Eˇzaˬlaˬ 7 - Akha

Eˇzaˬlaˬ Yeˬluˇsaˬlehˬ meuˬ-ahˇ gʼoꞈ keuˆ laˇ-euˬ

^1-5 Aˇ kʼoꞈ aˇ la gʼawˬ myahˇ ni dzeuˇ-iˇ-awˇ, Paˇshaˇ miˇ kʼahˬ-ahˇ Aˬtaˬdzeuˬsehˆ uˆ lahˇ-eu yamˬ-ahˇ, Eˇzaˬlaˬ lehˇ myahˇ-euˬ tsawˇ haˬ tiˬ gʼaˬ jawˇ-euˬ meh. Piˇ ma yaw huiˬ gʼaˬ pyeuꞈ-eu Aˬloˬ-ahˇ neh aˇ dahˬ beh-awˇ gui ka leꞈ-euˬ aˬ yawꞈ-euˬ tsuiꞈ-aˬ, heu loꞈ-ehˇ meh. Aˬloˬ, Eˇlaˬzaˬ, Piˇnaˬhaˇ, Aˬbiˇshahˬ, Buˇkiˬ, Awˇzeˬ, Zeˬlaˬhiˇ, Meˬlaˇyoˆ, Aˬzaˬyiˇ, Aˬmaˬliˇ, Aˬhiˇtuˆ, Zaˬdoˆ, Shaˬlmˬ, Hiˇlaˬkiˇ, Aˬzaˬyiˇ, Seˬlehˇyaˬ, Eˇzaˬlaˬ lehˇ meh.

⁶ Eˇzaˬlaˬ kʼoeˇ gʼaˬ Baˬbuˇloˬ miˇ kʼahˬ-ahˇ neh gʼoꞈ doˆ laˇ-euˬ meh. Aˬ yawꞈ-aˬ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ neh Moˇseˬ-ahˇ biꞈ-euˬ zahˇ dawˬ kʼoꞈ dawˬ siˬ nya dui dui-eu zahˇ dzoeˬ miˬ ma tiˬ gʼaˬ pyeuꞈ-eu meh. Eˇzaˬlaˬ-aˬ, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh biꞈ-euˬ guiˬ lahˬ za-euˬ tsawˇ haˬ pyeuꞈ-eu miˇ neh, aˬ yawꞈ kʼaˇ shaˇ-eu jeˬ sahˬ paˬ aˬ yawꞈ-ahˇ biꞈ-euˬ meh.

⁷ Sahˬ paˬ Aˬtaˬdzeuˬsehˆ uˆ lahˇ-eu shiꞈ kʼoꞈ tiˬ kʼoꞈ-ahˇ, Iˇsaˬleˬlaˆ tsawˇ haˬ tiˬ paˆ na deuˬ maˬ ehˇ, piˇ ma deuˬ hawˇ-eu Leˬbiˇ tsawˇ haˬ tiˬ paˆ na deuˬ maˬ ehˇ, caˇ dawˬ caˇ-eu deuˬ hawˇ-eu Uˬ duˬ tahˬ nymˇ nymˇ ma lahˇ kʼehˬ-ahˇ loꞈ piˇ-eu deuˬ maˬ ehˇ, Uˬ duˬ tahˬ nymˇ nymˇ ma-ahˇ gaˇ mˇ-eu deuˬ maˬ ehˇ, Baˬbuˇloˬ miˇ kʼahˬ-ahˇ neh Yeˬluˇsaˬlehˬ meuˬ-ahˇ gʼoꞈ leˇ-euˬ meh.

⁸ Sahˬ paˬ Aˬtaˬdzeuˬsehˆ uˆ lahˇ-eu shiꞈ kʼoꞈ tiˬ kʼoꞈ ba la ngaˬ siˬ tiˬ siˬ yaw beh nah-ahˇ, Yeˬluˇsaˬlehˬ meuˬ-ahˇ aˬ yawꞈ gʼoꞈ keuˆ laˇ-euˬ meh.

⁹ Kʼoeˇ ngeh kʼoꞈ ba la yaw beh siˬ aˇ nah yaw beh nah-ahˇ Baˬbuˇloˬ miˇ kʼahˬ-ahˇ neh aˬ yawꞈ doˆ laˇ-awˇ, Miˬyehˇ sheuˬ gʼeh-euˬ miˇ neh, ba la ngaˬ siˬ tiˬ siˬ yaw beh nah-ahˇ Yeˬluˇsaˬlehˬ meuˬ-ahˇ gʼoꞈ keuˆ laˇ-euˬ meh.

¹⁰ Eˇzaˬlaˬ-aˬ, Sahˬpaˬ Miˬyehˇ-euˬ zahˇ dawˬ kʼoꞈ dawˬ-ahˇ dzaw geuꞈ-awˇ caw teh-eu gʼaˇ duˬ maˬ ehˇ, zahˇ dawˬ kʼoꞈ dawˬ kʼoeˇ deuˬ hawˇ-eu zahˇ sahˇ kʼoꞈ deuˬ Iˇsaˬleˬlaˆ tsawˇ haˬ deuˬ-ahˇ mehˬ nehˬ tsoˆ nehˬ-eu gʼaˇ duˬ maˬ ehˇ, noeˬ tsehˆ taˬ-euˬ tsawˇ haˬ tiˬ gʼaˬ pyeuꞈ-eu meh.

Aˬtaˬdzeuˬsehˆ neh Eˇzaˬlaˬ-ahˇ boꞈ nehˬ-euˬ sahˬ boꞈ

¹¹ Piˇ ma hawˇ-eu zahˇ dzoeˬ miˬ ma kʼawꞈ pyeuꞈ-awˇ, Iˇsaˬleˬlaˆ tsawˇ jeuˬ-ahˇ Sahˬpaˬ Miˬyehˇ neh boꞈ-euˬ zahˇ dawˬ kʼoꞈ dawˬ deuˬ hawˇ-eu zahˇ sahˇ kʼoꞈ deuˬ-ahˇ yaw muiˬ paˬ-ehˇ siˬ duˬ-eu gʼaˬ pyeuꞈ-eu Eˇzaˬlaˬ-ahˇ sahˬ paˬ Aˬtaˬdzeuˬsehˆ neh boꞈ nehˬ-euˬ sahˬ boꞈ-aˬ, heu loꞈ-ehˇ meh.

¹² “Mˬ taˆ Miˬyehˇ-euˬ Zahˇ dawˬ kʼoꞈ dawˬ siˬ nya-eu zahˇ dzoeˬ miˬ ma pyeuꞈ-eu piˇ ma Eˇzaˬlaˬ jawˇ gaˇ, sahˬ paˬ Aˬtaˬdzeuˬsehˆ heu loꞈ-ehˇ sahˬ boꞈ boꞈ ahˇ laꞈ-eu ma.

¹³ “Ngaˬ-euˬ miˇ kʼahˬ laꞈ kʼoeˇ kʼaˇ jawˇ-eu Iˇsaˬleˬlaˆ tsawˇ haˬ dawˬ tawˆ luꞈ, piˇ ma deuˬ maˬ ehˇ, Leˬbiˇ tsawˇ haˬ deuˬ maˬ ehˇ, Yeˬluˇsaˬlehˬ meuˬ-ahˇ kʼaˇ gʼoꞈ leˇ mawꞈ-eu deuˬ-ahˇ nawˬ nehˬ-ehˇ bi gʼoꞈ leˇ-awˬ.

¹⁴ Nawˬ-euˬ laꞈ-ahˇ jaˆ-eu nawˬ-euˬ Miˬyehˇ-euˬ zahˇ dawˬ kʼoꞈ dawˬ-ahˇ Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ laꞈ kʼoeˇ aˇ naˆ ni caw teh luꞈ-eu gaˇ kawˆ bi pyehˆ tseˇ haw leˇ-eu gʼaˇ duˬ, ngaˇ hawˇ-eu ngaˬ-ahˇ nui noeˬ nui duˇ biꞈ-eu shiꞈ gʼaˬ gʼeh-awˇ, nawˬ-ahˇ pyehˬ gʼeh-eu ma.

¹⁵ Yeˬluˇsaˬlehˬ meuˬ Uˬ duˬ tahˬ nymˇ nymˇ ma-euˬ Miˬyehˇ pyeuꞈ-eu Iˇsaˬleˬlaˆ tsawˇ jeuˬ-euˬ Miˬyehˇ-ahˇ, ngaˇ hawˇ-eu ngaˬ-ahˇ nui noeˬ nui duˇ biꞈ-eu deuˬ neh damˬ nehˬ-euˬ shuiˇ hawˇ-eu pyuˇ deuˬ kʼawꞈ, nawˇ ya yuˇ gʼeh meh.

¹⁶ Baˬbuˇloˬ miˇ kʼahˬ laꞈ kʼoeˇ nawˇ kʼaˇ taꞈ za-euˬ pyuˇ hawˇ-eu shuiˇ deuˬ maˬ ehˇ, Iˇsaˬleˬlaˆ tsawˇ haˬ deuˬ hawˇ-eu aˬ yawꞈ maꞈ-euˬ piˇ ma deuˬ neh, Yeˬluˇsaˬlehˬ meuˬ-ahˇ jaˆ-eu aˬ yawꞈ maꞈ-euˬ Miˬyehˇ-euˬ Uˬ duˬ tahˬ nymˇ nymˇ ma gʼaˇ duˬ damˬ nehˬ-euˬ jeˬ maˬ ehˇ, nawˇ ya yuˇ gʼeh meh.

¹⁷ “Pyuˇ kʼoeˇ deuˬ-ahˇ nawˇ saˇ jaˇ taˬ-awˇ zmˬ-eu laꞈ kʼoeˇ, mawˇ neˇ deuˬ, yawˇ deuˬ, yawˇ zaˬ deuˬ, cehˇ deuˬ hawˇ-eu aˬ gaꞈ dzaˇ uiˇ zeuˇ-awˇ, Yeˬluˇsaˬlehˬ meuˬ-euˬ Uˬ duˬ tahˬ nymˇ nymˇ ma-ahˇ jaˆ-eu lawˇ duˬ kʼoeˇ taˆ ya lawˇ meh.

¹⁸ Dzehˬ laˇ-euˬ pyuˇ hawˇ-eu shuiˇ deuˬ-ahˇ, Miˬyehˇ nui ma tsaˬ-eu loꞈ-ehˇ nawˇ hawˇ-eu nawˬ-euˬ miˇ kʼahˬ zaˬ deuˬ kʼaˇ zmˬ mawꞈ gaˇ zmˬ nya meh.

¹⁹ Uˬ duˬ tahˬ nymˇ nymˇ ma laꞈ kʼoeˇ uˬ duˬ tahˬ ngeh bi zmˬ-eu lehˇ nawˬ-ahˇ biꞈ nehˬ taˬ-euˬ keu ka deuˬ-ahˇ, Yeˬluˇsaˬlehˬ meuˬ-euˬ Miˬyehˇ-ahˇ nawˇ ya a nehˬ meh.

²⁰ Kʼoeˇ naˇ, Uˬ duˬ tahˬ nymˇ nymˇ ma gʼaˇ duˬ nawˇ kʼaˇ loˬ-eu nui jeˬ dawˬ tawˆ luꞈ-ahˇ, sahˬ paˬ-euˬ pyuˇ shuiˇ myawˬ gahˬ laꞈ kʼoeˇ nawˇ yuˇ doˆ-awˇ hehˇ gʼeh nya tehꞈ-a.

²¹ “Mˬ taˆ Miˬyehˇ-euˬ zahˇ dawˬ kʼoꞈ dawˬ siˬ duˬ-eu zahˇ dzoeˬ miˬ ma pyeuꞈ-eu piˇ ma Eˇzaˬlaˬ kʼaˇ shaˇ-eu yawˬ jeˬ na luꞈ-ahˇ maˬ nyi naˬ ni biꞈ nehˬ-eu gʼaˇ duˬ, Uˇpaˬlaˇ lawˇ baˬ nahˇ ma doˆ kʼehˬ paw miˇ kʼahˬ-ahˇ jawˇ-eu pyuˇ shuiˇ myawˬ gahˬ bi jeˬ hmˬ-euˬ yaw huiˬ yaw mahˇ dawˬ tawˆ luꞈ-ahˇ ngaˇ dawˬ biꞈ-eu ma.

²² Pyuˇ nyiˬ heˇ oeˬ tseˇ jawꞈ-i, cehˇ ngaˬ yaˇ daˇ, aˬ gaꞈ dzaˇ uiˇ smˬ heˇ tsaꞈ, saˬ loˬ tsiˇ smˬ heˇ tsaꞈ-ahˇ keuˆ ni hawˇ-eu, saˬ deuꞈ kʼaˇ loˬ-eu myaˆ ni biꞈ-eu gʼaˇ duˬ ngaˇ dawˬ biꞈ-eu ma.

²³ Ngaˬ-ahˇ maˬ ehˇ, ngaˬ-euˬ jeˬ nah sahˬ paˬ kʼaˇ geuꞈ-eu deuˬ-ahˇ maˬ ehˇ, mˬ taˆ Miˬyehˇ nui ma maˬ ya pehˇ ni, aˬ yawꞈ-euˬ Uˬ duˬ tahˬ nymˇ nymˇ ma gʼaˇ duˬ kʼaˇ loˬ-eu yawˬ jeˬ na luꞈ-ahˇ naw maꞈ yaw muiˬ paˬ-ehˇ ya biꞈ nehˬ meh.

²⁴ Piˇ ma deuˬ, Leˬbiˇ tsawˇ haˬ deuˬ, caˇ dawˬ caˇ-eu deuˬ, Uˬ duˬ tahˬ nymˇ nymˇ ma-ahˇ loꞈ piˇ-eu tsawˇ haˬ deuˬ hawˇ-eu gaˇ mˇ-eu deuˬ ahˇ leˇ-ehˇ, Uˬ duˬ tahˬ nymˇ nymˇ ma-ahˇ taꞈ leˇ-eu tsawˇ haˬ deuˬ-ahˇ naw maꞈ kawˬ maˬ ya taꞈ-a.

²⁵ “Eˇzaˬlaˬ nawˇ gʼaˬ-aˬ, nawˬ-euˬ Miˬyehˇ-euˬ zahˇ dawˬ kʼoꞈ dawˬ-ahˇ gʼoe-awˇ dehꞈ luꞈ-eu Uˇpaˬlaˇ lawˇ baˬ nahˇ ma doˆ kʼehˬ paw kʼaˇ jawˇ-eu tsawˇ haˬ dawˬ tawˆ luꞈ kʼoeˇ taˆ bi uˆ lahˇ-eu gʼaˇ duˬ, nawˬ-euˬ Miˬyehˇ neh nawˬ-ahˇ biꞈ taˬ-euˬ zaˬ siˬ tsawˇ gahˇ-ahˇ gʼoe-awˇ, uˆ lahˇ-eu deuˬ hawˇ-eu yaˇ kʼaˬ daˇ-eu deuˬ tseˇ doˆ-awˬ. Zahˇ dawˬ kʼoꞈ dawˬ-ahˇ maˬ siˬ-eu tsawˇ haˬ deuˬ-ahˇ nawˇ zahˇ dawˬ kʼoꞈ dawˬ mehˬ nehˬ-awˬ.

²⁶ Nawˬ-euˬ Miˬyehˇ-euˬ zahˇ dawˬ kʼoꞈ dawˬ deuˬ-ahˇ maˬ ehˇ, ngaˬ-euˬ miˇ kʼahˬ kʼahˬ ma-euˬ zahˇ dawˬ kʼoꞈ dawˬ deuˬ-ahˇ maˬ ehˇ, maˬ naˇ haˬ geuꞈ-eu tsawˇ haˬ jawˇ naˇ, maˬ nyi naˬ ni tiˬ poˆ tehꞈ-ehˇ kʼehˬ nehˬ kʼaˆ nehˬ-awˬ. Sehꞈ-eu laꞈ kʼoeˇ maˬ ehˇ, miˇ kʼahˬ laꞈ kʼoeˇ neh teh dzeh-eu laꞈ kʼoeˇ maˬ ehˇ, pyuˇ shuiˇ myawˬ gahˬ dawˬ tawˆ luꞈ yuˇ jiˇ nehˬ-eu laꞈ kʼoeˇ maˬ ehˇ, paꞈ kuˆ-ahˇ dawˆ-eu laꞈ kʼoeˇ maˬ ehˇ, kʼehˬ nehˬ kʼaˆ nehˬ-awˬ.”

Eˇzaˬlaˬ Miˬyehˇ-ahˇ ja ceuˬ-euˬ

²⁷ Eˇzaˬlaˬ ehˇ-eu, “Aˬ dui-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ja ceuˬ-awˬ. Yeˬluˇsaˬlehˬ meuˬ-ahˇ jaˆ-eu Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma-ahˇ Baˬbuˇloˬ sahˬ paˬ heu loꞈ-ehˇ taˬ huiˬ taˬ mahˇ ni aˬ yawꞈ jahˇ-euˬ meh.

²⁸ Miˬyehˇ-euˬ guiˬ lahˬ baˬ da neh, Baˬbuˇloˬ sahˬ paˬ maˬ ehˇ, aˬ yawꞈ-ahˇ nui noeˬ nui duˇ biꞈ-eu deuˬ maˬ ehˇ, baoˬ ahˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ maˬ ehˇ, ngaˬ-ahˇ nui ma tsaˬ-eu meh. Ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ ngaˬ-ahˇ gʼaˬ biꞈ laꞈ-euˬ miˇ neh, Iˇsaˬleˬlaˆ tsawˇ jeuˬ tsawˇ ca-euˬ aˬ yuiꞈ aˬ tsu gʼawˬ mya gʼaˬ-ahˇ ngaˬ nehˬ-ehˇ sheuˬ kʼoꞈ laꞈ nya-euˬ ma” lehˇ ehˇ-eu meh.