Eˇzaˬlaˬ 8 - Akha

Baˬbuˇloˬ miˇ kʼahˬ-ahˇ neh gʼoꞈ laˇ-euˬ tsawˇ haˬ deuˬ

¹ Yaw beh neh Baˬbuˇloˬ miˇ kʼahˬ-ahˇ bi nyehꞈ ka gʼeh-awˇ, sahˬ paˬ Aˬtaˬdzeuˬsehˆ uˆ lahˇ-eu yamˬ-ahˇ Eˇzaˬlaˬ nehˬ-ehˇ tiˬ kawˆ loꞈ-ehˇ Yeˬluˇsaˬlehˬ meuˬ-ahˇ gʼoꞈ laˇ-euˬ Iˇsaˬleˬlaˆ tsawˇ jeuˬ tsawˇ ca deuˬ-euˬ aˬ yuiꞈ aˬ tsu deuˬ-euˬ jaˇ laˇ-aˬ, heu loꞈ-ehˇ meh.

^2-3 Piˇnaˬhaˇ-euˬ zaˬ deuˬ uˆ deuˬ laꞈ kʼoeˇ, Geˬlaˬshmˬ, Iˇdaˬmaˬ-euˬ zaˬ deuˬ uˆ deuˬ laꞈ kʼoeˇ, Daˬyeˬlaˇ, Daˬbiˇ-euˬ zaˬ deuˬ uˆ deuˬ laꞈ kʼoeˇ, Sheˬkaˬniˇ-euˬ aˬ li Haˬtuˇshaˬ, Paˬloˆ-euˬ zaˬ deuˬ uˆ deuˬ laꞈ kʼoeˇ, Zaˬkaˬliˇ hawˇ-eu aˬ yawꞈ nehˬ-ehˇ tsawˇ myahˇ ahˇ-eu tiˬ yaˇ ngaˬ tseˇ gʼaˬ,

⁴ Paˬhaˆmawˇbaˆ-euˬ zaˬ deuˬ uˆ deuˬ laꞈ kʼoeˇ, Zeˬlaˬhiˇ-euˬ aˬ li Eˇliˆhawˇneˬ hawˇ-eu aˬ yawꞈ nehˬ-ehˇ ahˇ-eu nyiˬ yaˇ gʼaˬ,

⁵ Zaˬtuˬ-euˬ zaˬ deuˬ uˆ deuˬ laꞈ kʼoeˇ, Yaˬhaˬzeˬlaˇ-euˬ aˬ li Sheˬkaˬniˇ hawˇ-eu aˬ yawꞈ nehˬ-ehˇ ahˇ-eu smˬ yaˇ gʼaˬ,

⁶ Aˬdeˬ-euˬ zaˬ deuˬ uˆ deuˬ laꞈ kʼoeˇ, Yawˇnaˆshaˬ-euˬ aˬ li Eˇbehˆ hawˇ-eu aˬ yawꞈ nehˬ-ehˇ ahˇ-eu ngaˬ tseˇ gʼaˬ,

⁷ Eˇlamˬ-euˬ zaˬ deuˬ uˆ deuˬ laꞈ kʼoeˇ, Aˬdaˬliˇ-euˬ aˬ li Yeˬshaˬyaˆ hawˇ-eu aˬ yawꞈ nehˬ-ehˇ ahˇ-eu shiꞈ tseˇ gʼaˬ,

⁸ Sheˬpaˬtiˇ aˇ jeuˬ laꞈ kʼoeˇ, Miˇkeˬlaˇ-euˬ aˬ li Zeˬbaˬdiˇ hawˇ-eu aˬ yawꞈ nehˬ-ehˇ ahˇ-eu yehꞈ tseˇ gʼaˬ,

⁹ Yoˇbaˬ-euˬ zaˬ deuˬ uˆ deuˬ laꞈ kʼoeˇ, Yeˬheˬlaˇ-euˬ aˬ li Awˇbaˬdiˇ hawˇ-eu aˬ yawꞈ nehˬ-ehˇ ahˇ-eu nyiˬ yaˇ tseˇ yehꞈ gʼaˬ,

¹⁰ Baˬniˬ-euˬ zaˬ deuˬ uˆ deuˬ laꞈ kʼoeˇ, Yawˇseˬpiˇ-euˬ aˬ li Sheˬloˇmiˇ hawˇ-eu aˬ yawꞈ nehˬ-ehˇ ahˇ-eu tiˬ yaˇ koꞈ tseˇ gʼaˬ,

¹¹ Beˬbaiˬ-euˬ zaˬ deuˬ uˆ deuˬ laꞈ kʼoeˇ, Beˬbaiˬ-euˬ aˬ li Zaˬkaˬliˇ hawˇ-eu aˬ yawꞈ nehˬ-ehˇ ahˇ-eu nyiˬ tseˇ yehꞈ gʼaˬ,

¹² Aˬzaˬgaˆ-euˬ zaˬ deuˬ uˆ deuˬ laꞈ kʼoeˇ, Haˬkaˬtaˬ-euˬ aˬ li Yoˇhaˬnaˬ hawˇ-eu aˬ yawꞈ nehˬ-ehˇ ahˇ-eu tiˬ yaˇ tseˇ gʼaˬ,

¹³ Aˬ cawˬ-euˬ jeˬ nah hawˇ-eu gʼoꞈ laˇ-euˬ deuˬ pyeuꞈ-eu Aˬdawˇniˇkamˬ-euˬ zaˬ deuˬ uˆ deuˬ laꞈ kʼoeˇ, Eˇliˇpaˬlehˇ, Yoeˬlaˇ, Sheˬmaˇyaˬ hawˇ-eu, aˬ yawꞈ maꞈ nehˬ-ehˇ ahˇ-eu koꞈ tseˇ gʼaˬ,

¹⁴ Biˇgaˬbeˬ-euˬ zaˬ deuˬ uˆ deuˬ laꞈ kʼoeˇ, Uˇdehˇ, Zaˬkuˬlaˇ hawˇ-eu, aˬ nyaꞈ nehˬ-ehˇ ahˇ-eu shiꞈ tseˇ gʼaˬ meh.

Uˬ duˬ tahˬ nymˇ nymˇ ma laꞈ kʼoeˇ gaˇ bi mˇ-eu Leˬbiˇ tsawˇ haˬ deuˬ-ahˇ poˆ mawˇ-euˬ

¹⁵ Aˬ yawꞈ maꞈ dawˬ tawˆ luꞈ-ahˇ Aˬhaˬbaˬ meuˬ paw yoeˇ gʼeh-euˬ iˇ cuꞈ uiˇ kʼehˬ dawˬ peh ngaˇ kuˇ uiˬ-awˇ, smˬ nah keuˆ ni kʼoeˇ gaˇ sehˬ gʼawˆ gʼawˆ-awˇ naˬ-euˬ ma. Tsawˇ haˬ kʼoeˇ maꞈ laꞈ kʼoeˇ piˇ ma deuˬ ahˇ-awˇ, Leˬbiˇ tsawˇ haˬ tiˬ gʼaˬ-iˬ maˬ ahˇ gaˇ ngaˇ mawˇ-euˬ ma.

¹⁶ Kʼoeˇ miˇ neh, aˬ yuiꞈ aˬ tsu deuˬ pyeuꞈ-eu Eˇliˇzaˬ, Aˬyeˬlaˇ, Sheˬmaˇyaˬ, Eˇlaˬnaˬdaˬ, Yaˬliˆ, Eˇlaˬnaˬdaˬ, Naˬdaˬ, Zaˬkaˬliˇ hawˇ-eu, Meˬshuˇlamˬ aˬ ha gʼoeˬ gʼaˬ hawˇ-eu, tsawˇ gahˇ ahˇ-eu nyiˬ gʼaˬ pyeuꞈ-eu Yawˇyaˬliˆ hawˇ-eu Eˇlaˬnaˬdaˬ aˬ ha nyaꞈ-ahˇ bi kuˇ laˬ-iˇ-euˬ ma.

¹⁷ Aˬ yawꞈ maꞈ-ahˇ Kaˬseˬpyaˇ meuˬ-ahˇ jawˇ-eu deuˬ kʼoeˇ taˆ aˬ yuiꞈ geuꞈ luꞈ-eu Iˇdoˬ jawˇ gaˇ ngaˇ pyehˬ gʼeh-awˇ, Uˬ duˬ tahˬ nymˇ nymˇ ma laꞈ kʼoeˇ Miˬyehˇ-euˬ gaˇ bi mˇ-eu tsawˇ haˬ deuˬ biꞈ nehˬ laꞈ lehˇ, Iˇdoˬ hawˇ-eu aˬ yawꞈ-euˬ cawˬ deuˬ-ahˇ bi shaˇ-iˇ-euˬ ma.

¹⁸ Miˬyehˇ-euˬ guiˬ lahˬ baˬ da neh, Maˬhaˬliˬ aˇ jeuˬ pyeuꞈ-eu Sheˬleˬbiˇ lehˇ myahˇ-euˬ nui noeˬ kʼoˆ tsehˆ-eu Leˬbiˇ tsawˇ haˬ tiˬ gʼaˬ aˬ yawꞈ maꞈ pyehˬ gʼeh laꞈ-awˇ, aˬ yawꞈ nehˬ-ehˇ aˬ yawꞈ-euˬ aˬ li deuˬ hawˇ-eu mehˇ nmˇ deuˬ tseˇ yehꞈ gʼaˬ caw teh laꞈ-euˬ meh.

¹⁹ Meˬlaˬliˇ aˇ jeuˬ pyeuꞈ-eu Haˬshaˬbiˇ, Yeˬshaˬyaˆ hawˇ-eu, aˬ yawꞈ nyaꞈ-euˬ aˬ yuiꞈ aˬ nyiˇ nyiˬ tseˇ gʼaˬ-ahˇ kʼawꞈ, aˬ yawꞈ maꞈ pyehˬ gʼeh laꞈ-euˬ meh.

²⁰ Kʼoeˇ uˬ taꞈ, sahˬ paˬ Daˬbiˇ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ neh Leˬbiˇ tsawˇ haˬ deuˬ-ahˇ caw ba-eu gaˇ bi mˇ-euˬ deuˬ-euˬ zaˬ deuˬ uˆ deuˬ pyeuꞈ-eu tsawˇ haˬ nyiˬ yaˇ nyiˬ tseˇ gʼaˬ kʼawꞈ, aˬ yawꞈ maꞈ sheuˬ laꞈ-euˬ meh. Aˬ yawꞈ maꞈ dawˬ tawˆ luꞈ-euˬ tsawˇ myahˇ jaˇ laˇ yuˇ taˬ-euˬ meh.

Eˇzaˬlaˬ hawˇ-eu Iˇsaˬleˬlaˆ tsawˇ haˬ deuˬ maˬ dzaˬ-eu zahˇ jahˇ-awˇ guiˬ lahˬ shaˇ-euˬ

²¹ Nga maꞈ gaˇ ma doˆ-iˇ luꞈ ngeh Miˬyehˇ sheuˬ gʼeh nehˬ laꞈ-awˇ, nga maꞈ-euˬ aˬ buˇ aˬ li deuˬ hawˇ-eu nga maꞈ kʼaˇ jaˆ-eu jeˬ dawˬ tawˆ luꞈ kʼoeˇ taˆ haw piˇ nehˬ laꞈ-eu gʼaˇ duˬ, yawˬ gʼaˬ na luꞈ maˬ dzaˬ-eu zahˇ jahˇ-eu laꞈ kʼoeˇ nui ma nahˬ yu ni taˬ-awˇ guiˬ lahˬ shaˇ-awˬ lehˇ, Aˬhaˬbaˬ uiˇ kʼehˬ dawˬ peh ngaˇ dawˬ biꞈ-eu ma.

²² Gaˇ pehˇ-ahˇ nga maꞈ-ahˇ muiˇ-eu deuˬ laˆ bahˬ laˇ gaˇ bi haw piˇ-eu gʼaˇ duˬ, guiˇ maꞈ tiˬ maꞈ bi caw teh le-awˬ lehˇ sahˬ paˬ Aˬtaˬdzeuˬsehˆ-ahˇ ngaˇ maˬ shaˇ saˇ nya. Aˬ jeˬ miˇ neh ehˇ naˇ, Nga maꞈ-euˬ Miˬyehˇ-aˬ, aˬ yawꞈ-ahˇ gʼoe-eu tsawˇ haˬ deuˬ-ahˇ ngehˬ gʼeh dah teˬ nehˬ-awˇ, aˬ yawꞈ-ahˇ byehˇ dzeh-eu tsawˇ haˬ deuˬ-ahˇ bye-eu laꞈ kʼoeˇ kʼehˬ nehˬ kʼaˆ nehˬ-eu meh lehˇ aˬ yawꞈ-ahˇ ehˇ nehˬ taˬ-euˬ ma.

²³ Kʼoeˇ miˇ neh, Miˬyehˇ nga maꞈ-ahˇ haw piˇ nehˬ laꞈ-eu gʼaˇ duˬ nga maꞈ maˬ dzaˬ-eu zahˇ jahˇ-awˇ guiˬ lahˬ shaˇ ngeh, nga maꞈ-euˬ shaˇ dawˬ-ahˇ naˇ haˬ geuꞈ nehˬ laꞈ-euˬ meh.

Uˬ duˬ tahˬ nymˇ nymˇ ma gʼaˇ duˬ damˬ-euˬ deuˬ

²⁴ Piˇ ma deuˬ laꞈ kʼoeˇ aˬ yuiꞈ geuꞈ luꞈ-eu deuˬ pyeuꞈ-eu Sheˬleˬbiˇ, Haˬshaˬbiˇ hawˇ-eu, nui deuˬ tseˇ gʼaˬ-ahˇ ngaˇ tseˇ doˆ-euˬ ma.

²⁵ Kʼoeˇ naˇ, sahˬ paˬ Aˬtaˬdzeuˬsehˆ, aˬ yawꞈ-ahˇ nui noeˬ nui duˇ biꞈ-eu deuˬ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ hawˇ-eu, Iˇsaˬleˬlaˆ tsawˇ haˬ deuˬ neh Uˬ duˬ tahˬ nymˇ nymˇ ma-ahˇ bi zmˬ-eu lehˇ damˬ taˬ-euˬ pyuˇ hawˇ-eu shuiˇ deuˬ-ahˇ ngaˇ saˆ haw-awˇ, piˇ ma deuˬ-ahˇ biꞈ nehˬ-euˬ ma.

²⁶ Pyuˇ hawˇ-eu shuiˇ kʼoeˇ deuˬ-ahˇ saˆ haw ngeh, pyuˇ tiˬ muiˇ ngaˬ heˇ jawꞈ-i, oeˬ tseˇ nyiꞈ jawꞈ-i byah-eu pyuˇ ngeuˬ kʼeu tiˬ yaˇ hmˬ, shuiˇ tiˬ heˇ nyiˬ yaˇ oeˬ tseˇ jawꞈ-i,

²⁷ ngaˬ jawꞈ-i byah-eu shuiˇ naˬ bo nyiˬ tseˇ bo hawˇ-eu, shuiˇ naˬ bo kʼoeˇ deuˬ naˆ ni aˇ poeˬ jaˆ-eu muiˬ dui dui-eu guiˬ shuiˇ naˬ bo nyiˬ bo byah-eu meh.

²⁸ Aˬ yawꞈ maꞈ-ahˇ ngaˇ ehˇ nehˬ-euˬ, “Naw maꞈ-euˬ gʼawˇ mawˇ hawˇ-eu naw maꞈ neh nui ma keuˆ-awˇ damˬ taˬ-euˬ pyuˇ hawˇ-eu shuiˇ myawˬ guˇ heu deuˬ-aˬ, naw maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ mehˬ shi muiˬ-eu shawˇ-eu jeˬ pyeuꞈ-eu meh.

²⁹ Kʼoeˇ deuˬ-ahˇ, Uˬ duˬ tahˬ nymˇ nymˇ ma-ahˇ keuˆ ni maˬ bi byoˆ-iˇ ni yaw muiˬ paˬ-ehˇ yuˇ keuˆ gʼeh-awˇ, piˇ ma deuˬ jawˇ-eu lawˆ laꞈ kʼoeˇ saˆ haw-awˇ, piˇ ma deuˬ laꞈ kʼoeˇ aˬ yuiꞈ aˬ tsu geuꞈ-eu deuˬ, Leˬbiˇ tsawˇ haˬ deuˬ hawˇ-eu, Yeˬluˇsaˬlehˬ meuˬ-ahˇ jawˇ-eu Iˇsaˬleˬlaˆ tsawˇ haˬ aˬ yuiꞈ aˬ tsu deuˬ-euˬ laꞈ-ahˇ a nehˬ-awˬ.”

³⁰ Kʼoeˇ naˇ, pyuˇ, shuiˇ hawˇ-eu myawˬ guˇ kʼoeˇ deuˬ-ahˇ, piˇ ma deuˬ hawˇ-eu Leˬbiˇ tsawˇ haˬ deuˬ ha geuꞈ-awˇ, Yeˬluˇsaˬlehˬ meuˬ-ahˇ jaˆ-eu Uˬ duˬ tahˬ nymˇ nymˇ ma-ahˇ yuˇ gʼeh-euˬ meh.

Yeˬluˇsaˬlehˬ meuˬ-ahˇ gʼoꞈ leˇ-euˬ

³¹ Ba la yaw beh siˬ tseˇ nyiꞈ nah-ahˇ, Aˬhaˬbaˬ uiˇ kʼehˬ-ahˇ neh nga maꞈ luˆ-iˇ-awˇ, Yeˬluˇsaˬlehˬ meuˬ-ahˇ le-euˬ ma. Nga maꞈ gaˇ pehˇ le luꞈ ngeh, nga maꞈ-euˬ Miˬyehˇ nga maꞈ nehˬ-ehˇ jawˇ-awˇ, nga maꞈ-ahˇ muiˇ-eu deuˬ hawˇ-eu gaˇ pehˇ gaˇ laˆ nga maꞈ-ahˇ kʼoeˬ deuˆ laˇ-eu deuˬ-euˬ laꞈ-ahˇ neh nga maꞈ-ahˇ haw piˇ nehˬ laꞈ-euˬ meh.

³² Yeˬluˇsaˬlehˬ meuˬ-ahˇ nga maꞈ le keuˆ ngeh, smˬ nah gʼaˬ naˬ naˬ-euˬ ma.

³³ Oeˬ nah tiˬ nah-ahˇ Uˬ duˬ tahˬ nymˇ nymˇ ma-ahˇ nga maꞈ le-awˇ, pyuˇ, shuiˇ, myawˬ guˇ, kʼoeˇ deuˬ-ahˇ saˆ haw-awˇ, Uˇliˇyaˆ-euˬ aˬ li piˇ ma Meˬlaˬmoˇ-ahˇ a nehˬ-euˬ ma. Piˇnaˬhaˇ-euˬ aˬ li Eˇlaˬzaˬ hawˇ-eu, Leˬbiˇ tsawˇ haˬ deuˬ pyeuꞈ-eu Yeˬshah-euˬ aˬ li Yawˇzaˬbaˆ hawˇ-eu Biˇnuiˇ-euˬ aˬ li Nawˇdiˆ aˬ nyaꞈ kʼawꞈ, aˬ yawꞈ nehˬ-ehˇ jawˇ luꞈ-eu meh.

³⁴ Yawˬ jeˬ na luꞈ-ahˇ gui haw saˆ haw-awˇ, tiˬ poˆ tehꞈ-ehˇ jaˇ laˇ yaw muiˬ paˬ-ehˇ yuˇ taˬ-euˬ ma.

³⁵ Baˬbuˇloˬ miˇ kʼahˬ-ahˇ neh gʼoꞈ laˇ-euˬ tsawˇ haˬ dawˬ tawˆ luꞈ, Iˇsaˬleˬlaˆ tsawˇ jeuˬ-euˬ Miˬyehˇ-ahˇ lawˇ nehˬ-eu gʼaˇ duˬ, miˬ dzaˬ-ahˇ dzah puiˆ-awˇ lawˇ-eu jeˬ yuˇ laꞈ-euˬ meh. Iˇsaˬleˬlaˆ tsawˇ jeuˬ dawˬ tawˆ luꞈ gʼaˇ duˬ mawˇ neˇ tseˇ nyiꞈ mawˇ lawˇ-euˬ meh. Yawˇ aˬ buˬ gʼoeˬ tseˇ koꞈ mawˇ hawˇ-eu yawˇ zaˬ shiꞈ tseˇ shiꞈ mawˇ kʼawꞈ aˬ yawꞈ maꞈ lawˇ-euˬ meh. Kʼoeˇ uˬ taꞈ, aˬ yawꞈ maꞈ-euˬ iˬ baˇ shawˇ-eu gʼaˇ duˬ ciꞈ myehꞈ tseˇ nyiꞈ mawˇ lawˇ-euˬ meh. Jeˬ zaˬ heu deuˬ dawˬ tawˆ luꞈ miˬ dzaˬ-ahˇ dzah puiˆ-awˇ Sahˬpaˬ Miˬyehˇ-ahˇ lawˇ nehˬ-euˬ meh.

³⁶ Uˇpaˬlaˇ lawˇ baˬ nahˇ ma ga kʼehˬ paw miˇ kʼahˬ-ahˇ uˆ lahˇ-eu sahˬ paˬ sahˬ ma deuˬ hawˇ-eu yaw huiˬ yaw mahˇ deuˬ-ahˇ, sahˬ paˬ Aˬtaˬdzeuˬsehˆ neh boꞈ-euˬ sahˬ boꞈ kʼoeˇ taꞈ biꞈ nehˬ ngeh, sahˬ paˬ sahˬ ma hawˇ-eu yaw huiˬ yaw mahˇ kʼoeˇ deuˬ kʼawꞈ aˬ yawꞈ maꞈ-ahˇ maˬ ehˇ, Uˬ duˬ tahˬ nymˇ nymˇ ma-ahˇ taꞈ-eu gaˇ deuˬ-ahˇ maˬ ehˇ, caw ba nehˬ-euˬ meh.