Eˇpeˇsu 6 - Akha

Aˬ da aˬ ma hawˇ-eu zaˬ deuˬ dehꞈ taꞈ-eu

¹ Zaˬ deuˬ-oˇ, Sahˬpaˬ Yeˬsuˇ laꞈ kʼoeˇ yawˬ ha-euˬ aˬ da aˬ ma ehˇ dawˬ naˇ haˬ-awˬ. Naw maꞈ kʼoeˇ loꞈ-ehˇ mˇ-eu tsaˬ dui dui meh.

² “Nawˬ da nawˬ ma-ahˇ yaw zeu baw-awˬ” lehˇ ehˇ-eu zahˇ dawˬ kʼoꞈ dawˬ heu dawˬ-aˬ, naˇ haˬ geuꞈ-eu tsawˇ haˬ deuˬ-ahˇ Miˬyehˇ guiˬ lahˬ biꞈ-eu gʼaˇ duˬ saˇ jaˇ dzaˬ taˬ-euˬ zahˇ dawˬ kʼoꞈ dawˬ yaw beh dawˬ meh.

³ “Kʼoeˇ loꞈ-ehˇ yaw zeu baw naˇ, nawˇ yawˬ jeˬ na luꞈ laꞈ kʼoeˇ baw le za le-awˇ, miˇ tsaˬ kʼoeˇ taˆ dehꞈ ngeh ziˇ baw ziˇ za tehꞈ-a.”

⁴ Aˬ da aˬ ma deuˬ-oˇ, naw maꞈ-euˬ zaˬ deuˬ nui ma pehˇ ni taˬ jahˇ. Sahˬpaˬ Yeˬsuˇ-euˬ zahˇ sahˇ kʼoꞈ mehˬ nehˬ tsoˆ nehˬ-awˇ, bo saˆ huiˬ-awˬ.

Zaˬ kʼaˆ deuˬ baw leˬ-euˬ ehˇ dawˬ ya naˇ haˬ-eu

⁵ Zaˬ kʼaˆ deuˬ-oˇ, miˇ tsaˬ zaˬ pyeuꞈ-eu naw maꞈ-euˬ baw leˬ deuˬ-ahˇ guˆ-awˇ yaw dzuˬ dzuˬ-eu laꞈ koeˇ, ehˇ dawˬ naˇ haˬ geuꞈ-awˬ. Ka li-euˬ gaˇ mˇ gaˇ duˇ ni, aˬ yawꞈ maꞈ kʼaˇ kʼehˇ-eu jeˬ-ahˇ mˇ-awˬ.

⁶ Baw leˬ haw luꞈ ngeh tehꞈ-ehˇ myaˆ pyawˬ naˇ mehˇ za ni mˇ-eu jeˬ taˬ bi pyeuꞈ. Ehˇ kʼawꞈ, Ka li-euˬ zaˬ kʼaˆ loꞈ-ehˇ Miˬyehˇ nui kʼahˇ shiˇ-eu jeˬ-ahˇ nui ma keuˆ-awˇ mˇ-awˬ.

⁷ Naw maꞈ zaˬ kʼaˆ geuꞈ-awˇ ya mˇ luꞈ-eu gaˇ deuˬ-ahˇ, tsawˇ haˬ zaˬ-euˬ gaˇ mˇ nehˬ-eu loꞈ-ehˇ tehꞈ-ehˇ maˬ ngeuˇ ni, Sahˬpaˬ Yeˬsuˇ-euˬ gaˇ mˇ nehˬ-eu loꞈ-ehˇ laˬ kʼaˬ tiˬ cehˇ mˇ-awˬ.

⁸ Zaˬ kʼaˆ maˬ ehˇ, zaˬ kʼaˆ maˬ ngeuˇ-eu deuˬ maˬ ehˇ, yawˬ ha neh kʼaˇ mˇ-euˬ muiˬ-eu gaˇ gʼaˇ duˬ Sahˬpaˬ Yeˬsuˇ laꞈ sawˬ biꞈ nehˬ laꞈ tehꞈ-a lehˇ siˬ duˬ-awˬ.

⁹ Baw leˬ deuˬ-oˇ, kʼoeˇ loꞈ-ehˇ duˇ ni, naw maꞈ kʼawꞈ zaˬ kʼaˆ deuˬ gʼaˇ duˬ shaˇ noeˬ nehˬ-awˬ. Aˬ yawꞈ maꞈ-ahˇ guˆ tsiˬ taˬ nyehꞈ. Naw maꞈ maˬ ehˇ, naw maꞈ-euˬ zaˬ kʼaˆ deuˬ maˬ ehˇ, dawˬ tawˆ luꞈ tiˬ kawˆ loꞈ-ehˇ mˬ kʼoeˇ taˆ jawˇ-eu Baw leˬ kʼoeˇ gʼaˬ-euˬ zaˬ kʼaˆ pyeuꞈ-eu ma lehˇ siˬ nya-awˬ. Aˬ yawꞈ-aˬ, yawˬ gʼaˬ na luꞈ-ahˇ myaˆ pyawˬ huiˬ nyiˇ maˬ tseˇ-ehˇ tiˬ kawˆ di ni yaˇ kʼaˬ daˇ-eu meh.

Miˬyehˇ-euˬ guiˇ deuˆ-eu keu ka

¹⁰ Aˇ saˬ saˬ-eu dawˬ heu loꞈ-ehˇ ehˇ-eu ma. Sahˬpaˬ Yeˬsuˇ-euˬ huiˬ-eu baoˬ-ahˇ gʼoe-awˇ, aˬ yawꞈ laꞈ kʼoeˇ gʼaˬ ahˇ laˇ-awˬ.

¹¹ Nehꞈ sahˬ paˬ tsawˇ gahˇ gahˇ laˇ gaˇ naw maꞈ gʼaˬ leˇ nya ni, Miˬyehˇ neh biꞈ laꞈ-euˬ guiˇ deuˆ-eu keu ka dawˬ tawˆ luꞈ-ahˇ dm-awˬ.

¹² Aˬ jeˬ miˇ neh ehˇ naˇ, tsawˇ haˬ zaˬ-ahˇ aˬ dui deuˆ ceh ceh luꞈ-eu maˬ ngeuˇ. Maˬ mawˇ nya-eu haiˬ dui dui-eu mˬ taˆ-euˬ yaw sahˇ pyeuꞈ-eu uˆ lahˇ-eu deuˬ-ahˇ maˬ ehˇ, baoˬ deuˬ-ahˇ maˬ ehˇ, zahˇ tsui ni gʼeh-eu ziˇ heu ziˇ-ahˇ dzoeˬ luꞈ-eu mˬ hawˇ-eu miˇ yaw kaˬ-ahˇ jawˇ-eu deuˬ-ahˇ maˬ ehˇ, aˬ dui deuˆ ceh ceh luꞈ-eu ma.

¹³ Haiˬ-eu aˇ nah aˇ yamˬ kʼoeˇ keuˆ le ngeh, muiˇ-eu deuˬ deuˆ le gaˇ naw maꞈ ciˬ daˬ coeˇ-awˇ, aˇ saˬ deuˆ saˬ ngeh keuˆ ni tiˬ toꞈ-iˬ maˬ jiˆ kʼoꞈ-iˇ ni ziꞈ dah ni yawꞈ tehˬ coeˇ-eu gʼaˇ duˬ, Miˬyehˇ-euˬ guiˇ deuˆ-eu keu ka dawˬ tawˆ luꞈ-ahˇ nymˬ-mˇ dm-awˬ.

¹⁴ Kʼoeˇ miˇ neh, yaw sui yaw dawˇ jeˬ joꞈ paꞈ paꞈ-awˇ, yaw tsaˬ yaw dawˇ jeˬ kʼahˬ-ahˇ dehˬ kaˬ-awˇ yawꞈ-awˬ.

¹⁵ Biˬ tsaˬ bi dzoeˇ leˇ-eu Laˬ kʼaˬ cehˇ-eu Guiˬ lahˬ dawˬ sehˬ nawˆ nawˆ-awˬ.

¹⁶ Kʼoeˇ uˬ taꞈ, Haiˬ dui dui-eu Gʼaˬ neh beuˆ gʼeh laꞈ-euˬ miˬ dzaˬ doꞈ-eu kaˆ myaˬ deuˬ bi miˆ-iˇ-eu gʼaˇ duˬ, jah-eu jeˬ pyeuꞈ-eu dehˬ daˬ duˬ-ahˇ aˬ myah luꞈ ziꞈ dah ni tuˆ tehˬ taˬ-awˬ.

¹⁷ Ka kʼoꞈ-eu jeˬ pyeuꞈ-eu shmˇ uˬ kʼoˆ kʼoˆ-awˇ, Yaw sahˇ Miˬyehˇ neh biꞈ laꞈ-euˬ mi cehˇ pyeuꞈ-eu Miˬyehˇ-euˬ dawˬ kawˬ-ahˇ tuˆ tehˬ taˬ-awˬ.

¹⁸ Miˬyehˇ caw ba laꞈ ni guiˬ lahˬ shaˇ-awˇ, kʼoeˇ deuˬ dawˬ tawˆ luꞈ-ahˇ mˇ gʼeh-awˬ. Yaw sahˇ Miˬyehˇ sheuˬ gʼeh-eu laꞈ kʼoeˇ aˬ myah luꞈ guiˬ lahˬ shaˇ-awˬ. Maˬ ya smˬ-iˇ ni aˬ myah luꞈ yaw beuˇ beuˇ-ehˇ jawˇ-awˬ. Miˬyehˇ-euˬ tsawˇ haˬ dawˬ tawˆ luꞈ gʼaˇ duˬ aˬ myah luꞈ guiˬ lahˬ shaˇ-awˬ.

¹⁹ Laˬ kʼaˬ cehˇ-eu Guiˬ lahˬ dawˬ gaˇ kawˆ zaꞈ taˬ-euˬ jeˬ-ahˇ aˬ cawˬ siˬ nya laˇ ni kʼaˬ duˬ ni dawˬ ngehˬ nya-eu gʼaˇ duˬ, ngaˇ dawˬ ngehˬ-eu lehˇ kʼaˇ gʼeh ngeh Miˬyehˇ-euˬ dawˬ ngaˬ-ahˇ biꞈ laꞈ ni ngaˬ-euˬ gʼaˇ duˬ kʼawꞈ aˬ myah luꞈ guiˬ lahˬ shaˇ-awˬ.

²⁰ Nymˬ-mˇ ngaˇ tawˬ-ahˇ uˇ luꞈ-eu kʼawꞈ, Laˬ kʼaˬ cehˇ-eu Guiˬ lahˬ dawˬ heu-euˬ gʼaˇ duˬ Sahˬpaˬ Yeˬsuˇ-euˬ dah zaˇ ngehˬ zaˬ tmˇ zaˬ pyeuꞈ-eu ma. Laˬ kʼaˬ cehˇ-eu Guiˬ lahˬ dawˬ gʼaˇ duˬ ngehˬ paˬ tmˇ paˬ-ehˇ gʼeh-eu jeˬ-ahˇ ngaˇ kʼaˬ duˬ ni ngehˬ nya tmˇ nya ni guiˬ lahˬ shaˇ nehˬ laꞈ-awˬ.

Aˇ saˬ saˬ-eu dawˬ

²¹ Ngaˇ aˬ joˆ-ehˇ mˇ luꞈ shaˇ luꞈ-eu gaˇ kawˆ naw maꞈ ya siˬ ni, aˬ dui-euˬ aˬ nyiˇ Duˇjiˇ naw maꞈ-ahˇ ja mehˬ jiˇ nehˬ laꞈ tehꞈ-a. Aˬ yawꞈ-aˬ, Sahˬpaˬ Yeˬsuˇ-euˬ gaˇ mˇ-eu saˇ jaˇ ziꞈ-eu zaˬ kʼaˆ tiˬ gʼaˬ pyeuꞈ-eu meh.

²² Kʼoeˇ miˇ neh, nga maꞈ dawˬ tawˆ luꞈ aˬ joˆ-ehˇ mˇ luꞈ shaˇ luꞈ-eu gaˇ kawˆ bi ja mehˬ le-awˇ naw maꞈ-ahˇ gʼaˬ bi biꞈ le-eu gʼaˇ duˬ, aˬ yawꞈ-ahˇ ngaˇ kʼehˇ gʼeh leꞈ-eu ma.

²³ Aˬda Miˬyehˇ hawˇ-eu Sahˬpaˬ Yeˬsuˇ Ka li-euˬ nui saˇ oꞈ-eu jeˬ maˬ ehˇ, gʼoeˇ-eu gaˬ-eu jeˬ maˬ ehˇ, jah-eu jeˬ maˬ ehˇ, aˬ yuiꞈ aˬ nyiˇ Ka li zaˬ dawˬ tawˆ luꞈ kʼoeˇ taˆ jaˆ luꞈ-uˇ.

²⁴ Aˬ dui-euˬ Sahˬpaˬ Yeˬsuˇ ka li-ahˇ tiˬ jawˇ-iˬ maˬ piˬ maˬ byoˆ-iˇ nya-eu gʼoeˇ-eu gaˬ-eu jeˬ neh kʼaˇ gaˬ-eu tsawˇ haˬ dawˬ tawˆ luꞈ kʼoeˇ taˆ, Miˬyehˇ gʼawˬ shaˬ gaˬ-eu guiˬ lahˬ yaw dzahˇ jaˆ luꞈ-uˇ.