Gʼaˬkʼehˇ 1 - Akha

¹ Tawˇpiˇluˆ-oˇ, ngaˬ neh boꞈ-euˬ sahˬ boꞈ yaw beh taꞈ laꞈ kʼoeˇ, Yeˬsuˇ gaˇ mˇ dahˬ beh ngeh neh aˬ yawꞈ neh kʼaˇ mˇ kʼaˇ shaˇ, kʼaˇ mehˬ kʼaˇ tsoˆ yaꞈ-euˬ gaˇ kawˆ deuˬ boꞈ taˬ-euˬ ma.

² Aˬ yawꞈ-ahˇ mˬ kʼoeˇ taˆ bi ciˬ daˆ kʼoꞈ gʼeh ngeh nah-ahˇ keuˆ ni boꞈ taˬ-euˬ ma. Aˬ yawꞈ-ahˇ mˬ kʼoeˇ taˆ maˬ bi ciˬ kʼoꞈ daˆ kʼoꞈ leꞈ mi naˆ-ehˇ, aˬ yawꞈ-euˬ gʼaˬ kʼehˇ bi geuꞈ-eu gʼaˇ duˬ aˬ yawꞈ neh tseˇ doˆ-euˬ tsawˇ haˬ deuˬ-ahˇ, Muiˬ-eu shawˇ-eu Yaw sahˇ Miˬyehˇ-euˬ baoˬ-ahˇ gʼoe-eu laꞈ kʼoeˇ aˬ yawꞈ mehˬ yaꞈ tsoˆ yaꞈ-euˬ meh.

³ Aˬ yawꞈ aˬ diˇ aˬ maˇ dehꞈ luꞈ-eu gaˇ kawˆ noeˬ bahˬ kʼaˇ maˬ bi za-eu gʼaˇ duˬ, aˬ yawꞈ shiˇ gʼaˬ naˇ kʼah, aˇ yamˬ oeˬ tseˇ nah laꞈ kʼoeˇ aˬ yawꞈ maꞈ jawˇ gaˇ gʼawˬ mya poˆ doˆ le-euˬ meh. Aˬ yawꞈ maꞈ aˬ yawꞈ-ahˇ mawˇ-awˇ, Miˬyehˇ Miˇkʼahˬ gaˇ kawˆ aˬ yawꞈ maꞈ-ahˇ aˬ yawꞈ ja mehˬ-euˬ meh.

⁴ Aˬ yawꞈ maꞈ tiˬ gaˇ uiˬ leˇ-awˇ jawˇ ngeh, aˬ yawꞈ heu loꞈ-ehˇ dawˬ biꞈ yaꞈ-euˬ meh. “Ngaˬ Da neh naw maꞈ-ahˇ biꞈ ma lehˇ saˇ jaˇ dzaˬ taˬ-euˬ jeˬ pyeuꞈ-eu, ngaˬ neh naw maꞈ-ahˇ ehˇ nehˬ taˬ-euˬ jeˬ-ahˇ maˬ za kʼoeˇ keuˆ ni, Yeˬluˇsaˬlehˬ meuˬ-ahˇ neh maˬ doˆ-iˇ ni dawˬ tawˬ-awˬ.

⁵ Yoˇhaˬ-aˬ, iˇ cuꞈ laꞈ kʼoeˇ iˇ cuꞈ shawˇ nehˬ-euˬ meh. Ehˇ kʼawꞈ, gʼawˬ myahˇ maˬ gʼeh-ehˇ, Miˬ yehˇ naw maꞈ-ahˇ Yaw sahˇ Miˬyehˇ laꞈ kʼoeˇ iˇ cuꞈ shawˇ nehˬ laꞈ tehꞈ-a.”

Yeˬsuˇ-ahˇ mˬ kʼoeˇ taˆ ciˬ daˆ kʼoꞈ gʼeh-euˬ

⁶ Zaˬ lahˇ deuˬ tiˬ gaˇ uiˬ leˇ-awˇ Yeˬsuˇ-ahˇ ya tahˬ dzoeˇ ngeh heu loꞈ-ehˇ naˇ haˬ-euˬ meh. “Sahˬpaˬ-oˇ, nymˬ-mˇ poˆ jawˇ Miˇ kʼahˬ heu kʼahˬ Iˇsaˬleˬlaˆ tsawˇ jeuˬ-ahˇ nawˇ biꞈ kʼoꞈ-eu lehˇ gʼeh-eu ma loˇ.”

⁷ Aˬ yawꞈ maꞈ-ahˇ Yeˬsuˇ ehˇ nehˬ-eu, “Aˇ yamˬ aˇ law-ahˇ ngaˬ Da-euˬ baoˬ neh toꞈ taˬ gʼaˬ jiˇ-euˬ meh. Naw maꞈ siˬ nya-eu maˬ loˬ-a.

⁸ Ehˇ kʼawꞈ, Muiˬ-eu shawˇ-eu Yaw sahˇ Miˬyehˇ naw maꞈ kʼoeˇ taˆ oe keuˆ ngeh, naw maꞈ baoˬ za-awˇ, Yeˬluˇsaˬlehˬ meuˬ laꞈ kʼoeˇ maˬ ehˇ, Yuˇdaˆ miˇ kʼahˬ hawˇ-eu Saˬmaˬliˆ miˇ kʼahˬ doe ni maˬ ehˇ, mˬ dzeˇ miˇdzeˇ keuˆ ni maˬ ehˇ, naw maꞈ ngaˬ-euˬ gʼaˇ duˬ saˇ kiˇ kamˬ-eu tsawˇ haˬ pyeuꞈ laˇ tehꞈ-a.”

⁹ Aˬ yawꞈ kʼoeˇ loꞈ-ehˇ ehˇ gʼaˬ-awˇ, aˬ yawꞈ maꞈ haw haw-ehˇ jawˇ ngeh, mˬ kʼoeˇ taˆ bi ciˬ daˆ kʼoꞈ leꞈ-euˬ meh. Mˬ dmˇ aˬ yawꞈ-ahˇ tsahˇ kaˬ le-awˇ, aˬ yawꞈ maꞈ aˬ yawꞈ-ahˇ maˬ mawˇ nya-a.

¹⁰ A yawꞈ maꞈ aˬ yawꞈ mˬ-ahˇ gʼoꞈ daˆ leˇ gaˇ haw tsoˆ-awˇ jawˇ ngeh, mehˬ tsoeˬ pyuˇ deuˬ ni dm luꞈ-eu tsawˇ haˬ nyiˬ gʼaˬ aˬ yawꞈ maꞈ-euˬ dawˬ peh ja pyuˬ ni yawꞈ le-euˬ meh.

¹¹ Aˬ yawꞈ nyaꞈ-ehˇ-eu, “Gaˬliˬlehˇ tsawˇ haˬ deuˬ-oˇ, aˬ jeˬ miˇ neh naw maꞈ heu gaˇ yawꞈ-awˇ mˬ-ahˇ haw haw-ehˇ jawˇ te. Naw maꞈ jawˇ gaˇ neh mˬ-ahˇ bi ciˬ kʼoꞈ daˆ leꞈ-euˬ Yeˬsuˇ heu gʼaˬ-aˬ, naw maꞈ-euˬ mehˬ shi kʼaˇ gʼoꞈ daˆ leˇ-euˬ loꞈ-ehˇ tiˬ poˆ paˇ gʼoꞈ ka le meh.”

Yuˇdaˆ-euˬ dah zaˇ tseˇ paˇ-euˬ

¹² Kʼoeˇ naˇ, gʼaˬ kʼehˇ kʼoeˇ deuˬ Saˬloˬ Gawˬ jawˬ-ahˇ neh Yeˬluˇsaˬlehˬ meuˬ-ahˇ gʼoꞈ-iˇ-euˬ meh. Gawˬ jawˬ kʼoeˇ jawˬ-aˬ, Yeˬluˇsaˬlehˬ meuˬ-ahˇ neh oeˬ yaˇ oeˬ tseˇ lmˇ kaˬ-eu tehꞈ meh.

¹³ Aˬ yawꞈ maꞈ meuˬ-ahˇ gʼoꞈ-iˇ-awˇ, nymˇ laꞈ taˆ tiˆ-ahˇ jaˆ-eu aˬ yawꞈ maꞈ yaꞈ-eu lawˆ-ahˇ gʼoꞈ uˇ leˇ-euˬ meh. Aˬ yawꞈ maꞈ-aˬ, Beˬtuˆluˆ, Yoˇhaˬ, Yaˬkoˆ hawˇ-eu Aˬdehˬlehˬ, Piˇliˇpuˆ, Toˇmaˆ, Baˬtawˇlaˬmehˇ, Maꞈtehˬ, Aˬlaˬpehˇ-euˬ aˬ li Yaˬkoˆ, Siˇmoˬ Zeˬloˆ, Yaˬkoˆ-euˬ aˬ li Yuˇdaˆ, heu deuˬ meh.

¹⁴ Aˬ yawꞈ maꞈ-aˬ, zaˬ miˬ zaˬ deuˬ hawˇ-eu, Yeˬsuˇ-euˬ aˬ ma Maˬliˇ hawˇ-eu Yeˬsuˇ-euˬ aˬ nyiˇ deuˬ nehˬ-ehˇ tiˬ kawˆ loꞈ-ehˇ, tiˬ kʼehˬ maˬ taˬ ni uiˬ leˇ-awˇ guiˬ lahˬ shaˇ-eu meh.

¹⁵ Gʼawˬ myahˇ maˬ gʼeh-ehˇ, jah-eu tsawˇ haˬ deuˬ tiˬ yaˇ nyiˬ tseˇ gʼaˬ uiˬ leˇ-awˇ jawˇ gaˇ, Beˬtuˆluˆ tuˇ laˇ-awˇ, heu loꞈ-ehˇ ehˇ-eu meh.

¹⁶ “Aˬ yuiꞈ aˬ nyiˇ deuˬ-oˇ, Yeˬsuˇ-ahˇ nyehꞈ-euˬ tsawˇ haˬ deuˬ-ahˇ gaˇ ma sheuˬ mehˬ nehˬ-euˬ gʼa pyeuꞈ-eu Yuˇdaˆ-euˬ gaˇ kawˆ, Muiˬ-eu shawˇ-eu Yaw sahˇ Miˬyehˇ neh Daˬbiˇ-ahˇ gʼoe-awˇ ehˇ taˬ-euˬ Jaˇliꞈ dawˬ kawˬ kʼoeˇ byah laˇ-euˬ meh.

¹⁷ Yuˇdaˆ-aˬ, aˬ dui-euˬ aˇ muˇ laꞈ kʼoeˇ uˇ-eu tsawˇ haˬ tiˬ gʼaˬ meh. Aˬ jeˬ miˇ neh ehˇ naˇ, aˬ dui nehˬ-ehˇ gaˇ mˇ-eu gʼaˇ duˬ aˬ yawꞈ-ahˇ tseˇ doˆ taˬ-euˬ meh.”

¹⁸ (Haiˬ dui dui-eu gaˇ kʼoeˇ mˇ-awˇ za-euˬ pyuˇ neh, miˇ tsaˬ tiˬ tsahˇ Yuˇdaˆ zeuˇ-awˇ, miˇ tsaˬ kʼoeˇ tsahˇ-ahˇ aˬ yawꞈ uˬ duˬ tahˬ poˆ-ehˇ ga sehꞈ-euˬ meh. Aˬ yawꞈ-euˬ u maˆ ga paˆ-awˇ, baw uˇ baw ma dawˬ tawˆ luꞈ doˆ le jiˇ-euˬ meh.

¹⁹ Yeˬluˇsaˬlehˬ meuˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ, gaˇ kawˆ kʼoeˇ gaˬ jiˇ-euˬ meh. Kʼoeˇ miˇ neh, miˇ tsaˬ kʼoeˇ tsahˇ-ahˇ aˬ yawꞈ maꞈ-euˬ dawˬ-ahˇ neh Aˬkeˬdaˬmaˬ lehˇ kuˇ-eu meh. Dawˬ tsuiꞈ-aˬ, ‘Shiˬ doˆ-euˬ miˇ tsaˬ’ lehˇ ehˇ mawꞈ-eu meh.

²⁰ “Ja ceuˬ-eu sahˬ boꞈ laꞈ kʼoeˇ heu loꞈ-ehˇ boꞈ taˬ-euˬ meh. ‘Aˬ yawꞈ-euˬ nymˇ ngehꞈ-iˇ jiˇ-awˇ, tsawˇ haˬ maˬ jawˇ ni jaˆ luꞈ-uˇ’ lehˇ boꞈ taˬ-euˬ meh. ‘Aˬ yawꞈ mˇ-euˬ gaˇ-ahˇ mˇ-eu, dah zaˇ tiˬ gʼaˬ doˆ le luꞈ-uˇ’ lehˇ kʼawꞈ boꞈ taˬ-euˬ meh.

^21-22 “Kʼoeˇ miˇ neh, Sahˬpaˬ Yeˬsuˇ gʼoꞈ dehꞈ laˇ-euˬ gaˇ kawˆ saˇ kiˇ kamˬ-eu gʼaˇ duˬ, aˬ dui nehˬ-ehˇ tsawˇ haˬ tiˬ gʼaˬ ya bi lahˬ laˇ meh. Tsawˇ haˬ kʼoeˇ gʼaˬ-aˬ, Yoˇhaˬ iˇ cuꞈ shawˇ-eu gaˇ kawˆ mehˬ ngeh neh aˇ dahˬ beh-awˇ, Yeˬsuˇ-ahˇ mˬ-ahˇ ciˬ daˆ kʼoꞈ leꞈ-euˬ aˇ yamˬ-ahˇ keuˆ ni, Sahˬpaˬ Yeˬsuˇ aˬ dui nehˬ-ehˇ kʼaˇ cah taꞈ-euˬ aˇ yamˬ laꞈ kʼoeˇ, aˬ dui-euˬ aˇ muˇ-ahˇ uˇ-awˇ cah taꞈ-euˬ tsawˇ haˬ tiˬ gʼaˬ ya bi pyeuꞈ meh.”

²³ Kʼoeˇ ngeh, aˬ yawꞈ maꞈ tsawˇ haˬ nyiˬ gʼaˬ-ahˇ shaˇ noeˬ-euˬ meh. Yaw beh gʼaˬ-aˬ, tsawˇ myahˇ myahˇ maˇ Yuˇtuˬ lehˇ myahˇ-awˇ, Baˬsaˬbaˆ lehˇ kʼawꞈ kuˇ-eu Yoˇsehˆ meh. Nyiˬ gʼaˬ tiˬ gʼaˬ-aˬ, Maˬtiˇ meh.

^24-25 Kʼoeˇ naˇ, a yawꞈ maꞈ heu loꞈ-ehˇ guiˬ lahˬ shaˇ-euˬ meh. “SahˬpaˬMiˬyehˇ-oˇ, tsawˇ haˬ yawˬ gʼaˬ na luꞈ-euˬ nui noeˬ nui duˇ-ahˇ nawˇ siˬ nya-eu meh. Yuˇdaˆ-aˬ, yawˬ paw yawˬ ciˬ pyawˇ-awˇ, aˬ yawꞈ-ahˇ geuˇ-eu jawˇ duˬ-ahˇ le dzeuˇ-euˬ meh. Kʼoeˇ miˇ neh, Yuˇdaˆ-euˬ dah zaˇ gʼaˬ kʼehˇ geuꞈ-awˇ gaˇ mˇ-eu gʼaˇ duˬ, tsawˇ haˬ heu nyiˬ gʼaˬ laꞈ kʼoeˇ nawˬ neh tseˇ doˆ-euˬ gʼaˬ nga maꞈ-ahˇ mehˬ nehˬ laꞈ-awˬ.”

²⁶ Kʼoeˇ naˇ, aˬ yawꞈ nyaꞈ-euˬ tsawˇ myahˇ boꞈ ahˇ-awˇ, maˬ haw ni beuˬ ngeh, Maˬtiˇ-ahˇ zaˬ leˇ-euˬ meh. Kʼoeˇ miˇ neh, Maˬtiˇ-ahˇ gʼaˬ kʼehˇ tseˇ tiꞈ gʼaˬ nehˬ-ehˇ bi gawꞈ leˇ-euˬ meh.