Eˇzaˬlaˬ 1 - Akha

Yuˇdaˆ tsawˇ haˬ deuˬ-ahˇ sahˬ paˬ Guˇluˆ bi gʼoꞈ leˇ-euˬ

¹ Paˇshaˇ miˇ kʼahˬ-ahˇ sahˬ paˬ Guˇluˆ uˆ lahˇ-euˬ yaw beh kʼoꞈ-ahˇ, Miˬyehˇ gʼaˇ duˬ ngehˬ dah-eu gʼaˬ pyeuꞈ-eu Yeˬlaˬmiˇ-ahˇ gʼoe-awˇ aˬ yawꞈ neh ehˇ taˬ-euˬ dawˬ kʼoeˇ dawˬ byah laˇ ni Sahˬpaˬ Miˬyehˇ jahˇ-euˬ meh. Guˇluˆ sahˬ boꞈ tiˬ taꞈ boꞈ-awˇ aˬ yawꞈ-euˬ miˇ kʼahˬ doe ni bi gui gaˬ-iˇ-eu gʼaˇ duˬ, aˬ yawꞈ-euˬ nui ma-ahˇ Sahˬpaˬ Miˬyehˇ laˆ saˆ nehˬ-euˬ meh. Sahˬ boꞈ kʼoeˇ taꞈ heu loꞈ-ehˇ boꞈ taˬ-euˬ meh.

² “Heu-aˬ, Paˇshaˇ sahˬ paˬ Guˇluˆ-euˬ dawˬ pyeuꞈ-eu meh. Mˬ kʼoeˇ taˆ jawˇ-eu Miˬyehˇ pyeuꞈ-eu Sahˬpaˬ Miˬyehˇ-aˬ, miˇ tsaˬ dawˬ tawˆ luꞈ kʼoeˇ taˆ ngaˬ-ahˇ bi uˆ lahˇ laꞈ-awˇ, Yuˇdaˆ miˇ kʼahˬ Yeˬluˇsaˬlehˬ meuˬ-ahˇ aˬ yawꞈ gʼaˇ duˬ uˬ duˬ tahˬ nymˇ tiˬ nymˇ tsoˆ-awˬ lehˇ ngaˬ-ahˇ kʼehˇ-eu meh.

³ Aˬ yawꞈ-euˬ tsawˇ haˬ pyeuꞈ-eu naw maꞈ dawˬ tawˆ luꞈ nehˬ-ehˇ Miˬyehˇ jawˇ luꞈ-uˇ. Naw maꞈ Yeˬluˇsaˬlehˬ meuˬ-ahˇ ya le-awˇ, Yeˬluˇsaˬlehˬ meuˬ-ahˇ naw maꞈ neh uˬ duˬ tahˬ-euˬ Miˬyehˇ pyeuꞈ-eu, Iˇsaˬleˬlaˆ tsawˇ jeuˬ-euˬ Miˬyehˇ, Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma-ahˇ naw maꞈ ya tsoˆ muiˬ meh.

⁴ Heu gaˇ jawˇ luꞈ-eu Miˬyehˇ-euˬ tsawˇ haˬ tiˬ gʼaˬ na Yeˬluˇsaˬlehˬ meuˬ-ahˇ gʼoꞈ leˇ nya-eu gʼaˇ duˬ caw ba nehˬ-eu jeˬ loˬ naˇ, aˬ yawꞈ-euˬ dawˬ peh jawˇ-eu deuˬ aˬ yawꞈ-ahˇ heu loꞈ-ehˇ ya caw ba nehˬ meh. Pyuˇ hawˇ-eu shuiˇ maˬ ehˇ, dzaˬ dzaˬ dawˇ dawˇ hawˇ-eu mˇ myawˬ bi tawˬ-eu jeˬ zaˬ deuˬ maˬ ehˇ, Yeˬluˇsaˬlehˬ meuˬ-ahˇ jaˆ-eu Uˬ duˬ tahˬ nymˇ nymˇ ma-ahˇ lawˇ-eu shehˇ-eu gʼaˇ duˬ loˬ-eu jeˬ maˬ ehˇ, ya caw ba nehˬ meh.”

⁵ Kʼoeˇ naˇ, Yuˇdaˆ tsawˇ jeuˬ tsawˇ ca hawˇ-eu Beˬyaˬmiˬ tsawˇ jeuˬ tsawˇ ca deuˬ kʼoeˇ taˆ aˬ yuiꞈ aˬ tsu geuꞈ-eu deuˬ maˬ ehˇ, piˇ ma deuˬ hawˇ-eu Leˬbiˇ tsawˇ haˬ deuˬ maˬ ehˇ, Miˬyehˇ neh nui ma kʼaˇ bi noeˬ keuˆ-euˬ tsawˇ haˬ yawˬ gʼaˬ na luꞈ, Yeˬluˇsaˬlehˬ meuˬ-ahˇ jaˆ-eu Sahˬpaˬ Miˬyehˇ-euˬ Uˬ duˬ tahˬ nymˇ nymˇ ma tsoˆ muiˬ leˇ-eu gʼaˇ duˬ lehˬ hmˬ-euˬ meh.

⁶ Aˬ yawꞈ maꞈ dawˬ peh jawˇ-eu tsawˇ haˬ deuˬ aˬ yawꞈ maꞈ-ahˇ, pyuˇ myawˬ guˇ deuˬ, shuiˇ deuˬ, dzaˬ dzaˬ dawˇ dawˇ deuˬ, myawˬ tawˬ-eu jeˬ zaˬ deuˬ hawˇ-eu, gaˇ dahˇ tsoeˬ-eu mˇ myawˬ deuˬ uˬ taꞈ, Uˬ duˬ tahˬ nymˇ nymˇ ma-ahˇ lawˇ-eu gʼawˬ mya jeˬ biꞈ-euˬ meh.

⁷ Yeˬluˇsaˬlehˬ meuˬ Uˬ duˬ tahˬ nymˇ nymˇ ma laꞈ kʼoeˇ jaˆ luꞈ gaˇ sahˬ paˬ Neˬbuˬkaˬneˬzaˬ neh yuˇ kʼoꞈ laꞈ-awˇ, aˬ yawꞈ-euˬ miˬ yehˇ deuˬ-euˬ uˬ duˬ tahˬ nymˇ laꞈ kʼoeˇ bi jaˆ-euˬ naˬ bo deuˬ hawˇ-eu kʼmˬ maˬ deuˬ, sahˬ paˬ Guˇluˆ neh aˬ yawꞈ maꞈ-ahˇ paˇ biꞈ kʼoꞈ nehˬ-euˬ meh.

⁸ Paˇshaˇ sahˬ paˬ Guˇluˆ-aˬ, aˬ yawꞈ-euˬ myawˬ gahˬ jeˬ hmˬ-eu yaw huiˬ yaw mahˇ pyeuꞈ-eu Miˇdaˬleˬdaˇ-ahˇ naˬ bo kʼmˬ maˬ kʼoeˇ deuˬ bi yuˇ laꞈ-awˇ, Yuˇdaˆ miˇ kʼahˬ-ahˇ uˆ lahˇ-eu gʼaˬ pyeuꞈ-eu Sheˬshaˆbaˬzaˬ-euˬ mehˬ shi bi gui nehˬ-euˬ meh.

⁹ Aˬ yawꞈ neh gui doˆ-euˬ kʼmˬ maˬ naˬ bo kʼoeˇ deuˬ-aˬ, heu loꞈ-ehˇ meh. Shuiˇ sehˇ byehˇ & smˬ tseˇ byehˇ Pyuˇ sehˇ byehˇ & tiˬ heˇ byehˇ Pyuˇ mui za & nyiˬ tseˇ gʼoeˬ siˬ

¹⁰ Shuiˇ naˬ bo & smˬ tseˇ bo Pyuˇ naˬ bo & oeˬ yaˇ tseˇ bo Nui jeˬ & tiˬ heˇ hmˬ

¹¹ Sheˬshaˆbaˬzaˬ hawˇ-eu Yuˇdaˆ tsawˇ haˬ tiˬ paˆ na deuˬ Baˬbuˇloˬ meuˬ-ahˇ neh Yeˬluˇsaˬlehˬ meuˬ-ahˇ gʼoꞈ leˇ ngeh, aˬ yawꞈ neh yuˇ kʼoꞈ gʼeh-euˬ shuiˇ hawˇ-eu pyuˇ neh jahˇ taˬ-euˬ naˬ bo kʼmˬ maˬ deuˬ hawˇ-eu nui jeˬ dawˬ tawˆ luꞈ, ngaˬ heˇ oeˬ yaˇ hmˬ byah-eu meh.