Eˇzaˬlaˬ 5 - Akha

Uˬ duˬ tahˬ nymˇ nymˇ ma tsoˆ muiˬ-euˬ tiˬ poˆ paˇ dawꞈ leˇ-euˬ

¹ Aˇ yamˬ kʼoeˇ yamˬ laꞈ kʼoeˇ, Haˬgaiˇ hawˇ-eu Iˇdoˬ-euˬ aˬ li Zaˬkaˬliˇ lehˇ myahˇ-euˬ Miˬyehˇ gʼaˇ duˬ ngehˬ dah-eu kʼoeˇ nyiˬ gʼaˬ, Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ-ahˇ jawˇ-eu Yuˇdaˆ tsawˇ haˬ deuˬ-ahˇ, Iˇsaˬleˬlaˆ tsawˇ jeuˬ-euˬ Miˬyehˇ-euˬ tsawˇ myahˇ uˬ moˆ dawˬ ngehˬ cawˬ le-euˬ meh.

² Aˬ yawꞈ nyaꞈ ehˇ-eu dawˬ-ahˇ Shaˬtiˇlaˆ-euˬ aˬ li Zeˬluˇbaˬbeˬlaˇ hawˇ-eu Yeˬhawˇzaˬdaˆ-euˬ aˬ li Yawˇshuˆ aˬ ha nyaꞈ ya gaˬ ngeh, Yeˬluˇsaˬlehˬ meuˬ-ahˇ jaˆ-eu Uˬ duˬ tahˬ nymˇ nymˇ ma tsoˆ muiˬ-eu gaˇ-ahˇ tiˬ poˆ paˇ dawꞈ leˇ-awˇ, Miˬyehˇ gʼaˇ duˬ ngehˬ dah-eu kʼoeˇ nyiˬ gʼaˬ aˬ yawꞈ nyaꞈ-ahˇ caw ba nehˬ-euˬ meh.

³ Kʼoeˇ ngeh, Uˇpaˬlaˇ lawˇ baˬ nahˇ ma ga kʼehˬ paw jaˆ-eu miˇ kʼahˬ-ahˇ uˆ lahˇ-eu Taˬteˬnehˇ, Sheˬdaˬbawˇzaˬnehˇ hawˇ-eu, aˬ nyaꞈ-euˬ cawˬ yaw huiˬ yaw mahˇ geuꞈ luꞈ-eu deuˬ Yeˬluˇsaˬlehˬmeuˬ-ahˇ laˇ-awˇ, “Uˬ duˬ tahˬ nymˇ nymˇ ma heu nymˇ tsoˆ-awˇ kʼoeˇ gaˇ jaˆ-eu keu ka deuˬ laˆ saˆ-eu gʼaˇ duˬ aˬ suˇ gʼaˬ naw maꞈ-ahˇ aˬ kawˬ-aˬ biꞈ laꞈ-euˬ ta” lehˇ naˇ haˬ-euˬ meh.

⁴ Uˬ duˬ tahˬ nymˇ nymˇ ma tsoˆ muiˬ luꞈ-eu tsawˇ haˬ deuˬ-euˬ tsawˇ myahˇ-ahˇ kʼawꞈ aˬ yawꞈ maꞈ naˇ haˬ-euˬ meh.

⁵ Ehˇ kʼawꞈ, Yuˇdaˆ tsawˇ haˬ aˬ yuiꞈ aˬ tsu deuˬ-ahˇ Miˬyehˇ haw piˇ luꞈ-eu miˇ neh, sahˬ paˬ Daˬliˇ jawˇ gaˇ sahˬ boꞈ boꞈ ahˇ nehˬ-awˇ gaˇ kawˆ maˬ gaˬ kʼoꞈ laˇ kʼoeˇ keuˆ ni aˬ yawꞈ maꞈ-ahˇ tiˬ jeˬ-iˬ maˬ jahˇ lehˇ Paˇshaˇ tsawˇ haˬ yaw huiˬ yaw mahˇ deuˬ noeˬ tsehˆ-euˬ meh.

⁶ Sahˬ paˬ Daˬliˇ jawˇ gaˇ aˬ yawꞈ maꞈ heu loꞈ-ehˇ sahˬ boꞈ boꞈ ahˇ nehˬ-euˬ meh.

⁷ “Sahˬ paˬ Daˬliˇ-oˇ, nawˇ miˇ kʼahˬ-ahˇ coꞈ ngehˇ ni ya uˆ lahˇ luꞈ-uˇ.

⁸ “Sahˬ paˬ-oˇ, Yuˇdaˆ miˇ kʼahˬ-ahˇ nga maꞈ le ngeh, huiˬ dui mahˇ dui dui-eu Miˬyehˇ-euˬ Uˬ duˬ tahˬ nymˇ nymˇ ma-ahˇ huiˬ dui dui-eu kʼaˬ lo tsaˬ byaˆ neh tsoˆ muiˬ luꞈ-awˇ, kaˇ pyawˇ-ahˇ daˇ kawˬ pyaꞈ dmˬ gawˬ tehˬ gawˬ tehˬ-ehˆ tsoˆ luꞈ-eu ya mawˇ-euˬ gaˇ kawˆ nawˬ-ahˇ bi siˬ-eu ma. Aˬ yawꞈ maꞈ yaw muiˬ paˬ-ehˇ shaˇ noeˬ shaˇ noeˬ-ehˇ mˇ luꞈ-eu laꞈ kʼoeˇ, tiˬ jeˬ saˇ-i tiˬ jeˬ mˇ pyeuꞈ doˆ luꞈ gaˇ ya mawˇ-euˬ ma.

⁹ “‘Uˬ duˬ tahˬ nymˇ nymˇ ma-ahˇ tsoˆ muiˬ-awˇ, kʼoeˇ gaˇ jaˆ-eu keu ka deuˬ-ahˇ laˆ saˆ muiˬ-eu gʼaˇ duˬ aˬ suˇ gʼaˬ neh naw maꞈ-ahˇ aˬ kawˬ-aˬ biꞈ laꞈ taˬ’ lehˇ, tsawˇ haˬ kʼoeˇ deuˬ-euˬ aˬ yuiꞈ aˬ tsu deuˬ-ahˇ nga maꞈ naˇ haˬ-euˬ ma.

¹⁰ Gaˇ heu hmˬ-ahˇ aˬ yuiꞈ geuꞈ-awˇ mˇ-euˬ deuˬ-ahˇ nawˇ kʼawꞈ ya siˬ ni, aˬ yawꞈ maꞈ-euˬ tsawˇ myahˇ ahˇ nga maꞈ naˇ haˬ-eu ma.

¹¹ “Aˬ yawꞈ maꞈ heu loꞈ-ehˇ ehˇ-eu meh. ‘Nga maꞈ-aˬ, mˬ hawˇ-eu miˇ-ahˇ uˆ lahˇ-eu Miˬyehˇ-euˬ zaˬ kʼaˆ pyeuꞈ-eu ma. Aˇ hu ba baoˬ huiˬ-eu Iˇsaˬleˬlaˆ sahˬ paˬ tiˬ gʼaˬ neh tsoˆ taˬ yaꞈ-euˬ Uˬ duˬ tahˬ nymˇ nymˇ ma-ahˇ nga maꞈ paˇ tsoˆ muiˬ luꞈ-eu ma.

¹² Ehˇ kʼawꞈ, nga maꞈ-euˬ aˬ poeˬ aˬ bawˇ deuˬ mˬ kʼoeˇ taˆ jawˇ-eu Miˬyehˇ nui ma pehˇ ni mˇ-euˬ miˇ neh, Kaˬlaˬdehˇ tsawˇ jeuˬ pyeuꞈ-eu Baˬbuˇloˬ sahˬ paˬ Neˬbuˬkaˬneˬzaˬ-ahˇ aˬ yawꞈ pyehˬ gʼeh leꞈ-awˇ, aˬ yawꞈ maꞈ-ahˇ bi deuˆ gʼaˬ-euˬ meh. Kʼoeˇ ngeh, Uˬ duˬ tahˬ nymˇ nymˇ ma-ahˇ laˆ luˬ laˆ seˇ yaꞈ-awˇ, miˇ kʼahˬ zaˬ deuˬ-ahˇ Baˬbuˇloˬ miˇ kʼahˬ-ahˇ nyehꞈ ka gʼeh-euˬ meh.

¹³ Kʼoeˇ naˇ, sahˬ paˬ Guˇluˆ Baˬbuˇloˬ miˇ kʼahˬ-ahˇ uˆ lahˇ beh beh ngeh koꞈ-ahˇ, Uˬ duˬ tahˬ nymˇ nymˇ ma paˇ tsoˆ muiˬ-eu gʼaˇ duˬ sahˬ paˬ Guˇluˆ aˬ yawꞈ dawˬ biꞈ-euˬ meh.

¹⁴ Yeˬluˇsaˬlehˬ meuˬ Uˬ duˬ tahˬ nymˇ nymˇ ma laꞈ kʼoeˇ jaˆ luꞈ gaˇ sahˬ paˬ Neˬbuˬkaˬneˬzaˬ neh yuˇ laꞈ-awˇ Baˬbuˇloˬ meuˬ uˬ duˬ tahˬ nymˇ laꞈ kʼoeˇ bi jaˆ-euˬ shuiˇ hawˇ-eu pyuˇ keu ka deuˬ-ahˇ sahˬ paˬ Guˇluˆ paˇ yuˇ doˆ-awˇ, Yuˇdaˆ miˇ kʼahˬ-ahˇ uˆ lahˇ-eu gʼaˬ bi geuꞈ-eu lehˇ aˬ yawꞈ neh tseˇ doˆ-euˬ Sheˬshaˆbaˬzaˬ-ahˇ a kʼoꞈ nehˬ-euˬ meh.

¹⁵ Keu ka kʼoeˇ deuˬ-ahˇ Uˬ duˬ tahˬ nymˇ nymˇ ma laꞈ kʼoeˇ paˇ bi jaˆ-awˇ, Uˬ duˬ tahˬ nymˇ nymˇ ma-ahˇ kʼawꞈ aˬ yawꞈ yaw oeˇ tsahˇ-ahˇ paˇ tsoˆ-eu gʼaˇ duˬ, Sheˬshaˆbaˬzaˬ-ahˇ sahˬ paˬ Guˇluˆ ehˇ nehˬ-euˬ meh.

¹⁶ Kʼoeˇ naˇ, Sheˬshaˆbaˬzaˬ gʼoꞈ laˇ-awˇ, Uˬ duˬ tahˬ nymˇ nymˇ ma-euˬ dawˬ pehˬ gawˬ dahˬ beh-euˬ meh. Kʼoeˇ gaˇ neh naˇ iˬ nah keuˆ ni tsoˆ daˆ luꞈ-eu ma. Ehˇ kʼawꞈ, maˬ tsoˆ gʼaˬ dah-aˬ siˬ’ lehˇ aˬ yawꞈ maꞈ ehˇ-eu meh.

¹⁷ “Sahˬ paˬ-oˇ, Yeˬluˇsaˬlehˬ meuˬ-ahˇ jaˆ-eu Uˬ duˬ tahˬ nymˇ nymˇ ma heu nymˇ paˇ bi tsoˆ-eu gʼaˇ duˬ sahˬ paˬ Guˇluˆ neh dawˬ biꞈ-euˬ ngeuˇ maˬ ngeuˇ-eu siˬ duˬ laˇ ni, Baˬbuˇloˬ meuˬ-ahˇ jaˆ-eu sahˬ paˬ-euˬ jaˇ laˇ sahˬ boꞈ-ahˇ bi poˆ tseˇ duˬ-awˇ, gaˇ heu hmˬ-ahˇ nga maꞈ aˬ joˆ-ehˇ ya jahˇ jiˇ nehˬ paˬ-ehˇ gʼeh-eu gaˇ kawˆ, nawˬ neh noeˬ taˬ-euˬ loꞈ-ehˇ paˇ tsaꞈ ahˇ kʼoꞈ laꞈ-awˬ.”