Eˇpeˇsu 1 - Akha

¹ Miˬyehˇ nui ma tsaˬ-eu miˇ neh Yeˬsuˇ Ka li-euˬ gʼaˬ kʼehˇ ya geuꞈ luꞈ-eu ngaˇ Pawˇluˆ, Yeˬsuˇ Ka li laꞈ kʼoeˇ saˇ jaˇ ziꞈ-eu Eˇpeˇsu meuˬ-ahˇ jawˇ-eu Miˬyehˇ-euˬ tsawˇ haˬ deuˬ jawˇ gaˇ sahˬ boꞈ boꞈ ahˇ leꞈ-eu ma.

² Aˬ dui-euˬ Aˬda Miˬyehˇ hawˇ-eu Sahˬpaˬ Yeˬsuˇ Ka li-euˬ guiˬ lahˬ yaw dzahˇ hawˇ-eu nui saˇ oꞈ-eu jeˬ, naw maꞈ kʼoeˇ taˆ keuˆ le luꞈ-uˇ.

Yeˬsuˇ Ka li laꞈ kʼoeˇ za-euˬ saꞈ laˇ paw-euˬ guiˬ lahˬ

³ Aˬ dui-euˬ Sahˬpaˬ Yeˬsuˇ Ka liˬeuˬ Aˬda pyeuꞈ-eu Miˬyehˇ-euˬ guiˬ lahˬ-ahˇ ja ceuˬ kaˇ-euˇ. Aˬ jeˬ miˇ neh ehˇ naˇ, mˬ taˆ miˇ kʼahˬ-ahˇ jaˆ-eu saꞈ laˇ paw-euˬ guiˬ lahˬ yawˬ jeˬ na luꞈ, Yeˬsuˇ Ka li laꞈ kʼoeˇ aˬ dui-ahˇ aˬ yawꞈ biꞈ laꞈ-euˬ meh.

⁴ Miˬyehˇ-euˬ mehˬ shi aˬ dui muiˬ-awˇ shawˇ-awˇ, iˬ baˇ taˬ kʼaˇ maˬ bi za-eu gʼaˇ duˬ, miˇ tsaˬ tahˬ kʼawˇ heu maˬ beh mi naˆ-ehˇ Yeˬsuˇ Ka li laꞈ kʼoeˇ Miˬyehˇ neh aˬ dui-ahˇ tseˇ doˆ taˬ-euˬ meh.

⁵ Miˬyehˇ aˬ dui-ahˇ gaˬ-eu miˇ neh, Yeˬsuˇ Ka li-ahˇ gʼoe-awˇ aˬ dui-ahˇ aˬ yawꞈ-euˬ zaˬ deuˬ bi pyeuꞈ laˇ-eu gʼaˇ duˬ noeˬ tsehˆ taˬ-euˬ meh. Kʼoeˇ loꞈ-ehˇ bi pyeuꞈ laˇ-eu gʼaˇ duˬ aˬ yawꞈ laˬ kʼaˬ cehˇ-awˇ noeˬ tmˬ taˬ-euˬ meh.

⁶ Aˬ yawꞈ-euˬ huiˬ dui muiˬ dui dui-eu gʼawˬ shaˬ gaˬ-eu guiˬ lahˬ kʼoeˇ, aˬ yawꞈ gaˬ dui dui-eu aˬ yawꞈ-euˬ Zaˬmaˇ laꞈ kʼoeˇ aˬ dui-ahˇ biꞈ laꞈ-euˬ miˇ neh, Miˬyehˇ-ahˇ ja ceuˬ kaˇ-euˇ.

⁷ Aˬ jeˬ miˇ neh ehˇ naˇ, Ka li kamˇ shiˇ-euˬ baˬ da neh aˬ dui ya buˬ-iˇ-awˇ, aˬ dui-euˬ iˬ baˇ-ahˇ pyehˬ nehˬ laꞈ-euˬ meh. Miˬyehˇ gʼawˬ shaˬ gaˬ-eu guiˬ lahˬ kʼoeˇ aˇ naˆ ni huiˬ-eu nga.

⁸ Aˬ yawꞈ aˬ dui-ahˇ kʼoeˇ myaˆ myaˆ-ehˇ biꞈ nehˬ laꞈ-euˬ meh. Miˬyehˇ-aˬ, aˬ yawꞈ-euˬ zaˬ siˬ tsawˇ gahˇ hawˇ-eu noeˬ siˬ noeˬ mawˇ nya-eu jeˬ-ahˇ gʼoe-eu laꞈ kʼoeˇ,

⁹ aˬ yawꞈ neh noeˬ tmˬ taˬ-euˬ loꞈ-ehˇ Yeˬsuˇ Ka li-ahˇ gʼoe-awˇ mˇ byah-eu gʼaˇ duˬ lehˬ hmˬ taˬ-euˬ zaꞈ taˬ-euˬ jeˬ, aˬ dui-ahˇ bi siˬ bi mawˇ laꞈ-euˬ meh.

¹⁰ Aˇ yamˬ tsaˬ laˇ ngeh mˇ byah-eu gʼaˇ duˬ Miˬyehˇ neh noeˬ tsehˆ-awˇ lehˬ hmˬ taˬ-euˬ gaˇ kawˆ kʼoeˇ-aˬ, yawˬ jeˬ na luꞈ-euˬ uˬ duˬ pyeuꞈ-eu Ka li-ahˇ mˬ hawˇ-eu miˇ kʼoeˇ taˆ kʼaˇ beh taˬ-euˬ jeˬ dawˬ tawˆ luꞈ bi gawꞈ bi bawˆ leˇ-eu gʼaˇ duˬ pyeuꞈ-eu meh.

¹¹ Dawˬ tawˆ luꞈ Miˬyehˇ neh noeˬ tsehˆ-awˇ lehˬ hmˬ taˬ-euˬ loꞈ-ehˇ pyeuꞈ laˇ-euˬ meh. Aˇ dahˬ beh ngeh neh Miˬyehˇ noeˬ tsehˆ-awˇ lehˬ hmˬ taˬ-euˬ jaˆ-eu miˇ neh, Ka li laꞈ kʼoeˇ aˬ yawꞈ-euˬ tsawˇ haˬ bi pyeuꞈ laˇ-eu gʼaˇ duˬ aˬ dui -ahˇ tseˇ doˆ-euˬ meh.

¹² Kʼoeˇ miˇ neh, Ka li-ahˇ noeˬ tmˬ beh beh-euˬ deuˬ pyeuꞈ-eu nga maꞈ-aˬ, Miˬyehˇ-euˬ yaw shehꞈ kʼahˬ sehˇ-ahˇ ja ceuˬ-eu ma.

¹³ Naw maꞈ kʼawꞈ, naw maꞈ jawˇ gaˇ ka kʼoꞈ-eu jeˬ bi keuˆ le-euˬ Laˬ kʼaˬ cehˇ-eu Guiˬ lahˬ dawˬ pyeuꞈ-eu yaw tsaˬ yaw dawˇ dawˬ-ahˇ ya gaˬ-awˇ, Miˬyehˇ-euˬ tsawˇ haˬ pyeuꞈ laˇ-euˬ meh. Naw maꞈ Ka li-ahˇ jah-awˇ, Miˬyehˇ neh saˇ jaˇ dzaˬ taˬ-euˬ loꞈ-ehˇ Muiˬ-eu Shawˇ-eu Yaw sahˇ Miˬyehˇ bi oe-eu laꞈ kʼoeˇ, aˬ yawꞈ-euˬ tsawˇ haˬ bi pyeuꞈ tsehˆ-eu gʼaˇ duˬ naw maꞈ-ahˇ jmˬ diˬ taˬ-euˬ meh.

¹⁴ Yaw sahˇ Miˬyehˇ-aˬ, Miˬyehˇ neh aˬ yawꞈ-euˬ tsawˇ haˬ deuˬ-ahˇ saˇ jaˇ dzaˬ taˬ-euˬ jeˬ-ahˇ aˬ dui aˬ diˇ za-eu gaˇ kawˆ saˇ kiˇ pyeuꞈ-awˇ, Miˬyehˇ aˬ yawꞈ-euˬ tsawˇ haˬ deuˬ-ahˇ tiˬ byah tiˬ loꞈ bi buˬ bi law-iˇ tehꞈ-a lehˇ aˬ dui-ahˇ bi siˬ duˬ laꞈ-euˬ jeˬ pyeuꞈ-eu meh. Aˬ yawꞈ-euˬ yaw shehꞈ kʼahˬ sehˇ-ahˇ ja ceuˬ kaˇ-euˇ.

Pawˇluˆ guiˬ lahˬ shaˇ-eu

¹⁵ Heu baˬ da neh, sahˬ paˬ Yeˬsuˇ-ahˇ naw maꞈ jah-eu gaˇ kawˆ hawˇ-eu Miˬyehˇ-euˬ tsawˇ haˬ dawˬ tawˆ luꞈ-ahˇ naw maꞈ gaˬ-eu gaˇ kawˆ ngaˇ ya gaˬ ngeh,

¹⁶ naw maꞈ gʼaˇ duˬ Miˬyehˇ-euˬ guiˬ lahˬ-ahˇ maˬ naˬ leˇ ni ja ceuˬ luꞈ ma. Ngaˇ guiˬ lahˬ shaˇ ngeh naw maꞈ gʼaˇ duˬ shaˇ-eu ma.

¹⁷ Naw maꞈ-ahˇ Yaw sahˇ Miˬyehˇ biꞈ nehˬ-eu gʼaˇ duˬ, baoˬ yaw shehꞈ kʼahˬ sehˇ huiˬ-eu Aˬda pyeuꞈ-eu aˬ duiˬ-euˬ Sahˬpaˬ Yeˬsuˇ Ka li-euˬ Miˬyehˇ-ahˇ ngaˇ shaˇ-eu ma. Naw maꞈ Miˬyehˇ-ahˇ siˬ nya laˇ ni, yaw sahˇ Miˬyehˇ naw maꞈ-ahˇ zaˬ siˬ tsawˇ gahˇ bi ahˇ laˇ-awˇ, Miˬyehˇ gaˇ kawˆ pah mehˬ nehˬ laꞈ tehꞈ-a.

¹⁸ Miˬyehˇ naw maꞈ-ahˇ kuˇ-euˬ miˇ neh naw maꞈ aˬ jeˬ-ahˇ noeˬ tmˬ kʼaˇ za-eu gaˇ kawˆ maˬ ehˇ, aˬ yawꞈ neh aˬ yawꞈ-euˬ tsawˇ haˬ deuˬ-ahˇ biꞈ-eu lehˇ saˇ jaˇ dzaˬ taˬ-euˬ guiˬ lahˬ kʼoeˇ deuˬ aˇ naˆ ni zahˬ leˇ paˬ-ehˇ gʼeh-eu gaˇ kawˆ maˬ ehˇ, naw maꞈ siˬ nya laˇ ni, naw maꞈ-euˬ nui ma-ahˇ pah nehˬ-awˇ aˬ yawꞈ-euˬ yaw shehꞈ-ahˇ bi mawˇ-eu gʼaˇ duˬ shaˇ-eu ma.

¹⁹ Jah-eu tsawˇ haˬ pyeuꞈ-eu aˬ dui-euˬ laꞈ kʼoeˇ gaˇ mˇ luꞈ-eu aˬ yawꞈ-euˬ baoˬ aˇ naˆ ni huiˬ-eu gaˇ kawˆ naw maꞈ siˬ nya laˇ ni shaˇ-eu ma. A dui laꞈ kʼoeˇ gaˇ mˇ luꞈ-eu baoˬ kʼoeˇ-aˬ, gʼaˬ kʼaˆ dui dui-eu baoˬ pyeuꞈ-eu meh.

²⁰ Baoˬ kʼoeˇ neh Ka li-ahˇ shiˇ-euˬ gaˇ bi gʼoꞈ dehꞈ laˇ-awˇ, mˬ kʼoeˇ taˆ miˇ kʼahˬ-ahˇ aˬ yawꞈ-euˬ aˇ maˇ paw bi nuiˇ-euˬ meh.

²¹ Mˬ kʼoeˇ taˆ uˆ lahˇ luꞈ-eu deuˬ pyeuꞈ-eu, uˆ lahˇ-eu deuˬ, sahˬ paˬ sahˬ ma deuˬ, baoˬ deuˬ hawˇ-eu, miˇ kʼah-ahˇ haw-eu pyaˆ-eu deuˬ dawˬ tawˆ luꞈ kʼoeˇ taˆ Ka li uˆ lahˇ-eu meh. Heu ziˇ maˬ ehˇ, aˬ kaˇ kaˇ ziˇ maˬ ehˇ, kʼaˇ biꞈ taˬ-euˬ tsawˇ myahˇ dawˬ tawˆ luꞈ kʼoeˇ taˆ huiˬ dzehˬ-eu tsawˇ myahˇ aˬ yawꞈ jaˆ-eu meh.

²² Dawˬ tawˆ luꞈ Miˬyehˇ neh Ka li-euˬ aˬ kuiˇ pehˬ zaˬ uˬ moˆ bi jaˆ-awˇ, Ka li zaˬ aˇ muˇ-euˬ gʼaˇ duˬ aˬ yawꞈ-ahˇ dawˬ tawˆ luꞈ kʼoeˇ taˆ uˬ duˬ bi geuꞈ-euˬ meh.

²³ Ka li zaˬ aˇ muˇ-aˬ, Ka li tiˬ byah ni jawˇ-eu Ka li-euˬ gʼawˇ mawˇ meh. Ka li-aˬ, yawˬ jeˬ na luꞈ-ahˇ yawˬ gaˇ na luꞈ bi byah laˇ-eu gʼaˬ meh.