Doˆ-iˇ 9 - Akha

Jeˬ shiˇ bi shiˇ-euˬ

¹ Kʼoeˇ naˇ, Moˇseˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Sahˬ paˬ kʼoeˇ gʼaˬ jawˇ gaˇ iˇ-awˇ, Heˬbyehˇ tsawˇ haˬ-euˬ Miˬyehˇ pyeuꞈ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ ehˇ nehˬ-iˇ-awˬ. ‘Ngaˬ-ahˇ uˬ duˬ bi tahˬ laˇ-eu gʼaˇ duˬ, ngaˬ-euˬ tsawˇ haˬ deuˬ-ahˇ pyehˬ nehˬ-awˬ.

² Aˬ yawꞈ maꞈ-ahˇ nawˇ maˬ pyehˬ nehˬ-ehˇ, laˆ tsoeˬ naˇ,

³ nawˬ-euˬ jeˬ zaˬ deuˬ pyeuꞈ-eu mahˬ, mahˬ tahˬ laˆ, law taw, mawˇ neˇ, yawˇ hawˇ-eu ciꞈ myehꞈ deuˬ-ahˇ, kʼaˆ dui dui-eu naˇ gawˇ bi pyeuꞈ doˆ laˇ-eu laꞈ kʼoeˇ, nawˬ-ahˇ ngaˇ kʼehˬ nehˬ ma.

⁴ Iˇjiˇtuˆ tsawˇ haˬ-euˬ jeˬ zaˬ deuˬ-ahˇ tehꞈ-ehˇ ngaˇ tseˇ paˆ-awˇ, Iˇsaˬleˬlaˆ tsawˇ haˬ-euˬ jeˬ zaˬ tiˬ mawˇ-iˬ maˬ ya shiˇ ni ngaˇ jahˇ ma.

⁵ Sahˬpaˬ Miˬyehˇ pyeuꞈ-eu ngaˇ, ni shawˬ nah kʼoeˇ loꞈ-ehˇ mˇ ma’ lehˇ, sahˬ paˬ kʼoeˇ gʼaˬ-ahˇ ehˇ nehˬ-awˬ.”

⁶ Yawˬ nah yawˬ keuˆ laˇ ngeh, aˬ yawꞈ neh ehˇ taˬ-euˬ loꞈ-ehˇ Sahˬpaˬ Miˬyehˇ mˇ-awˇ, Iˇjiˇtuˆ tsawˇ haˬ-euˬ jeˬ zaˬ deuˬ shiˇ jiˇ-awˇ, Iˇsaˬleˬlaˆ tsawˇ haˬ-euˬ jeˬ zaˬ deuˬ tiˬ mawˇ-iˬ maˬ shiˇ ni dzeuˇ-iˇ-euˬ meh.

⁷ Aˬ joˆ-ehˇ pyeuꞈ laˇ-euˬ gaˇ kawˆ, sahˬ paˬ kʼoeˇ gʼaˬ bi pyehˆ tseˇ haw-iˇ ngeh, Iˇsaˬleˬlaˆ tsawˇ haˬ-euˬ jeˬ zaˬ tiˬ mawˇ-iˬ maˬ shiˇ-euˬ gaˇ kawˆ, aˬ yawꞈ ya siˬ-euˬ meh. Ehˇ kʼawꞈ, aˬ yawꞈ nui ma gʼahˇ-awˇ, Iˇsaˬleˬlaˆ tsawˇ haˬ deuˬ-ahˇ maˬ pyehˬ nehˬ ni jawˇ-euˬ meh.

Shaˬ ciˬ bi ciˬ-euˬ

⁸ Kʼoeˇ naˇ, Moˇseˬ hawˇ-eu Aˬloˬ-ahˇ Sahˬpaˬ Miˬyehˇ ehˇ nehˬ-eu, “Miˬ dzaˬ tsawˬ bu-ahˇ kʼaˬ lehˇ ui cuiˆ tsuˆ laˬ-iˇ-awˬ. Sahˬ paˬ kʼoeˇ gʼaˬ-euˬ mehˬ shi kʼaˬ lehˇ kʼoeˇ Moˇseˬ yuˇ-awˇ, jaˬ lehˇ laꞈ kʼoeˇ byaˆ gʼeh-awˬ.

⁹ Kʼaˬ lehˇ kʼoeˇ, lehˇ meuꞈ loꞈ-ehˇ Iˇjiˇtuˆ miˇ kʼahˬ kʼahˬ lah ni byah-iˇ-awˇ, yawˬ gaˇ na luꞈ, tsawˇ haˬ zaˬ hawˇ-eu jeˬ zaˬ deuˬ-ahˇ shaˬ ciˬ bi ciˬ doˆ laˇ-awˇ, maˇ naˇ bi naˇ tehꞈ-a.”

¹⁰ Aˬ yawꞈ nyaꞈ kʼaˬ lehˇ ui cuiˆ tsuˆ-awˇ sahˬ paˬ-euˬ mehˬ shi yawꞈ-awˇ, kʼaˬ lehˇ kʼoeˇ-ahˇ jaˬ lehˇ laꞈ kʼoeˇ Moˇseˬ byaˆ gʼeh-euˬ meh. Kʼaˬ lehˇ kʼoeˇ tsawˇ haˬ zaˬ hawˇ-eu jeˬ zaˬ deuˬ-ahˇ shaˬ ciˬ bi ciˬ laˇ-awˇ, maˇ naˇ bi naˇ doˆ laˇ-euˬ meh.

¹¹ Mah loˬ nya-eu tsawˇ haˬ kʼoeˇ deuˬ Moˇseˬ-euˬ mehˬ shi maˬ doˆ le nya-a. Aˬ jeˬ miˇ neh ehˇ naˇ, aˬ yawꞈ maꞈ kʼawꞈ, Iˇjiˇtuˆ tsawˇ haˬ kʼoeˇ deuˬ loꞈ-ehˇ shaˬ ciˬ ciˬ-eu miˇ neh meh.

¹² Ehˇ kʼawꞈ, Sahˬpaˬ Miˬyehˇ neh ehˇ taˬ-euˬ loꞈ-ehˇ, sahˬ paˬ kʼoeˇ gʼaˬ-ahˇ Sahˬpaˬ Miˬyehˇ nui ma bi gʼahˇ-awˇ, Moˇseˬ hawˇ-eu Aˬloˬ-euˬ ehˇ dawˬ maˬ naˇ haˬ ni jawˇ-euˬ meh.

Uˬ yehˇ aˇ siˬ bi ga le-euˬ

¹³ Kʼoeˇ naˇ, Moˇseˬ-ahˇ Sahˬpaˬ Miˬyehˇ ehˇ nehˬ-eu, “Ni shawˬ uˬ shawˬ yaw naꞈ-ehˇ sahˬ paˬ kʼoeˇ gʼaˬ jawˇ gaˇ iˇ-awˬ, Heˬ byehˇ tsawˇ haˬ-euˬ Miˬyehˇ pyeuꞈ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ ehˇ nehˬ-iˇ-awˬ. ‘Ngaˬ-euˬ tsawˇ haˬ deuˬ ngaˬ-ahˇ uˬ duˬ tahˬ laˇ nya ni pyehˬ nehˬ-awˬ.

¹⁴ Heu poˆ-aˬ, miˇ tsaˬ heu dawˬ tawˆ luꞈ kʼoeˇ taˆ ngaˬ-ahˇ duˇ-eu tiˬ gʼaˬ-iˬ maˬ jawˇ-eu gaˇ kawˆ nawˇ ya siˬ ni, nawˬ-eu gaˇ mˇ-eu yaw huiˬ yaw mahˇ deuˬ-ahˇ tehꞈ-ehˇ maˬ ngeuˇ-ehˇ, nawˬ-ahˇ kʼawꞈ ngaˇ kʼehˬ-eu lehˇ lehˬ hmˬ taˬ-euˬ ma.

¹⁵ Yaw beh ngeh neh ngaˬ-euˬ aˬ laꞈ cawˬ ja-awˇ, nawˇ hawˇ-eu nawˬ-euˬ tsawˇ haˬ deuˬ kʼoeˇ taˆ naˇ gawˇ bi keuˆ le law nmˇ-aˬ, naw maꞈ dawˬ tawˆ luꞈ ya cawˆ-iˇ jiˇ-euˬ tehꞈ-a.

¹⁶ Ehˇ kʼawꞈ, miˇ tsaˬ heu mˬ dzeˇ miˇ dzeˇ keuˆ ni, ngaˇ tsawˇ myahˇ doˆ-eu gʼaˇ duˬ, ngaˬ-euˬ baoˬ-ahˇ nawˇ ya mawˇ ni, nawˬ-ahˇ ngaˇ yaw dehꞈ bi dehꞈ tawˬ-euˬ ma.

¹⁷ Ehˇ kʼawꞈ, iˬ nah keuˆ ni nawˇ nui ma huiˬ-awˇ, ngaˬ-euˬ tsawˇ haˬ-ahˇ maˬ pyehˬ nehˬ ni jawˇ luꞈ-eu meh.

¹⁸ Heu poˆ-aˬ, iˬ nah keuˆ ni Iˇjiˇtuˆ miˇ kʼahˬ laꞈ kʼoeˇ tiˬ jawˇ-iˬ maˬ ya gaˬ maˬ ya mawˇ haw-euˬ, guˆ laˇ paˬ-ehˇ gʼeh-eu uˬ yehˇ aˇ siˬ ga le-eu jeˬ, ni shawˬ nah ngaˇ bi keuˆ le ma.

¹⁹ Nymˬ-mˇ, nawˇ dawˬ biꞈ-awˇ, naw maꞈ-euˬ jeˬ zaˬ deuˬ hawˇ-eu, laꞈ nyiˇ paw kʼaˇ jaˆ-eu naw maꞈ-euˬ myawˬ gahˬ dawˬ tawˆ luꞈ, kuˆ laꞈ kʼoeˇ hawˇ-eu nymˇ laꞈ kʼoeˇ bi laˆ luiˆ taˬ jiˇ-awˬ. Naˇ shmˇ uˬ moˆ maˬ jawˇ-ehˇ, laꞈ nyiˇ paw kʼaˇ jawˇ-eu tsawˇ haˬ hawˇ-eu jeˬ zaˬ deuˬ kʼoeˇ taˆ, uˬ yehˇ aˇ siˬ ga le-awˇ, bi deh sehꞈ jiˇ tehꞈ-a’ lehˇ ehˇ nehˬ-awˬ.”

²⁰ Sahˬ paˬ kʼoeˇ gʼaˬ-euˬ gaˇ mˇ-eu yaw huiˬ yaw mahˇ tiˬ paˆ na deuˬ Sahˬpaˬ Miˬyehˇ neh ehˇ taˬ-euˬ dawˬ-ahˇ guˆ-awˇ, aˬ yawꞈ maꞈ-euˬ zaˬ kʼaˆ deuˬ hawˇ-eu jeˬ zaˬ deuˬ-ahˇ, nymˇ laꞈ kʼoeˇ maˬ ehˇ, kuˆ laꞈ kʼoeˇ maˬ ehˇ, bi uˇ leˇ jiˇ-euˬ meh.

²¹ Ehˇ kʼawꞈ, tiˬ paˆ na deuˬ-aˬ, Sahˬpaˬ Miˬyehˇ neh ehˇ taˬ-euˬ dawˬ aˬ yawꞈ maꞈ-ahˇ gaˬ leˇ gaˇ maˬ duˇ ni, aˬ yawꞈ maꞈ-euˬ zaˬ kʼaˆ deuˬ hawˇ-eu jeˬ zaˬ deuˬ-ahˇ, laꞈ nyiˇ paw bi jawˇ-euˬ meh.

²² “Iˇjiˇtuˆ miˇ kʼahˬ doe ni, tsawˇ haˬ kʼoeˇ taˆ maˬ ehˇ, jeˬ zaˬ kʼoeˇ taˆ maˬ ehˇ, sahˬ lahˬ aˇ bawˇ yawˬ bawˇ yawˬ na luꞈ kʼoeˇ taˆ maˬ ehˇ, uˬ yehˇ aˇ siˬ bi ga le-eu gʼaˇ duˬ, mˬ kʼoeˇ taˆ paw nawˬ-euˬ aˬ laꞈ cawˬ diˇ-awˬ” lehˇ, Moˇseˬ-ahˇ Sahˬpaˬ Miˬyehˇ ehˇ nehˬ-euˬ meh.

²³ Kʼoeˇ naˇ, Moˇseˬ aˬ yawꞈ-euˬ gawˬ yoeˬ-ahˇ mˬ paw cawˬ diˇ ngeh, Sahˬpaˬ Miˬyehˇ mˬ jeˬ tsawˬ tehˆ hawˇ-eu uˬ yehˇ aˇ siˬ pyehˬ gʼeh leꞈ-awˇ, miˇ tsaˬ kʼoeˇ taˆ mˬ jeˬ tsawˬ tehˆ tehˆ-awˇ, mˬ myawꞈ myawꞈ-euˬ meh. Kʼoeˇ ngeh, Iˇjiˇtuˆ miˇ kʼahˬ kʼoeˇ taˆ, Sahˬpaˬ Miˬyehˇ uˬ yehˇ aˇ siˬ bi ga le-euˬ meh.

²⁴ Kʼoeˇ dzeˇ heu dzeˇ mˬ jeˬ tsawˬ tehˆ lawꞈ lawꞈ-ehˇ jaˆ-awˇ, kʼaˆ dui dui-eu uˬ yehˇ aˇ siˬ ga le-euˬ meh. Kʼoeˇ-aˬ, Iˇjiˇtuˆ miˇ kʼahˬ laꞈ kʼoeˇ tiˬ jawˇ-iˬ maˬ ya gaˬ maˬ ya mawˇ haw-euˬ mˬ jeˬ jaˬ lehˇ lehˇ ma tiˬ bahˬ pyeuꞈ-eu meh.

²⁵ Iˇ jiˇ tuˆ miˇ kʼahˬ doe ni, laꞈ nyiˇ paw kʼaˇ jawˇ-eu tsawˇ haˬ hawˇ-eu jeˬ zaˬ dawˬ tawˆ luꞈ kʼoeˇ taˆ maˬ ehˇ, laꞈ nyiˇ paw kʼaˇ jaˆ-eu myawˬ gahˬ dawˬ tawˆ luꞈ kʼoeˇ taˆ maˬ ehˇ, uˬ yehˇ aˇ siˬ ga deh le-euˬ meh. Baw duˆ hawˇ-eu sahˬ lahˬ aˇ bawˇ dawˬ tawˆ luꞈ kʼoeˇ taˆ, uˬ yehˇ aˇ siˬ ga deh le-awˇ, aˇ bawˇ dawˬ tawˆ luꞈ bi deh nmˆ jiˇ-euˬ meh.

²⁶ Uˬ yehˇ aˇ siˬ maˬ ga le-euˬ pehˇ tsahˇ-aˬ, Iˇsaˬleˬlaˆ tsawˇ haˬ deuˬ jawˇ-eu Goˬsheˬ miˇ tsaˬ tiˬ tsahˇ jaˆ-eu tehꞈ meh.

²⁷ Sahˬ paˬ kʼoeˇ gʼaˬ, Moˇseˬ hawˇ-eu Aˬloˬ-ahˇ bi kuˇ laꞈ-awˇ, heu loꞈ-ehˇ ehˇ nehˬ-euˬ meh. “Heu poˆ-aˬ, ngaˇ iˬ baˇ mˇ gʼaˬ-euˬ ma. Sahˬpaˬ Miˬyehˇ-aˬ, yaw tsaˬ yaw dawˇ paw jawˇ-awˇ, ngaˇ hawˇ-eu ngaˬ-euˬ tsawˇ haˬ deuˬ-aˬ, yaw lehˬ paw jawˇ luꞈ-eu ma.

²⁸ Sahˬpaˬ Miˬyehˇ-ahˇ guiˬ lahˬ shaˇ-awˬ. Mˬ jeˬ tsawˬ tehˆ hawˇ-eu uˬ yehˇ aˇ siˬ heu deuˬ-ahˇ nga maꞈ maˬ paˇ daˬ coeˇ miˇ-a. Naw maꞈ-ahˇ pyehˬ nehˬ ma lehˇ ngaˇ saˇ jaˇ dzaˬ-eu ma. Naw maꞈ heu gaˇ maˬ paˇ ya jawˇ-aˇ.”

²⁹ Moˇseˬ ehˇ-eu, “Meuˬ heu meuˬ laꞈ kʼoeˇ neh ngaˇ doˆ-iˇ-eu nehˬ-ehˇ, ngaˬ-euˬ aˬ laꞈ baꞈ diˇ-awˇ, Sahˬpaˬ Miˬyehˇ-ahˇ guiˬ lahˬ shaˇ ma. Miˇ tsaˬ heu-aˬ, Sahˬpaˬ Miˬyehˇ-euˬ miˇ tsaˬ pyeuꞈ-eu gaˇ nawˇ ya siˬ ni, mˬ jeˬ tsawˬ tehˆ tehˆ-eu naˬ leˇ-awˇ, uˬ yehˇ aˇ siˬ ga le-eu tsiˇ leˇ tehꞈ-a.

³⁰ Ehˇ kʼawꞈ, nawˇ hawˇ-eu nawˬ-euˬ gaˇ mˇ-eu yaw huiˬ yaw mahˇ deuˬ, nymˬ-mˇ keuˆ ni, Miˬyehˇ pyeuꞈ-eu Sahˬpaˬ Miˬyehˇ-ahˇ maˬ guˆ-a siˬ lehˇ ngaˇ siˬ duˬ ma.”

³¹ Dziˬ dziˬ yaˇ hawˇ-eu lawˬ loeˇ loeˇ yaˇ deuˬ cawˆ jiˇ-euˬ meh. Aˬ jeˬ miˇ neh ehˇ naˇ, lawˬ loeˇ myah laˇ-euˬ aˇ yamˬ pyeuꞈ-awˇ, dziˬ aˇ bawˇ deuˬ aˇ cuˬ cuˬ-eu aˇ yamˬ pyeuꞈ-eu meh.

³² Ehˇ kʼawꞈ, cehˇ myah yamˬ maˬ keuˆ laˇ-euˬ miˇ neh, cehˇ cehˇ yaˇ tiˬ kawˬ-iˬ maˬ cawˆ-a.

³³ Sahˬ paˬ kʼoeˇ gʼaˬ jawˇ-eu meuˬ kʼoeˇ meuˬ-euˬ laꞈ nyiˇ paw Moˇseˬ doˆ-iˇ-awˇ, aˬ laꞈ baꞈ diˇ-awˇ Sahˬpaˬ Miˬyehˇ-ahˇ guiˬ lahˬ shaˇ ngeh, mˬ jeˬ jeˬ-awˇ uˬ yehˇ aˇ siˬ ga le-eu naˬ leˇ-awˇ, uˬ yehˇ tsiˇ leˇ-euˬ meh.

³⁴ Ehˇ kʼawꞈ, uˬ yehˇ yehˇ-eu maˬ ehˇ, uˬ yehˇ aˇ siˬ ga le-eu maˬ ehˇ, mˬ jeˬ tsawˬ tehˆ tehˆ-eu maˬ ehˇ, naˬ leˇ tsiˇ leˇ jiˇ-euˬ gaˇ ya mawˇ ngeh, sahˬ paˬ kʼoeˇ gʼaˬ iˬ baˇ tiˬ poˆ paˇ mˇ-awˇ, aˬ yawꞈ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ, dzeuˇ laˇ ngeh loꞈ-ehˇ, nui ma gʼahˇ-eu laꞈ kʼoeˇ jawˇ-euˬ meh.

³⁵ Moˇseˬ-ahˇ gʼoe-awˇ Sahˬpaˬ Miˬyehˇ neh ehˇ taˬ-euˬ loꞈ-ehˇ, sahˬ paˬ kʼoeˇ gʼaˬ Iˇsaˬleˬlaˆ tsawˇ haˬ-ahˇ maˬ pyehˬ nehˬ ni, kʼoeˇ loꞈ-ehˇ jawˇ-euˬ meh.