Gʼaˬkʼehˇ 11 - Akha

Aˬ cawˬ tsawˇ jeuˬ kʼawꞈ iˬ baˇ noeˬ poˆ gaˇ Miˬyehˇ geuꞈ mawꞈ-eu

¹ Yuˇdaˆ tsawˇ haˬ maˬ ngeuˇ-eu deuˬ kʼawꞈ, Miˬyehˇ-euˬ dawˬ kawˬ-ahˇ ha geuꞈ-euˬ gaˇ kawˆ, gʼaˬ kʼehˇ deuˬ hawˇ-eu Yuˇdaˆ miˇ kʼahˬ-ahˇ jawˇ-eu jah-eu tsawˇ haˬ deuˬ ya gaˬ-euˬ meh.

² Beˬtuˆluˆ Yeˬluˇsaˬlehˬ meuˬ-ahˇ le ngeh, Yuˇdaˆ tsawˇ haˬ maˬ ngeuˇ-eu deuˬ-ahˇ kʼawꞈ baˆ kʼoˆ mehˬ dzaˬ bi yehˬ mawꞈ-eu nui ma ahˇ-eu deuˬ aˬ yawꞈ-ahˇ heu loꞈ-ehˇ iˬ baˇ taˬ-eu meh.

³ “Aˬ jeˬ miˇ neh nawˇ baˆ kʼoˆ mehˬ dzaˬ maˬ yehˬ-euˬ aˬ cawˬ tsawˇ jeuˬ-euˬ nymˇ-ahˇ daˆ leˇ-eu uˬ taꞈ, aˬ yawꞈ maꞈ nehˬ-ehˇ dzaˬ taꞈ dawˇ taꞈ te.”

⁴ Kʼoeˇ miˇ neh, Beˬtuˆluˆ neh aˬ yawꞈ maꞈ-ahˇ kʼaˇ pyeuꞈ laˇ-euˬ jeˬ dawˬ tawˆ luꞈ, aˇ dahˬ beh gaˇ neh heu loꞈ-ehˇ dzawˇ mehˬ nehˬ-euˬ meh.

⁵ “Yuˇbeˬ meuˬ-ahˇ ngaˇ guiˬ lahˬ shaˇ luꞈ ngeh, yaw sahˇ laꞈ kʼoeˇ heu loꞈ-ehˇ ya mawˇ-euˬ ma. Aˇ bui bui ma loꞈ-ehˇ gʼeh-eu tiˬ hmˬ laꞈ coeˇ oeˬ coeˇ-ahˇ aˇ caˆ paꞈ-awˇ, mˬ-ahˇ neh aˬ za za-ehˇ pyehˬ ka leꞈ-awˇ, ngaˬ-euˬ dawˬ peh naˬ le-euˬ meh.

⁶ Laꞈ kʼoeˇ paw yaw muiˬ paˬ-ehˇ haw duˬ ngeh, cu-eu jeˬ zaˬ maˬ ehˇ, bawˇ tsahˬ jeˬ zaˬ maˬ ehˇ, joe joe-ehˇ cah-eu jeˬ zaˬ maˬ ehˇ, aˇ jiˇ deuˬ maˬ ehˇ, ya mawˇ-euˬ ma.

⁷ Kʼoeˇ ngeh, ‘Beˬtuˆluˆ-oˇ, tuˇ-awˇ sehꞈ dzaˬ-awˬ’ lehˇ, teˇ saˇ tiˬ saˇ ngaˬ-ahˇ ehˇ-eu meh.

⁸ Ehˇ kʼawꞈ, ‘Sahˬpaˬ-oˇ, aˬ jeˬ keuˆ le kʼawꞈ ngaˇ maˬ dzaˬ. Zahˇ sahˇ kʼoꞈ-ahˇ taꞈ leˇ-awˇ maˬ muiˬ maˬ shawˇ-eu jeˬ lehˇ kʼaˇ ehˇ taˬ-euˬ dzaˇ yaw jawꞈ jeˬ, ngaˬ-euˬ kʼaˬ meh laꞈ kʼoeˇ tiˬ jawˇ-iˬ maˬ dawˆ ahˇ haw-aˬ’ lehˇ, ngaˇ ehˇ kʼoꞈ nehˬ-euˬ ma.

⁹ ‘Miˬyehˇ neh yaw shawˇ meh lehˇ ehˇ taˬ-euˬ jeˬ-ahˇ, maˬ shawˇ-a lehˇ maˬ noeˬ kʼmˬ-a’ lehˇ, teˇ saˇ kʼoeˇ saˇ mˬ kʼoeˇ taˆ neh paˇ ehˇ-eu meh.

¹⁰ Kʼoeˇ loꞈ-ehˇ smˬ poˆ keuˆ ni pyeuꞈ laˇ gʼaˬ-awˇ, aˇ saˬ saˬ laˇ ngeh, dawˬ tawˆ luꞈ mˬ kʼoeˇ taˆ gʼeu daˆ kʼoꞈ leꞈ-euˬ meh.

¹¹ Kʼoeˇ ngeh kʼaˆ tseuˆ ni, Gehˇsaˬliˇ meuˬ-ahˇ neh ngaˇ jawˇ gaˇ kʼehˇ gʼeh leꞈ-euˬ tsawˇ haˬ smˇ gʼaˬ, ngaˇ yaꞈ luꞈ-eu nymˇ-ahˇ oe keuˆ-euˬ meh.

¹² Maˬ nyi naˬ ni aˬ yawꞈ maꞈ nehˬ-ehˇ le-awˬ lehˇ, Yaw sahˇ Miˬyehˇ ngaˬ-ahˇ ehˇ-eu meh. Yuˇbeˬ meuˬ-ahˇ jawˇ-eu jah-eu tsawˇ haˬ aˬ yuiꞈ aˬ nyiˇ heu koꞈ gʼaˬ kʼawꞈ, ngaˬ-euˬ mehˬ nah caw teh laˇ-awˇ, nga maꞈ dawˬ tawˆ luꞈ Gawˬneˬliˇ-euˬ nymˇ-ahˇ uˇ leˇ-euˬ ma.

¹³ Aˬ yawꞈ-euˬ nymˇ laꞈ kʼoeˇ yawꞈ le-euˬ mˬ taˆ gʼaˬ kʼehˇ-ahˇ aˬ yawꞈ aˬ joˆ-ehˇ mawˇ-euˬ gaˇ kawˆ hawˇ-eu, mˬ taˆ gʼaˬ kʼehˇ kʼoeˇ gʼaˬ heu loꞈ-ehˇ ehˇ-eu gaˇ kawˆ, aˬ yawꞈ nga maꞈ-ahˇ dzawˇ nehˬ laꞈ-euˬ meh. ‘Yuˇbeˬ meuˬ-ahˇ tsawˇ haˬ pyehˬ gʼeh-awˇ, Beˬtuˆluˆ lehˇ kuˇ-eu Siˇmoˬ-ahˇ biˬ kuˇ laˬ-iˇ-awˬ.

¹⁴ Nawˇ hawˇ-eu nawˬ-euˬ miˬ sawˇ zaˬ dawˬ tawˆ luꞈ ka kʼoꞈ-eu jeˬ za nya ni, aˬ yawꞈ dawˬ mehˬ mehˬ nehˬ laꞈ tehꞈ-a’ lehˇ ehˇ-eu meh lehˇ, ngaˬ-ahˇ dzawˇ nehˬ laꞈ-euˬ meh.

¹⁵ Kʼoeˇ naˇ, ngaˇ dawˬ ngehˬ dahˬ beh-eu nehˬ-ehˇ, yaw beh aˬ dui maꞈ kʼoeˇ taˆ pyeuꞈ beh beh laˇ ngeh poˆ loꞈ-ehˇ, aˬ yawꞈ maꞈ kʼoeˇ taˆ Muiˬ-eu shawˇ-eu Yaw sahˇ Miˬyehˇ zaꞈ le-euˬ meh.

¹⁶ Kʼoeˇ ngeh, ‘Yoˇhaˬ-aˬ, iˇ cuꞈ laꞈ kʼoeˇ iˇ cuꞈ shawˇ nehˬ-euˬ meh. Ehˇ kʼawꞈ, naw maꞈ-aˬ, Muiˬ-eu shawˇ-eu Yaw sahˇ Miˬyehˇ laꞈ kʼoeˇ iˇ cuꞈ ya shawˇ tehꞈ-a’ lehˇ, Sahˬpaˬ Yeˬsuˇ neh ehˇ-euˬ dawˬ kʼoeˇ dawˬ ngaˬ-ahˇ noeˬ doˆ laˇ-euˬ miˇ-a.

¹⁷ Aˬ dui maꞈ Sahˬpaˬ Yeˬsuˇ Ka li-ahˇ jah ngeh, Miˬyehˇ neh aˬ dui-ahˇ biꞈ laꞈ-euˬ laꞈ sawˬ kʼoeˇ, Yuˇdaˆ tsawˇ haˬ maˬ ngeuˇ-eu kʼoeˇ deuˬ-ahˇ kʼawꞈ Miˬyehˇ biꞈ-euˬ ngaˇ lehˇ, bya cehˆ ni siˬ duˬ laˇ-euˬ meh. Miˬyehˇ-ahˇ ngaˇ aˬ joˆ-ehˇ paˇ laˆ tsoeˬ nya nmˇ tawˇ.”

¹⁸ Kʼoeˇ loꞈ-ehˇ dzawˇ mehˬ nehˬ gaˇ aˬ yawꞈ maꞈ ya gaˬ ngeh, Beˬtuˆluˆ-ahˇ iˬ baˇ maˬ taˬ ni byehˇ-awˇ, heu loꞈ-ehˇ ehˇ-eu meh. “Miˬyehˇ-aˬ, Yuˇdaˆ tsawˇ haˬ maˬ ngeuˇ-eu aˬ cawˬ tsawˇ jeuˬ deuˬ-ahˇ kʼawꞈ, iˬ baˇ noeˬ poˆ-awˇ dehꞈ nya ni aˬ kawˬ-aˬ biꞈ-euˬ nga.”

Aˬdiˇawˬ meuˬ-ahˇ jawˇ-eu Ka li zaˬ aˇ muˇ

¹⁹ Saˬteˬpaˬ-ahˇ sehꞈ ngeh poˆ kʼehˬ-eu kʼaˆ-eu jeˬ-ahˇ ya daˬ-awˇ cehˆ byaˆ-euˬ jah-eu tsawˇ haˬ tiˬ paˆ na deuˬ-aˬ, Piˇniˇshaˆ miˇ kʼahˬ, Guˇbaˬluˇ iˇ jaw lahˇ hawˇ-eu, Aˬdiˇawˬ meuˬ-ahˇ keuˆ ni cehˆ keuˆ-euˬ meh. Aˬ yawꞈ maꞈ-aˬ, Yuˇdaˆ tsawˇ haˬ deuˬ-ahˇ tehꞈ-ehˇ guiˬ lahˬ dawˬ mehˬ-euˬ meh.

²⁰ Ehˇ kʼawꞈ, Guˇbaˬluˇ iˇ jaw lahˇ hawˇ-eu Kuˇleˬniˬ miˇ kʼahˬ-ahˇ jawˇ-eu jah-eu tsawˇ haˬ tiˬ deuˬ-aˬ, Aˬdiˇawˬ meuˬ-ahˇ le-awˇ, Yuˇdaˆ tawˇ haˬ maˬ ngeuˇ-eu deuˬ-ahˇ kʼawꞈ guiˬ lahˬ dawˬ mehˬ-awˇ, Sahˬpaˬ Yeˬsuˇ Ka li gaˇ kawˆ Laˬ kʼaˬ cehˇ-eu Guiˬ lahˬ dawˬ ja mehˬ-euˬ meh.

²¹ Sahˬpaˬ Miˬyehˇ-euˬ baoˬ aˬ yawꞈ maꞈ nehˬ-ehˇ jawˇ-eu miˇ neh, tsawˇ haˬ gʼawˬ mya ni jah laˇ-awˇ, Sahˬpaˬ Miˬyehˇ jawˇ paw pyawˇ laˇ-euˬ meh.

²² Gaˇ kawˆ kʼoeˇ Yeˬluˇsaˬlehˬ meuˬ-ahˇ jawˇ-eu Ka li zaˬ aˇ muˇ-ahˇ gaˬ keuˆ-iˇ-euˬ miˇ neh, Baˬnaˬbaˇ-ahˇ Aˬdiˇawˬ meuˬ-ahˇ aˬ yawꞈ maꞈ pyehˬ gʼeh-euˬ meh.

²³ Aˬ yawꞈ kʼoeˇ gaˇ le keuˆ-awˇ, Miˬyehˇ neh tsawˇ haˬ kʼoeˇ deuˬ-ahˇ guiˬ lahˬ biꞈ-euˬ gaˇ ya mawˇ ngeh, laˬ kʼaˬ cehˇ dui dui-eu laꞈ kʼoeˇ, Sahˬ paˬ Yeˬsuˇ-ahˇ nui ma laꞈ kʼoeˇ keuˆ ni saˇ jaˇ ziꞈ-eu gʼaˇ duˬ aˬ yawꞈ maꞈ dawˬ tawˆ luꞈ-ahˇ gʼaˬ biꞈ nehˬ-euˬ meh.

²⁴ Baˬnaˬbaˇ-aˬ, muiˬ-eu jaˬ-eu tsawˇ haˬ tiˬ gʼaˬ pyeuꞈ-awˇ, Muiˬ-eu shawˇ-eu Yaw sahˇ Miˬyehˇ tiˬ byah ni ahˇ-awˇ, jah-eu jeˬ kʼawꞈ tiˬ byah ni ahˇ-eu miˇ neh, tsawˇ haˬ gʼawˬ mya ni Sahˬpaˬ Yeˬsuˇ jawˇ paw ahˇ laˇ-euˬ meh.

²⁵ Kʼoeˇ naˇ, Daˬsuˇ meuˬ-ahˇ Baˬnaˬbaˇ iˇ-awˇ, Pawˇluˆ-ahˇ poˆ-iˇ-euˬ meh.

²⁶ Aˬ yawꞈ-ahˇ poˆ mawˇ ngeh, Aˬdiˇawˬ meuˬ-ahˇ sheuˬ gʼeh-awˇ, Ka li zaˬ aˇ muˇ laꞈ kʼoeˇ jawˇ-eu tsawˇ haˬ deuˬ-ahˇ aˬ yawꞈ nyaꞈ kʼoꞈ kʼoꞈ lah ni tahˬ dzoeˇ-awˇ, tsawˇ haˬ gʼawˬ mya ni-ahˇ mehˬ nehˬ tsoˆ nehˬ-euˬ meh. Jah-eu tsawˇ haˬ deuˬ-ahˇ Ka li zaˬ lehˇ kuˇ beh beh-euˬ kʼoeˇ-aˬ, Aˬdiˇawˬ meuˬ-ahˇ meh.

²⁷ Aˇ yamˬ kʼoeˇ yamˬ laꞈ kʼoeˇ, Miˬyehˇ gʼaˇ duˬ ngehˬ dah-eu tiˬ paˆ na deuˬ, Yeˬluˇsaˬlehˬ meuˬ-ahˇ neh Aˬdiˇawˬ meuˬ-ahˇ le-euˬ meh.

²⁸ Miˬyehˇ gʼaˇ duˬ ngehˬ dah-eu kʼoeˇ deuˬ laꞈ kʼoeˇ, Aˬgaˬbuˇ lehˇ myahˇ-euˬ gʼaˬ tuˇ laˇ-awˇ, “Miˇ tsaˬ heu dawˬ tawˆ luꞈ kʼoeˇ taˆ, mehꞈ dui shuꞈ dui dui-eu jeˬ keuˆ le tehꞈ-a” lehˇ, Yaw sahˇ Miˬyehˇ-euˬ baoˬ-ahˇ gʼoe-awˇ ehˇ-eu meh. (Mehꞈ-eu shuꞈ-eu kʼoeˇ poˆ-aˬ, Loˇmaˆ sahˬ paˬ Gaˬlawˇdiˇ dzoeˬ dzaˬ ngeh keuˆ le-euˬ meh.)

²⁹ Zaˬ lahˇ deuˬ yawˬ gʼaˬ na luꞈ, yawˬ ha kʼaˇ gʼeh nya-eu loꞈ-ehˇ, Yuˇdaˆ miˇ kʼahˬ-ahˇ jawˇ-eu jah-eu tsawˇ haˬ deuˬ-ahˇ caw ba-eu gʼaˇ duˬ noeˬ tsehˆ-euˬ meh.

³⁰ Aˬ yawꞈ maꞈ kʼoeˇ loꞈ-ehˇ jahˇ-awˇ, Baˬnaˬbaˇ hawˇ-eu Sawˇluˆ aˬ nyaꞈ-ahˇ neh tiˬ tiˆ, Ka li zaˬ aˇ muˇ-euˬ aˬ yuiꞈ aˬ tsu deuˬ jawˇ gaˇ pyuˇ dawˆ ahˇ gʼeh-euˬ meh.