Eˇzaˬlaˬ 3 - Akha

Miˬyehˇ-ahˇ uˬ duˬ tahˬ-eu aˇ dahˬ paˇ beh-euˬ

¹ Ba la shiꞈ siˬ tiˬ siˬ keuˆ laˇ ngeh, Iˇsaˬleˬlaˆ tsawˇ haˬ dawˬ tawˆ luꞈ yawˬ ha-euˬ meuˬ-ahˇ jawˇ duˬ dah gʼaˬ jiˇ-euˬ meh. Kʼoeˇ naˇ, aˬ yawꞈ maꞈ dawˬ tawˆ luꞈ Yeˬluˇsaˬlehˬ meuˬ-ahˇ uiˬ leˇ-euˬ meh.

² Miˬyehˇ-euˬ tsawˇ haˬ pyeuꞈ-eu Moˇseˬ-euˬ Zahˇ dawˬ kʼoꞈ dawˬ laꞈ kʼoeˇ boꞈ taˬ-euˬ loꞈ-ehˇ miˬ dzaˬ-ahˇ dzah puiˆ-awˇ lawˇ-eu jeˬ lawˇ nya shehˇ nya ni, Yeˬhawˇzaˬdaˆ-euˬ aˬ li Yawˇshuˆ hawˇ-eu aˬ yawꞈ-euˬ cawˬ piˇ ma deuˬ maˬ ehˇ, Shaˬtiˇlaˆ-euˬ aˬ li Zeˬluˇbaˬbeˬlaˇ hawˇ-eu aˬ yawꞈ-euˬ aˬ yuiꞈ aˬ nyiˇ deuˬ maˬ ehˇ, tiˬ kawˆ loꞈ-ehˇ Iˇsaˬleˬlaˆ tsawˇ jeuˬ-euˬ Miˬyehˇ-euˬ lawˇ duˬ gawˬ-euˬ meh.

³ Baˬbuˇloˬ miˇ kʼahˬ-ahˇ neh gʼoꞈ laˇ-euˬ Iˇsaˬleˬlaˆ tsawˇ haˬ deuˬ-aˬ, aˬ yawꞈ maꞈ-euˬ miˇ kʼahˬ-ahˇ jawˇ luꞈ-eu tsawˇ haˬ deuˬ-ahˇ guˆ-eu nui ma ahˇ kʼawꞈ, aˇ hu lawˇ duˬ kʼaˇ jaˆ-euˬ jawˇ duˬ-ahˇ lawˇ duˬ paˇ tsoˆ-awˇ, yawˬ shawˬ yawˬ miˇ na luꞈ miˬ dzaˬ-ahˇ dzah puiˆ-awˇ lawˇ-eu jeˬ lawˇ dahˬ paˇ beh-euˬ meh.

⁴ Zahˇ sahˇ kʼoꞈ jaˆ-eu loꞈ-ehˇ, Sehˬ gʼawˆ-euˬ bawˬ-iˬ aˬ yawꞈ maꞈ gʼeh-awˇ, aˬ yawꞈ nah yawꞈ ya lawˇ-eu jeˬ lawˇ-euˬ meh.

⁵ Kʼoeˇ uˬ taꞈ, aˬ myah luꞈ ya lawˇ-eu mawˇ lah-ehˇ miˬ dzaˬ-ahˇ dzah puiˆ-awˇ lawˇ-eu jeˬ maˬ ehˇ, la shuiꞈ lah-eu bawˬ-iˬ gʼeh ngeh lawˇ-eu jeˬ maˬ ehˇ, Sahˬpaˬ Miˬyehˇ-ahˇ uˬ duˬ tahˬ-eu gʼaˇ duˬ uiˬ leˇ ngeh lawˇ-eu jeˬ maˬ ehˇ, nui ma keuˆ-eu laꞈ kʼoeˇ Sahˬpaˬ Miˬyehˇ-ahˇ lawˇ nehˬ-eu lawˇ-eu jeˬ maˬ ehˇ, aˬ yawꞈ maꞈ lawˇ-euˬ meh.

⁶ Aˬ yawꞈ maꞈ Uˬ duˬ tahˬ nymˇ nymˇ ma tsoˆ-eu gaˇ-ahˇ laꞈ maˬ dawꞈ leˇ dah-euˬ kʼawꞈ, ba la shiꞈ siˬ tiˬ siˬ aˇ nah yaw beh nah-ahˇ neh dahˬ beh-awˇ, miˬ dzaˬ dzah puiˆ-awˇ lawˇ-eu jeˬ Sahˬpaˬ Miˬyehˇ-ahˇ lawˇ nehˬ-euˬ meh.

Uˬ duˬ tahˬ nymˇ nymˇ ma paˇ tsoˆ muiˬ-euˬ

⁷ Tsaˬ byaˆ gawˬ-eu deuˬ hawˇ-eu laꞈ myawˬ laꞈ sawˆ mˇ-eu deuˬ-ahˇ biꞈ-eu gʼaˇ duˬ aˬ yawꞈ maꞈ pyuˇ damˬ-euˬ meh. Leˬbaˬnoˬ gawˬ jawˬ-ahˇ dehꞈ-eu shuˬ liˇ aˇ bawˇ nehˬ-ehˇ bi paˇ-eu gʼaˇ duˬ, dzaˬ dzaˬ dawˇ dawˇ hawˇ-eu saˬ loˬ tsiˇ deuˬ, Duˇlu meuˬ hawˇ-eu Siˇdoˬ meuˬ-ahˇ aˬ yawꞈ maꞈ biꞈ gʼeh-euˬ meh. Daˇ kawˬ kʼoeˇ deuˬ-ahˇ, iˬ ma laˆ shaˆ-ahˇ neh Yuˇbeˬ meuˬ-ahˇ ya hehˇ ka leꞈ-eu meh. Paˇshaˇ sahˬ paˬ Duˇlu neh aˬ kaw-aˬ biꞈ-euˬ loꞈ-ehˇ, kʼoeˇ deuˬ dawˬ tawˆ luꞈ-ahˇ aˬ yawꞈ maꞈ mˇ-euˬ meh.

⁸ Yeˬluˇsaˬlehˬ meuˬ Uˬ duˬ tahˬ nymˇ nymˇ ma nymˇ coeˬ-ahˇ aˬ yawꞈ maꞈ gʼoꞈ keuˆ laˇ-euˬ nyiˬ kʼoꞈ tiˬ kʼoꞈ ba la nyiˬ siˬ tiˬ siˬ-ahˇ, Uˬ duˬ tahˬ nymˇ nymˇ ma tsoˆ dahˬ beh-euˬ meh. Zeˬluˇbaˬbeˬlaˇ, Yawˇshuˆ hawˇ-eu aˬ yawꞈ maꞈ-euˬ miˇ kʼahˬ zaˬ deuˬ pyeuꞈ-eu piˇ ma deuˬ, Leˬbiˇ tsawˇ haˬ deuˬ ahˇ leˇ-ehˇ, Baˬbuˇloˬ miˇ kʼahˬ-ahˇ neh kʼaˇ gʼoꞈ laˇ-euˬ tsawˇ haˬ dawˬ tawˆ luꞈ, Uˬ duˬ tahˬ nymˇ nymˇ ma tsoˆ-eu gaˇ mˇ-euˬ meh. Nyiˬ tseˇ kʼoꞈ-ahˇ neh laꞈ taˆ paw-euˬ Leˬbiˇ tsawˇ haˬ dawˬ tawˆ luꞈ-ahˇ, gaˇ mˇ gaˇ bi haw bi pyaˆ-euˬ meh.

⁹ Leˬbiˇ tsawˇ haˬ Yeˬshah hawˇ-eu aˬ yawꞈ-euˬ aˬ li deuˬ maˬ ehˇ, aˬ yuiꞈ aˬ nyiˇ deuˬ maˬ ehˇ, Hawˇdaˬyaˇ aˇ jeuˬ pyeuꞈ-eu Kaˬdaˬmeˬlaˇ-euˬ aˬ li deuˬ maˬ ehˇ, Uˬ duˬ tahˬ nymˇ nymˇ ma tsoˆ gaˇ haw-eu pyaˆ-eu gaˇ-ahˇ tiˬ kawˆ loꞈ-ehˇ mˇ-euˬ meh. Heˬnaˬdaˆ aˇ jeuˬ pyeuꞈ-eu Leˬbiˇ tsawˇ haˬ deuˬ aˬ yawꞈ maꞈ-ahˇ caw ba-euˬ meh.

¹⁰ Uˬ duˬ tahˬ nymˇ nymˇ ma-euˬ dawˬ pehˬ gawˬ dahˬ beh ngeh jawˇ, pehˇ kʼahˬ pehˇ mahˇ dm taˬ-euˬ piˇ ma deuˬ aˬ laꞈ-ahˇ daˇ heh tuˆ tehˬ-awˇ jawˇ duˬ yuˇ-euˬ meh. Aˬsaˆ aˇ jeuˬ pyeuꞈ-eu Leˬbiˇ tsawˇ haˬ deuˬ kʼawꞈ, cehˇ lehˇ yuˇ-awˇ kʼoeˇ gaˇ yawꞈ-euˬ meh. Sahˬ paˬ Daˬbiˇ-euˬ ziˇ-ahˇ neh mehˬ ka leꞈ-euˬ Sahˬpaˬ Miˬyehˇ-ahˇ ja ceuˬ-eu caˇ dawˬ aˬ yawꞈ maꞈ caˇ-euˬ meh.

¹¹ Aˬ yawꞈ maꞈ ja ceuˬ-eu caˇ dawˬ caˇ ngeh, “Sahˬpaˬ Miˬyehˇ muiˬ dui dui meh. Iˇsaˬleˬlaˆ-ahˇ gaˬ-eu jeˬ, mˬ maˬ maˬ byaˆ zaˇ ziˇ ziꞈ meh” lehˇ ehˇ-eu kʼoeˇ tsahˇ-ahˇ caˇ poˆ caˇ poˆ-ehˇ caˇ-euˬ meh. Uˬ duˬ tahˬ nymˇ nymˇ ma-euˬ dawˬ pehˬ gawˬ dahˬ beh-eu dawꞈ leˇ-euˬ miˇ neh, yawˬ gʼaˬ na luꞈ gʼaˬ kʼaˇ jaˆ-eu shaˇ shaˇ-ehˇ guˇ-eu laꞈ kʼoeˇ Sahˬpaˬ Miˬyehˇ-ahˇ ja ceuˬ-euˬ meh.

¹² Yaw beh jaˆ-eu Uˬ duˬ tahˬ nymˇ nymˇ ma kʼoeˇ nymˇ-ahˇ mawˇ haw-euˬ deuˬ pyeuꞈ-eu tsawˇ mawˬ mawˬ laˇ-euˬ piˇ ma deuˬ, Leˬbiˇ tsawˇ haˬ deuˬ hawˇ-eu, tsawˇ jeuˬ tsawˇ ca kʼoeˇ taˆ aˬ yuiꞈ aˬ tsu geuꞈ-eu deuˬ-aˬ, Uˬ duˬ tahˬ nymˇ nymˇ ma-euˬ dawˬ pehˬ gawˬ dahˬ beh gaˇ ya mawˇ ngeh, yaw kʼaˆ-ehˇ guˇ-awˇ ngoeˇ-eu meh. Ehˇ kʼawꞈ, kʼoeˇ gaˇ jawˇ luꞈ-eu tsawˇ haˬ nui deuˬ-aˬ, laˬ kʼaˬ cehˇ cehˇ-ehˇ guˇ-eu meh.

¹³ Laˬ kʼaˬ cehˇ-awˇ guˇ-eu hawˇ-eu noeˬ shaˬ-awˇ ngoeˇ-eu maˬ siˬ laˇ ni jaˆ-eu meh. Aˬ jeˬ miˇ neh ehˇ naˇ, aˬ yawꞈ maꞈ yaw kʼaˆ-ehˇ laˆ lawꞈ taˬ-euˬ miˇ neh, gaˇ mahˇ kaˬ gaˇ keuˆ ni gaˬ keuˆ-iˇ-euˬ meh.