Kʼoeˇ loꞈ-ehˇ pyeuꞈ laˇ-euˬ aˇ yamˬ kʼoeˇ-aˬ, Dehˬ tseˬ maˬ dawˆ-euˬ Kaˬmuˇ dzaˬ-eu Bawˬ-iˬ gʼeh ngeh yamˬ-ahˇ tsaˬ-eu meh.)

⁴ Beˬtuˆluˆ-ahˇ nyehꞈ gʼaˬ ngeh, paꞈ kuˆ-ahˇ dawˆ-awˇ, tiˬ muˇ-euˬ oeˬ gʼaˬ byah-eu yehˇ oeˬ muˇ neh bi loꞈ-euˬ meh. Baˬsaˬkaˬ Bawˬ-iˬ gʼeh gʼaˬ naˇ, miˇ kʼahˬ zaˬ-euˬ mehˬ shi tsahˇ doˆ-awˇ yaˇ kʼaˬ daˇ-eu gʼaˇ duˬ, Heˬloˆ lehˬ hmˬ taˬ-euˬ meh.

⁵ Kʼoeˇ miˇ neh, Beˬtuˆluˆ-ahˇ paꞈ kuˆ-ahˇ dawˆ taˬ-euˬ jeˬ pyeuꞈ-eu meh. Ehˇ kʼawꞈ, Ka li zaˬ aˇ muˇ muˇ lah-ehˇ, Beˬtuˆluˆ gʼaˇ duˬ nui ma keuˆ dui dui-eu laꞈ kʼoeˇ Miˬyehˇ-ahˇ guiˬ lahˬ shaˇ-euˬ meh.

Beˬtuˆluˆ law-iˇ-euˬ

⁶ Aˬ yawꞈ-ahˇ miˇ kʼahˬ zaˬ mehˬ shi Heˬloˆ tsahˇ doˆ-eu lehˇ gʼeh-eu aˇ nah keuˆ le-eu mehˬ hu uˬ ciꞈ kʼoeˇ miˇ-ahˇ, a yawꞈ-ahˇ loꞈ luꞈ-eu yehˇ nyiˬ gʼaˬ-euˬ aˇ kaˬ-ahˇ, Beˬtuˆluˆ yuꞈ kʼaˆ taˬ-euˬ meh. Aˬ yawꞈ-ahˇ shmˇ caˆ nyiˬ caˆ paꞈ tawꞈ taˬ-awˇ, paꞈ kuˆ-euˬ gʼoˆ kʼehˬ-ahˇ kʼawꞈ, yehˇ deuˬ loꞈ luꞈ-eu meh.

⁷ Ja pyuˬ ni SahˬpaˬMiˬyehˇ-euˬ mˬ taˆ gʼaˬ kʼehˇ tiˬ gʼaˬ kʼoeˇ gaˇ yawꞈ le-awˇ, paˬ kuˆ aˇ lawˆ kʼoeˇ lawˆ-ahˇ yaw shehꞈ bya le-euˬ meh. Mˬ taˆ gʼaˬ kʼehˇ kʼoeˇ gʼaˬ Beˬtuˆluˆ-euˬ baꞈ pu-ahˇ ngawˬ zuˆ-awˇ, “Yaw kawˇ-ehˇ tuˇ-awˬ” lehˇ laˆ noeˬ-euˬ meh. Beˬtuˆluˆ-euˬ aˬ laꞈ-ahˇ paꞈ taˬ-euˬ shmˇ caˆ kʼoeˇ deuˬ ga puiˇ-iˇ-euˬ meh.

⁸ “Joꞈ paꞈ paꞈ ziꞈ-awˇ, sehˬ nawˆ nawˆ-awˬ” lehˇ, mˬ taˆ gʼaˬ kʼehˇ kʼoeˇ gʼaˬ ehˇ ngeh, kʼaˇ ehˇ-eu loꞈ-ehˇ Beˬtuˆluˆ jahˇ-euˬ meh. “Nawˬ-euˬ mehˬ tsoeˬ tsahˇ lahˇ-awˇ ngaˬ-euˬ mehˬ nah laˇ-awˬ” lehˇ, mˬ taˆ gʼaˬ kʼehˇ kʼoeˇ gʼaˬ ehˇ-eu meh.

⁹ Kʼoeˇ naˇ, mˬ taˆ gʼaˬ kʼehˇ kʼoeˇ gʼaˬ-euˬ mehˬ nah caw caw-ehˇ paꞈ kuˆ laꞈ nyiˇ caw teh doˆ gʼeh-euˬ meh. Mˬ taˆ gʼaˬ kʼehˇ kʼoeˇ gʼaˬ kʼoeˇ loꞈ-ehˇ jahˇ le-euˬ kʼoeˇ aˬ diˇ ngeuˇ meh lehˇ aˬ yawꞈ maˬ siˬ duˬ-ehˇ, yaw sahˇ laꞈ kʼoeˇ ya mawˇ-euˬ jeˬ nga lehˇ tehꞈ-ehˇ noeˬ-euˬ meh.

¹⁰ Aˬ yawꞈ nyaꞈ-aˬ, loꞈ duˬ yaw beh tsahˇ maˬ ehˇ, nyiˬ tsahˇ tiˬ tsahˇ maˬ ehˇ, oe dzeuˇ jiˇ-awˇ,meuˬ paw dahˇ doˆ-eu shmˇ laˇ gʼoˆ gʼoˆ ma-ahˇ oe keuˆ-euˬ meh. Laˇ gʼoˆ gʼoˆ ma kʼoeˇ aˬ yawˇ yawꞈ pah-iˇ-awˇ, aˬ yawꞈ nyaꞈ laꞈ nyiˇ iˇ doˆ gʼeh-euˬ meh. Aˬ yawꞈ nyaꞈ gaˇ ma tiˬ kahˇ law caw iˇ luꞈ ngeh, mˬ taˆ gʼaˬ kʼehˇ kʼoeˇ gʼaˬ ja pyuˬ ni Beˬtuˆluˆ-ahˇ gʼawˬ-iˇ-euˬ meh.

¹¹ Kʼoeˇ ngeh, Beˬtuˆluˆ yaw muiˬ paˬ-ehˇ noeˬ gahˇ laˇ-awˇ, heu loꞈ-ehˇ ehˇ-eu meh. “Nymˬ-mˇ poˆ jawˇ-aˬ, yuꞈ maˆ maˆ-eu maˬ ngeuˇ-ehˇ aˬ diˇ aˬ maˇ pyeuꞈ luꞈ law hawˇ ngaˬ tawˇ. Sahˬpaˬ Miˬyehˇ-aˬ, aˬ yawꞈ-euˬ mˬ taˆ gʼaˬ kʼehˇ pyehˬ gʼeh leꞈ-awˇ, Heˬloˆ-euˬ baoˬ laꞈ kʼoeˇ maˬ ehˇ, Yuˇdaˆ tsawˇ haˬ deuˬ neh ngaˬ-ahˇ jahˇ nehˬ-eu lehˇ noeˬ tmˬ taˬ-euˬ jeˬ laꞈ kʼoeˇ maˬ ehˇ, ngaˬ-ahˇ bi ka kʼoꞈ le-euˬ ngaˇ.”

¹² Gaˇ kawˆ kʼoeˇ deuˬ-ahˇ aˬ yawꞈ siˬ duˬ gʼaˬ ngeh, Maˬkuˆ lehˇ kʼawꞈ kuˇ-eu Yoˇhaˬ-euˬ aˬ ma pyeuꞈ-eu Maˬliˇ-euˬ nymˇ-ahˇ iˇ-euˬ meh. Tsawˇ haˬ gʼawˬ mya ni kʼoeˇ gaˇ uiˬ leˇ-awˇ guiˬ lahˬ shaˇ luꞈ-eu meh.

¹³ Aˬ yawꞈ laˇ gʼoˆ laꞈ nyiˇ gʼoˆ-ahˇ kʼoˆ ngeh, Loˇdeˬ lehˇ myahˇ-euˬ aˬ buˇ zaˬ kʼaˆ tiˬ gʼaˬ naˇ haˬ le-euˬ meh.

¹⁴ Beˬtuˆluˆ-euˬ teˇ saˇ-ahˇ aˬ yawꞈ gʼoˆ siˬ-awˇ, laˬ kʼaˬ cehˇ dui dui-eu miˇ neh laˇ gʼoˆ pah nehˬ-eu maˬ noeˬ ni iˇ kahˇ laꞈ kʼoeˇ paˇ cehˆ uˇ gʼeh-awˇ, Beˬtuˆluˆ laˇ gʼoˆ dawˬ peh yawꞈ luꞈ meh lehˇ ehˇ gaˬ nehˬ-euˬ meh.

¹⁵ Aˬ yawꞈ maꞈ aˬ yawꞈ-ahˇ, “Nawˇ uˬ-iˇ-euˬ nya loˇ” lehˇ ehˇ nehˬ-euˬ meh. Ehˇ kʼawꞈ, “Aˬ diˇ aˬ maˇ ngeuˇ meh” lehˇ tehꞈ-ehˇ aˬ yawꞈ ehˇ-eu miˇ neh, “Aˬ yawꞈ-euˬ yaw sahˇ tehꞈ-a” lehˇ aˬ yawꞈ maꞈ ehˇ-eu meh.

¹⁶ Kʼoeˇ ngeh, Beˬtuˆluˆ-aˬ, laˇ gʼoˆ-ahˇ maˬ naˬ leˇ ni kʼoˆ luꞈ-eu meh. Aˬ yawꞈ maꞈ laˇ gʼoˆ pah-iˇ ngeh, Beˬtuˆluˆ-ahˇ ya mawˇ-awˇ, zahˬ dui dui leˇ-euˬ meh.

¹⁷ Aˬ yawꞈ maꞈ ciˬ cuˇ ni jawˇ-eu gʼaˇ duˬ aˬ yawꞈ laꞈ dzawˇ dzawˇ nehˬ-awˇ, Sahˬpaˬ Miˬyehˇ neh aˬ yawꞈ-ahˇ paꞈ kuˆ laꞈ kʼoeˇ aˬ joˆ-ehˇ sheuˬ doˆ laˬ le-euˬ gaˇ kawˆ dzawˇ mehˬ nehˬ-awˇ, “Gaˇ kawˆ heu Yaˬkoˆ hawˇ-eu jah-eu tsawˇ haˬ deuˬ-ahˇ dzawˇ mehˬ nehˬ-awˬ” lehˇ ehˇ nehˬ-euˬ meh. Kʼoeˇ naˇ, aˬ yawꞈ doˆ-iˇ-awˇ, yawˬ gaˇ yawˬ iˇ-euˬ meh.

¹⁸ Uˬ bya bya laˇ ngeh, Beˬtuˆluˆ iˇ zaˇ laˇ zaˇ maˬ siˬ ni byoˆ-iˇ-euˬ miˇ neh, kʼoeˇ gaˇ loꞈ-eu yehˇ kʼoeˇ deuˬ bahˬ gʼa dui dui-eu meh.

¹⁹ Heˬloˆ neh dawˬ biꞈ-awˇ aˬ yawꞈ-ahˇ bi poˆ kʼawꞈ, maˬ poˆ mawˇ nya-a. Kʼoeˇ miˇ neh, loꞈ-eu yehˇ kʼoeˇ deuˬ-ahˇ Beˬtuˆluˆ bi cehˆ doˆ-euˬ gaˇ kawˆ naˇ haˬ gʼaˬ-awˇ sehꞈ-eu gʼaˇ duˬ, aˬ yawꞈ dawˬ biꞈ-euˬ meh.

Heˬloˆ shiˇ-euˬ

²⁰ Heˬloˆ-aˬ, Duˇlu meuˬ hawˇ-eu Siˇdoˬ meuˬ-ahˇ jawˇ-eu tsawˇ haˬ deuˬ-ahˇ nui ma pehˇ dui dui-eu meh. Kʼoeˇ miˇ neh, aˬ yawꞈ maꞈ nui maˬ tiˬ siˬ tehꞈ-ehˇ taˬ-eu laꞈ kʼoeˇ, baˬ maꞈ puˇ jeˬ-ehˇ aˬ yawꞈ-ahˇ tahˬ puˬ laˇ-euˬ meh. Sahˬ paˬ-euˬ hawˇ nymˇ-ahˇ aˬ yuiꞈ geuꞈ-awˇ haw-eu pyaˆ-eu gʼaˬ pyeuꞈ-eu Baˬlaˬduˇ-ahˇ jeˬ huˬ ja cawˬ-awˇ, Heˬloˆ nehˬ-ehˇ ja tsaˬ geuꞈ leˇ-euˬ meh. Aˬ jeˬ miˇ neh ehˇ naˇ, sahˬ paˬ Heˬloˆ-euˬ miˇ kʼahˬ-ahˇ aˬ yawꞈ maꞈ dzaˬ dzaˬ dawˇ dawˇ gʼoe luꞈ-eu meh.

²¹ Ngehˬ cawˬ taˬ-euˬ aˇ nah keuˆ laˇ ngeh, Heˬloˆ-aˬ, sahˬ paˬ-euˬ dm gʼaˬ dm lmˇ dm-awˇ, aˬ yawꞈ-euˬ dzoeˬ dzaˬ nuiˇ mahˬ kʼoeˇ taˆ nuiˇ-awˇ, miˇ kʼahˬ zaˬ deuˬ-ahˇ dawˬ ngehˬ nehˬ-euˬ meh.

²² “Tsawˇ haˬ zaˬ dawˬ ngehˬ gaˇ maˬ duˇ nya. Miˬyehˇ dawˬ ngehˬ gaˇ duˇ nya” lehˇ aˬ yawꞈ maꞈ guˇ-eu meh.

²³ Ja pyuˬ ni, Sahˬpaˬ Miˬyehˇ-euˬ gʼaˬ kʼehˇ neh Heˬloˆ-ahˇ kʼehˬ-euˬ meh. Aˬ jeˬ miˇ neh ehˇ naˇ, Miˬyehˇ-ahˇ aˬ yawꞈ maˬ taˬ huiˬ-a. Kʼoeˇ miˇ neh, aˇ boeˬ aˇ mawˇ neh bi dzaˬ sehꞈ-euˬ meh.

²⁴ Kʼoeˇ ngeh, Miˬyehˇ-euˬ dawˬ kawˬ-aˬ, tiˬ gaˇ saˇ-iˬ tiˬ gaˇ gaˬ byah-iˇ luꞈ-eu meh.

²⁵ Baˬnaˬbaˇ hawˇ-eu Sawˇluˆ aˬ nyaꞈ-aˬ, aˬ yawꞈ nyaꞈ ya mˇ-eu saˬ saˬ naˬ gaˇ mˇ luiˆ yaꞈ-awˇ, Maˬkuˆ lehˇ kʼawꞈ kuˇ-eu Yoˇhaˬ-ahˇ sheuˬ-awˇ, Yeˬluˇsaˬlehˬ meuˬ-ahˇ neh gʼoꞈ daˆ leˇ-euˬ meh.